ວິທີອອກກຳລັງກາຍ ສຳລັບຄົນທີ່ເຈັບຫົວເຂົ່າ

360 10 ມ.ກ. 2019 ຫົວຂໍ້ຂ່າວອື່ນໆ

    ສຳ­ລັບ​ຄົນ​ທີ່​ເຈັບ​ຫົວ­ເຂົ່າ ແຕ່​ຕ້ອງ­ການ​ອອກ­ກຳ­ລັງ​ກາຍ​ເພື່ອ​ໃຫ້​ມີ​ສຸ­ຂະ­ພາບ​ແຂງ­ແຮງ ຄວນ​ສຶກ​ສາ​ວິ­ທີ​ອອກ­ກຳ­ລັງ​ກາຍ​ໃຫ້​ດີ ເພື່ອ​ບໍ່​ໃຫ້​ເກີດ​ຜົນ​ກະ­ທົບ​ຕໍ່​ອາ­ການ​ເຈັບ ບໍ່​ດັ່ງ­ນັ້ນ​ອາ­ການ​ເຈັບ​ຫົວ­ເຂົ່າ​ຈະ​ກາຍ­ເປັນ​ພະ­ຍາດ​ຊຳ​ເຮື້ອ​ໄດ້ ການ​ອອກ­ກຳ­ລັງ​ກາຍ​ທີ່​ຖືກ​ວິ­ທີ​ນັ້ນ ຈະ​ຊ່ວຍ​ຫຼຸດ​ອາ­ການ​ເຈັບ​ລົງ​ໄດ້​ຢ່າງ​ມີ​ປະ­ສິດ­ທິ­ພາບ ທັງ​ເປັນ​ການ​ເສີມ​ກ້າມ­ຊີ້ນ​ຫົວ­ເຂົ່າ ເອັນ​ຫົວ­ເຂົ່າ ເອັນ​ຢືດ​ຂໍ້​ຕໍ່ ແລະ ເຫຍື່ອ​ຫຸ້ມ​ຫົວ­ເຂົ່າ​ເຮັດ​ໃຫ້​ຫົວ­ເຂົ່າ​ມີ​ຄວາມ​ຄ່ອງ​ຕົວ​ດີ​ຂຶ້ນ ເຊິ່ງ​ທ່ານ​ໃດ​ທີ່​ມີ​ອາ­ການ​ເຈັບ​ຫົວ­ເຂົ່າ ຕ້ອງ­ການ​ອອກ­ກຳ­ລັງ​ກາຍ​ໃຫ້​ຖືກ​ວິ­ທີ​ຄວນ​ປະ­ຕິ­ບັດ​ດັ່ງ­ນີ້:

    ຄວນ​ອອກ­ກຳ­ລັງ​ກາຍ​ຢ່າງ​ສະ​ໝ່ຳ​ສະ­ເໝີ ແລະ ຄວນ​ເລືອກ​ການ​ອອກ­ກຳ­ລັງ​ກາຍ​ທີ່​ເໝາະ​ສົມ ເຊັ່ນ: ຍ່າງ ແລະ ລອຍ­ນ້ຳ ເປັນ­ຕົ້ນ ຫຼີກ​ລ່ຽງ​ການ​ອອກ­ກຳ­ລັງ​ກາຍ​ທີ່​ມີ​ການ​ກະ­ທົບ​ຢ່າງ​ແຮງ​ຕໍ່​ກັບ​ຫົວ­ເຂົ່າ ເຊັ່ນ: ການ​ແລ່ນ ການ​ເຕັ້ນ ຫຼື ການ​ກະ­ໂດດ​ເຫຼົ່າ​ນີ້​ເປັນ­ຕົ້ນ.

    ການ​ອອກ­ກຳ­ລັງ​ກາຍ­ເປັນ​ສິ່ງ​ທີ່​ດີ​ສຳ­ລັບ​ຄົນ​ທີ່​ມີ​ອາ­ການ​ເຈັບ​ຫົວ­ເຂົ່າ ເພາະ​ຈະ​ເປັນ​ການ​ຄວບ​ຄຸມ​ນ້ຳ­ໜັກ​ຕົວ ເຮັດ​ໃຫ້​ຮ່າງ­ກາຍ​ເບື້ອງ​ລຸ່ມ​ບໍ່​ຕ້ອງ​ແບກ​ຮັບ​ນ້ຳ­ໜັກ​ຕົວ​ຫຼາຍ​ເກີນ​ໄປ ທັງ​ຍັງ​ເປັນ​ການ​ຫຼຸດ­ຜ່ອນ​ຄວາມ​ສ່ຽງ​ເປັນ​ພະ­ຍາດ­ຫົວ­ໃຈ ພະ­ຍາດ​ຕຸ້ຍ ແລະ ພະ­ຍາດ​ເບົາ­ຫວານ​ໄດ້​ນຳ​ອີກ.

