ຂ່າວຫຼ້າສຸດ

ນັກກີລາຍິງທະນູທີມຊາດລາວ ຫວັງສ້າງຜົນງານໃນຊີເກມ

159 09 ມ.ກ. 2019 ວົງຈອນກີລາ
ນັກກີລາຍິງທະນູທີມຊາດລາວ ຫວັງສ້າງຜົນງານໃນຊີເກມ

    ທ້າວ ຄຳ​ຫວານ ວັນ​ລີ​ວົງ ນັກ­ກີ­ລາ​ຍິງ​ທະ­ນູ​ທີມ​ຊາດ​ລາວ (ປະ­ເພດ​ຄອມ​ປາວ​ໄລ­ຍະ 50 ແມັດ​ຊາຍ) ໃຫ້​ສຳ­ພາດ​ວ່າ: ໃນ​ໄລ­ຍະ​ຕົ້ນ​ປີ 2018 ຜ່ານ​ມາ ນ້ອງ​ໄດ້​ທຸ້ມ­ເທ​ເຂົ້າ​ໃນ​ການ​ເຝິກ­ຊ້ອມ​ຢ່າງ​ໜັກ ຫວັງ​ຢາກ​ສ້າງ​ຜົນ­ງານ​ດີ­ເດັ່ນ​ໃຫ້​ວົງ​ການ​ກີ­ລາ​ຍິງ​ທະ­ນູ​ລາວ ໃນ​ເວ­ທີ​ພາກ​ພື້ນ​ອະ­ນຸ​ພາກ​ພື້ນ ແລະ ສາ­ກົນ ແຕ່​ງານ​ທຳ​ອິດ​ທີ່​ຕັ້ງ​ເປົ້າ​ໝາຍ​ຢາກ​ສ້າງ​ຜົນ­ງານ ກໍ່​ຜິດ​ຫວັງ​ໃນ​ງານ​ມະ​ຫະ​ກຳ​ກີ­ລາ​ເອ​ຊຽນ​ເກມ ຄັ້ງ​ທີ 19 ທີ່​ປະ­ເທດ​ອິນ​ໂດ​ເນ​ເຊຍ ເປັນ​ເຈົ້າ­ພາບ ທ້າຍ​ເດືອນ​ສິງ­ຫາ ຫາ ເດືອນ​ກັນ­ຍາ ແລະ ມາ​ສ້າງ​ຜົນ­ງານ​ຍາດ​ໄດ້ 2 ຫຼຽນ​ເງິນ ແລະ 2 ຫຼຽນ​ທອງ ໃນ​ງານ​ແຂ່ງ­ຂັນ​ຍິງ​ທະ­ນູ ລາຍ­ການ​ເວີນ​ຄັບ 2018 ທີ່​ສະ­ຫະ­ພາບ​ມຽນ​ມາ ເປັນ​ເຈົ້າ­ພາບ ໃນ​ເດືອນ​ພະ­ຈິກ ມີ​ນັກ­ກີ­ລາ​ຈາກ 5 ປະ­ເທດ​ເຂົ້າ​ຮ່ວມ ປະ­ກອບ​ມີ: ລາວ ໄທ ບັງ​ກລາ​ເທດ ຮົງ​ກົງ ເຈົ້າ­ພາບ ມຽນ​ມາ ແລະ ມາ​ຜິດ​ຫວັງ​ຄັ້ງ​ໃຫຍ່ ໃນ​ການ​ເຂົ້າ​ຮ່ວມ​ງານ​ກີ­ລາ​ມະ­ຫາ­ວິ­ທະ­ຍາ­ໄລ​ອາ​ຊຽນ ຄັ້ງ​ທີ 18 ທີ່​ສະ­ຫະ­ພາບ​ມຽນ​ມາ ຈັດ​ຂຶ້ນ​ໃນ​ຕົ້ນ​ເດືອນ​ທັນ­ວາ 2018 ເຮັດ​ບໍ່​ໄດ້​ຕາມ​ຄາດ.

