ນັກທ່ອງທ່ຽວຕ່າງປະເທດ ຜ່ານດ່ານຂົວມິດຕະພາບລາວ-ໄທ 1 ເພີ່ມຂຶ້ນ 7.000 ກວ່າຄົນ

229 16 ມ.ກ. 2019 ຂ່າວໜ້າ​ໜຶ່ງ
ນັກທ່ອງທ່ຽວຕ່າງປະເທດ ຜ່ານດ່ານຂົວມິດຕະພາບລາວ-ໄທ 1 ເພີ່ມຂຶ້ນ 7.000 ກວ່າຄົນ

    ດ່ານ​ສາ­ກົນ​ຂົວ​ມິດ­ຕະ­ພາບ​ລາວ-ໄທ 1 ນະ­ຄອນ­ຫຼວງ​ວຽງ​ຈັນ-ແຂວງ​ໜອງ​ຄາຍ ເປັນ​ດ່ານ​ໜຶ່ງ​ທີ່​ມີ​ປະ­ຊາ­ຊົນ ແລະ ພາ­ຫະ­ນະ​ເຂົ້າ-ອອກ​ເປັນ​ຈຳ­ນວນ​ຫຼວງ­ຫຼາຍ​ໃນ​ແຕ່​ລະ​ປີ ແລະ ໄດ້​ເພີ່ມ​ຂຶ້ນ​ເລື້ອຍໆ ສະ­ເພາະ​ປີ 2018 ມີ​ນັກ​ທ່ອງ​ທ່ຽວ​ຕ່າງ­ປະ­ເທດ​ເຂົ້າ​ມາ ສປປ ລາວ ໂດຍ​ຜ່ານ​ດ່ານ​ແຫ່ງ​ນີ້​ເພີ່ມ​ຂຶ້ນ ເນື່ອງ​ຈາກ​ລັດ­ຖະ­ບານ​ລາວ ໄດ້​ເປີດ​ເປັນ​ປີ​ທ່ອງ​ທ່ຽວ​ລາວ ໂດຍ​ໄດ້​ສ້າງ​ເງື່ອນ­ໄຂ​ຕ່າງໆ​ທີ່​ດຶງ​ດູດ​ນັກ​ທ່ອງ​ທ່ຽວ​ຕ່າງ­ປະ­ເທດ ເຂົ້າ​ມາ​ທ່ອງ​ທ່ຽວ​ລາວ​ຫຼາຍ​ຂຶ້ນ ພ້ອມ​ທັງ​ໄດ້​ນຳ​ເອົາ​ເງິນ­ຕາ ເປັນ​ການ​ສ້າງ​ລາຍ​ຮັບ​ທາງ​ກົງ ແລະ ທາງ​ອ້ອມ​ໃຫ້​ປະ­ເທດ​ຊາດ ແລະ ປະ­ຊາ­ຊົນ​ລາວ ກໍ່​ຄື ຫົວ­ໜ່ວຍ​ທຸ­ລະ​ກິດ-ຜູ້​ປະ­ກອບ​ການ​ທຸ­ລະ​ກິດ​ທ່ອງ​ທ່ຽວ ໂຮງ­ແຮມ ເຮືອນ​ພັກ ແລະ ຮ້ານ​ອາ­ຫານ.

