ນາຊາ ກຽມສົ່ງຫຸ່ນຍົນສຳຫຼວດອ່າວ ທີ່ເຄີຍເປັນທະເລສາບເທິງດາວອັງຄານ

246 15 ມ.ກ. 2019 ຫົວຂໍ້ຂ່າວອື່ນໆ

    ອົງ­ການ​ບໍ­ລິ­ຫານ​ການ­ບິນ ແລະ ອະ­ວະ­ກາດ​ແຫ່ງ​ຊາດ​ສະ­ຫະ­ລັດ​ອາ​ເມ​ຣິ​ກາ ຫຼື ນາ​ຊາ ກຽມ​ສົ່ງ​ຫຸ່ນ​ຍົນ​ລົງ​ສຳ​ຫຼວດ​ພື້ນ​ຜິວ​ດາວ​ອັງ­ຄານ ບໍ­ລິ­ເວນ​ອ່າວ​ຫຼຸມ​ເຢ​ເຊ​ໂຣ (Jezero crater) ໃນ​ອີກ​ສອງ​ປີ​ຂ້າງ​ໜ້າ ເນື່ອງ​ຈາກ​ຫຼັກ​ຖານ​ທາງ​ທໍ­ລະ­ນີ ວິ­ທະ­ຍາ​ຊີ້​ແຈງ​ຊັດ​ເຈນ​ວ່າ ເຄີຍ​ມີ​ແມ່­ນ້ຳ​ໄຫຼ ຜ່ານ​ລົງ​ສູ່​ທະ­ເລ­ສາບ​ຂະ­ໜາດ​ໃຫຍ່ ໃນ​ພື້ນ​ທີ່​ດັ່ງ­ກ່າວ ເມື່ອ​ຫຼາຍ​ພັນ​ລ້ານ​ປີ​ກ່ອນ ແລະ ອາດ​ມີ​ຮ່ອງ­ຮອຍ​ຂອງ​ສິ່ງ​ມີ​ຊີ­ວິດ​ຫຼົງ​ເຫຼືອ​ຢູ່.

    ອ່າວ​ຫຼຸມ​ດັ່ງ­ກ່າວ ຕັ້ງ​ຢູ່​ບໍ­ລິ­ເວນ​ເສັ້ນ​ສູນ​ສູດ​ຂອງ​ດາວ​ອັງ­ຄານ ມີ​ຄວາມ​ກວ້າງ 50 ກິ­ໂລ­ແມັດ ຄວາມ​ເລິກ 500 ແມັດ ແລະ ມີ​ອາ­ຍຸ​ເກົ່າ​ແກ່​ປະ­ມານ 3.500 - 3.900 ລ້ານ​ປີ ໂດຍ​ມີ​ຮ່ອງ­ຮອຍ​ທາງ­ນ້ຳ​ໄຫຼ​ຂອງ​ແມ່­ນ້ຳ​ສາຍ​ໜຶ່ງ ຕັດ​ຜ່ານ​ຂອບ​ອ່າວ​ເຂົ້າ​ມາ​ດ້ານ​ໃນ ຈົນ​ເກີດ​ເປັນ​ພື້ນ​ທີ່​ສາມ­ຫຼ່ຽມ​ປາກ​ແມ່­ນ້ຳ ກ່ອນ​ຈະ​ໄຫຼ​ລົງ​ທະ­ເລ­ສາບ​ຂະ­ໜາດ​ໃຫຍ່​ພາຍ​ໃນ ອ່າວ​ໄປ.

    - ພົບ “ທະ­ເລ­ສາບ” ໃຕ້​ຜືນ​ນ້ຳ­ກ້ອນ​ດາວ​ອັງ­ຄານ​ເປັນ​ຄັ້ງ​ທຳ​ອິດ.

    - ພາ­ລະ­ກິດ “ແຕະ” ດວງ​ຕາ­ເວັນ​ຂອງ​ນາ​ຊາ.

    - ນາ​ຊາ​ສ້າງ​ຝູງ​ເຜິ້ງ​ຫຸ່ນ​ຍົນ​ໃຊ້​ບິນ​ສຳ​ຫຼວດ​ດາວ​ອັງ­ຄານ.

    ນັກ­ວິ­ທະ­ຍາ­ສາດ​ຜູ້​ຊ່ຽວ­ຊານ​ເລື່ອງ​ດາວ​ອັງ­ຄານ​ຂອງ​ນາ​ຊາ ໄດ້​ລົງ­ມະ­ຕິ​ເລືອກ​ອ່າວ​ຫຼຸມ​ແຫ່ງ​ນີ້​ເປັນ​ພື້ນ​ທີ່​ສຳ​ຫຼວດ​ໃນ​ພາ­ລະ­ກິດ Mars 2020 ເນື່ອງ​ຈາກ​ເປັນ​ແຫຼ່ງ​ນ້ຳ​ຂະ­ໜາດ​ໃຫຍ່​ໃນ​ອະ­ດີດ ທີ່​ອາດ​ມີ​ສິ່ງ​ມີ​ຊີ­ວິດ​ອາ­ໄສ​ຢູ່​ເມື່ອ​ຫຼາຍ​ພັນ​ລ້ານ​ປີ​ມາ​ແລ້ວ ຊຶ່ງ​ໃນ​ຍຸກ​ນັ້ນ ດາວ​ອັງ­ຄານ​ມີ​ສະ­ພາບ​ອາ­ກາດ ທີ່​ອົບ​ອຸ່ນ ແລະ ຊຸ່ມ​ຊື່ນ​ກວ່າ​ໃນ​ປັດ­ຈຸ­ບັນ.

