ນຳເອົາກົດໝາຍ-ລະບຽບການ ເຂົ້າເຖິງກຸ່ມເປົ້າໝາຍຄຸ້ມຄອງຄົນຕ່າງປະເທດ ໃຫ້ທັນສະພາບການ

    ກອງ​ປະ­ຊຸມ​ທົ່ວ​ປະ­ເທດ​ປຶກ­ສາ​ຫາ­ລື​ກ່ຽວ​ກັບ ແຜນ​ສືບ­ຕໍ່​ແກ້​ໄຂ​ຄົນ​ຕ່າງ­ປະ­ເທດ​ທີ່​ເຄື່ອນ​ໄຫວ​ບໍ່​ຖືກ­ຕ້ອງ​ຕາມ​ກົດ­ໝາຍ​ຂອງ ສປປ ລາວ ອັດ​ລົງ​ດ້ວຍ​ຜົນ­ສຳ­ເລັດ​ຢ່າງ​ຈົບ­ງາມ ພາຍ­ຫຼັງ​ດຳ­ເນີນ​ມາ​ເປັນ​ເວ­ລາ 2 ວັນ ເຊິ່ງ​ພິ­ທີ​ປິດ​ກອງ​ປະ­ຊຸມ​ດັ່ງ­ກ່າວ ຈັດ​ຂຶ້ນ 8 ມັງ­ກອນ 2019 ໂດຍ​ເປັນ​ປະ­ທານ​ຂອງ​ທ່ານ ຄຳ​ແພງ ໄຊ​ສົມ​ແພງ ລັດ­ຖະ­ມົນ­ຕີ​ກະ­ຊວງ​ແຮງ​ງານ ແລະ ສະ­ຫວັດ­ດີ​ການ​ສັງ­ຄົມ (ຮສສ) ແລະ ທ່ານ ພົນ​ຕີ ສິນ​ທະ​ວົງ ໄຊ​ຍະ​ກອນ ຮອງ​ລັດ­ຖະ­ມົນ­ຕີ​ກະ­ຊວງ​ປ້ອງ​ກັນ​ຄວາມ​ສະ­ຫງົບ (ປກສ) ໃຫ້​ກຽດ​ເຂົ້າ​ຮ່ວມ​ຂອງ​ທ່ານ ສອນ​ໄຊ ສີ​ພັນ​ດອນ ຮອງ​ນາ­ຍົກ­ລັດ­ຖະ­ມົນ­ຕີ ພ້ອມ​ດ້ວຍ​ພາກ­ສ່ວນ​ກ່ຽວ­ຂ້ອງ.

    ຜ່ານ​ການ­ຈັດ­ຕັ້ງ​ປະ­ຕິ­ບັດ​ຄຳ​ສັ່ງ​ເລກ​ທີ 62/ນຍ ວ່າ​ດ້ວຍ​ການ​ອຳ­ນວຍ​ຄວາມ​ສະ­ດວກ​ໃຫ້​ແກ່​ການ​ຂຶ້ນ​ທະ­ບຽນ ແລະ ອອກ​ບັດ​ອະ­ນຸ­ຍາດ​ເຄື່ອນ​ໄຫວ​ຊົ່ວ­ຄາວ​ໃຫ້​ຄົນ​ຕ່າງ­ປະ­ເທດ ເຊິ່ງ​ກະ­ຊວງ ຮສສ ແລະ ກະ­ຊວງ ປກສ ໄດ້​ຮ່ວມ​ກັນ​ຈັດ​ຕັ້ງ​ປະ­ຕິ­ບັດ​ແຕ່​ຕົ້ນ​ປີ 2016 ຮອດ​ທ້າຍ​ປີ 2017 ສຳ­ເລັດ​ການ​ຂຶ້ນ​ທະ­ບຽນ 42.434 ຄົນ ຍິງ 11.767 ຄົນ ປັດ­ຈຸ­ບັນ ຕາມ​ການ​ລາຍ​ງານ​ຂອງ​ແຂວງ​ສາ­ມາດ​ແກ້​ໄຂ​ໄດ້ 7.506 ຄົນ ຕ້ອງ​ໄດ້​ສືບ­ຕໍ່​ແກ້​ໄຂ 34.928 ຄົນ ໃນ​ນີ້ ແບ່ງ​ເປັນ​ຜູ້​ສາ­ມາດ​ປັບ​ສະ­ຖາ­ນະ​ພາບ​ໄດ້ 23.168 ຄົນ ແລະ ຜູ້​ທີ່​ຕ້ອງ​ໄດ້​ຊຳ­ລະ​ສະ​ສາງ 11.760 ຄົນ ໝາ­ຍວ່າ ຂະ­ແໜງ ປກສ ຕ້ອງ​ຮັບ­ຜິດ­ຊອບ​ຕິດ­ຕາມ 11.760 ຄົນ ຂະ­ແໜງ ຮສສ 12.960 ຄົນ ແລະ ຂະ­ແໜງ​ອຸດ­ສາ­ຫະ­ກຳ ແລະ ການ​ຄ້າ 10.208 ຄົນ ສຳ­ລັບ​ເງິນ​ທີ່​ເກັບ​ໄດ້​ຈາກ​ການ​ຂຶ້ນ​ທະ­ບຽນ​ມີ 37 ຕື້​ກວ່າ​ກີບ ໃນ​ນີ້ ໄດ້​ຈັດ​ແບ່ງ​ໃຫ້​ແຕ່​ລະ​ພາກ­ສ່ວນ​ຕາມ​ມະ­ຕິ​ກອງ​ປະ­ຊຸມ 2 ຂະ­ແໜງ­ການ ເຊັ່ນ: ບ້ານ 25% ເມືອງ 15% ແຂວງ 50% ແລະ ສູນ​ກາງ 10%.

