ຂ່າວຫຼ້າສຸດ

ຜູ້ວ່າການ ທຫລ ເຂົ້າຢ້ຽມຄຳນັບນາຍົກຫວຽດນາມ

302 10 ມ.ກ. 2019 ຂ່າວໜ້າ​ໜຶ່ງ
ຜູ້ວ່າການ ທຫລ ເຂົ້າຢ້ຽມຄຳນັບນາຍົກຫວຽດນາມ

    ທ່ານ ສອນ​ໄຊ ສິດ​ພະ​ໄຊ ຜູ້​ວ່າ­ການ​ທະ­ນາ­ຄານ​ແຫ່ງ ສປປ ລາວ ພ້ອມ​ຄະ­ນະ ເດີນ­ທາງ​ຢ້ຽມ­ຢາມ ແລະ ເຮັດ​ວຽກ​ຮ່ວມ​ກັບ​ການ​ນຳ​ຂັ້ນ​ສູງ​ທະ­ນາ­ຄານ​ແຫ່ງ​ລັດ ສສ ຫວຽດ­ນາມ ຢູ່​ນະ­ຄອນ­ຫຼວງ​ຮ່າ​ໂນ້ຍ ໃນ​ວັນ​ທີ 7-10 ມັງ­ກອນ​ນີ້ ວັນ​ທີ 9 ມັງ­ກອນ ທ່ານ ສອນ​ໄຊ ສິດ​ພະ​ໄຊ ພ້ອມ​ຄະ­ນະ ໄດ້​ເຂົ້າ​ຢ້ຽມ​ຄຳ­ນັບ​ທ່ານ ຫງວຽນ ຊວນ​ຟຸກ ນາ­ຍົກ­ລັດ­ຖະ­ມົນ­ຕີ ສສ ຫວຽດ­ນາມ ຢູ່​ສຳ­ນັກ­ງານ​ນາ­ຍົກ­ລັດ­ຖະ­ມົນ­ຕີ ສສ ຫວຽດ­ນາມ.

    ໂອ­ກາດ​ນີ້ ທ່ານ ສອນ​ໄຊ ສິດ​ພະ​ໄຊ ກໍ່​ໄດ້​ກ່າວ​ສະ­ແດງ​ຄວາມ​ເຄົາ­ລົບ​ນັບ­ຖື​ຢ່າງ​ສູງ​ມາ​ຍັງ​ທ່ານ​ນາ­ຍົກ­ລັດ­ຖະ­ມົນ­ຕີ ສສ ຫວຽດ­ນາມ ພ້ອມ​ທັງ​ໄດ້​ລາຍ​ງານ​ຜົນ​ຂອງ​ກອງ​ປະ­ຊຸມ​ພົບ​ປະ ແລະ ແລກ­ປ່ຽນ​ບົດ­ຮຽນ ລະ­ຫວ່າງ​ທະ­ນາ­ຄານ​ແຫ່ງ ສປປ ລາວ ແລະ ທະ­ນາ­ຄານ​ແຫ່ງ​ລັດ ສສ ຫວຽດ­ນາມ ເຊິ່ງ​ໄດ້​ຮັບ​ຜົນ­ສຳ­ເລັດ​ອັນ​ຈົບ­ງາມ ເຊິ່ງ ສສ ຫວຽດ­ນາມ ເປັນ​ປະ­ເທດ​ທຳ​ອິດ​ໃນ​ການ­ເຄື່ອນ­ໄຫວ ແລະ ເຮັດ​ວຽກ ພາຍ­ຫຼັງ​ທີ່​ໄດ້​ມີ​ການ​ຮັບ­ຮອງ​ເປັນ​ຜູ້​ວ່າ­ການ​ທະ­ນາ­ຄານ​ແຫ່ງ ສປປ ລາວ ຈາກ​ກອງ​ປະ­ຊຸມ​ສະ­ໄໝ​ສາ­ມັນ​ເທື່ອ​ທີ 6 ຂອງ​ສະ­ພາ​ແຫ່ງ​ຊາດ ຊຸດ​ທີ VIII ໃນ​ທ້າຍ​ປີ 2018.

    ທ່ານ ຫງວຽນ ຊວນ​ຟຸກ ໄດ້​ສະ­ແດງ​ຄວາມ​ຍິນ​ດີ​ຕ້ອນ­ຮັບ ພ້ອມ​ທັງ​ໄດ້​ຕີ​ລາ­ຄາ​ສູງ​ຕໍ່​ການ​ມາ​ຢ້ຽມ­ຢາມ ແລະ ເຮັດ​ວຽກ​ຢູ່ ສສ ຫວຽດ­ນາມ ຂອງ​ຄະ­ນະ​ຜູ້​ແທນ​ທະ­ນາ­ຄານ​ແຫ່ງ ສປປ ລາວ ພ້ອມ​ທັງ​ໄດ້​ອວຍ­ພອນ​ໃຫ້​ທ່ານ ສອນ​ໄຊ ສິດ​ພະ​ໄຊ ຜູ້​ວ່າ­ການ​ທະ­ນາ­ຄານ​ແຫ່ງ ສປປ ລາວ ຄົນ​ໃໝ່ ຈົ່ງ​ປະ­ສົບ​ຜົນ­ສຳ­ເລັດ​ໃນ​ໜ້າ­ທີ່​ວຽກ​ງານ​ໃໝ່ ປະ­ກອບ­ສ່ວນ​ໃນ​ການ​ພົວ­ພັນ ແລະ ຮ່ວມ​ມື​ລະ­ຫວ່າງ​ທະ­ນາ­ຄານ​ກາງ­ຂອງ 2 ປະ­ເທດ ໃຫ້​ກ້າວ​ສູ່​ລວງ​ເລິກ​ຍິ່ງໆ​ຂຶ້ນ.

ຂ່າວທີ່ກ່ຽວຂ້ອງ