ເບິ່ງບ້ານເຂົາເອົາບົດຮຽນ 16/01/2019

193 16 ມ.ກ. 2019 ຫົວຂໍ້ຂ່າວອື່ນໆ

    ມື້­ນີ້ ມີ​ຂ່າວ​ການ​ຈັບ​ກຸມ​ຜູ້​ສົ່ງ​ຫໍ່​ເຄື່ອງ​ຝາກ​ທີ່​ເປັນ​ອັນ­ຕະ­ລາຍ ເຖິງ​ສະ­ຖານ­ທີ່​ທາງ​ການ​ທູດ ຢູ່ ອົດ​ສະ​ຕຣາ​ລີ ເລື່ອງ​ການ​ຕັດ­ສິນ​ໂທດ​ປະ­ຫານ ຢູ່ ສປ ຈີນ ແລະ ຂ່າວ​ການ​ຈັບ​ກຸມ​ພວກ​ສໍ້​ລາດ​ບັງ​ຫຼວງ​ຢູ່​ຫວຽດ­ນາມ.

    ທີ່ ອົດ​ສະ​ຕຣາ​ລີ: ຂ່າວ​ຕ່າງ­ປະ­ເທດ​ຈາກ​ອິນ​ເດຍ ໄດ້​ໃຫ້​ຮູ້​ຫວ່າງ​ບໍ່​ດົນ​ມາ​ນີ້ (ວຽງ​ຈັນ​ທາມ 11 ມັງ­ກອນ 2019) ວ່າ​ເຈົ້າ​ໜ້າ­ທີ່​ຕຳ­ຫຼວດ​ສາ­ມາດ​ຈັບ​ກຸມ​ຊາຍ ອາ­ຍຸ 48 ປີ ຄົນ​ໜຶ່ງ ທີ່​ສົ່ງ​ຫໍ່​ວັດ­ຖຸ​ທີ່​ເປັນ​ໜ້າ​ສົງ­ໄສ​ເຖິງ​ສຳ­ນັກ­ງານ​ການ​ທູດ​ຕ່າງ­ປະ­ເທດ ທີ່​ປະ­ເທດ​ອົດ​ສະ​ຕຣາ​ລີ ຜູ້​ກໍ່​ເຫດ​ດັ່ງ­ກ່າວ ຖືກ​ຈັບ​ກຸມ​ໄດ້​ຢູ່​ເຮືອນ​ຂອງ​ເຂົາ​ເອງ ທີ່​ເມືອງ​ເຊັບ​ພາດ​ເທິນ (Shepparton) ລັດ​ວິກ​ຕໍ​ເຣຍ ແລະ ໄດ້​ຮັບ​ໂທດ​ຖານ​ມີ​ຄວາມ​ຜິດ ທີ່​ໄດ້​ສົ່ງ​ວັດ­ຖຸ​ທີ່​ເປັນ​ອັນ­ຕະ­ລາຍ​ຜ່ານ​ລະ­ບົບ​ໄປ­ສະ­ນີ ການ​ກະ­ທຳ​ຜິດ​ດັ່ງ­ກ່າວ ມີ​ໂທດ​ຈຳ​ຄຸກ​ສູງ​ສຸດ 10 ປີ ຂ່າວ​ໃຫ້​ລາຍ​ລະ­ອຽດ​ຕື່ມ​ວ່າ ຊາຍ​ຄົນ​ນີ້​ໄດ້​ສົ່ງ​ຫໍ່​ລຶກ​ລັບ​ທັງ​ໝົດ ຈຳ­ນວນ 38 ຫໍ່ ໄປ​ຍັງ​ສະ­ຖານ­ທູດ ແລະ ສະ­ຖານ­ກົງ­ສູນ​ຕ່າງ­ປະ­ເທດ ປະ­ຈຳ­ເມືອງ ເມວ​ເບີນ ຊິດ​ນີ ແລະ ນະ­ຄອນ­ຫຼວງ ແຄນ​ເບີ​ຣາ ຂອງ ອົດ​ສະ​ຕຣາ​ລີ.

