ງານມະຫະກຳອະສັງຫາລິມະຊັບ ຈະຈັດຂຶ້ນເດືອນມີນາ

160 16 ມ.ກ. 2019 ຂ່າວໜ້າ​ໜຶ່ງ

    ງານ​ມະ​ຫະ​ກຳ​ອະ­ສັງ­ຫາ­ລິ­ມະ​ຊັບ 2019 (Laorealestate.la Home Expo 2019) ຈະ​ຈັດ​ຂຶ້ນ​ວັນ​ທີ 1-2 ມີ­ນາ 2019 ຢູ່​ໂຮງ­ແຮມ​ດອນ​ຈັນ​ພລາ​ເລດ ນະ­ຄອນ­ຫຼວງ​ວຽງ​ຈັນ ພາຍ​ໃນ​ງານ​ຈະ​ມີ​ບໍ­ລິ­ສັດ​ຊັ້ນ​ນຳ​ຕ່າງໆ​ຢູ່​ລາວ​ເຂົ້າ​ຮ່ວມ ເຊັ່ນ: ນັກ​ພັດ­ທະ­ນາ​ໂຄງ­ການ ສະ­ຖາ­ປະ­ນິກ ຜູ້​ຮັບ​ເໝົາ​ກໍ່­ສ້າງ ນາຍ​ໜ້າ​ອະ​ສັງ​ຫາ ຄົນ​ຂາຍ​ທີ່​ດິນ ທະ­ນາ­ຄານ​ປ່ອຍ​ສິນ​ເຊື່ອ​ເຮືອນ ບໍ­ລິ­ສັດ​ປະ­ກັນ​ໄພ ບໍ­ລິ­ສັດ​ດ້ານ​ກົດ­ໝາຍ ລວມ​ທັງ​ນັກ​ລົງ­ທຶນ​ອະ​ສັງ​ຫາ​ຈາກ​ຕ່າງ­ປະ­ເທດ ເຊິ່ງ​ຈະ​ມີ​ຫ້ອງ​ວາງ­ສະ­ແດງ​ຫຼາຍ​ກວ່າ 40 ຫ້ອງ.

    ງານ​ດັ່ງ­ກ່າວ ຈັດ​ຂຶ້ນ​ເປັນ​ຄັ້ງ​ທຳ​ອິດ​ຢູ່​ລາວ ໂດຍ​ການ​ຮ່ວມ​ມື​ລະ­ຫວ່າງ​ສະ­ພາ​ການ​ຄ້າ ແລະ ອຸດ­ສາ­ຫະ­ກຳ​ແຫ່ງ​ຊາດ​ລາວ Yula.la ແລະ Laorealestate.la ພາຍ​ໃນ​ງານ​ຈະ​ລວມ​ເອົາ​ບັນ­ດາ​ບໍ­ລິ­ສັດ​ຊັ້ນ​ນຳ​ຈາກ​ອຸດ­ສາ­ຫະ­ກຳ​ອະ­ສັງ­ຫາ­ລິ­ມະ​ຊັບ ມາ​ໄວ້​ບ່ອນ​ດຽວ​ກັນ ເຊິ່ງ​ເປັນ​ໂອ­ກາດ​ດີ​ທີ່​ຜູ້​ຊື້​ພາຍ​ໃນ​ປະ­ເທດ ແລະ ນັກ​ລົງ­ທຶນ​ຕ່າງ​ຊາດ ໄດ້​ສຳ​ຫຼວດ​ໂອ­ກາດ​ໃນ​ການ​ລົງ­ທຶນ​ດ້ານ​ອະ​ສັງ​ຫາ​ທີ່​ເໝາະ​ສົມ​ທີ່​ສຸດ ພ້ອມ​ດຽວ​ກັນ​ນີ້ ຍັງ​ມີ​ການ​ຈັດ​ສຳ​ມະ​ນາ​ຫຼາຍ​ກວ່າ 20 ຫົວ­ຂໍ້ ໂດຍ​ມີ​ຕົວ​ແທນ​ຈາກ​ບໍ­ລິ­ສັດ​ອະ​ສັງ​ຫາ​ຊັ້ນ​ນຳ​ຂອງ​ລາວ ແລະ ຜູ້​ຊ່ຽວ­ຊານ​ດ້ານ​ການ​ພັດ­ທະ­ນາ​ອະ​ສັງ​ຫາ ນັກ​ເສດ­ຖະ­ສາດ ທະ­ນາຍ ນັກ​ການ​ເງິນ ພະ­ນັກ­ງານ-ວິ­ຊາ​ການ ແລະ ແຂກ​ຈາກ​ຕ່າງ­ປະ­ເທດ​ເຂົ້າ​ຮ່ວມ​ບັນ​ລະ​ຍາຍ ການ​ສຳ​ມະ​ນາ​ຈະ​ເນັ້ນ​ໃສ່​ໃຫ້​ຄວາມ​ຮູ້​ແກ່​ຜູ້​ຊື້ ແລະ ຜູ້​ຂາຍ​ກ່ຽວ​ກັບ​ສະ­ພາບ​ການ​ລົງ­ທຶນ​ຢູ່​ລາວ ຂໍ້​ບັງ­ຄັບ ຂໍ້​ດີ-ຂໍ້​ອ່ອນ ແລະ ຄຳ​ແນະ­ນຳ​ສຳ­ລັບ​ຜູ້​ຊື້​ເຮືອນ​ຫຼັງ​ທຳ​ອິດ ແລະ ຜູ້​ມີ​ປະ­ສົບ​ການ​ຊື້​ມາ​ກ່ອນ.

    ພິ­ທີ​ຖະ­ແຫຼງ​ຂ່າວ​ງານ​ດັ່ງ­ກ່າວ​ຈັດ​ຂຶ້ນ​ວັນ​ທີ 15 ມັງ­ກອນ 2019 ຢູ່​ໂຮງ­ແຮມ​ດອນ​ຈັນ​ພລາ​ເລດ ມີ​ທ່ານ​ນາງ ຈັນ­ທະ​ຈອນ ວົງ​ໄຊ ຮອງ​ປະ­ທານ​ສະ­ພາ​ການ​ຄ້າ ແລະ ອຸດ­ສາ­ຫະ­ກຳ​ແຫ່ງ​ຊາດ​ລາວ ທ່ານ ເຈມ​ສ ໄວ​ທ​ເຮດ ຜູ້​ບໍ­ລິ­ຫານ Yula.la ແລະ Laorealestate.la ທ່ານ ໄຊ​ສົມ​ເພັດ ນໍ­ລະ​ສິງ ຮັກ­ສາ​ການ​ຫົວ­ໜ້າ​ກົມ​ສົ່ງ­ເສີມ​ການ​ຄ້າ ກະ­ຊວງ​ອຸດ­ສາ­ຫະ­ກຳ ແລະ ການ​ຄ້າ ຫົວ­ໜ່ວຍ​ທຸ­ລະ​ກິດ ແລະ ຜູ້​ທີ່​ກ່ຽວ­ຂ້ອງ​ເຂົ້າ​ຮ່ວມ.

ຂ່າວທີ່ກ່ຽວຂ້ອງ