ຂ່າວຫຼ້າສຸດ

ສຳເລັດການສະຫຼອງບຸນກິນຈຽງ 2019

461 08 ມ.ກ. 2019 ວົງຈອນກີລາ
ສຳເລັດການສະຫຼອງບຸນກິນຈຽງ 2019

    ສະ­ຫະ­ພັນ​ກີ­ລາ​ພື້ນ­ເມືອງ ແລະ ກີ­ລາ​ສັດ​ແຫ່ງ​ຊາດ​ລາວ ສຳ­ເລັດ​ງານ​ເທ​ສະ­ການ​ສະ­ເຫຼີມ­ສະ­ຫຼອງ​ບຸນ­ປີ­ໃໝ່​ຂອງ​ຊົນ­ເຜົ່າ​ມົ້ງ (ບຸນ​ກິນ​ຈຽງ 2019) ວັນ​ທີ 6 ມັງ­ກອນ 2019 ຢູ່​ສະ­ໂມ­ສອນ​ກີ­ລາ​ພື້ນ­ເມືອງ-ກີ­ລາ​ສັດ​ລາວ​ສຳ­ພັນ ບ້ານ​ຊຳ​ເກດ ເມືອງ​ສີ​ໂຄດ​ຕະ­ບອງ ນະ­ຄອນ­ຫຼວງ​ວຽງ​ຈັນ ໂດຍ​ມີ​ທ່ານ ວັນ​ສີ ກົວ​ມົ່ວ ຫົວ­ໜ້າ​ຫ້ອງ­ການ​ກະ­ຊວງ​ຖະ​ແຫຼ່ງ​ຂ່າວ ວັດ­ທະ­ນາ​ທຳ ແລະ ທ່ອງ​ທ່ຽວ ທ່ານ ສຸ­ລິ­ຍາ ວົງ​ສະ​ໜໍ​ລະ​ພູມ ຄະ­ນະ​ປະ­ທານ​ສະ­ຫະ­ພັນ​ກີ­ລາ​ພື້ນ­ເມືອງ ແລະ ກີ­ລາ​ສັດ​ແຫ່ງ​ຊາດ​ລາວ ພ້ອມ​ດ້ວຍ​ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

    ການ​ຈັດ​ກິດ­ຈະ­ກຳ​ຕ່າງໆ ດຳ­ເນີນ​ມາ​ແຕ່​ວັນ​ທີ 28 ທັນ­ວາ 2018-6 ມັງ­ກອນ 2019 ໃນ​ນີ້​ມີ​ແຂ່ງ­ຂັນ 9 ລາຍ­ການ ຄື: ຄັດ​ເລືອກ​ນາງ​ສາວ​ງາມ ບານ­ເຕະ ມວຍ​ລາວ ໝາກ​ຂ່າງ ຍິງ​ໜ້າ​ເກັກ ເປ​ຕັງ ງົວ​ຊົນ​ງົວ ໄກ່­ຕີ​ໄກ່ ແລະ ກີ­ລາ​ແຂ່ງ​ມ້າ ເພື່ອ​ເປັນ​ການ​ສະ­ເຫຼີມ­ສະ­ຫຼອງ​ສົ່ງ​ທ້າຍ​ປີ​ເກົ່າ 2018 ແລະ ຕ້ອນ­ຮັບ​ປີ​ໃໝ່ 2019 (ເທ​ສະ­ການ​ບຸນ​ກິນ​ຈຽງ​ຊົນ­ເຜົ່າ​ມົ້ງ ປະ­ຈຳ​ປີ 2019) ຕາມ​ຮີດ­ຄອງ​ປະ­ເພ­ນີ ແລະ ວັດ­ທະ­ນະ­ທຳ​ອັນ​ດີ­ງາມ​ຂອງ​ຊົນ­ເຜົ່າ​ມົ້ງ ທີ່​ເຄີຍ​ປະ­ຕິ­ບັດ​ກັນ​ມາ​ແຕ່​ດົນ​ນານ.

    ສຳ­ລັບ​ການ​ແຂ່ງ­ຂັນ​ໄກ່­ຕີ​ໄກ່ ຈັດ​ຂຶ້ນ​ວັນ​ທີ 5 ທັນ­ວາ 2019 ຜ່ານ​ການ​ແຂ່ງ­ຂັນ​ອັນ​ດັບ 1 ສະ­ໂມ­ສອນ​ໄກ່­ຕີ​ໂຊກ​ມີ​ໄຊ ໄດ້​ຮັບ​ຂັນ+ເງິນ​ລາ­ງວັນ 1,5 ລ້ານ​ກີບ ອັນ​ດັບ 2 ສະ­ໂມ­ສອນ​ໄກ່­ຕີ​ສຸ​ປະ­ຫວັດ ໄດ້​ຮັບ​ຂັນ+ເງິນ​ລາ­ງວັນ 1 ລ້ານ​ກີບ ອັນ​ດັບ 3 ສະ­ໂມ­ສອນ​ໄກ່­ຕີ​ມັງ­ກອນ​ທອງ ໄດ້​ຮັບ​ຂັນ+ເງິນ​ລາ­ງວັນ 500.000 ກີບ.

ຂ່າວທີ່ກ່ຽວຂ້ອງ