ຂ່າວຫຼ້າສຸດ

ເພີ່ມທະວີການຄຸ້ມຄອງຕ່ອງໂສ້ຂະບວນການປຸງແຕ່ງໄມ້

306 11 ມ.ກ. 2019 ຂ່າວໜ້າ​ໜຶ່ງ
ເພີ່ມທະວີການຄຸ້ມຄອງຕ່ອງໂສ້ຂະບວນການປຸງແຕ່ງໄມ້

    ກົມ​ອຸດ­ສາ­ຫະ­ກຳ ແລະ ຫັດ­ຖະ­ກຳ ກະ­ຊວງ​ອຸດ­ສາ­ຫະ­ກຳ ແລະ ການ​ຄ້າ ໂດຍ​ໄດ້​ຮັບ​ການ​ສະ­ໜັບ­ສະ­ໜູນ​ຈາກ​ໜ່ວຍ​ແຜນ​ງານ​ການ​ຮ່ວມ​ມື​ດ້ານ​ການ​ພັດ­ທະ­ນາ​ຂອງ​ເຢຍ​ລະ​ມັນ “ປົກ​ປັກ​ຮັກ­ສາ​ນຳ​ໃຊ້​ລະ­ບົບ​ນິ­ເວດ​ປ່າ­ໄມ້ ແລະ ຊີ­ວະ​ນາໆພັນ​ທີ່​ຍືນ​ຍົງ” (ProFEB) ຈັດ​ກອງ​ປະ­ຊຸມ​ປຶກ­ສາ​ຫາ­ລື​ຜ່ານ​ຂໍ້​ຕົກ­ລົງ​ວ່າ​ດ້ວຍ​ການ​ຄຸ້ມ​ຄອງ ແລະ ຕິດ­ຕາມ​ໄມ້​ສົ້ນ​ເຂົ້າ ແລະ ສົ້ນ​ອອກ ໃນ​ຂະ​ບວນ​ການ​ປຸງ​ແຕ່ງ ແລະ ການ​ຄ້າ ຈັດ​ຂຶ້ນ​ໃນ​ວັນ​ທີ 10 ມັງ­ກອນ 2019 ທີ່​ໂຮງ­ແຮມ​ວຽງ​ຈັນ​ພາ​ຊາ ໂດຍ​ເປັນ​ປະ­ທານ​ຂອງ​ທ່ານ ສົມ​ຟອງ ສຸ​ລິ​ວັນ ຮອງ​ຫົວ­ໜ້າ​ກົມ​ອຸດ­ສາ­ຫະ­ກຳ ແລະ ຫັດ­ຖະ­ກຳ ມີ​ທ່ານ ມາກ ກຼອດສ໌ ຫົວ­ໜ້າ​ໜ່ວຍ​ງານ​ແຜນ​ງານ​ການ​ຮ່ວມ​ມື​ດ້ານ​ການ​ພັດ­ທະ­ນາ​ເຢຍ​ລະ​ມັນ (GIZ)  ພ້ອມ​ດ້ວຍ​ຜູ້­ຕາງ­ໜ້າ​ຈາກ​ຂະ­ແໜງ­ການ​ກ່ຽວ­ຂ້ອງ​ເຂົ້າ​ຮ່ວມ.