    ທ່ານ ທອງ​ທິບ ສີ​ວິ​ໄຊ ຮັກ­ສາ​ການ​ຫົວ­ໜ້າ​ຫ້ອງ­ການ​ຄຸ້ມ​ຄອງ ແລະ ບໍ­ລິ­ການ​ດ່ານ​ສາ­ກົນ​ຂົວ​ມິດ­ຕະ­ພາບ​ລາວ-ໄທ 1 ໃຫ້​ສຳ­ພາດ​ວັນ​ທີ 10 ມັງ­ກອນ 2019 ວ່າ: ປີ 2017 ມີ 2.470.000 ກວ່າ​ຄົນ ທີ່​ມາ​ຜ່ານ​ດ່ານ​ສາ­ກົນ​ຂົວ​ມິດ­ຕະ­ພາບ​ລາວ-ໄທ 1 ສ່ວນ​ປີ 2018 ມີ 2.689.000 ກວ່າ​ຄົນ ເພີ່ມ​ຂຶ້ນ 202.000 ຄົນ ສ່ວນ​ຂາ​ອອກ​ປີ 2017 ມີ 256.000 ຄົນ ປີ 2018 ມີ 275.000 ຄົນ ເພີ່ມ​ຂຶ້ນ 17.000 ກວ່າ​ຄົນ ສຳ­ລັບ​ພາ­ຫະ­ນະ​ລົດ​ເຂົ້າ ປີ 2017 ມີ 328.000 ກວ່າ​ຄັນ ປີ 2018 ມີ 385.000 ກວ່າ​ຄັນ ເພີ່ມ​ຂຶ້ນ 50.000 ກວ່າ​ຄັນ ພາ­ຫະ­ນະ​ລົດ​ອອກ​ປີ 2017 ມີ 349.000 ກວ່າ​ຄັນ ປີ 2018 ມີ 400.000 ກວ່າ​ຄັນ ເພີ່ມ​ຂຶ້ນ 50.000 ກວ່າ​ຄັນ.

    ນອກ­ຈາກ​ຈຳ­ນວນ​ຄົນ ແລະ ພາ­ຫະ­ນະ​ເຂົ້າ-ອອກ​ເພີ່ມ​ແລ້ວ ຈຳ­ນວນ​ນັກ​ທ່ອງ​ທ່ຽວ​ຕ່າງ­ປະ­ເທດ​ທີ່​ເຂົ້າ​ມາ​ທ່ອງ​ທ່ຽວ ສປປ ລາວ ກໍ່​ຄື ນະ­ຄອນ­ຫຼວງ​ວຽງ​ຈັນ ກໍ່​ເພີ່ມ​ຂຶ້ນ​ເຊັ່ນ​ດຽວ​ກັນ ສະ­ແດງ​ອອກ​ປີ 2017 ມີ​ນັກ​ທ່ອງ​ທ່ຽວ​ເຂົ້າ​ມາ 29.000 ກວ່າ​ຄົນ ປີ 2018 ມີ 36.000 ກວ່າ​ຄົນ ເພີ່ມ​ຂຶ້ນ 7.000 ກວ່າ​ຄົນ ນອກ​ນີ້ ກະ­ຊວງ​ວິ­ທະ­ຍາ­ສາດ ແລະ ເຕັກ​ໂນ​ໂລ​ຊີ ຍັງ​ໄດ້​ກວດ​ຄຸ­ນະ­ພາບ​ນ້ຳ­ມັນ​ຢູ່​ດ່ານ​ແຫ່ງ​ນີ້​ຕື່ມ​ອີກ ໂດຍ​ປີ 2017 ມີ 435 ລ້ານ​ລິດ ປີ 2018 ມີ 383 ລ້ານ​ລິດ ສະ­ພາບ​ການ​ຈັດ​ເກັບ​ລາຍ​ຮັບ​ງົບ­ປະ­ມານ​ປີ 2017 ແຜນ­ການ​ປີ 1.200 ຕື້​ກີບ ປະ­ຕິ­ບັດ​ໄດ້ 1.150 ຕື້​ກີບ ເທົ່າ​ກັບ 84,64% ປີ 2018 ໄດ້​ເພີ່ມ​ແຜນ­ການ​ເກັບ​ງົບ­ປະ­ມານ​ຂຶ້ນ​ຕື່ມ ຍ້ອນ​ວ່າ​ໄດ້​ໂຮມ​ສາງ​ທ່າ​ນາ​ແລ້ງ​ເຂົ້າ​ມາ ຈຶ່ງ​ເຮັດ​ໃຫ້​ຕົວ​ເລກ​ແຜນ­ການ​ທີ່​ຂັ້ນ​ເທິງ​ມອບ​ໝາຍ​ໃຫ້​ເພີ່ມ​ຂຶ້ນ 3.247 ຕື້​ກີບ ປະ­ຕິ­ບັດ​ໄດ້ 2.793 ຕື້​ກີບ ເທົ່າ​ກັບ 86,32%.

ຂ່າວທີ່ກ່ຽວຂ້ອງ