ຂ່າວຫຼ້າສຸດ

JDB ເປີດໂຄງ¬ການເງິນຝາກສະສົມດອກເບ້ຍຄູນ 2

314 11 ມ.ກ. 2019 ຂ່າວໜ້າ​ໜຶ່ງ
JDB ເປີດໂຄງ¬ການເງິນຝາກສະສົມດອກເບ້ຍຄູນ 2

    ທະ­ນາ­ຄານ​ຮ່ວມ​ພັດ­ທະ­ນາ (JDB) ໃຫ້­ການ​ບໍ­ລິ­ການການ​ເງິນ​ແບບ​ຄົບ​ວົງ​ຈອນ ພ້ອມ​ທັງ​ຍົກ​ສູງ​ການ​ບໍ­ລິ­ການ​ໃຫ້​ເປັນ​ທີ່​ຍອມ­ຮັບ​ຂອງ​ສັງ­ຄົມ​ລາວ ແລະ ກ້າວ​ສູ່​ສາ­ກົນ​ເທື່ອ​ລະ​ກ້າວ ເປັນ​ທີ່​ປະ​ທັບ​ໃຈ​ທັນ​ຍຸກ​ທັນ​ສະ­ໄໝ​ໄດ້​ມາດ­ຕະ­ຖານ​ສາ­ກົນ ຖື​ເອົາ​ຄວາມ​ຕ້ອງ­ການ​ຂອງ​ລູກ​ຄ້າ​ເປັນ​ຫຼັກ ແລະ ພັດ­ທະ­ນາ​ຜະ­ລິດ​ຕະ​ພັນ ດ້ວຍ​ລະ­ບົບ​ເຕັກ​ໂນ​ໂລ​ຢີ​ທັນ​ສະ­ໄໝ ສ້າງ​ຜົນ​ປະ­ໂຫຍດ​ໃຫ້​ແກ່​ທຸກ​ຝ່າຍ ສາ­ມາດ​ເຕີບ​ໃຫຍ່​ຂະ­ຫຍາຍ­ຕົວ​ໄປ​ພ້ອມ​ກັນ ແລະ ເປັນ​ສ່ວນ​ປະ­ກອບ​ທີ່​ສຳ­ຄັນ​ໃນ​ການ​ພັດ­ທະ­ນາ​ປະ­ເທດ​ຊາດ.

    ວັນ​ທີ 8 ມັງ­ກອນ 2019 JDB ໄດ້​ຈັດ​ພິ­ທີ​ເປີດ​ການ​ນຳ​ໃຊ້​ສູນ​ບໍ­ລິ­ການ​ໃໝ່​ຢູ່​ຊັ້ນ 2 ສຳ­ນັກ­ງານ​ໃຫຍ່​ຂອງ​ຕົນ ໂດຍ​ໄດ້​ປັບ­ປຸງ​ປ່ຽນ­ແປງ​ຮູບ​ໂສມ​ຂອງ​ສູນ​ບໍ­ລິ­ການ​ເກົ່າ​ໃຫ້​ມີ​ຄວາມ​ທັນ​ສະ­ໄໝ ເພື່ອ​ສ້າງ​ຄວາມ​ສະ­ດວກ​ສະ­ບາຍ ແລະ ເປັນ​ທີ່​ຈັບ​ອົກ​ຈັບ­ໃຈ​ໃຫ້​ແກ່​ລູກ​ຄ້າ​ທີ່​ມາ​ໃຊ້​ບໍ­ລິ­ການ ພ້ອມ​ດຽວ​ກັນ​ນັ້ນ ຍັງ​ໄດ້​ເປີດ​ຜະ­ລິດ​ຕະ​ພັນ​ໃໝ່ ຄື: ໂຄງ­ການ​ເງິນ​ຝາກ​ສະ​ສົມ​ດອກ​ເບ້ຍ​ຄູນ 2 ໂດຍ​ເປັນ​ປະ­ທານ​ຂອງ​ທ່ານ ບຸນ​ສະ­ຫວ່າງ ພິ­ລາ​ໄຊ​ພິ​ທັກ ຜູ້­ອຳ­ນວຍ­ການ​ໃຫຍ່ JDB ມີ​ບັນ­ດາ​ຜູ້​ບໍ​ລິ ຫານ​ລະ­ດັບ​ສູງ ແລະ ພະ­ນັກ­ງານ​ເຂົ້າ​ຮ່ວມ.

