ຂ່າວຫຼ້າສຸດ

ອັງກິດຊ່ວຍເຫຼືອເກັບກູ້ລະເບີດບໍ່ທັນແຕກຢູ່ລາວ

361 16 ມ.ກ. 2019 ຂ່າວໜ້າ​ໜຶ່ງ
ອັງກິດຊ່ວຍເຫຼືອເກັບກູ້ລະເບີດບໍ່ທັນແຕກຢູ່ລາວ

    ພິ­ທີ​ເຊັນ​ບົດ​ບັນ­ທຶກ​ຄວາມ​ເຂົ້າ­ໃຈ ໂຄງ­ການ​ລະ­ຫວ່າງ​ຄະ­ນະ​ກຳ­ມະ­ການ​ຄຸ້ມ​ຄອງ​ແຫ່ງ​ຊາດ ເພື່ອ​ແກ້​ໄຂ​ບັນ­ຫາ​ລະ­ເບີດ​ບໍ່​ທັນ​ແຕກ​ທີ່​ຕົກ​ຄ້າງ​ຢູ່​ລາວ (ຄຊກລ) ແລະ ອົງ­ການ​ເກັບ​ກູ້​ລະ­ເບີດ​ແມັກ ປະ­ຈຳ​ລາວ ຈັດ​ຂຶ້ນ​ວັນ​ທີ 14 ມັງ­ກອນ 2019 ທີ່​ນະ­ຄອນ­ຫຼວງ​ວຽງ​ຈັນ ລົງ​ນາມ​ໂດຍ​ທ່ານ ພູ​ຂຽວ ຈັນ­ທະ​ສົມ­ບູນ ຫົວ­ໜ້າ​ຫ້ອງ­ການ​ຄະ­ນະ​ກຳ­ມະ­ການ​ຄຸ້ມ​ຄອງ​ແຫ່ງ​ຊາດ ເພື່ອ​ແກ້​ໄຂ​ບັນ­ຫາ​ລະ­ເບີດ​ບໍ່​ທັນ​ແຕກ​ທີ່​ຕົກ​ຄ້າງ​ຢູ່​ລາວ ແລະ ທ່ານ​ນາງ ບລອດ​ຊຳ ກີວ​ມໍ ຫົວ­ໜ້າ​ອົງ­ການ​ເກັບ​ກູ້​ລະ­ເມີດ​ແມັກ ປະ­ຈຳ​ລາວ ມີ​ທ່ານ ຄຳ​ແກ້ວ ສານ​ບຸນ​ຄູນ​ໄຊ ຮອງ​ລັດ­ຖະ­ມົນ­ຕີ​ກະ­ຊວງ​ແຮງ​ງານ ແລະ ສະ­ຫວັດ­ດີ​ການ​ສັງ­ຄົມ ທ່ານ​ຮອງ​ເຈົ້າ­ແຂວງ​ຊຽງ​ຂວາງ ຄຳ​ມ່ວນ ແລະ ຂະ­ແໜງ­ການ​ກ່ຽວ­ຂ້ອງ​ເຂົ້າ​ຮ່ວມ.

