ປີ 2019 ມີຄວາມສ່ຽງສູງທີ່ຈະເກີດລະບາດຂອງພະຍາດໄຂ້ຍຸງລາຍ

492 08 ມ.ກ. 2019 ຂ່າວໜ້າ​ໜຶ່ງ

    ພະ­ຍາດ​ໄຂ້­ຍຸງ​ລາຍ (ໄຂ້­ເລືອດ­ອອກ) ແມ່ນ​ໜຶ່ງ​ໃນ​ບັນ­ດາ​ພະ­ຍາດ​ຕິດ­ຕໍ່​ບຸ­ລິ­ມະ­ສິດ​ທີ່​ລັດ­ຖະ­ບານ ແລະ ກະ­ຊວງ​ສາ­ທາ­ລະ­ນະ​ສຸກ​ເອົາ­ໃຈ­ໃສ່​ເປັນ​ພິ­ເສດ ເຊິ່ງ​ໄຂ້​ດັ່ງ­ກ່າວ​ເກີດ​ຍ້ອນ​ຍຸງ​ລາຍ​ມີ​ເຊື້ອ​ດູດ​ກິນ​ເລືອດ​ຄົນ ເວ­ລາ​ດຽວ​ກັນ​ກໍ່​ປ່ອຍ​ເຊື້ອ​ຈຸ​ລະ​ໂລກ​ເຂົ້າ​ກະ­ແສ​ເລືອດ​ຂອງ​ຄົນ​ທີ່​ຖືກ​ຍຸງ​ລາຍ​ກັດ ເຊື້ອ​ຈຸ​ລະ​ໂລກ​ຍຸງ​ລາຍ​ມີ 4 ຊະ­ນິດ ຄື: Den1 Den2 Den3 Den4 ຍຸງ​ລາຍ​ນຳ​ເຊື້ອ​ມີ 2 ຊະ­ນິດ ຄື: Aedes aegypti ແລະ albopictus ພະ­ຍາດ​ໄຂ້­ຍຸງ​ລາຍ ຖືກ​ຄົ້ນ​ພົບ ແລະ ຢັ້ງ­ຢືນ​ວ່າ​ມີ​ຢູ່ ສປປ ລາວ ປີ 1977 ແລະ ມີ​ການ​ລະ­ບາດ​ຫຼາຍ​ຄັ້ງ ເຊັ່ນ: ປີ 1985 1987 1995 1997 2003 2005 2010 ແລະ ປີ 2013 ມີ​ການ​ລະ­ບາດ​ຂະ­ໜາດ​ໃຫຍ່ ແລະ ໄດ້​ແຜ່​ຂະ­ຫຍາຍ​ເປັນ​ວົງ​ກວ້າງ ແຕ່​ຕົວ​ເມືອງ-ຊົນ­ນະ­ບົດ​ແຂວງ​ຕ່າງໆ​ທົ່ວ​ປະ­ເທດ ໂດຍ​ມີ​ກໍ­ລະ­ນີ​ເຈັບ­ເປັນ 44.171 ກໍ­ລະ­ນີ ເສຍ​ຊີ­ວິດ 95 ຄົນ.

