ຂ່າວຫຼ້າສຸດ

ເບິ່ງບ້ານເຂົາເອົາບົດຮຽນ 15/01/2019

286 15 ມ.ກ. 2019 ຫົວຂໍ້ຂ່າວອື່ນໆ

    ພົບ​ກັນ​ປະ­ຈຳ​ວັນ​ນີ້ ມີ​ຂ່າວ​ກ່ຽວ​ກັບ​ການ​ປຸກ​ສ້າງ​ໂຮງ­ແຮມ​ທີ່​ບໍ່​ຖືກ­ຕ້ອງ​ຕາມ​ກົດ­ໝາຍ​ທີ່ ມາ​ເລ​ເຊຍ ກົດ­ໝາຍ​ການ​ຄ້າ ເອ​ເລັກ​ໂຕຣ​ນິກ​ຂອງ​ຈີນ ແລະ ຂ່າວ​ການ​ຈັບ​ກຸມ​ໂຈນ​ຕູ້ ATM ທີ່​ອິນ​ໂດ​ເນ​ເຊຍ.

    ທີ່ ມາ​ເລ​ເຊຍ: ໜັງ­ສື­ພິມ​ວຽງ​ຈັນ​ທາມ ສະ­ບັບ​ວັນ​ທີ 7 ເດືອນ​ມັງ­ກອນ​ນີ້ ໃຫ້​ຮູ້​ເຖິງ​ຄວາມ​ກັງ­ວົນ​ໃຈ​ທາງ​ການ​ມາ​ເລ​ເຊຍ ກ່ຽວ​ກັບ​ໂຮງ­ແຮມ ແລະ ເຮືອນ​ພັກ​ທີ່​ຜິດ​ກົດ­ໝາຍ​ໂຜ່​ຕົວ​ຂຶ້ນ​ໃນ​ຄຸ້ມ​ຈອດ​ທາວ (George Town) ເຂດ​ມໍ­ລະ­ດົກ​ໂລກ​ແຫ່ງ​ຄວາມ​ຫຼາກ​ຫຼາຍ​ທາງ​ວັດ­ທະ­ນະ­ທຳ​ຂອງ​ອາ­ຊີ-ເອີ​ຣົບ ເກາະ​ປີ​ນັງ ມາ​ເລ​ເຊຍ ຂ່າວ​ບອກ​ວ່າ ບັນ­ດາ​ໂຮງ­ແຮມ​ທີ່​ປຸກ​ສ້າງ ແບບ​ຜິດ​ກົດ­ໝາຍ​ດັ່ງ­ກ່າວ​ນັ້ນ ມີ​ບັນ­ຫາ​ກ່ຽວ​ກັບ​ລະ­ບົບ​ປ້ອງ​ກັນ​ອັກ­ຄີ​ໄພ ເມື່ອ​ບໍ່​ພໍ​ເທົ່າ­ໃດ​ປີ­ຜ່ານ­ມາ​ນີ້ ທາງ​ການ​ຂອງ​ປີ​ນັງ​ໄດ້​ເລີກ​ຮື້​ບັນ­ດາ​ໂຮງ­ແຮມ​ທີ່​ປຸກ​ຂຶ້ນ​ແບບ​ບໍ່​ຖືກ­ຕ້ອງ​ຢູ່​ເຂດ​ອະ­ນຸ​ຮັກ ແຕ່​ໃນ​ປັດ­ຈຸ­ບັນ​ໂຮງ­ແຮມ​ຫຼັງ​ໃໝ່​ຜັດ​ໄດ້​ປົ່ງ​ຂຶ້ນ​ປານ​ດອກ​ເຫັດ ໃນ​ນັ້ນ ຈຳ­ນວນ​ໜຶ່ງ​ໄດ້​ປຸກ​ແທນ​ບ່ອນ​ເຮືອນ​ພັກ​ທີ່​ທາງ​ການ​ໄດ້​ເລີກ​ຮື້​ໄປ​ແລ້ວ​ເມື່ອ​ປີ­ຜ່ານ­ມາ ຈອດ​ທາວ ໄດ້​ຖືກ​ຮັບ​ເປັນ​ເມືອງ​ມໍ­ລະ­ດົກ​ໂລກ​ທີ່​ຍັງ​ອະ­ນຸ​ຮັກ​ວັດ­ທະ­ນະ­ທຳ​ຮີດ­ຄອງ​ປະ­ເພ­ນີ​ປະ­ສົມ​ປະ­ສານ ລະ­ຫວ່າງ ອາ­ຊີ ແລະ ເອີ​ຣົບ​ໄວ້​ໄດ້ ການ​ກໍ່­ສ້າງ​ອາ­ຄານ ບ້ານ​ເຮືອນ ໂຮງ­ແຮມ ກໍ່​ຄື ເຮືອນ​ພັກ ຢູ່ ຈອດ​ທາວ ນັ້ນ​ຕ້ອງ​ໃຫ້​ສອດ­ຄ່ອງ​ກັບ​ກົດ​ລະ­ບຽບ​ຂອງ​ອົງ­ການ​ມໍ­ລະ­ດົກ​ເຊັ່ນ​ດຽວ​ກັບ​ນະ­ຄອນ­ຫຼວງ​ພະ​ບາງ ເຊິ່ງ​ກໍ່​ເຄີຍ​ມີ​ບັນ­ຫາ​ກ່ຽວ​ກັບ​ການ​ກໍ່­ສ້າງ​ທີ່​ຂັດ​ກັບ​ກົດ​ລະ­ບຽບ​ຂອງ​ອົງ­ການ ມໍ­ລະ­ດົກ​ໂລກ ແຕ່​ໃນ​ປັດ­ຈຸ­ບັນ ໄດ້​ມີ​ການ​ແກ້​ໄຂ​ຕົກ​ໄປ​ແລ້ວ.

