ກຽມຄວາມພ້ອມ ສະຫຼອງວັນສ້າງຕັ້ງກອງທັບ ຄົບຮອບ 70 ປີ

613 15 ມ.ກ. 2019 ຂ່າວໜ້າ​ໜຶ່ງ
ກຽມຄວາມພ້ອມ ສະຫຼອງວັນສ້າງຕັ້ງກອງທັບ ຄົບຮອບ 70 ປີ

    ການ​ເດີນ​ສວນ­ສະ­ໜາມ​ຫັດ​ແອບ​ສະ­ແດງ​ທົດ​ລອງ ຄັ້ງ​ທີ 1 ເພື່ອ​ສະ­ເຫຼີມ­ສະ­ຫຼອງ​ວັນ​ສ້າງ­ຕັ້ງ​ກອງ­ທັບ​ປະ­ຊາ­ຊົນ​ລາວ ຄົບ­ຮອບ 70 ປີ (20/1/1949-20/1/2019) ຈັດ​ຂຶ້ນ​ວັນ​ທີ 14 ມັງ­ກອນ 2019 ທີ່​ວິ­ທະ­ຍາ­ຄານ​ກົມ​ມະ​ດຳ ແຂວງ​ວຽງ​ຈັນ ເປັນ​ປະ­ທານ​ໂດຍ​ທ່ານ ພົນ​ເອກ ຈັນ​ສະ​ໜອນ ຈັນ​ຍາ​ລາດ ລັດ­ຖະ­ມົນ­ຕີ​ກະ­ຊວງ​ປ້ອງ​ກັນ​ປະ­ເທດ ໃຫ້​ກຽດ​ເຂົ້າ​ຮ່ວມ​ຊົມ​ມີ​ທ່ານ ທອງ​ລຸນ ສີ​ສຸ​ລິດ ນາ­ຍົກ­ລັດ­ຖະ­ມົນ­ຕີ ທ່ານ ພັນ​ຄຳ ວິ­ພາ​ວັນ ຮອງ​ປະ­ທານ​ປະ­ເທດ ພ້ອມ​ດ້ວຍ​ການ​ນຳ​ພັກ-ລັດ ພະ­ນັກ­ງານ​ອາ­ວຸ­ໂສ​ບຳ­ນານ ນາຍ ແລະ ພົນ­ທະ­ຫານ ອົງ​ການ­ຈັດ­ຕັ້ງ​ມະ­ຫາ­ຊົນ ທູດ​ການ​ທະ­ຫານ​ປະ­ເທດ​ເພື່ອນ​ມິດ ປະ­ຈຳ​ລາວ ພ້ອມ​ດ້ວຍ​ພະ­ນັກ­ງານ ທະ­ຫານ ຕຳ­ຫຼວດ ມວນ​ຊົນ​ນະ­ຄອນ­ຫຼວງ​ວຽງ​ຈັນ ແລະ ແຂວງ​ວຽງ​ຈັນ.

    ການ​ຫັດ​ແອບ​ທົດ​ລອງ​ຄັ້ງ​ນີ້ 1 ເປັນ​ການ­ສະ­ແດງ​ປະ­ສົມ​ປະ­ສານ​ເພື່ອ​ກະ­ກຽມ​ໃຫ້​ແກ່​ການ​ສະ­ເຫຼີມ­ສະ­ຫຼອງ ວັນ​ສ້າງ­ຕັ້ງ​ກອງ­ທັບ​ປະ­ຊາ­ຊົນ​ລາວ ຄົບ­ຮອບ 70 ປີ ແລະ ຈະ​ມີ​ຄັ້ງ​ທີ 2 ຈັດ​ຂຶ້ນ​ວັນ​ທີ 17 ມັງ­ກອນ 2019 ກ່ອນ​ທີ່​ຈະ​ມີ​ການ­ສະ­ແດງ​ຢ່າງ​ເປັນ​ທາງ​ການ​ໃນ​ວັນ​ທີ 20 ມັງ­ກອນ 2019 ທີ່​ວິ­ທະ­ຍາ­ຄານ​ກົມ​ມະ​ດຳ.