    ສະ­ເພາະ​ປີ 2018 ມີ 6.176 ກໍ­ລະ­ນີ ຕາຍ 18 ຄົນ ໃນ 18 ແຂວງ ມີ 17 ແຂວງ​ທີ່​ມີ​ລາຍ​ງານ​ໄຂ້­ຍຸງ​ລາຍ ແລະ ແຂວງ​ຫົວ­ພັນ ບໍ່​ມີ​ລາຍ​ງານ​ກໍ­ລະ­ນີ​ພະ­ຍາດ​ຍຸງ​ລາຍ ທຽບ­ໃສ່​ປີ 2013 ເພີ່ມ​ຂຶ້ນ​ກວ່າ​ປີ​ອື່ນໆ​ຜ່ານ​ມາ ໂດຍ​ສະ­ເພາະ Den2 ແລະ Den4 ເຊິ່ງ​ມາດ​ຕະ­ການ​ໃນ​ການ​ປ້ອງ​ກັນ ແລະ ຄວບ​ຄຸມ​ໄດ້​ເນັ້ນ​ໃສ່​ວຽກ​ງານ​ປະ­ສານ ແລະ ຊີ້​ນຳ​ໃນ​ການ​ປ້ອງ​ກັນ ແລະ ຄວບ​ຄຸມ­ພະ​ຍາດ​ໄຂ້­ຍຸງ​ລາຍ ວຽກ​ງານ​ເຝົ້າ​ລະ­ວັງ ວຽກ​ງານ​ວິ­ເຄາະ ຄວບ​ຄຸມ​ແຫຼ່ງ​ເຜາະ​ພັນ​ໜອນ​ນ້ຳ​ຍຸງ​ລາຍ ຄຸ້ມ​ຄອງ​ກໍ­ລະ­ນີ ແລະ ວຽກ​ງານ​ໂຄ­ສະ­ນາ​ສຸ​ຂະ​ສຶກ​ສາ ສຳ­ລັບ​ມາດ​ຕະ­ການ​ໃນ​ການ​ຄວບ​ຄຸມ​ແຫຼ່ງ​ເຜາະ​ພັນ​ໜອນ​ນ້ຳ​ຍຸງ​ລາຍ ແມ່ນ​ໃຊ້​ວິ­ທີ​ການ 5ປ ເປັນ​ຫຼັກ.