    ສຳ­ລັບ​ແຜນ­ການ​ສືບ­ຕໍ່​ນຳ​ເອົາ​ຄົນ​ຕ່າງ­ປະ­ເທດ​ທີ່​ເຄື່ອນ​ໄຫວ​ຢູ່ ສປປ ລາວ ເຂົ້າ​ສູ່​ການ​ຄຸ້ມ​ຄອງ​ຕາມ​ກົດ­ໝາຍ ແລະ ລະ­ບຽບ​ການ ແມ່ນ​ໄດ້​ແບ່ງ​ຄວາມ​ຮັບ­ຜິດ­ຊອບ​ໃຫ້​ຂະ­ແໜງ­ການ​ທີ່​ກ່ຽວ­ຂ້ອງ ເປັນ­ຕົ້ນ ຂະ­ແໜງ ປກສ ຕ້ອງ​ເປັນ​ເຈົ້າ​ການ​ຮັບ­ຜິດ­ຊອບ​ຂຶ້ນ​ທະ­ບຽນ 11.760 ຄົນ ຫຼື ຕ່າງ­ປະ­ເທດ​ເຂົ້າ​ມາ​ເຄື່ອນ​ໄຫວ​ແບບ​ເລ້​ລ້ອນ ເຊັ່ນ: ຫາບ ຫິ້ວ ຍູ້​ລໍ້ ບັນ­ທຸກ​ໃສ່​ຍານ­ພາ­ຫະ­ນະ​ຂາຍ​ສິ່ງ​ຂອງ​ຕາມ​ສະ­ຖານ­ທີ່​ຕ່າງໆ ເຄື່ອນ​ໄຫວ​ຊອກ​ຫາ​ວຽກ​ແບບ​ອິດ­ສະ­ຫຼະ ບໍ່​ເປັນ​ຜູ້​ອອກ­ແຮງ​ງານ ຕັ້ງ​ຮ້ານ​ເກມ ຮ້ານ​ບັນ­ເທີງ ເພື່ອ​ບໍ­ລິ­ການ​ແບບ​ບໍ່​ໄດ້​ຮັບ​ອະ­ນຸ­ຍາດ​ຂາຍ​ອາ­ຫານ ຜັກ ໝາກ​ໄມ້ ເຄື່ອງ​ຍ່ອຍ ແລະ ອື່ນໆ ສ່ວນ​ຂະ­ແໜງ ຮສສ ຮັບ­ຜິດ­ຊອບ​ຄົນ​ຕ່າງ­ປະ­ເທດ​ທີ່​ໄດ້​ຮັບ​ການ​ຂຶ້ນ​ທະ­ບຽນ​ໃນ 12.960 ຄົນ ຫຼື ຜູ້​ອອກ­ແຮງ​ງານ​ຕ່າງ­ປະ­ເທດ​ທັງ​ໝົດ ທີ່​ຍັງ​ເຮັດ​ວຽກ​ແບບ​ບໍ່​ຖືກ­ຕ້ອງ ເຊັ່ນ: ເຮັດ​ວຽກ​ນຳ​ຫົວ­ໜ່ວຍ​ແຮງ​ງານ ໂຄງ­ການ ຫ້າງ​ຮ້ານ​ຕ່າງໆ ແລະ ຮັບ­ຜິດ­ຊອບ​ຊຸກ­ຍູ້​ເຈົ້າ​ໜ້າ­ທີ່​ກວດ­ກາ​ແຮງ​ງານ​ໃນ​ທົ່ວ​ປະ­ເທດ ເພື່ອ​ກວດ­ກາ​ການ​ນຳ​ໃຊ້​ແຮງ​ງານ​ຕ່າງ­ປະ­ເທດ ເປັນ​ເຈົ້າ​ການ​ສຶກ​ສາ​ອົບ­ຮົມ ແລະ ປະ­ຕິ­ບັດ​ວິ­ໄນ​ຕໍ່​ເຈົ້າ​ໜ້າ­ທີ່​ກວດ­ກາ​ແຮງ​ງານ​ທີ່​ບໍ່​ປະ­ຕິ­ບັດ ສ່ວນ​ຂະ­ແໜງ​ອຸດ­ສາ­ຫະ­ກຳ ແລະ ການ​ຄ້າ ຮັບ­ຜິດ­ຊອບ​ຂຶ້ນ​ທະ­ບຽນ 10.208 ຄົນ ຫຼື ຜູ້​ລົງ­ທຶນ​ເພື່ອ​ຄ້າ­ຂາຍ ສ້ອມ­ແປງ ດຳ­ເນີນ​ທຸ­ລະ​ກິດ ບໍ­ລິ­ການ​ຮ້ານ​ອາ­ຫານ ເຮືອນ​ພັກ ໂຮງ­ແຮມ ແລະ ການ​ລົງ­ທຶນ​ປະ­ເພດ​ອື່ນໆ​ທີ່​ຂັດ​ກັບ​ກົດ­ໝາຍ ແລະ ລະ­ບຽບ​ການ​ຂອງ​ຂະ­ແໜງ​ດັ່ງ­ກ່າວ ໂດຍ​ສະ­ເພາະ ບັນ­ຊີ​ປະ­ເພດ​ທຸ­ລະ​ກິດ​ທີ່​ສະ­ຫງວນ​ໄວ້​ໃຫ້​ພົນ­ລະ­ເມືອງ​ລາວ.