ຂ່າວຫຼ້າສຸດ

ເຕົ້າໂຮມສອງເຂດເສດຖະກິດພິເສດ ຢູ່ແຂວງສະຫວັນນະເຂດ

254 07 ມ.ກ. 2019 ຂ່າວໜ້າ​ໜຶ່ງ

    ອາ­ທິດ​ຜ່ານ​ມາ ທ່ານ ສຸ­ພັນ ແກ້ວ​ມີ​ໄຊ ລັດ­ຖະ­ມົນ­ຕີ​ກະ­ຊວງ​ແຜນ­ການ ແລະ ການ​ລົງ­ທຶນ ໄດ້​ເປັນ​ປະ­ທານ​ໃນ​ພິ­ທີ​ປະ­ກາດ​ໂຮມ​ເຂດ​ເສດ­ຖະ­ກິດ​ພິ­ເສດ​ສະ­ຫວັນ-ເຊ​ໂນ ແລະ ເຂດ​ການ​ຄ້າ​ຊາຍ​ແດນ-ບ້ານ​ແດນ​ສະ­ຫວັນ ເຂົ້າ­ກັນ​ເປັນ​ຄະ­ນະ​ຄຸ້ມ​ຄອງ​ເຂດ​ເສດ­ຖະ­ກິດ​ພິ­ເສດ ແຂວງ​ສະ­ຫວັນ​ນະ​ເຂດ. ເພື່ອ​ເປັນ​ກຳ­ລັງ​ແຮງ​ລວມ​ສູນ ໃນ​ການ​ຕິດ­ຕາມ​ກວດ­ກາ ແລະ ຄຸ້ມ​ຄອງ ຊຸກ­ຍູ້-ສົ່ງ­ເສີມ ອຳ­ນວຍ​ຄວາມ​ສະ­ດວກ​ໃນ​ການ​ດຶງ​ດູດ​ການ​ລົງ­ທຶນ ທັງ​ພາຍ​ໃນ ແລະ ຕ່າງ­ປະ­ເທດ ເພື່ອ​ພັດ­ທະ­ນາ​ເສດ­ຖະ­ກິດ​ຂອງ​ແຂວງ​ສະ­ຫວັນ​ນະ​ເຂດ ກໍ່​ຄື ປະ­ເທດ​ຊາດ​ໃຫ້​ມີ​ຄວາມ​ເຂັ້ມ­ແຂງ​ຍິ່ງໆ​ຂຶ້ນ.

    ໂອ​ການ​ດຽວ​ກັນ​ນັ້ນ ທ່ານ ສຸ­ພັນ ແກ້ວ​ມີ​ໄຊ ໄດ້​ໃຫ້​ກຽດ​ໂອ້​ລົມ ໂດຍ​ຊີ້​ໃຫ້​ເຫັນ​ວ່າ: ເນື່ອງ​ຈາ​ກວ່າ​ປະ­ເທດ​ລາວ​ເຮົາ ເປັນ​ປະ­ເທດ​ທີ່​ບໍ່​ໃຫຍ່ ເສດ­ຖະ­ກິດ​ຂະ­ຫຍາຍ​ໂຕ​ບໍ່​ສູງ ຖ້າ​ທຽບ­ໃສ່​ປະ­ເທດ​ອື່ນ ເຊັ່ນ: ປະ­ເທດ​ຍີ່­ປຸ່ນ ດັ່ງ­ນັ້ນ ເພື່ອ​ເຮັດ​ໃຫ້­ການ​ປະ­ຕິ­ບັດ​ແນວ­ທາງ​ນະ­ໂຍ­ບາຍ​ຈາກ​ສູນ​ກາງ​ລົງ­ທ້ອງ​ຖິ່ນ ເພື່ອ​ສະ­ດວກ​ໃນ​ການ​ປະ­ຕິ­ບັດ​ນະ­ໂຍ­ບາຍ​ດຽວ​ໃຫ້​ທົ່ວ​ທຸກ​ພາກ­ສ່ວນ ເປັນ­ຕົ້ນ ຫ້ອງ­ການ​ປະ­ຕູ​ດຽວ ໃຫ້​ມີ​ຜູ້​ຊີ້​ນຳ​ພຽງ​ຄົນ​ດຽວ ເພື່ອ​ສ້າງ​ເງື່ອນ­ໄຂ​ອຳ­ນວຍ​ຄວາມ​ສະ­ດວກ​ໃນ​ການ​ລົງ­ທຶນ.

    ທ່ານ ເຕັ່ງ​ເມັ່ງ ຢ່າງ​ລື​ໄຊ ຮອງ​ຫົວ­ໜ້າ​ກົມ​ຈັດ​ຕັ້ງ ແລະ ພະ­ນັກ­ງານ ກະ­ຊວງ​ແຜນ­ການ ແລະ ການ​ລົງ­ທຶນ ກ່າວ​ວ່າ: ການ​ໂຮມ​ເຂົ້າ­ກັນ​ໃນ​ຄັ້ງ​ນີ້ ແມ່ນ​ປະ­ຕິ­ບັດ​ຕາມ​ການ​ຕົກ­ລົງ​ຂອງ​ລັດ­ຖະ­ບານ ກໍ່​ຄື ມະ­ຕິ​ຕົກ­ລົງ​ຂອງ​ທ່ານ​ລັດ­ຖະ­ມົນ­ຕີ​ກະ­ຊວງ​ແຜນ­ການ ແລະ ການ​ລົງ­ທຶນ ເລກ​ທີ 3266/ກຜທ ນະ­ຄອນ­ຫຼວງ​ວຽງ​ຈັນ ລົງ​ວັນ​ທີ 28 ທັນ­ວາ 2018 ດ້ວຍ​ການ​ໂຮມ​ເຂດ​ເສດ­ຖະ­ກິດ​ພິ­ເສດ​ສະ­ຫວັນ-ເຊ​ໂນ ແລະ ເຂດ​ການ​ຄ້າ​ຊາຍ​ແດນ-ບ້ານ​ແດນ​ສະ­ຫວັນ​ເຂົ້າ​ຮ່ວມ​ກັນ ນັບ​ຕັ້ງ­ແຕ່​ວັນ​ທີ 31 ທັນ­ວາ 2018 ເປັນ­ຕົ້ນ​ໄປ ໂດຍ​ໃຫ້​ທ່ານ ທອງ​ໃສ ໄຊ​ຍະ​ວົງ​ຄຳ​ດີ ເປັນ​ຜູ້​ຊີ້​ນຳ​ລວມ.

ຂ່າວທີ່ກ່ຽວຂ້ອງ