    ແຕ່​ຖ້າ​ຫາກ​ໃຜ​ຍັງ​ມີ​ຄວາມ​ກັງ­ວົນ​ບໍ່​ກ້າ​ອອກ­ກຳ­ລັງ​ກາຍ ເພາະ​ຢ້ານ​ໄປ​ກະ­ທົບ​ກັບ​ອາ­ການ​ເຈັບ​ຫົວ­ເຂົ່າ ຢ້ານ​ວ່າ​ອາ­ການ​ເຈັບ​ຫົວ­ເຂົ່າ​ຈະ​ເປັນ​ຊຳ​ເຮື້ອ ຄວນ​ສຶກ​ສາ​ກັບ​ແພດ-ໝໍ​ທີ່​ກ່ຽວ­ຂ້ອງ ນັກ​ກາ​ຍະ​ພາບ​ບຳ­ບັດ ຫຼື ຜູ້​ຊ່ຽວ­ຊານ​ດ້ານ​ນີ້ ໂດຍ​ສະ­ເພາະ ເພື່ອ​ກວດ​ປະ​ເມີນ​ລະ­ດັບ​ການ​ເຈັບ ບໍ­ລິ­ເວນ​ທີ່​ເຈັບ ການ​ເສື່ອມ ແລະ ການ­ເຄື່ອນ­ໄຫວ​ຂອງ​ຂໍ້ ເພື່ອ​ນຳ​ເອົາ​ຂໍ້​ມູນ​ທີ່​ໄດ້​ໄປ​ປະ​ເມີນ​ຫາ​ການ​ອອກ­ກຳ­ລັງ​ທີ່​ເໝາະ​ສົມ​ທີ່​ສຸດ.

    ນອກ​ນັ້ນ ຍັງ​ສາ­ມາດ​ທົດ​ສອບ​ສະ­ພາບ​ຕ່າງໆ​ຂອງ​ຮ່າງ­ກາຍ ເຊັ່ນ: ຄວາມ​ແຂງ­ແຮງ ຄວາມ​ທົນ​ຂອງ​ຫົວ­ໃຈ ແລະ ຄວາມ​ຫົດ-ຢືດ​ຂອງ​ກ້າມ­ຊີ້ນ ລວມ​ເຖິງ​ອັດ­ຕາ​ການ​ເຕັ້ນ​ຂອງ​ຫົວ­ໃຈ ແລະ ຊີບ­ພະ­ຈອນ ເພື່ອ​ຊອກ​ຫາ​ລະ­ດັບ​ການ​ອອກ­ກຳ­ລັງ​ກາຍ​ທີ່​ເໝາະ​ສົມ ທີ່​ບໍ່​ກໍ່­ໃຫ້­ເກີດ​ມີ​ຄວາມ­ເຈັບ​ປວດ ແລະ ຄວາມ​ອິດ­ເມື່ອຍ​ຂອງ​ກ້າມ­ຊີ້ນ​ຫຼາຍ​ເກີນ​ໄປ ຈາກ​ນັ້ນ ຕ້ອງ​ວາງ​ແຜນ­ການ​ອອກ­ກຳ­ລັງ​ກາຍ​ໃຫ້​ດີ ໂດຍ​ເນັ້ນ​ໃຫ້​ອອກ­ກຳ­ລັງ​ກາຍ​ທີ່​ມີ​ການ​ເຮັດ​ໃຫ້​ຫົວ­ເຂົ່າ​ຮັບ​ນ້ຳ­ໜັກ​ໜ້ອຍ​ທີ່​ສຸດ ແລະ ບໍ່​ກໍ່­ໃຫ້­ເກີດ​ມີ​ອາ­ການ​ເຈັບ​ປວດ (ດີ​ທີ່​ສຸດ ຕ້ອງ​ຢູ່​ໃນ​ການ​ຕິດ­ຕາມ​ຢ່າງ​ໃກ້­ຊິດ​ຈາກ​ຜູ້​ຊ່ຽວ­ຊານ​ດ້ານ​ການ​ອອກ­ກຳ­ລັງ​ກາຍ).

ຂ່າວທີ່ກ່ຽວຂ້ອງ