    ໂຄງ­ການ​ໃໝ່​ນີ້​ເພື່ອ​ເປັນ​ການ​ລະ­ດົມ​ທຶນ​ເງິນ​ຝາກ​ໃນ​ຮູບ​ແບບ​ໃໝ່ ເພື່ອ​ສ້າງ​ຜະ­ລິດ​ຕະ​ພັນ​ເງິນ​ຝາກ​ໃຫ້​ມີ​ຄວາມ​ຫຼາກ​ຫຼາຍ ເຈາະ​ກຸ່ມ​ລູກ​ຄ້າ​ບຸກ­ຄົນ​ທົ່ວ​ໄປ ເຊັ່ນ: ພໍ່­ຄ້າ​ຊາວ​ຂາຍ ແລະ ພະ­ນັກ­ງານ​ທີ່​ຕ້ອງ­ການ​ເກັບ​ສະ​ສົມ​ເງິນ​ໃຫ້​ລູກ​ຫຼານ​ເພື່ອ​ໃຊ້​ເປັນ​ທຶນ​ການ​ສຶກ​ສາ​ໃນ​ອະ­ນາ­ຄົດ ເປັນ​ການ​ບໍ­ລິ­ການ​ເງິນ​ຝາກ​ພິ­ເສດ ໄລ­ຍະ​ເວ­ລາ 3 ປີ ແລະ ໂຄງ­ການ​ນີ້​ຈະ​ສິ້ນ​ສຸດ​ໃນ​ວັນ​ທີ 31 ທັນ­ວາ 2021 ອັດ­ຕາ​ດອກ​ເບ້ຍ​ບັນ­ຊີ​ຝາກ​ປະ­ຢັດ​ຄູນ 2 ຄິດ­ໄລ່​ດອກ​ເບ້ຍ​ທຸກ​ວັນ ແລະ ດອກ​ເບ້ຍ​ຈະ​ໂອນ​ເຂົ້າ​ບັນ­ຊີ​ທຸກ 6 ເດືອນ ຖອນ​ຕົ້ນ​ທຶນ ແລະ ດອກ​ເບ້ຍ​ເມື່ອ​ຄົບ​ກຳ­ນົດ ເງື່ອນ­ໄຂ​ໃນ​ການ​ເປີດ​ບັນ­ຊີ ຄື: ເປີດ​ບັນ­ຊີ​ຂັ້ນ​ຕ່ຳ 200.000 ກີບ 1.000 ບາດ 30 ໂດ​ລາ ຫຼື 200 ຢວນ ການ​ຝາກ​ຄັ້ງ​ຕໍ່​ໄປ​ຕ້ອງ​ບໍ່​ໜ້ອຍ​ກວ່າ​ຄັ້ງ​ທຳ​ອິດ ສາ­ມາດ​ຝາກ​ໄດ້​ຫຼາຍ​ຄັ້ງ​ຕໍ່​ເດືອນ ໃນ​ແຕ່​ລະ​ເດືອນ​ຕ້ອງ​ມີ​ການ​ຝາກ​ຢ່າງ​ໜ້ອຍ 1 ຄັ້ງ  ແລະ ສາ­ມາດ​ຝາກ​ເຂົ້າ​ບັນ­ຊີ​ທີ່​ໜ່ວຍ​ບໍ­ລິ­ການ​ໃດ​ກໍ່​ໄດ້.

   ທະ­ນາ­ຄານ​ຮ່ວມ​ພັດ­ທະ­ນາ​ເປັນ​ທະ­ນາ­ຄານ​ທີ່​ໝັ້ນ­ຄົງ ແລະ ຂະ­ຫຍາຍ­ຕົວ​ໄວ ປັດ­ຈຸ­ບັນ​ມີ​ທັງ​ໝົດ 58 ໜ່ວຍ​ບໍ­ລິ­ການ​ໃນ​ຂອບ​ເຂດ​ທົ່ວ​ປະ­ເທດ ແລະ ຈະ​ເປີດ​ຕື່ມ​ອີກ 1 ໜ່ວຍ​ບໍ­ລິ­ການ​ໃນ​ໄວໆ​ນີ້  ເພື່ອ​ໃຫ້​ປະ­ຊາ­ຊົນ​ບັນ­ດາ­ເຜົ່າ​ໄດ້​ເຂົ້າ​ເຖິງ​ແຫຼ່ງ​ທຶນ​ທີ່​ໝັ້ນ­ຄົງ ແລະ ເຂົ້າ​ເຖິງ​ການ​ບໍ­ລິ­ການ​ດ້ານ​ການ​ເງິນ​ແບບ​ຄົບ​ວົງ​ຈອນ ພ້ອມ​ກັນ​ນັ້ນ JDB ຍັງ​ໄດ້​ພັດ­ທະ­ນາ​ທະ­ນາ­ຄານ​ຂອງ​ຕົນ​ໃຫ້​ກາຍ­ເປັນ Digital Banking ເທື່ອ​ລະ​ກ້າວ ສ້າງ​ຜົນ​ປະ­ໂຫຍດ​ສູງ​ສຸດ​ໃຫ້​ກັບ​ລູກ​ຄ້າ ໂດຍ​ໄປ​ຕາມ​ຄຳ​ຂວັນ​ທີ່​ວ່າ: ເຕີບ​ໃຫຍ່​ໄປ​ພ້ອມ​ກັນ.

ຂ່າວທີ່ກ່ຽວຂ້ອງ