ຈີນ ພວມ​ປະ​ເຊີນ​ກັບ​ໄລຍະ​ທີ່​ກຳລັງ​ແຮງ​ງານ​ຫຼຸດ​ລົງ

551 10 ມ.ກ. 2019 ຂ່າວຕ່າງປະເທດ
ຈີນ ພວມ​ປະ​ເຊີນ​ກັບ​ໄລຍະ​ທີ່​ກຳລັງ​ແຮງ​ງານ​ຫຼຸດ​ລົງ

   “ປຶ້ມ​ປົກ​ຂຽວ​ກ່ຽວ​ກັບ​ປະຊາກອນ ແລະ​ແຮງ​ງານ” ຊຶ່ງ​ສະ​ຖາ​ບັນ​ວິທະຍາສາດ​ສັງຄົມ​ຂອງ​ຈີນ ນຳ​ອອກ​ມາ​ເປີດເຜີຍ​ເມື່ອ​ວັນ​ທີ 4 ມັງກອນ​ນີ້ ລະບຸ​ວ່າ ປະຊາກອນ​ຈີນ ຈະ​ບັນລຸ​ສຸດ​ຍອດ​ທີ່ 1,44 ຕື້​ຄົນ ພາຍ​ໃນ​ປີ 2029 ແລະ ​ເລີ່ມ​ໄລຍະ​ຫຼຸດ​ລົງ​ຢ່າງ​ຕໍ່​ເນື່ອງ ພາຍ​ໃນ​ທ້າຍ​ປີ 2030.

    ບົດ​ລາຍ​ງານ​ຢັ້ງຢືນ​ວ່າ ຈີນ​ທີ່​ເປັນ​ປະເທດ​ມີ​ປະຊາກອນ​ຫຼາຍ​ທີ່​ສຸດ​ໃນ​ໂລກ​ນັ້ນ ຕ້ອງ​ໄດ້​ມີ​ນະໂຍບາຍ ເພື່ອ​ແກ້​ໄຂ​ບັນຫາ​ກຳລັງ​ແຮງ​ງານ​ຫຼຸດ​ລົງ  ແລະ​ສັງຄົມ​ຄົນ​ອາຍຸ​ສູງ. ຄວາມ​ເຕີບ​ໂຕ​ດ້ານ​ປະຊາກອນ​ແຮງ​ງານ​ໄດ້​ຊັກ​ຊ້າ​ລົງ ໃນ​ຂະນະ​ທີ່​ຄົນ​ອາຍຸ​ສູງ​ນັບ​ມື້​ນັບ​ເພີ່ມ​ຂຶ້ນ ຈະ​ກະທົບ​ຢ່າງ​ກວ້າງຂວາງ ຕໍ່​ການ​ພັດທະນາ​ເສດຖະກິດ ແລະ​ສັງຄົມ​ຂອງ​ຈີນ ໂດຍ​ສະເພາະ​ກໍ​ແມ່ນ​ຖ້າ​ຫາກ​ອັດຕາ​ສ່ວນ​ການ​ເກີດ ຍັງ​ຄົງ​ຢູ່​ໃນ​ລະດັບ​ຕ່ຳ.

    ຄາດ​ວ່າ ປະຊາກອນ​ຈີນ ຈະ​ຫຼຸດ​ລົງ​ໄປ​ທີ່ 1,36  ຕື້​ຄົນ ພາຍ​ໃນ​ກາງ​ສະຕະວັດ​ນີ້ ໝາຍ​ຄວາມ​ວ່າ​ກຳລັງ​ແຮງ​ງານ​ຈະ​ຫຼຸດ​ລົງ 200 ລ້ານ​ຄົນ. ຖ້າ​ຫາ​ກວ່າ​ອັດຕາ​ສ່ວນ​ການ​ເກີດ​ບໍ່​ມີ​ການ​ປ່ຽນແປງ​ແລ້ວ ປະຊາກອນ​ຈີນ​ຈະ​ຫຼຸດ​ລົງ​ສູ່ 1,17 ຕື້​ຄົນ ພາຍ​ໃນ​ປີ 2065.