    ທ່ານ ເຄນ​ເນັດ ຟາຣ໌ລີ ຈາກ​ສະ​ຖາ​ບັນ​ເຕັກ​ໂນ​ໂລ​ຊີ ກາ​ລິ​ຟໍ​ເນຍ (Caltech) ໜຶ່ງ​ໃນ​ທີມ​ຜູ້​ຊ່ຽວ­ຊານ​ຂອງ​ນາ​ຊາ​ບອກ​ວ່າ ສິ່ງ​ສຳ­ຄັນ​ທີ່​ເຮັດ​ໃຫ້​ຕັດ­ສິນ​ໃຈ​ເລືອກ​ອ່າວ ຫຼຸມ​ເຢ​ເຊ​ໂຣ ເປັນ​ສະ­ຖານ ທີ່​ສຳ​ຫຼວດ​ແຫ່ງ​ໃໝ່​ນັ້ນ ຄື​ລະ­ບົບ​ສາມ­ຫຼ່ຽມ​ປາກ​ແມ່­ນ້ຳ​ຂະ­ໜາດ​ໃຫຍ່ ຊຶ່ງ​ໜ້າ​ຈະ​ມີ​ຊັ້ນ​ຕະ​ກອນ ດິນ​ຕົມ ແລະ ຫີນ​ປູນ ທີ່​ເກັບ​ຮັກ­ສາ​ຮ່ອງ­ຮອຍ​ຂອງ​ສິ່ງ​ມີ​ຊີ­ວິດ​ໃນ​ທະ­ເລ­ສາບ ຫຼື ສິ່ງ​ມີ​ຊີ­ວິດ​ທີ່​ຖືກ​ພັດ​ພາ​ມາ​ຈາກ​ຕົ້ນ​ນ້ຳ​ເອົາ​ໄວ້​ໄດ້.

    ທັງ​ນີ້ ຊື່​ຂອງ​ອ່າວ ຫຼຸມ​ເຢ​ເຊ​ໂຣ ເປັນ​ຊື່​ຂອງ​ເມືອງ​ແຫ່ງ​ຫນຶ່ງ​ໃນ​ປະ​ເທດ​ບອສ​ນີ ແລະ ເຮີ​ເຊ​ໂກ​ວີ­ນາ ມີ​ຄວາມ​ໝາ­ຍວ່າ “ທະ­ເລ­ສາບ” ໃນ​ພາ­ສາ​ກຸ່ມ​ສະ​ລາ​ວິກ​ບາງ​ພາ­ສາ ເຊັ່ນ​ພາ­ສາ​ເຊັກ ພາ​ສາບ​ອສ​ນີ ແລະ ພາ­ສາ​ໂຄຣ​ເອ​ເຊຍ.

    ສ່ວນ​ຫຸ່ນ​ຍົນ Mars 2020 Rover ຊຶ່ງ​ເປັນ​ລົດ​ລາດ­ຕະ­ເວນ​ສຳ​ຫຼວດ​ທີ່​ຈະ​ໃຊ້​ໃນ​ພາ­ລະ­ກິດ​ຄັ້ງ​ນີ້ ໂດຍ​ເພີ່ມ​ອຸ­ປະ­ກອນ​ກວດ​ຈັບ ແລະ ເຄື່ອງ­ມື​ວິ­ເຄາະ​ຕົວ­ຢ່າງ​ດິນ ແລະ ຫີນ​ຊະ­ນິດ​ໃໝ່ ທັງ​ຍັງ​ມີ​ອຸ­ປະ­ກອນ​ເຮັດ​ການ​ທົດ​ລອງ ເພື່ອ​ສຳ​ຫຼວດ​ຄວາມ​ເປັນ​ໄປ​ໄດ້​ໃນ​ການ​ຜະ­ລິດ​ອົກ​ຊີ​ແຊນ ສຳ­ລັບ​ມະ­ນຸດ​ອະ­ວະ­ກາດ ທີ່​ຈະ​ຢູ່​ອາ­ໄສ​ເທິງ​ດາວ​ອັງ­ຄານ​ໃນ​ອະ­ນາ­ຄົດ​ດ້ວຍ.

    ນາ​ຊາ ຖະ­ແຫຼງ​ວ່າ​ຈະ​ສົ່ງ​ຫຸ່ນ​ຍົນ​ນີ້ ອອກ​ເດີນ­ທາງ​ສູ່​ຮ່ວງ​ອະ­ວະ­ກາດ​ໃນ​ເດືອນ​ກໍ­ລະ­ກົດ-ສິງ­ຫາ ປີ 2020 ແລະ ຄາດ​ວ່າ​ຈະ​ໄປ​ເຖິງ​ຈຸດ­ໝາຍ ລວມ​ທັງ​ລົງ​ຈອດ​ເທິງ​ດາວ​ອັງ­ຄານ​ໄດ້ ໃນ​ວັນ​ທີ 18 ກຸມ­ພາ 2021 ສ່ວນ​ຫຸ່ນ​ຍົນ​ສຳ​ຫຼວດ​ໂຄງ​ສ້າງ​ດ້ານ​ໃນ​ຂອງ​ດາວ​ອັງ­ຄານ​ໃນ​ພາ­ລະ­ກິດ InSight ໄດ້​ລົງ​ຈອດ​ບໍ­ລິ­ເວນ​ທີ່​ຮາບ Elysium Planitia ໄດ້ ໃນ​ວັນ​ທີ 26 ພະ­ຈິກ​ຜ່ານ​ມາ​ນີ້.

ຂ່າວທີ່ກ່ຽວຂ້ອງ