    ສຳ­ລັບ​ລາຍ​ການ­ສະ­ແດງ ເລີ່ມ​ຕົ້ນ​ດ້ວຍ​ສະ­ແດງ​ສິ­ລະ​ປະ​ວັນ­ນະ­ຄະ­ດີ​ຂອງ​ກອງ­ທັບ ການ­ສະ­ແດງ​ກ້ອນ​ກຳ­ລັງ​ຫັດ­ກາຍ​ມວຍ​ຂອງ​ເຫຼົ່າ​ຮົບ​ຕີ​ພິ­ເສດ ແລະ ເຫຼົ່າ​ຮົບ​ສືບ​ຂ່າວ ການ­ສະ­ແດງ​ມວຍ​ຕໍ່­ສູ້​ຊາຍ-ຍິງ ຕໍ່​ດ້ວຍ​ການ​ເດີນ​ສວນ­ສະ­ໜາມ​ຂອງ​ກ້ອນ​ກຳ­ລັງ​ພົນ ແລະ ຂະ​ບວນ​ພາ­ຫາ​ນະ​ອາ­ວຸດ​ຈາກ​ເຫຼົ່າ​ຮົບ​ຕ່າງໆ 25 ກ້ອນ​ກຳ­ລັງ​ຄື: ຂະ​ບວນ​ລົດ​ພະ­ນັກ­ງານ​ປະ­ຕິ­ວັດ​ອາ­ວຸ­ໂສ ຈູງ​ທຸງ­ໄຊ​ກອງ­ທັບ​ປະ­ຊາ­ຊົນ​ລາວ ກ້ອນ​ກອງ­ທັບ​ອິດ­ສະ­ຫຼະ ກອງ​ກຳ­ລັງ​ກອງ­ທັບ​ປົດ​ປ່ອຍ ກ້ອນ​ກຳ­ລັງ​ເພດ​ຍິງ 369 ກ້ອນ​ນາຍ​ທະ­ຫານ​ບົກ ກ້ອນ​ນາຍ​ທະ­ຫານ​ອາ­ກາດ ກ້ອນ​ທະ­ຫານ​ຊ່າງ​ແສງ ກ້ອນ​ທະ­ຫານ​ສື່­ສານ ກ້ອນ​ກຳ­ລັງ​ແພດ​ເພດ​ຍິງ ກ້ອນ​ທະ­ຫານ​ທ້ອງ­ຖິ່ນ ກ້ອນ​ກຳ­ລັງ​ກອງ​ຫຼອນ ກ້ອນ​ກຳ­ລັງ​ປ້ອງ​ກັນ​ຕົວ ຂະ​ບວນ​ລົດ​ທະ­ຫານ​ຮາບ-ຍານ​ເກາະ ຂະ​ບວນ​ລົດ​ເຫຼົ່າ​ຮົບ​ລົດ​ຕັງ-ຍານ​ເກາະ ຂະ​ບວນ​ລົດ​ເຫຼົ່າ​ຮົບ​ປືນ​ໃຫຍ່​ໜ້າ­ດິນ ຂະ​ບວນ​ເຫຼົ່າ​ຮົບ​ປ້ອງ​ກັນ​ອາ­ກາດ ຂະ​ບວນ​ລົດ​ເຫຼົ່າ​ຮົບ​ຊ່າງ​ແສງ ແລະ ກ້ອນ​ກອງ­ແກ​ວົງ​ກອງ­ທັບ​ປະ­ຊາ­ຊົນ​ລາວ ນອກ​ນີ້ ຍັງ​ມີ​ສະ­ແດງ​ຝູງ​ບິນ Mi-17 ສະ­ແດງ​ໂດດ​ຈ້ອງ​ທາງ​ອາ­ກາດ​ປະ­ກອບ​ທຸງ­ຊາດ ທຸງ​ພັກ ທຸງ​ກາ 70 ປີ ກອງ­ທັບ​ປະ­ຊາ­ຊົນ​ລາວ ຈຳ­ນວນ​ພົນ 50 ຄົນ ເຊິ່ງ​ບັນ­ດາ​ກ້ອນ​ກຳ­ລັງ​ທະ­ຫານ​ທີ່​ສະ­ແດງ​ໃຫ້​ເຫັນ​ເຖິງ​ການ​ເຕີບ​ໃຫຍ່​ຂະ­ຫຍາຍ­ຕົວ ຂອງ​ກຳ­ລັງ​ປະ­ກອບ​ອາ­ວຸດ​ຕະ­ຫຼອດ​ໄລ­ຍະ 70 ປີ​ທີ່​ຜ່ານ​ມາ ທັງ​ເປັນ​ການ​ຈົດ​ຈຳ​ລ້ຳ​ລຶກ​ທາດ​ແທ້​ຜົນ­ງານ​ມູນ­ເຊື້ອ​ວີ­ລະ​ກຳ​ອັນ​ລ້ຳ​ເລີດ​ຂອງ​ກອງ­ທັບ​ປະ­ຊາ­ຊົນ​ລາວ ຜ່ານ​ເສັ້ນ­ທາງ​ແຫ່ງ​ການ​ສ້າງ­ຕັ້ງ​ສູ້​ຮົບ​ມີ​ໄຊ ແລະ ເຕີບ​ໃຫຍ່​ເຂັ້ມ­ແຂງ ພາຍ​ໃຕ້​ການ​ນຳ­ພາ​ເດັດ­ຂາດ​ໂດຍ​ກົງ ແລະ ຮອບ­ດ້ານ​ຂອງ​ພັກ​ປະ­ຊາ­ຊົນ​ປະ­ຕິ­ວັດ​ລາວ ໂດຍ​ໄດ້​ຮັບ​ການ​ລ້ຽງ​ດູ ແລະ ເບິ່ງ­ແຍງ​ຈາກ​ປະ­ຊາ­ຊົນ ຊຸບ​ຫຼໍ່​ໃນ​ແປວ­ໄຟ​ສົງ­ຄາມ​ປະ­ຕິ­ວັດ ຜ່ານ​ຜ່າ​ອຸ­ປະ­ສັກ​ນາໆ​ປະ­ການ​ທີ່​ເຕັມ​ໄປ​ດ້ວຍ​ການ​ເສຍ­ສະ­ຫຼະ​ອັນ​ໃຫຍ່​ຫຼວງ ໃນ​ພາ­ລະ­ກິດ​ປະ­ຕິ­ວັດ​ປົດ​ປ່ອຍ​ຊາດ ປົກ​ປັກ​ຮັກ­ສາ ແລະ ພັດ­ທະ­ນາ​ປະ­ເທດ​ຊາດ ເຮັດ​ສຳ­ເລັດ​ໜ້າ­ທີ່​ພາ­ລະ​ກຳ​ປະ­ຫວັດ­ສາດ​ທີ່​ພັກ ແລະ ປະ­ຊາ­ຊົນ​ມອບ​ໜາຍ​ໃຫ້​ຢ່າງ​ມີ​ໄຊ ສ້າງ​ໜ້າ­ທີ່​ປະ­ຫວັດ­ສາດ​ຍຸກ​ໃໝ່ ແລະ ມູນ­ເຊື້ອ​ກອງ­ທັບ​ວິ­ລະ​ຊົນ​ຂອງ​ຊາດ​ລາວ​ຢ່າງ​ສະ­ຫງ່າ​ງາມ.

ຂ່າວທີ່ກ່ຽວຂ້ອງ