    ເມື່ອ​ປີ 2016 ຈີນ​ຕ້ອງ​ໄດ້​ຕົກລົງ​ໂຍະຍານ​ນະໂຍບາຍ​ເກີດ​ລູກ 1 ຄົນ ຊຶ່ງ​ເປັນ​ນະໂຍບາຍ​ແນໃສ່​ຄວບ​ຄຸມ​ຄວາມ​ເຕີບ​ໂຕ​ຂອງ​ປະຊາກອນ ແລະ​ມາ​ອະນຸຍາດ​ໃຫ້​ບັນດາ​ຄູ່​ຜົວ​ເມຍ ເກີດ​ລູກ​ໄດ້ 2 ຄົນ. ເຖິງ​ຢ່າງໃດ​ກໍ​ຕາມ ອັດຕາ​ສ່ວນ​ການ​ເກີດ​ຢູ່​ຈີນ ກໍ​ຍັງ​ຄົງ​ຫຼຸດ​ລົງ 3,5% ໃນ​ປີ 2017 ແລະ ​ຖື​ວ່າ​ໄດ້​ສືບຕໍ່​ຫຼຸດ​ລົງ​ໃນ​ປີ 2018.

    ໃນ​ຂະນະ​ດຽວ​ກັນ ກຸ່ມ​ຄົນ​ທີ່​ຂຶ້ນ​ກັບ (ບັນດາ​ຜູ້​ທີ່​ບໍ່​ອອກແຮງ​ງານ) ໃນ​ນັ້ນ​ມີ​ເດັກນ້ອຍ ແລະ​ຜູ້​ເຖົ້າ ຢູ່​ໃນ​ຍອດ​ຈຳນວນ​ປະຊາກອນ​ຈີນ ໄດ້​ເພີ່ມ​ຂຶ້ນ​ເປັນ​ເທື່ອ​ທຳ​ອິດ ພາຍ​ໃນ​ປີ 2011 ຫຼັງ​ເວລາ 30 ກວ່າ​ປີ. ຕົວ​ເລກ​ເຊັ່ນ​ນີ້ ໄດ້​ຮັບ​ການ​ຄາດ​ຄະເນ​ວ່າ​ຈະ​ເພີ່ມ​ຂຶ້ນ​ຕື່ມ​ຢ່າງ​ໜ້ອຍ​ພາຍ​ໃນ​ຫຼາຍ​ທົດ​ສະ​ວັດ​ຕໍ່ໜ້າ. ບົດ​ລາຍ​ງານ​ກໍ​ໄດ້​ລະບຸ​ວ່າ ອັດຕາ​ສ່ວນ​ຄົນ​ຮັບ​ເບ້ຍ​ບຳນານ ຈະ​ສືບຕໍ່​ເພີ່ມ​ຂຶ້ນ​ໄປ​ຈົນ​ຮອດ​ປີ 2060 ໃນ​ຂະນະ​ທີ່​ການ​ໂຍະຍານ​ນະໂຍບາຍ​ເກີດ​ລູກ 1 ຄົນ ເພື່ອ​ກັບ​ມາ​ສ້າງ​ຄວາມ​ກ້ຳ​ເກິ່ງ​ໂຄງ​ສ້າງ​ປະຊາກອນ​ຂອງ​ຈີນ​ນັ້ນ ໃນ​ໄລຍະ​ສັ້ນ​ຈະ​ນຳໄປ​ສູ່​ການ​ເພີ່ມ​ຂຶ້ນ​ຂອງ​ອັດຕາ​ສ່ວນ​ກຸ່ມ​ຄົນ​ຂຶ້ນ​ກັບ.

    ການ​ຄາດ​ຄະເນ​ອອກ​ມາ​ກ່ອນ​ໜ້າ​ນີ້ ກໍ​ໄດ້​ໃຫ້​ຂໍ້​ສັງເກດ​ວ່າ ກຸ່ມ​ປະຊາກອນ​ເຖົ້າ​ແກ່​ຂອງ​ຈີນ ຈະ​ເພີ່ມ​ຂຶ້ນ​ຈາກ​ລະດັບ 240 ລ້ານ​ຄົນ ໃນ​ປີ 2018 ຂຶ້ນ​ເປັນ 400 ລ້ານ​ຄົນ ໃນ​ທ້າຍ​ປີ 2035.

ຂ່າວທີ່ກ່ຽວຂ້ອງ