ທ່ຽວຊົມງານວາງສະແດງຜະລິດຕະພັນເຟີນີເຈີລາວ

188 16 ມ.ກ. 2019 ຂ່າວໜ້າ​ໜຶ່ງ
ທ່ຽວຊົມງານວາງສະແດງຜະລິດຕະພັນເຟີນີເຈີລາວ

    ສະ­ມາ­ຄົມ​ເຟີ​ນີ​ເຈີ​ລາວ ຈັດ​ພິ­ທີ​ເປີດ​ງານ​ວາງ­ສະ­ແດງ​ຜະ­ລິດ​ຕະ​ພັນ (ເຟີ​ນີ​ເຈີ) ໄມ້​ລາວ​ຄັ້ງ​ທີ 5 ປະ­ຈຳ​ປີ 2019 ຂຶ້ນ​ວັນ​ທີ 14 ມັງ­ກອນ 2019 ທີ່​ສູນ​ການ​ຄ້າ​ລາວ-ໄອ​ເຕັກ (ຕຶກ​ເກົ່າ) ມີ​ທ່ານ ພັນ​ທອງ ພິດ​ທຸມ­ມາ ຮອງ​ລັດ­ຖະ­ມົນ­ຕີ​ກະ­ຊວງ​ອຸດ­ສາ­ຫະ­ກຳ ແລະ ການ​ຄ້າ ມີ​ບັນ­ດາ​ຫົວ­ໜ່ວຍ​ທຸ­ລະ​ກິດ ຫ້າງ​ຮ້ານ ຜູ້​ປະ­ກອບ​ການ​ທັງ​ພາຍ​ໃນ ແລະ ຕ່າງ­ປະ­ເທດ​ເຂົ້າ​ຮ່ວມ.

    ທ່ານ ຄຳ​ໄພ ສົມ​ຊະ­ນະ ປະ­ທານ​ສະ­ມາ­ຄົມ​ເຟີ​ນີ​ເຈີ​ລາວ ກ່າວ​ວ່າ: ເພື່ອ​ປະ­ຕິ­ບັດ​ນະ­ໂຍ­ບາຍ​ໃນ​ການ​ສົ່ງ­ເສີມ​ການ​ຜະ­ລິດ​ເຄື່ອງ​ເຟີ​ນີ​ເຈີ​ໄມ້​ລາວ ທັງ​ເປັນ​ການ​ໂຄ­ສະ­ນາ​ເຜີຍ­ແຜ່​ໃຫ້​ສັງ­ຄົມ​ຮັບ​ຮູ້​ຜະ­ລິດ​ຕະ​ພັນ​ໄມ້​ລາວ​ໃຫ້​ຫຼາຍ​ຂຶ້ນ ໃຫ້​ຜູ້​ຜະ­ລິດ​ສາ­ມາດ​ເຂົ້າ​ຫາ​ຕະ­ຫຼາດ ແລະ ຈຳ­ໜ່າຍ​ສິນ­ຄ້າ​ໄດ້​ທັງ​ພາຍ​ໃນ ແລະ ຕ່າງ­ປະ­ເທດ ແລະ ກ້າວ​ເຂົ້າ​ສູ່​ການ​ສ້າງ​ຕາ​ໜ່າງ​ກາ­ນວາງ­ສະ­ແດງ-ຂາຍ​ສິນ­ຄ້າ​ເຟີ​ນີ​ເຈີ​ກັບ​ພາກ​ພື້ນ ແລະ ສາ­ກົນ ໃນ​ອະ­ນາ­ຄົດ ທັງ​ເປັນ​ການ​ຊຸກ­ຍູ້​ໃຫ້​ປະ­ຊາ­ຊົນ​ລາວ​ບັນ­ດາ­ເຜົ່າ ມີ​ການ​ຜະ­ລິດ​ສິນ­ຄ້າ​ໃຫ້​ນັບ​ມື້​ນັບ​ຫຼາຍ​ຂຶ້ນ ໄດ້​ທັງ​ປະ­ລິ­ມານ ແລະ ຄຸ­ນະ­ພາບ ເປັນ​ການ​ດຶງ​ດູດ​ເອົາ​ນັກ​ລົງ­ທຶນ​ຈາກ​ພາຍ​ໃນ ແລະ ຕ່າງ­ປະ­ເທດ ໃຫ້​ມາ​ລົງ­ທຶນ​ໃນ​ຂົງ­ເຂດ​ການ​ຜະ­ລິດ​ເຟີ​ນີ​ເຈີ​ໄມ້​ລາວ ສ້າງ​ມູນ​ຄ່າ​ເພີ່ມ​ໃຫ້​ແກ່​ຜະ­ລິດ​ຕະ​ພັນ​ໄມ້​ລາວ ແລະ ປະ­ກອບ­ສ່ວນ​ເຂົ້າ​ໃນ​ການ​ພັດ­ທະ­ນາ​ເສດ­ຖະ­ກິດ-ສັງ­ຄົມ ພາຍ​ໃນ​ປະ­ເທດ​ຊາດ​ໃຫ້​ເຂັ້ມ­ແຂງ.

    ງານ​ວາງ­ສະ­ແດງ​ຜະ­ລິດ​ຕະ​ພັນ​ເຟີ​ນີ​ເຈີ​ຄັ້ງ​ນີ້ ເກີດ​ຂຶ້ນ​ໄດ້​ກໍ່​ຍ້ອນ​ໄດ້​ຮັບ​ການ​ສະ­ໜັບ­ສະ­ໜູນ​ຈາກ​ຫຼາຍ​ພາກ­ສ່ວນ ເຊັ່ນ: ຄະ­ນະ​ບໍ­ລິ­ຫານ​ງານ ແລະ ບັນ­ດາ​ໂຮງ­ງານ​ໃນ​ສະ­ມາ­ຊິກ​ສະ­ມາ­ຄົມ​ເຟີ​ນີ​ເຈີ​ລາວ ກົມ​ສົ່ງ­ເສີມ​ການ​ຄ້າ ສະ­ພາ​ການ​ຄ້າ ແລະ ອຸດ­ສາ­ຫະ­ກຳ​ແຫ່ງ​ຊາດ ແລະ ຜູ້​ສະ­ໜັບ­ສະ­ໜູນ​ອື່ນໆ ທີ່​ເຮັດ​ໃຫ້​ງານ​ດັ່ງ­ກ່າວ​ດຳ­ເນີນ​ໄປ​ດ້ວຍ​ດີ ແລະ ງານ​ວາງ­ສະ­ແດງ​ຄັ້ງ​ນີ້​ຈັດ​ຂຶ້ນ​ວັນ​ທີ 12-20 ມັງ­ກອນ 2019 ເຊິ່ງ​ມີ​ຫ້ອງ​ວາງ­ສະ­ແດງ-ຂາຍ​ສິນ­ຄ້າ​ທັງ​ໝົດ 177 ຫ້ອງ ທີ່​ມາ​ຈາກ 74 ຫົວ­ໜ່ວຍ​ທຸ­ລະ​ກິດ ໃນ​ນັ້ນ ມີ​ຫົວ­ໜ່ວຍ​ທີ່​ເປັນ​ໂອ​ດ໋ອບ 21 ຫົວ­ໜ່ວຍ ມາ​ຈາກ​ຕ່າງ​ແຂວງ 16 ຫົວ­ໜ່ວຍ ມີ 20 ຫ້ອງ ຈາກ 11 ແຂວງ​ໃນ​ຂອບ​ເຂດ​ທົ່ວ​ປະ­ເທດ ມາ​ຈາກ​ປະ­ເທດ​ໄທ 5 ຫົວ­ໜ່ວຍ ມີ 7 ຫ້ອງ ນອກ​ນັ້ນ ມາ​ຈາກ​ນະ­ຄອນ­ຫຼວງ​ວຽງ​ຈັນ ຄາດ​ວ່າ​ຈະ​ມີ​ມູນ​ຄ່າ​ຈໍ​ລະ​ຈອນ​ຊື້-ຂາຍ​ສິນ­ຄ້າ​ປະ­ມານ 20 ຕື້​ກີບ ແລະ ຈະ​ມີ​ການ​ຊື້-ຂາຍ​ໄດ້​ປະ­ມານ 70% ເປັນ​ມູນ​ຄ່າ​ປະ­ມານ 14 ຕື້​ກີບ ພ້ອມ​ນີ້ ຕະ­ຫຼອດ​ງານ​ຍັງ​ມີ​ຫຼາຍ​ກິດ­ຈະ­ກຳ​ທີ່​ໜ້າ​ສົນ­ໃຈ ເພື່ອ​ດຶງ​ດູດ​ມວນ​ຊົນ​ໃຫ້​ເຂົ້າ​ມາ​ທ່ຽວ​ຊົມ ເຊັ່ນ: ການ​ສາ­ທິດ​ແກະ­ສະ­ຫຼັກ​ໄມ້ ກິດ­ຈະ­ກຳ​ແຂ່ງ­ຂັນ​ຮ້ອງ­ເພງ ເພື່ອ​ຮັບ​ລາ­ງວັນ​ມູນ​ຄ່າ 20 ລ້ານ​ກີບ ຊົມ​ການ­ສະ­ແດງ​ສິ­ລະ​ປະ​ຈາກ​ສິ­ລະ​ປິນ​ທີ່​ມີ​ຊື່​ສຽງ​ຈາກ​ພາຍ​ໃນ ແລະ ຕ່າງ­ປະ­ເທດ ພ້ອມ​ກິດ­ຈະ­ກຳ​ອື່ນໆ.

ຂ່າວທີ່ກ່ຽວຂ້ອງ