ຂ່າວຫຼ້າສຸດ

ສ ເກົາຫຼີ ມອບເຂົ້າສານ 1 ພັນໂຕນ ໃຫ້ລັດຖະບານລາວ

177 07 ມ.ກ. 2019 ຂ່າວໜ້າ​ໜຶ່ງ

    ລັດ­ຖະ­ບານ ສ ເກົາ­ຫຼີ ໄດ້​ນຳ​ເອົາ​ເຂົ້າ­ສານ​ຈຳ­ນວນ 1 ພັນ​ໂຕນ ຈາກ​ຄັງ​ແຮ​ເຂົ້າ​ສຸກ​ເສີນ​ອາ​ຊຽນ​ບວກ​ສາມ ມາ​ມອບ​ໃຫ້​ລັດ­ຖະ­ບານ​ລາວ ໃນ​ວັນ​ທີ 4 ມັງ­ກອນ 2019 ທີ່​ນະ­ຄອນ­ຫຼວງ​ວຽງ​ຈັນ ເພື່ອ​ແຈກ​ຢາຍ​ໃຫ້​ປະ­ຊາ­ຊົນ​ຜູ້​ທີ່​ປະ­ສົບ​ໄພ­ພິ­ບັດ​ຢູ່ ສປປ ລາວ ໂດຍ​ສະ­ເພາະ ຢູ່​ເມືອງ​ສະ­ໜາມ​ໄຊ ແຂວງ​ອັດ​ຕະ​ປື ຕາງ­ໜ້າ​ມອບ​ໂດຍ​ທ່ານ ຊິນ ຊອງ​ຊຸນ ເອກ​ອັກ​ຄະ​ລັດ​ຖະ​ທູດ ສ ເກົາ­ຫຼີ ປະ­ຈຳ​ລາວ ແລະ ຕາງ­ໜ້າ​ຮັບ​ໂດຍ​ທ່ານ​ນາງ ໃບ​ຄຳ ຄັດ​ທິ​ຍະ ຮອງ​ລັດ­ຖະ­ມົນ­ຕີ​ກະ­ຊວງ​ແຮງ​ງານ ແລະ ສະ­ຫວັດ­ດີ​ການ​ສັງ­ຄົມ ພ້ອມ​ດ້ວຍ​ພາກ­ສ່ວນ​ກ່ຽວ­ຂ້ອງ​ທັງ​ສອງ​ຝ່າຍ​ເຂົ້າ​ຮ່ວມ ເປັນ​ສັກ­ຂີ​ພິ­ຍານ.

    ໃນ​ໂອ­ກາດ​ດັ່ງ­ກ່າວ ທ່ານ​ນາງ ໃບ​ຄຳ ຄັດ​ທິ​ຍະ ໄດ້​ຕາງ­ໜ້າ​ໃຫ້​ລັດ­ຖະ­ບານ​ລາວ ສະ­ແດງ​ຄວາມ​ຂອບ­ໃຈ​ມາ​ຍັງ​ລັດ­ຖະ­ບານ ສ ເກົາ­ຫລີ ກໍ່​ຄື ທ່ານ​ເອກ​ອັກ​ຄະ​ລັດ​ຖະ​ທູດ ສ ເກົາ­ຫຼີ ປະ­ຈຳ​ລາວ ທີ່​ໄດ້​ນຳ​ເອົາ​ເຂົ້າ­ສານ​ມາ​ມອບ​ໃຫ້​ໃນ​ຄັ້ງ​ນີ້ ພ້ອມ​ຢືນ­ຢັນ​ວ່າ ຈະ​ນຳ​ເອົາ​ເຂົ້າ­ສານ​ຈຳ­ນວນ​ດັ່ງ­ກ່າວ​ໄປ​ມອບ​ໃຫ້​ປະ­ຊາ­ຊົນ​ທີ່​ປະ­ສົບ​ໄພ­ພິ­ບັດ​ຢ່າງ​ທົ່ວ​ເຖິງ ແລະ ລັດ­ຖະ­ບານ ສ ເກົາ­ຫຼີ ພ້ອມ​ຈະ​ສືບ­ຕໍ່​ນຳ​ເອົາ​ເຂົ້າ­ສານ ມາ​ມອບ​ໃຫ້​ລັດ­ຖະ­ບານ​ລາວ​ຕື່ມ​ອີກ​ໃນ­ຕໍ່­ໜ້າ.

    ໃນ​ໄລ­ຍະ​ຜ່ານ​ມາ​ກະ­ຊວງ​ແຮງ​ງານ ແລະ ສະ­ຫວັດ­ດີ​ການ​ສັງ­ຄົມ ປະ­ທານ​ຄະ­ນະ​ກຳ­ມະ­ການ​ປ້ອງ​ກັນ ແລະ ຄວບ​ຄຸມ​ໄພ­ພິ­ບັດ​ແຫ່ງ​ຊາດ ໄດ້​ຕາງ­ໜ້າ​ໃຫ້​ລັດ­ຖະ­ບານ ຂົນ­ຂວາຍ​ທຶນ­ຮອນ ນຳ​ສັງ­ຄົມ​ບັນ­ດາ​ປະ­ເທດ​ເພື່ອນ​ມິດ ອົງ​ການ­ຈັດ­ຕັ້ງ​ສາ­ກົນ ແລະ ອົງ​ການ­ຈັດ­ຕັ້ງ​ທີ່​ບໍ່​ສັງ­ກັດ​ລັດ­ຖະ­ບານ ເພື່ອ​ປະ­ກອບ­ສ່ວນ​ຊ່ວຍ­ເຫຼືອ ຜູ້​ປະ­ສົບ​ໄພ­ພິ­ບັດ​ຢູ່​ຂອບ​ເຂດ​ທົ່ວ​ປະ­ເທດ ໂດຍ​ສະ­ເພາະ ຢູ່​ເມືອງ​ສະ­ໜາມ​ໄຊ ແຂວງ​ອັດ​ຕະ​ປື.

ຂ່າວທີ່ກ່ຽວຂ້ອງ