    ທີ່ ສປ ຈີນ: ເລື່ອງ​ການ​ຄ້າ​ທາງ​ເອ​ເລັກ​ໂຕຣ​ນິກ​ນີ້ ສປ ຈີນ ໄດ້​ຢືນ​ຢູ່​ແຖວ​ໜ້າ​ສຸດ​ຂອງ​ໂລກ ດັ່ງ­ນັ້ນ ຈຶ່ງ​ບໍ່​ເປັນ​ເລື່ອງ​ແປກ​ທີ່ ສປ ຈີນ ໄດ້​ປະ­ກາດ​ໃຊ້​ກົດ­ໝາຍ​ການ​ຄ້າ​ປະ­ເພດ​ນີ້ ນັບ​ແຕ່​ເດືອນ​ມັງ­ກອນ ປີ 2019 ນີ້​ເປັນ­ຕົ້ນ​ໄປ ກົດ­ໝາຍ​ສະ­ບັບ​ນີ້ ນອກ­ຈາກ​ຈະ​ເປັນ​ບ່ອນ​ອີງ​ຕົ້ນ­ຕໍ​ໃນ​ການ​ກຳ­ນົດ​ລະ­ບຽບ​ທຸ­ລະ​ກິດ ອີ​ຄອມ​ເມີດ (ການ​ຄ້າ​ທາງ​ເອ​ເລັກ​ໂຕຣ​ນິກ) ແລ້ວ ຍັງ​ເຮັດ​ໜ້າ­ທີ່​ຄຸ້ມ​ຄອງ​ສິດ­ທິ​ຂອງ​ຜູ້​ບໍ­ລິ­ໂພກ ແລະ ສ້າງ​ຄວາມ​ໝັ້ນ​ໃຈ​ສຳ­ລັບ​ຜູ້​ໃຊ້​ບໍ­ລິ­ການ​ລະ­ບົບ​ອອນ​ລາຍ ເພື່ອ​ຊື້​ສິນ­ຄ້າ ກົດ­ໝາຍ​ຍັງ​ໄດ້​ກຳ­ນົດ​ຫ້າມ​ຜູ້​ຂາຍ​ສິນ­ຄ້າ​ທາງ​ອອນ​ລາຍ ລຶບ​ຂໍ້­ຄວາມ​ຮ້ອງ­ທຸກ ຫຼື ວິ­ພາກ​ວິ­ຈານ​ຂອງ​ລູກ​ຄ້າ ແລະ ຍົກ­ເລີກ​ຄຳ​ສັ່ງ​ຊື້​ຂອງ​ລູກ​ຄ້າ​ຜູ້​ເຮັດ​ທຸ­ລະ​ກິດ ອີ​ຄອມ​ເມັດ ຕ້ອງ​ລົງ­ທະ­ບຽນ​ເຮັດ​ທຸ­ລະ​ກິດ​ກ່ອນ​ມີ​ໃບ​ປະ­ກອບ​ການ​ຈ່າຍ​ພາ­ສີ​ຢ່າງ​ຖືກ­ຕ້ອງ ພ້ອມ​ທັງ​ຮັບ­ຜິດ­ຊອບ​ກໍ­ລະ­ນີ​ມີ​ສິນ­ຄ້າ​ປອມ​ໃນ​ທຸ­ລະ​ກິດ​ຂອງ​ຕົນ ຜູ້​ຝ່າ­ຝືນ​ກົດ­ໝາຍ​ຈະ​ຖືກ​ປັບ​ໃໝ​ເປັນ​ເງິນ​ສູງ​ເຖິງ 2 ລ້ານ​ຢວນ.