    ສະ­ນັ້ນ ໃນ​ປີ 2019 ນ້ອງ​ຈະ​ສືບ­ຕໍ່​ເຝິກ­ຝົນ​ຫຼໍ່​ຫຼອມ​ຕົນ​ເອງ​ໃຫ້​ໜັກ​ຂຶ້ນ ເພື່ອ​ເຮັດ​ໃຫ້​ຄວາມ​ຫວັງ​ສູງ​ສຸດ ທີ່​ຢາກ​ຈະ​ສ້າງ​ປະ­ຫວັດ­ສາດ​ຄວ້າ​ຫຼຽນ​ຄຳ ໃນ​ການ​ເຂົ້າ​ຮ່ວມ​ແຂ່ງ­ຂັນ​ງານ​ມະ​ຫະ​ກຳ​ກີ­ລາ​ຊີ­ເກມ ຄັ້ງ​ທີ 30 ທີ່​ປະ­ເທດ​ຟີ​ລິບ​ປິນ ຮັບ​ກຽດ​ເປັນ​ເຈົ້າ­ພາບ ໃນ​ທ້າຍ​ປີ​ນີ້ ໃຫ້​ສຳ­ເລັດ​ຕາມ​ຄວາມ​ມຸ້ງ​ຫວັງ​ທີ່​ຕັ້ງ​ໄວ້​ນັ້ນ ນ້ອງ​ຈະ​ເຝິກ­ຊ້ອມ​ເນັ້ນ​ໜັກ​ປັບ­ປຸງ​ຈຸດ​ຄົງ​ຄ້າງ​ທີ່​ເປັນ​ຂໍ້​ຜິດ­ພາດ ໃນ​ໄລ­ຍະ​ທີ່​ໄດ້​ເຂົ້າ​ຮ່ວມ​ແຂ່ງ­ຂັນ​ງານ​ລະ­ດັບ​ນາໆຊາດ​ໃນ​ໄລ­ຍະ 1 ປີ­ຜ່ານ­ມາ ມາ​ແກ້​ໄຂ​ໃຫ້​ດີ​ຂຶ້ນ​ກວ່າ​ເກົ່າ ປັດ­ຈຸ­ບັນ​ກຳ­ລັງ​ຈະ​ໄປ​ເຝິກ​ງານ​ຢູ່​ຕາມ​ທ້ອງ­ຖິ່ນ ຄາດ​ວ່າ​ແມ່ນ​ແຂວງ​ວຽງ​ຈັນ ສະ­ນັ້ນ ການ​ເຝິກ­ຊ້ອມ​ຈະ​ມີ​ຂໍ້​ຫຍຸ້ງ­ຍາກ​ເລັກ​ໜ້ອຍ ແຕ່​ກໍ່​ຈະ​ນຳ​ເອົາ​ອຸ­ປະ­ກອນ​ກີ­ລາ​ຍິງ​ທະ­ນູ​ຕິດ­ຕາມ​ໄປ​ນຳ ເພື່ອ​ຈະ​ລົງ​ເຝິກ​ໃຫ້​ເປັນ​ປົກ­ກະ­ຕິ ແລະ ຈະ​ເດີນ­ທາງ​ມາ​ເຝິກ­ຊ້ອມ​ກັບ​ຄູ​ເຝິກ​ຊາວ​ຈີນ ຮ່ວມ​ກັບ​ນັກ­ກີ­ລາ​ຍິງ​ທະ­ນູ​ເພື່ອນ​ຮ່ວມ​ທີມ​ຊາດ ຢູ່​ທີ່​ໂຮງ­ຮຽນ​ພອນ​ສະ­ຫວັນ​ກີ­ລາ-ກາ​ຍະ​ກຳ ບ້ານ​ສີ​ເກີດ ເມືອງ​ນາ​ຊາຍ​ທອງ ແລະ ສະ­ໜາມ​ກີ­ລາ​ຍິງ​ປືນ 5 ເມ­ສາ ແລະ ກ່ອນ​ຈະ​ຮອດ​ຊີ­ເກມ ຄັ້ງ​ທີ 30 ຄາດ​ວ່າ​ຍັງ​ຈະ​ໄດ້​ເຂົ້າ​ຮ່ວມ​ແຂ່ງ­ຂັນ​ຍິງ​ທະ­ນູ ຊີງ​ແຊັມ​ນາໆຊາດ ທີ່​ປະ­ເທດ​ໄທ ໃນ​ເດືອນ​ມີ­ນາ​ນີ້ ແລະ ລາຍ­ການ​ຊີງ​ແຊັມ​ໂລກ ເດືອນ​ພຶດ­ສະ­ພາ 2019 ທີ່​ນະ­ຄອນ​ຊຽງ​ໄຮ້ ສປ ຈີນ ອີກ​ດ້ວຍ.

ຂ່າວທີ່ກ່ຽວຂ້ອງ