ຈີນ ຈະ​ສົ່ງ​ຍານ “ສາງ​ເອີ 5” ຂຶ້ນ​ດວງ​ຈັນ​ເພື່ອ​ເກັບ​ເອົາ​ຕົວຢ່າງ​ຄືນ​ສູ່​ໂລກ

440 17 ມ.ກ. 2019 ຂ່າວຕ່າງປະເທດ
ຈີນ ຈະ​ສົ່ງ​ຍານ “ສາງ​ເອີ 5” ຂຶ້ນ​ດວງ​ຈັນ​ເພື່ອ​ເກັບ​ເອົາ​ຕົວຢ່າງ​ຄືນ​ສູ່​ໂລກ

    ຫ້ອງການ​ຖະແຫຼງ​ຂ່າວ​ລັດຖະບານ​ຈີນ ໄດ້​ຈັດ​ພິທີ​ຖະແຫຼງ​ຂ່າວ​ໃນ​ວັນ​ທີ 14 ມັງກອນ​ນີ້ ໂດຍ​ທ່ານ​ອູ​ຢ້ຽນ​ຫົວ ຮອງ​ຫົວໜ້າ​ອົງການ​ການບິນ​ອະວະກາດ​ແຫ່ງ​ຊາດ​ຈີນ ກ່າວ​ວ່າ ມາ​ຮອດ​ວັນ​ທີ 11 ມັງກອນ​ນີ້ ການ​ສົ່ງ​ຍານ​ອະວະກາດ “ສາງ​ເອີ 4” (Chang'e 4) ຂອງ​ໂຄງການ​ສຳ​ຫຼວດ​ດວງ​ຈັນ​ຂອງ​ຈີນ ໄດ້​ປະສົບ​ຜົນສຳເລັດ​ຢ່າງ​ເຕັມ​ເມັດ​ເຕັມ​ໜ່ວຍ​ແລ້ວ ໂດຍ​ໄດ້​ບັນລຸ​ເປົ້າ​ໝາຍ​ການ​ເຮັດ​ໃຫ້​ຍານ​ອະວະກາດ​ລົງ​ຈອດ​ພື້ນ​ຜິວ​ດວງ​ຈັນ ຢູ່​ເບື້ອງ​ທີ່​ເບິ່ງ​ຈາກ​ໂລກ​ບໍ່​ເຫັນ ເບື້ອງ​ມືດ) ໄດ້​ຢ່າງ​ປອດ​ໄພ​ດີ ທັງ​ເຮັດ​ໜ້າທີ່​ສຳ​ຫຼວດ ຊຶ່ງ​ເປັນ​ຜົນສຳເລັດ​ຄັ້ງ​ທຳ​ອິດ​ໃນ​ປະຫວັດສາດ​ຂອງ​ມວນ​ມະນຸດ ແລະ ​ບັນລຸ​ການ​ສື່ສານ​ກັນ​ລະຫວ່າງ​ໂລກ ກັບ​ດວງ​ຈັນ​ໃນ​ເບື້ອງ​ທີ່​ເບິ່ງ​ຈາກ​ໂລກ​ບໍ່​ເຫັນ​ເປັນ​ຄັ້ງ​ທຳ​ອິດ​ເຊັ່ນ​ດຽວ​ກັນ.

    ທ່ານ ອູ​ເຫວີຍ​ເຣີ໋ນ ນັກ​ອອກ​ແບບ​ໃຫຍ່​ໂຄງການ​ສຳ​ຫຼວດ​ດວງ​ຈັນ​ຂອງ​ຈີນ ກ່າວ​ວ່າ ຫຼັງ​ຈາກ​ຍານ “ສາງ​ເອີ 4” ເລີ່ມ​ປະຕິບັດ​ໜ້າທີ່​ການ​ສຳ​ຫຼວດ​ທາງ​ວິທະຍາສາດ​ແລ້ວ ກໍ​ຈະ​ດຳເນີນ​ການ​ສຳ​ຫຼວດ​ວິທະຍາສາດ 3 ປະເພດ​ໃຫຍ່​ຢ່າງ​ຕໍ່​ເນື່ອງ​ຢູ່​ດວງ​ຈັນ​ເບື້ອງ​ດັ່ງກ່າວ ທີ່​ມີ​ປະຫວັດສາດ​ເກົ່າ​ແກ່ ຄື​ສຳ​ຫຼວດ​ພູມ​ສັນຖານ​ບໍລິເວນ​ເຂດ​ລົງ​ຈອດ; ຕົ້ນຕໍ​ແມ່ນ​ສຳ​ຫຼວດ​ສິ່ງແວດລ້ອມ​ທາງ​ອະວະກາດ​ອ້ອມ​ຂ້າງ​ດວງ​ຈັນ ລວມ​ທັງ​ກຳ​ມັນ​ຕະ​ພາບ​ລັງສີ​ຈັກກະວານ ການ​ແຜ່​ລັງສີ ແລະ ​ການ​ລຸກ​ເຈີດ​ຈ້າ ຫຼື ໂຊ​ລາ​ແຟຼ​ຂອງ​ດວງ​ອາທິດ ມີ​ຜົນ​ສະທ້ອນ​ຕໍ່​ອະວະກາດ​ອ້ອມ​ຂ້າງ​ດວງ​ຈັນ​ເປັນ​ຄື​ແນວໃດ; ແລະ ​ຕົ້ນຕໍ​ແມ່ນ​ຄົ້ນຄວ້າ​ພາກສ່ວນ​ປະກອບ​ຂອງ​ວັດຖຸ​ດວງ​ຈັນ.