    ທີ່ ອິນ​ໂດ​ເນ​ເຊຍ: ໜັງ­ສື­ພິມ​ວຽງ​ຈັນ​ທາມ ປະ­ຈຳ​ວັນ​ທີ 9 ເດືອນ​ມັງ­ກອນ​ປີ​ນີ້ ໄດ້​ໃຫ້​ຊາບ​ກ່ຽວ​ກັບ​ການ​ຈັບ​ກຸມ​ໂຈນ​ຕູ້​ເອ​ທີ​ເອັມ (ATM ຕູ້​ເບີກ​ເງິນ​ອັດ­ຕະ­ໂນ­ມັດ) ຢູ່ ບາ​ຫຼີ ແຫຼ່ງ​ທ່ອງ​ທ່ຽວ​ຍອດ​ນິ­ຍົມ​ຂອງ​ອິນ​ໂດ​ເນ​ເຊຍ ແລະ ຂອງ​ໂລກ​ໂຈນ ຫຼື ອາ​ຊະ​ຍາ​ກອນ​ຕູ້​ເອ​ທີ​ເອັມ​ຄັ້ງ​ນີ້​ແມ່ນ​ຊາວ ບູນ​ກາ​ຣີ 4 ຄົນ ທີ່​ມີ​ພຽງ​ຊື່​ຫຍໍ້​ວ່າ: KDY VRG VKN ແລະ VVC ໂຈນ​ຕ່າງ​ຊາດ​ທັງ​ສີ່​ເຂົ້າ​ໄປ​ບາ​ຫຼີ​ໃນ​ຄາບ​ນັກ​ທ່ອງ​ທ່ຽວ ແຕ່​ສຸດ​ທ້າຍ​ກາຍ­ເປັນ​ໂຈນ ຂ່າວ​ບອກ​ວ່າ ໂຈນ​ກຸມ​ນີ້​ໄດ້​ກວາດ​ເອົາ​ເງິນ​ຈາກ​ຕູ້ ATM ຫຼາຍ​ບ່ອນ​ໃນ​ເມືອງ​ເດັນ​ປາ​ຊາ ບາ​ຫຼີ ແຕ່​ສຸດ​ທ້າຍ​ກໍ່​ໄປ​ບໍ່​ລອດ ຍ້ອນ​ວ່າ​ທາງ​ທະ­ນາ­ຄານ ແລະ ກອງ​ກຳ­ລັງ​ຕຳ­ຫຼວດ ໄດ້​ມີ​ການ​ປະ­ສານ​ງານ​ກັນ​ຢ່າງ​ໃກ້­ຊິດ ຂໍ້​ມູນ​ທີ່​ເປັນ​ພື້ນ­ຖານ​ສູ່​ການ​ຈັບ​ກຸມ​ໂຈນ​ທັງ​ສີ່ ແມ່ນ​ໄດ້​ຈາກ​ເຄື່ອງ­ມື​ທີ່​ມີ​ພິ­ລຸດ ເຊິ່ງ​ພົບ​ເຫັນ​ຢູ່​ຕູ້ ATM ຂອງ​ທະ­ນາ­ຄານ​ລັດ ໃນ​ຮ້ານ​ອາ­ຫານ​ແຫ່ງ​ໜຶ່ງ ເຫດ­ການ​ນີ້​ເຕືອນ​ໃຫ້​ທຸກ​ຄົນ­ຮູ້​ວ່າ ອາ​ຊະ​ຍາ​ກອນ​ນັ້ນ ສາ­ມາດ​ປອມ​ຕົວ​ມາ​ໃນ​ຄາບ​ນັກ​ທ່ອງ​ທ່ຽວ ແລະ ໄດ້​ສ້າງ​ບັນ­ຫາ​ໃນ​ຫຼາຍ​ປະ­ເທດ​ມາ​ແລ້ວ ດັ່ງ­ນັ້ນ ຕ້ອງ​ມີ​ສະ­ຕິ​ໄວ້​ຈະ​ດີ​ແລ.

ຂ່າວທີ່ກ່ຽວຂ້ອງ