    ໂຄງ­ການ​ດັ່ງ­ກ່າວ ມີ​ມູນ​ຄ່າ 38,54 ຕື້​ກີບ ຫຼື 4,5 ລ້ານ​ໂດ​ລາ​ສະ­ຫະ­ລັດ ໄລ­ຍະ​ເວ­ລາ​ໃນ​ການ­ຈັດ­ຕັ້ງ​ປະ­ຕິ­ບັດ 13 ເດືອນ ແລະ ຈັດ​ຕັ້ງ​ປະ­ຕິ­ບັດ​ຢູ່​ແຂວງ​ຊຽງ​ຂວາງ ປະ­ກອບ​ມີ​ເມືອງ​ໜອງ​ແຮດ ເມືອງ​ຄູນ ແລະ ເມືອງ​ຜາ​ໄຊ ໂດຍ​ຈະ​ໄດ້​ກວດ​ກູ້​ລະ­ເບີດ ສຳ​ຫຼວດ​ທີ່​ບໍ່​ແມ່ນ​ທາງ​ດ້ານ​ວິ­ຊາ​ການ ແລະ ໂຄ­ສະ­ນາ​ສຶກ​ສາ​ຄວາມ​ສ່ຽງ​ໄພ​ຕໍ່​ລະ­ເບີດ​ບໍ່​ທັນ​ແຕກ ແລະ ຢູ່​ແຂວງ​ຄຳ​ມ່ວນ​ຄື: ເມືອງ​ຍົມ​ມະ​ລາດ ແລະ ເມືອງ​ບົວ­ລະ­ພາ ຄາດ­ໝາຍ​ໃຫ້​ສຳ­ເລັດ​ການ​ສຳ​ຫຼວດ​ບໍ່​ແມ່ນ​ທາງ​ດ້ານ​ວິ­ຊາ​ການ​ຈຳ­ນວນ 39 ບ້ານ ກວດ​ກູ້​ລະ­ເບີດ­ອອກ​ຈາກ​ເນື້ອ­ທີ່​ດິນ​ຫຼາຍ​ກວ່າ 8.500.000 ຕາ​ແມັດ ໂຄ­ສະ­ນາ​ສຶກ​ສາ​ຄວາມ​ສ່ຽງ​ໄພ​ຕໍ່​ລະ­ເບີດ​ບໍ່​ທັນ​ແຕກ​ໃຫ້​ໄດ້ 195 ຄັ້ງ ໂດຍ​ໄດ້​ຮັບ​ທຶນ​ສະ­ໜັບ­ສະ­ໜູນ​ຈາກ​ໂຄງ­ການ​ຂອງ​ລັດ­ຖະ­ບານ​ລາ­ຊະ​ອາ­ນາ­ຈັກ​ອັງ­ກິດ.

    ທັງ​ນີ້​ກໍ​ເພື່ອ​ເປັນ​ການ​ສືບ­ຕໍ່​ແກ້​ໄຂ ບັນ­ຫາ​ລະ­ເບີດ​ບໍ່​ທັກ​ແຕກ​ທີ່​ຕົກ​ຄ້າງ​ຢູ່​ລາວ ທີ່​ເປັນ​ໄພ​ຂົ່ມ­ຂູ່​ຕໍ່​ການ​ດຳ­ລົງ​ຊີ­ວິດ​ຂອງ​ປະ­ຊາ­ຊົນ​ບັນ­ດາ­ເຜົ່າ ໂດຍ​ສະ­ເພາະ ປະ​ຊົນ​ທີ່​ດຳ­ລົງ​ຊີ­ວິດ​ຢູ່​ພື້ນ​ທີ່​ມີ​ຜົນ​ກະ­ທົບ​ຈາກ​ລະ­ເບີດ​ບໍ່​ທັນ​ແຕກ​ທີ່​ຕົກ​ຄ້າງ ການ​ແກ້​ໄຂ​ບັນ­ຫາ​ດັ່ງ­ກ່າວ ເປັນ​ການ​ຊ່ວຍ​ຫຼຸດ­ຜ່ອນ​ຈຳ­ນວນ​ການ​ເກີດ​ອຸ­ບັດ­ເຫດ​ຈາກ​ລະ­ເບີດ​ບໍ່​ທັນ​ແຕກ ແລະ ເພື່ອ​ເປັນ​ການ​ສະ­ໜອງ​ເນື້ອ­ທີ່​ດິນ​ທີ່​ປອດ​ໄພ ເຂົ້າ​ໃນ​ການ​ຜະ­ລິດ​ທາງ​ດ້ານ​ກະ­ສິ­ກຳ ປະ­ກອບ­ສ່ວນ​ເຂົ້າ​ໃນ​ວຽກ​ງານ​ເສດ­ຖະ­ກິດ-ສັງ­ຄົມ​ຂອງ​ລັດ­ຖະ­ບານ​ລາວ​ເຮົາ.

ຂ່າວທີ່ກ່ຽວຂ້ອງ