    ທ່ານ ອູ​ຢ້ຽນ​ຫົວ ຍັງ​ເປີດເຜີຍ​ວ່າ ໂດຍ​ຖື​ເອົາ​ການ​ໄດ້​ຮັບ​ຜົນສຳເລັດ​ຢ່າງ​ເຕັມ​ເມັດ​ເຕັມ​ໜ່ວຍ​ຂອງ​ການ​ສົ່ງ​ຍານ “ສາງ​ເອີ 4” ເປັນ​ຂີດ​ໝາຍ​ນັ້ນ ໄລຍະ 4 ຂອງ​ໂຄງການ​ສຳ​ຫຼວດ​ດວງ​ຈັນ ແລະ ໂຄງການ​ສຳ​ຫຼວດ​ອະວະກາດ​ຊັ້ນ​ນອກ​ຂອງ​ຈີນ ໄດ້​ເລີ່ມ​ເປີດ​ສາກ​ຢ່າງຮອບດ້ານ. ການ​ສົ່ງ​ຍານ “ສາງ​ເອີ 5” ຂຶ້ນ​ສູ່​ດວງ​ຈັນ ແລະ​ເກັບ​ເອົາ​ຕົວຢ່າງ​ເທິງ​ດວງ​ຈັນ​ກັບ​ຄືນ​ສູ່​ໂລກ ຈະ​ເລີ່ມ ປະຕິບັດ​ຢູ່​ລະຫວ່າງ​ທ້າຍ​ປີ​ນີ້. ນອກ​ນີ້ ຈີນ​ຍັງ​ຈະ​ດຳເນີນ​ການ​ສົ່ງ​ຍານ​ສຳ​ຫຼວດ​ດາວ​ອັງຄານ​ເປັນ​ຄັ້ງ​ທຳ​ອິດ​ຢູ່​ລະຫວ່າງ​ປີ 2020. ປັດຈຸບັນ​ນີ້ ອົງການ​ການບິນ​ອະວະກາດ​ແຫ່ງ​ຊາດ​ຈີນ ພວມ​ຈັດ​ຕັ້ງ​ຜູ້​ຊ່ຽວຊານ​ນັກວິຊາການ​ພາຍ​ໃນ​ປະເທດ ເພື່ອ​ວິເຄາະ ແລະ ປະ​ເມີນ​ແຜນການ​ໃນ​ພາຍຫຼັງ ແລະ ໄດ້ຜົນ​ອັນ​ຈະແຈ້ງ​ໂດຍ​ພື້ນຖານ​ວ່າ​ຍັງ​ຈະ​ດຳເນີນ​ການ​ສຳ​ຫຼວດ​ດວງ​ຈັນ​ອີກ 3 ຄັ້ງ.

    ທ່ານ​ອູ​ຢ້ຽນ​ຫົວ ຍັງ​ກ່າວ​ຕື່ມ​ວ່າ ໃນ​ການ​ສຳ​ຫຼວດ​ດວງ​ຈັນ ແລະ ດາວ​ອັງຄານ​ນັ້ນ ອົງການ​ການບິນ​ອະວະກາດ​ແຫ່ງ​ຊາດ​ຈີນ ຍິນ​ດີ​ຕ້ອນຮັບ​ປະເທດ​ຕ່າງໆ​ເຂົ້າ​ຮ່ວມ​ໂຄງການ​ສຳ​ຫຼວດ​ດວງ​ຈັນ​ໃນ​ໄລຍະ​ຫຼັງ ແລະ ໂຄງການ​ສຳ​ຫຼວດ​ອະວະກາດ​ຊັ້ນ​ນອກ ເຊັ່ນ ດາວ​ອັງຄານ​ດັ່ງນີ້​ເປັນຕົ້ນ ແລະ ຈີນ​ກໍ​ຍິນ​ດີ​ຕ້ອນຮັບ​ທຶນ ແລະ ​ຊັບພະຍາກອນ​ທາງ​ສັງຄົມ​ເຂົ້າ​ຮ່ວມ​ການ​ພັດທະນາ​ ແລະ​ ປະຍຸກ​ໃຊ້​ໃນ​ການ​ສຳ​ຫຼວດ​ອະວະກາດ.

ຂ່າວທີ່ກ່ຽວຂ້ອງ