ຢຶດສັດ-ຊິ້ນສ່ວນສັດປ່າຫວງຫ້າມ 1.930,6 ກິໂລ ຢູ່ແຂວງບໍ່ແກ້ວ

349 08 ມ.ກ. 2019 ຂ່າວໜ້າ​ໜຶ່ງ
ຢຶດສັດ-ຊິ້ນສ່ວນສັດປ່າຫວງຫ້າມ 1.930,6 ກິໂລ ຢູ່ແຂວງບໍ່ແກ້ວ

    ໂດຍ​ປະ­ຕິ­ບັດ​ຕາມ​ຄຳ​ສັ່ງ​ຂອງ​ທ່ານ​ນາ­ຍົກ­ລັດ­ຖະ­ມົນ­ຕີ ວ່າ​ດ້ວຍ​ການ​ເພີ່ມ​ທະ­ວີ​ຄວາມ​ເຂັ້ມ​ງວດ​ໃນ​ການ​ຄຸ້ມ​ຄອງ ແລະ ກວດ­ກາ​ສັດ­ປ່າ ແລະ ພືດ​ປ່າ​ປະ­ເພດ​ຫວງ​ຫ້າມ ວັນ​ທີ 8-17 ທັນ­ວາ 2018 ກົມ​ກວດ­ກາ​ປ່າ­ໄມ້ ກະ­ຊວງ​ກະ­ສິ­ກຳ ແລະ ປ່າ­ໄມ້ ໄດ້​ແຕ່ງ­ຕັ້ງ​ເຈົ້າ​ໜ້າ­ທີ່​ປ່າ­ໄມ້ ລົງ​ສົມ­ທົບ​ກັບ​ກອງ​ກວດ­ກາ​ປ່າ­ໄມ້ ແຂວງ​ບໍ່​ແກ້ວ ຄະ­ນະ P-WEN ຄະ­ນະ​ວິ­ຊາ​ການ​ໂຄງ­ການ WWF ຈັດ​ກອງ​ປະ­ຊຸມ​ປຶກ­ສາ​ຫາ­ລື ແລະ ວາງ​ແຜນ​ຮ່ວມ​ກັນ ເພື່ອ​ລົງ​ກວດ­ກາ​ການ​ລັກ­ລອບ​ຊື້-ຂາຍ ເຄື່ອນ​ຍ້າຍ​ຜະ­ລິດ​ຕະ​ພັນ​ສັດ­ປ່າ ແລະ ເຄື່ອງ​ປ່າ​ຂອງ​ດົງ​ຢູ່​ເຂດ​ດ່ານ​ຖິ່ນ ເມືອງ​ຫ້ວຍ​ຊາຍ ແລະ ເຂດ​ເສດ­ຖະ­ກິດ​ພິ­ເສດ​ສາມ­ຫຼ່ຽມ​ຄຳ ແຂວງ​ບໍ່​ແກ້ວ.