    ທີ່ ສປ ຈີນ: ແຫຼ່ງ​ຂ່າວ​ຈາກ​ໜັງ­ສື­ພິມ​ລາຍ​ວັນ ຈາຍ​ນາ​ເດລີ (China Daily) ໄດ້​ໃຫ້​ຮູ້​ກ່ຽວ​ກັບ​ການ​ຕັດ­ສິນ​ຄະ­ດີ​ຜູ້​ກໍ່​ເຫດ “ຂ້າ​ເພື່ອ​ລ້າງ​ແຄ້ນ” ດ້ວຍ​ໂທດ​ປະ­ຫານ​ຊີ­ວິດ ຜູ້​ກໍ່​ເຫດ​ຊື່​ທ້າວ ຊາງ ກູ​ກູ (Zhang Kou Kou) ອາ­ຍຸ 36 ປີ ຈາກ​ເມືອງ​ຮາມ​ຊົງ ແຂວງ​ຊານ​ຊີ ຜູ້­ກ່ຽວ​ໄດ້​ໃຊ້​ມີດ​ແທງ ທ້າວ ຫວັງ ຊີ​ຊິນ ເສຍ​ຊີ­ວິດ ພ້ອມ​ທັງ​ລູກ​ຂອງ​ຜູ້​ເຄາະ​ຮ້າຍ​ອີກ​ສອງ​ຄົນ ຊື່​ທ້າວ ຫວັງ ເຊັງ​ຈຸນ ແລະ ທ້າວ ຫວັງ ຊຽວ​ຈຸນ  ນອກ­ຈາກ​ນັ້ນ ຜູ້​ກໍ່​ເຫດ​ຍັງ​ໄດ້​ໃຊ້​ໄຟ​ເຜົາ​ລົດ​ຂອງ​ທ້າວ ຫວັງ ຊຽວ​ຈຸນ ອີກ​ດ້ວຍ  ຜູ້​ກໍ່​ເຫດ ແລະ ຜູ້​ຖືກ​ແທງ​ເສຍ​ຊີ­ວິດ​ເປັນ​ຄົນ​ເຮືອນ​ໃກ້​ກັນ  ຂ່າວ​ບອກ​ສັ້ນໆ​ວ່າ ທ້າວ ຊາງ ກູ​ກູ ໄດ້​ກໍ່​ເຫດ​ເພື່ອ​ແກ້­ແຄ້ນ​ແທນ​ແມ່​ຂອງ​ເຂົາ​ທີ່​ເສຍ​ຊີ­ວິດ (ຍ້ອນ​ເຫຍື່ອ).

    ທີ່ ຫວຽດ­ນາມ: ໜັງ­ສື­ພິມ​ວຽງ​ຈັນ​ທາມ ສະ­ບັບ​ວັນ​ທີ 8 ເດືອນ​ມັງ­ກອນ​ນີ້ ໄດ້​ເວົ້າ​ກ່ຽວ​ກັບ​ສານ​ສູງ ຫວຽດ­ນາມ ຮຽກ​ພະ­ນັກ­ງານ​ຂັ້ນ​ສູງ​ຈາກ​ກະ­ຊວງ​ປ້ອງ​ກັນ​ຄວາມ​ສະ­ຫງົບ​ຂຶ້ນ​ສານ ເຊິ່ງ​ປະ­ກອບ​ດ້ວຍ ຟານ​ວັນ​ອານ​ວາ (ຫຼື ເປັນ​ທີ່​ຮູ້­ຈັກ​ກັນ​ໃນ​ຊື່ ວາ​ຍົມ Va Nhom) ແລະ ພະ­ນັກ­ງານ​ອີກ​ຈຳ­ນວນ​ໜຶ່ງ ພວກ​ກ່ຽວ​ມີ​ຄວາມ​ຜິດ ຖານ​ໄດ້​ລະ­ເມີດ​ລະ­ບຽບ​ການ ວ່າ​ດ້ວຍ​ການ​ຊື້-ຂາຍ​ເຮືອນ ແລະ ດິນ​ລັດ ຢູ່​ນະ­ຄອນ​ດາ​ໜັງ ແລະ ນະ­ຄອນ​ໂຮ່​ຈີ​ມິງ ເນື້ອ​ໃນ​ການ​ແຈ້ງ​ຂ່າວ​ຮຽກ​ຕົວ​ພວກ​ກ່ຽວ​ຂຶ້ນ ສານ​ຄັ້ງ​ນີ້​ບອກ​ວ່າ ເປັນ​ຄະ­ດີ “ສໍ້​ລາດ​ບັງ​ຫຼວງ​ທີ່​ໜັກ­ໜ່ວງ​ທີ່​ສຸດ” ເຊິ່ງ​ສັງ­ຄົມ​ໃຫ້​ຄວາມ​ສົນ­ໃຈ ເພາະ​ມັນ​ພົວ­ພັນ​ກັບ​ພະ­ນັກ­ງານ​ຂັ້ນ​ສູງ​ຂອງ​ກະ­ຊວງ ທັງ​ກໍ່​ຄວາມ​ເສຍ​ຫາຍ​ຢ່າງ​ຫຼວງ­ຫຼາຍ ສຳ­ລັບ​ງົບ­ປະ­ມານ​ຂອງ​ລັດ.

ຂ່າວທີ່ກ່ຽວຂ້ອງ