ອູ​ແກຣນ ຈະ​ບໍ່​ໃຫ້​ພົນລະເມືອງ​ຣັດ​ເຊຍ ເຂົ້າ​ຮ່ວມ​ສັງເກດ​ການ​ການ​ເລືອກ​ຕັ້ງ​ປະທານາທິບໍດີ

544 11 ມ.ກ. 2019 ຂ່າວຕ່າງປະເທດ
ອູ​ແກຣນ ຈະ​ບໍ່​ໃຫ້​ພົນລະເມືອງ​ຣັດ​ເຊຍ ເຂົ້າ​ຮ່ວມ​ສັງເກດ​ການ​ການ​ເລືອກ​ຕັ້ງ​ປະທານາທິບໍດີ

    ຂ່າວສານ TASS ລາຍ​ງານ​ວ່າ ທ່ານ ປາບ​ໂລ ກລິມ​ກິນ ລັດຖະມົນຕີ​ການ​ຕ່າງປະເທດ ອູ​ແກຣນ ກ່າວ​ເມື່ອ​ວັນ​ທີ 9 ມັງກອນ​ນີ້​ວ່າ ອູ​ແກຣນ​ຈະ​ບໍ່​ອະນຸຍາດ​ໃຫ້​ພົນລະເມືອງ​ຂອງ​ຣັດ​ເຊຍ ເຂົ້າ​ໄປ​ສັງເກດ​ການ​ການ​ເລືອກ​ຕັ້ງ​ປະທານາທິບໍດີ ອູ​ແກຣນ ຊຶ່ງ​ມີ​ກຳນົດ​ປ່ອນ​ບັດ ໃນ​ວັນ​ທີ 31 ມີນາ ໜ້າ​ນີ້.

    ທ່ານ ກລິມ​ກິນ ລົງ​ພິມ​ຂໍ້ຄວາມ​ຜ່ານ​ສື່​ສັງຄົມ Facebook ສ່ວນ​ຕົວ​ຊີ້​ອອກ​ວ່າ ກ່ອນ​ໜ້າ​ນີ້​ບໍ່​ພໍ​ເທົ່າໃດ​ມື້ ເຂົາ​ໄດ້​ສົ່ງ​ຈົດໝາຍ​ໄປ​ຍັງ​ທ່ານ ອິນ​ກິບ​ໂຈກ ​ຊອລ​ຣູນ ກິ​ສລາ​ໂບ​ຕີ ຜູ້ອຳນວຍການ​ຂອງ​ຫ້ອງການ​ບັນດາ​ອົງການ​ປະຊາທິປະໄຕ ແລະ​ ສິດທິ​ມະນຸດ (ODIHR) ທີ່​ຂຶ້ນ​ກັບ​ອົງການ​ຄວາມ​ໝັ້ນຄົງ ແລະ​ຮ່ວມ​ມື​ເອີ​ຣົບ (OSCE) ເພື່ອ​ສະເໜີ​ການ​ຜັນ​ຂະຫຍາຍ ຄະນະ​ຕິດຕາມ​ໃຫ້​ແກ່​ການ​ເລືອກ​ຕັ້ງ​ປະທານາທິບໍດີ​ຢູ່​ໃນ​ອູ​ແກຣນ.  ຢູ່​ໃນ​ປະເດັນ​ອື່ນໆ​ນັ້ນ ທ່ານ​ໄດ້​ຊີ້​ແຈງ​ວ່າ ກະຊວງ​ການ​ຕ່າງປະເທດ​ອູ​ແກຣນ ຈະ​ບໍ່​ຍອມຮັບ​ຄຳ​ຮ້ອງ​ຂໍ​ເຂົ້າ​ຮ່ວມ​ຄະນະ​ດັ່ງກ່າວ ສຳລັບ​ບັນດາ​ນັກ​ສັງເກດ​ການ​ທີ່​ເປັນ​ຊາວ​ຣັດ​ເຊຍ.

    ເມື່ອ​ທ້າຍ​ເດືອນ​ທັນວາ​ປີ​ກາຍ ຄະນະ​ກຳມະການ​ການ​ເລືອກ​ຕັ້ງ​ສູນ​ກາງຂອງ​ອູ​ແກຣນ ໄດ້​ນຳ​ເອົາ​ການ​ດັດແກ້​ອອກ​ມາ ສຳລັບ​ດຳລັດ​ທີ່​ກ່ຽວຂ້ອງ​ເຖິງ​ບັນດາ​ສະຖານທີ່​ປ່ອນ​ບັດ ຊຶ່ງ​ຕາມ​ນັ້ນແລ້ວ ກໍ​ແມ່ນ​ປິດ​ສະຖານທີ່​ປ່ອນ​ບັດ​ທັງ​ໝົດ ທີ່​ມີ​ຢູ່​ໃນ​ຣັດ​ເຊຍ. ດຳລັດ​ດັ່ງກ່າວ ລະບຸ​ວ່າ ພົນລະເມືອງ​ອູ​ແກຣນ ທີ່​ດຳລົງ​ຊີວິດ​ຢູ່​ໃນ​ຣັດ​ເຊຍ ສາມາດ​ໄປ​ໃຊ້​ສິດ​ປ່ອນ​ບັດ​ເລືອກ​ຕັ້ງ ຢູ່​ໃນ​ປະເທດ ຈໍ​ເຈຍ ກາ​ຊັກ​ສະຖານ ແລະ ແຟງ​ລັງ.

ຂ່າວທີ່ກ່ຽວຂ້ອງ