    ຜ່ານ​ການ​ລົງ​ກວດ­ກາ​ຕົວ​ຈິງ ສາ­ມາດ​ຢຶດ​ຟານ 1 ໂຕ ໜັກ 22 ກິ​ໂລ ຊິ້ນ​ສ່ວນ​ໝູ່​ປ່າ ໜັກ 17 ກິ​ໂລ ອົ້ນ 6 ໂຕ ໜັກ 12,7 ກິ​ໂລ ເຫງັນ 5 ໂຕ ໜັກ 19,7 ກິ​ໂລ ລວມ 71,4 ກິ​ໂລ ສະ​ຂ່ານ ໜັກ 240 ກິ​ໂລ ຫວາຍ​ຂົມ ຫວາຍ​ນົກ​ຂໍ້ ຫວາຍ​ຝາດ ໜັກ 1.295 ກິ​ໂລ ຫົວ​ຕາວ ໜັກ 315 ກິ​ໂລ ຢູ່​ເຂດ​ດ່ານ​ຖິ່ນ ສຳ­ລັບ​ຢູ່​ເຂດ​ພິ­ເສດ​ສາມ­ຫຼ່ຽມ​ຄຳ ໄດ້​ລົງ​ກວດ­ກາ​ຮ້ານ​ຂາຍ­ເຄື່ອງ​ຫັດ­ຖະ­ກຳ ນາງ ຈານ​ເປົາ ພົບ​ເຫັນ​ເຂົາ​ກວາງ 1 ອັນ ໜັກ 1,8 ກິ​ໂລ ນໍ​ແຮດ 1 ອັນ ໜັກ 0,4 ກິ​ໂລ ໜັງ​ຊ້າງ 1 ອັນ ໜັກ 0,4 ກິ​ໂລ ເຂົາ​ຟານ 1 ອັນ ໜັກ 0,2 ກິ​ໂລ ກະ­ດູກ 1 ອັນ 1,6 ກິ​ໂລ ຊິ້ນ​ສ່ວນ​ຄ້າຍ­ຄື​ເຂົາ​ສັດ 4 ອັນ ແລະ ແຂ້ວ​ສັດ 2 ອັນ ໜັກ 0,1 ກິ​ໂລ ລວມ 4,5 ກິ​ໂລ ສ່ວນ​ຢູ່​ເມືອງ​ຕົ້ນ​ເຜີ້ງ ຢຶດ​ລິ່ນ​ມີ​ຊີ­ວິດ 1 ໂຕ ໜັກ 1,7 ກິ​ໂລ ເຫຼົ້າ​ບອງ​ຊິ້ນ​ສ່ວນ​ສັດ­ປ່າ ເຫຼົ້າ​ບອງ​ຢາ­ພື້ນ­ເມືອງ ເຂົາ​ກວາງ​ອ່ອນ 0,2 ກິ​ໂລ ໜັງ​ຊ້າງ 0,9 ກິ​ໂລ ຂົນ​ເໝັ້ນ 0,5 ກິ​ໂລ ບີ​ກະ­ທິງ 0,1 ກິ​ໂລ ໂຄງ​ເສືອ 0,2 ກິ​ໂລ ກັບ­ແກ້​ແຫ້ງ 0,7 ກິ​ໂລ ແລະ ເຂົາ​ສັດ 0,2 ກິ​ໂລ ລວມ​ນ້ຳ­ໜັກ 3 ກິ​ໂລ ສັດ­ປ່າ​ທີ່​ມີ​ຊີ­ວິດ ລິ່ນ 1 ໂຕ ນ້ຳ­ໜັກ 1,7 ກິ​ໂລ ສັງ​ລວມ​ແລ້ວ​ສາ­ມາດ​ຢຶດ​ໄດ້​ທັງ​ໝົດ 1.930,6 ກິ​ໂລ ເຊິ່ງ​ເຈົ້າ​ໜ້າ­ທີ່​ໄດ້​ຢຶດ​ໄວ້​ເປັນ​ຂອງ​ກາງ ພ້ອມ​ກັນ​ນັ້ນ ເພີ່ມ​ຄວາມ​ເຂັ້ມ​ງວດ​ໃນ​ການ​ກວດ­ກາ​ລາດ­ຕະ­ເວນ​ຢູ່​ຕາມ​ເຂດ​ຫຼໍ່​ແຫຼມ ພ້ອມ​ທັງ​ລົງ​ເກັບ​ກຳ​ຂໍ້​ມູນ​ບັນ­ດາ​ຮ້ານ​ຂາຍ­ເຄື່ອງ​ປະ­ດັບ ແລະ ຂອງ​ທີ່​ລະ­ນຶກ​ພາຍ​ໃນ​ແຂວງ ແລະ ເຂດ​ເສດ­ຖະ­ກິດ​ພິ­ເສດ​ສາມ­ຫຼ່ຽມ​ຄຳ​ຢ່າງ​ຕໍ່​ເນື່ອງ ຕ້ອງ​ດຳ­ເນີນ​ຄະ­ດີ​ຕໍ່​ຜູ້​ກະ­ທຳ​ຜິດ​ຕາມ​ລະ­ບຽບ ແລະ ກົດ­ໝາຍ​ຢ່າງ​ເຂັ້ມ​ງວດ ໃນ​ນີ້​ຂອງ​ກາງ​ທີ່​ຢຶດ​ໄດ້​ທັງ​ໝົດ ໄດ້​ຊີ້​ນຳ​ໃຫ້​ກອງ​ກວດ­ກາ​ປ່າ­ໄມ້​ແຂວງ​ບໍ່​ແກ້ວ ປະ­ຕິ­ບັດ​ດັ່ງ­ນີ້: ສຳ­ລັບ​ສັດ­ປ່າ​ທີ່​ຕາຍ​ແລ້ວ​ແມ່ນ​ໃຫ້​ທຳ­ລາຍ​ຖິ້ມ ສ່ວນ​ສັດ​ທີ່​ຍັງ​ມີ​ຊີ­ວິດ​ແມ່ນ​ໃຫ້​ຟື້ນ​ຟູ​ສຸ­ຂະ­ພາບ ແລ້ວ​ປ່ອຍ​ຄືນ​ສູ່​ທຳ​ມະ​ຊາດ ປະ­ເພດ​ເຫຼົ້າ​ບອງ​ຢາ​ຊິ້ນ​ສ່ວນ​ສັດ­ປ່າ ແລະ ຜະ­ລິດ​ຕະ​ພັນ​ສັດ­ປ່າ ໃຫ້​ກອງ​ກວດ­ກາ​ປ່າ­ໄມ້ ປົກ​ປັກ​ຮັກ­ສາ​ໄວ້ ເພື່ອ​ການ​ສຶກ​ສາ​ຄົ້ນ­ຄວ້າ ສຳ­ລັບ​ຜະ­ລິດ​ຕະ​ພັນ​ຊິ້ນ​ສ່ວນ​ສັດ­ປ່າ​ທີ່​ຢຶດ​ໄດ້​ເຈົ້າ​ໜ້າ­ທີ່​ປ່າ­ໄມ້ ກົມ​ກວດ­ກາ​ປ່າ­ໄມ້​ຈະ​ສົມ­ທົບ​ກັບ​ພາກ­ສ່ວນ​ກ່ຽວ­ຂ້ອງ ແລະ ຜູ້​ຊ່ຽວ­ຊານ ເອົາ​ໄປ​ພິ­ສູດ​ຕື່ມ​ອີກ ເພື່ອ​ເປັນ​ຫຼັກ​ຖານ​ໃນ​ການ​ດຳ­ເນີນ​ຄະ­ດີ​ຕໍ່​ໄປ.

ຂ່າວທີ່ກ່ຽວຂ້ອງ