    ທ່ານ ສົມ​ຟອງ ສຸ​ລິ​ວັນ ກ່າວ​ວ່າ: ການ​ເພີ່ມ​ທະ­ວີ​ການ​ຄວບ​ຄຸມ​ຕ່ອງ​ໂສ້​ການ​ສະ­ໜອງ​ໄມ້​ໃນ​ຂະ​ບວນ​ການ​ປຸງ​ແຕ່ງ ແລະ ການ​ຄ້າ​ໄມ້​ຢູ່​ລາວ ເປັນ​ການ​ປະ­ຕິ­ບັດ ແລະ ສົ່ງ­ເສີມ​ນະ­ໂຍ­ບາຍ​ຂອງ​ຄຳ​ສັ່ງ​ເລກ​ທີ 15/ນຍ ວ່າ​ດ້ວຍ​ການ​ເພີ່ມ​ທະ­ວີ​ຄວາມ​ເຂັ້ມ​ງວດ​ໃນ​ການ​ຄຸ້ມ​ຄອງ ແລະ ກວດ­ກາ​ການ​ຂຸດ​ຄົ້ນ​ໄມ້ ເຄື່ອນ​ຍ້າຍ​ໄມ້ ແລະ ທຸ­ລະ​ກິດ​ໄມ້ ເຊິ່ງ​ຂໍ້​ຕົກ­ລົງ​ສະ­ບັບ​ນີ້ ໄດ້​ເລີ່ມ​ຮ່າງ​ຂຶ້ນ​ແຕ່​ປີ 2016 ເປັນ­ຕົ້ນ​ມາ ມີ​ເປົ້າ​ໝາຍ​ຫຼັກ​ໃນ​ການ​ສົ່ງ­ເສີມ​ໃຫ້​ແກ່​ວຽກ​ງານ​ຄຸ້ມ​ຄອງ ແລະ ຕິດ­ຕາມ​ຕ່ອງ​ໂສ້​ການ​ສະ­ໜອງ​ໄມ້​ຈາກ​ບັນ­ດາ​ໂຮງ­ງານ​ປຸງ​ແຕ່ງ ແລະ ຜູ້​ຄ້າ​ໄມ້ ຈົນ​ເຖິງ​ຈຸດ​ທີ່​ມີ​ການ​ຊື້ຂາຍ ທັງ​ຢູ່​ພາຍ​ໃນ ແລະ ສົ່ງ​ອອກ​ຕ່າງ­ປະ­ເທດ ພ້ອມ​ນັ້ນ ຍັງ​ເປັນ​ຂໍ້​ກຳ­ນົດ​ສຳ­ລັບ​ຜູ້​ປະ­ກອບ​ການ​ທີ່​ມີ​ການ​ປຸງ​ແຕ່ງ ແລະ ຄ້າ­ຂາຍ​ໄມ້ ຕ້ອງ​ເປັນ​ເຈົ້າ​ການ­ຈັດ­ຕັ້ງ​ປະ­ຕິ­ບັດ ແລະ ໃຫ້​ມີ​ການ​ສ້າງ​ລະ­ບົບ​ຄຸ້ມ​ຄອງ​ບັນ­ຊີ​ວັດ​ສະ​ດຸ​ຂຶ້ນ​ມາ ເພື່ອ​ບັນ­ທຶກ​ໄມ້​ສົ້ນ​ເຂົ້າ ແລະ ໄມ້​ສົ້ນ​ອອກ​ຢູ່​ໃນ​ສະ­ຖານ­ທີ່​ຂອງ​ຜູ້​ປະ­ກອບ​ການ ພ້ອມ​ທັງ​ໄດ້​ເຮັດ​ການ​ລາຍ​ງານ​ກ່ຽວ​ກັບ​ອັດ­ຕາ​ການ​ນຳ​ໃຊ້​ໄມ້​ໃນ​ທຸກໆ​ຂັ້ນ​ຕອນ​ການ​ຜະ­ລິດ​ທີ່​ມີ​ການ​ແປ​ຮູບ  ເຊິ່ງ​ຈະ​ຊ່ວຍ​ເຮັດ​ໃຫ້​ຜູ້​ປະ­ກອບ​ການ​ສາ­ມາດ​ເຮັດ​ການ​ລາຍ​ງານ​ໃຫ້​ແກ່​ໜ່ວຍ​ງານ​ພາກ​ລັດ​ທີ່​ກ່ຽວ­ຂ້ອງ​ໄດ້​ຢ່າງ​ຖືກ­ຕ້ອງ ແລະ ຊັດ​ເຈນ  ນອກ​ນັ້ນ ຍັງ​ຈະ​ໄດ້​ຊ່ວຍ​ແນະ­ນຳ​ລະ­ອຽດ ດ້ານ​ວິ­ຊາ​ການ​ໃຫ້​ແກ່​ໜ່ວຍ​ງານ​ພາກ​ລັດ ເພື່ອ​ກວດ­ກາ​ຄວາມ​ຖືກ­ຕ້ອງ​ຕາມ​ກົດ   ໝາຍ ຕາມ​ກົດ­ໝາຍ​ຂອງ​ຜູ້​ຄ້າ​ໄມ້ ແລະ ຜູ້​ຕອບ​ສະ­ໜອງ​ວັດ​ສະ​ດຸ​ເຂົ້າ​ໃນ​ຂະ​ບວນ​ການ​ດັ່ງ­ກ່າວ​ອີກ​ດ້ວຍ ແນ­ໃສ່​ເພື່ອ​ຮັບ­ປະ­ກັນ ແລະ ການ​ຄຸ້ມ​ຄອງ​ຜະ­ລິດ​ຕະ​ພັນ​ທີ່​ປຸງ​ແຕ່ງ​ຈາກ​ໄມ້​ໃຫ້​ມີ​ຄວາມ​ຖືກ­ຕ້ອງ​ຕາມ​ກົດ­ໝາຍ.

   ໃນ​ການ​ຫາ­ລື​ທາງ​ກະ­ຊວງ​ອຸດ­ສາ­ຫະ­ກຳ ແລະ ການ​ຄ້າ​ໄດ້​ມີ​ການ​ບັນ­ທຶກ​ຄຳ​ຄິດ​ເຫັນ​ຈາກ​ບັນ­ດາ​ໜ່ວຍ​ງານ​ກ່ຽວ ຂ້ອງ​ທີ່​ເຂົ້າ​ຮ່ວມ​ໃນ​ກອງ​ປະ­ຊຸມ ເພື່ອ​ນຳ­ໄປ​ປັບ­ປຸງ​ແກ້​ໄຂ ເຮັດ​ໃຫ້​ຂໍ້​ຕົກ­ລົງ​ດັ່ງ­ກ່າວ​ມີ​ເນື້ອ​ໃນ​ສົມ­ບູນ ຖືກ­ຕ້ອງ ແລະ ເໝາະ​ສົມ​ຕາມ​ສະ­ພາບ​ຄວາມ​ເປັນ​ຈິງ​ຢູ່​ປະ­ເທດ​ເຮົາ.

ຂ່າວທີ່ກ່ຽວຂ້ອງ