    ທ່ານ ພູ­ທອນ ເມືອງ​ປາກ ຮອງ​ລັດ­ຖະ­ມົນ­ຕີ​ກະ­ຊວງ​ສາ­ທາ­ລະ­ນະ​ສຸກ ກ່າວ​ວ່າ: ປີ 2019 ເປັນ​ປີ​ໜຶ່ງ​ທີ່​ມີ​ຄວາມ​ສ່ຽງ​ສູງ ທີ່​ຈະ​ເກີດ​ມີ​ການ​ລະ­ບາດ​ຂອງ​ພະ­ຍາດ​ໄຂ້­ຍຸງ​ລາຍ ຖ້າ​ພວກ​ເຮົາ​ບໍ່​ມີ​ມາດ​ຕະ­ການ​ທີ່​ດີ ມີ​ການ​ຖອດ​ຖອນ​ໃນ​ການ​ປ້ອງ​ກັນ ແລະ ສະ­ກັດ​ກັ້ນ​ບໍ່​ໃຫ້​ມີ​ການ​ລະ­ບາດ​ຂອງ​ໄຂ້­ຍຸງ​ລາຍ ໂດຍ​ອີງ​ຕາມ​ການ​ສຶກ​ສາ​ພົບ​ວ່າ ມີ​ການ​ຕ້ານ​ຂອງ​ໜອນ​ນ້ຳ​ຍຸງ​ລາຍ​ຕໍ່​ຊາຍ​ອາ​ເບ ແລ້ວ ນອກ​ນີ້ ຍັງ​ພົບ​ສາຍ​ພັນ​ຍຸງ​ລາຍ​ທັງ 4 ຊະ­ນິດ​ແຜ່​ຫຼາຍ​ຢູ່​ຫຼາຍ​ທ້ອງ­ຖິ່ນ​ຂອງ​ປະ­ເທດ​ເຮົາ ຍ້ອນ​ສະ­ພາບ​ອາ­ກາດ​ມີ​ການ​ປ່ຽນ­ແປງ ມີ​ການ​ຕິດ­ເຊື້ອ ໂດຍ​ບໍ່​ເລືອກ​ລະ­ດູ​ການ ແຫຼ່ງ​ເຜາະ​ພັນ​ຂອງ​ໜອນ​ນ້ຳ​ຍຸງ​ລາຍ​ມີ​ຫຼາຍ​ຂຶ້ນ ແລະ ອື່ນໆ ພະ­ຍາດ​ໄຂ້­ຍຸງ​ລາຍ ແມ່ນ 1 ໃນ 17 ພະ­ຍາດ​ເຝົ້າ​ລະ­ວັງ ເຊິ່ງ​ຕິດ​ພັນ​ກັບ​ຊີ­ວິດ​ປະ­ຈຳ​ວັນ​ຂອງ​ປະ­ຊາ­ຊົນ ຍາກ​ທີ່​ຈະ​ຄວບ​ຄຸມ ຖ້າ​ບໍ່​ມີ​ສ່ວນ​ຮ່ວມ​ຂອງ​ສັງ­ຄົມ ສະ­ນັ້ນ ຈຶ່ງ​ຮຽກ­ຮ້ອງ​ໃຫ້​ທຸກ​ພາກ­ສ່ວນ​ຕ້ອງ​ຮ່ວມ​ແຮງ​ຮ່ວມ​ໃຈ​ກັນ ສະ­ກັດ​ກັ້ນ​ການ​ລະ­ບາດ​ຂອງ​ພະ­ຍາດ​ດັ່ງ­ກ່າວ ເຊິ່ງ​ກະ­ຊວງ​ສາ­ທາ­ລະ­ນະ​ສຸກ ຕ້ອງ​ເຮັດ​ໜ້າ­ທີ່​ພາ­ລະ​ບົດ­ບາດ​ໃຫ້​ດີ​ທີ່​ສຸດ ໂດຍ​ສະ­ເພາະ ການ​ອອກ​ແບບ ວາງ​ແຜນ­ການ​ຕາມ​ຫຼັກ​ວິ­ຊາ​ການ ຈັດ​ສັນ​ງົບ­ປະ­ມານ ຕິດ­ຕາມ​ເຝົ້າ​ລະ­ວັງ​ສະ­ພາບ​ການ ພ້ອມ​ທັງ​ມີ​ມາດ​ຕະ­ການ​ຕອບ​ໂຕ້​ຢ່າງ​ເໝາະ​ສົມ ແລະ ທັນ​ການ ອຳ­ນາດ​ການ​ປົກ­ຄອງ​ຕ້ອງ​ສືບ­ຕໍ່​ຊີ້​ນຳ-ນຳ­ພາ ປຸກ­ລະ­ດົມ​ຂົນ­ຂວາຍ​ສັງ­ຄົມ ບໍ­ລິ­ສັດ​ເອ­ກະ​ຊົນ ອົງ​ການ­ຈັດ­ຕັ້ງ ແລະ ປະ­ຊາ­ຊົນ ໃຫ້​ຕື່ນ​ຕົວ​ເຂົ້າ​ຮ່ວມ​ຂະ​ບວນ​ການ​ຕ່າງໆ ທີ່​ຕິດ​ພັນ​ກັບ​ການ​ຕ້ານ​ພະ­ຍາດ​ໄຂ້­ຍຸງ​ລາຍ ປະ­ຕິ­ບັດ​ຕາມ​ຫຼັກ​ວິ­ຊາ​ການ ປະ­ຊາ­ຊົນ​ຕ້ອງ​ຕື່ນ​ຕົວ​ສະ­ໝັກ​ໃຈ​ປະ­ກອບ­ສ່ວນ​ປະ­ຕິ­ບັດ​ໃຫ້​ເປັນ​ປົກ­ກະ­ຕິ ສ່ວນ​ອົງ​ການ­ຈັດ­ຕັ້ງ​ສາ­ກົນ ແລະ ຄູ່​ຮ່ວມ​ພັດ­ທະ­ນາ ກໍ່​ໃຫ້­ການ​ສືບ­ຕໍ່​ຊ່ວຍ­ເຫຼືອ​ດ້ານ​ເຕັກ­ນິກ​ວິ­ຊາ​ການ ແລະ ດ້ານ​ງົບ­ປະ­ມານ.

ຂ່າວທີ່ກ່ຽວຂ້ອງ