ເບິ່ງບ້ານເຂົາເອົາບົດຮຽນ 03/01/2019

293 03 ມ.ກ. 2019 ຫົວຂໍ້ຂ່າວອື່ນໆ

    ມື້­ນີ້​ມີ​ເລື່ອງ​ການ​ຄຸ້ມ​ຄອງ​ການ​ຊື້-ຂາຍ ແລະ ປຸກ­ເຮືອນ​ຢູ່ ກູ​ບາ ເລື່ອງ​ສັງ­ຄົມ​ໄທ ບໍ່​ພໍ­ໃຈ​ການ​ອອກ​ແບບ​ເກີບ​ຢູ່​ຝຣັ່ງ ທີ່​ມີ​ສີ​ທຸງ­ຊາດ​ໄທ ແລະ ຄວາມ​ໝາຍ​ໝັ້ນ​ຂອງ​ຜູ້­ນຳ ອິນ​ເດຍ ໃນ​ການ​ກຳ​ຈັດ­ການ​ສໍ້​ລາດ​ບັງ​ຫຼວງ.

    ທີ່ ກູ​ບາ: ໃນ​ຕົ້ນ​ເດືອນ​ສິງ­ຫາ ປີ 2018 ທາງ​ການ​ກູ​ບາ ໄດ້​ອອກ​ຂໍ້​ກຳ­ນົດ​ໃໝ່​ກ່ຽວ​ກັບ​ການ​ຊື້-ຂາຍ ແລກ­ປ່ຽນ ແລະ ການ​ປຸກ​ສ້າງ​ເຮືອນ​ໃນ​ບັນ­ດາ​ເຂດ​ພິ­ເສດ ເຊິ່ງ​ຕ້ອງ​ໄດ້​ອະ­ນຸ­ຍາດ​ຈາກ​ກະ­ຊວງ​ການ­ທ່ອງ­ທ່ຽວ ແລ້ວ​ຈຶ່ງ​ສົ່ງ​ໄປ​ຜ່ານ​ບັນ­ດາ​ອົງ­ການ​ທີ່​ຮັບ­ຜິດ­ຊອບ​ທີ່​ພັກ​ພາ​ອາ­ໄສ ເຂດ​ພິ­ເສດ​ທີ່​ວ່າ​ນັ້ນ ລວມ​ມີ​ພື້ນ​ທີ່​ສຳ­ລັບ​ການ­ທ່ອງ­ທ່ຽວ ວາ​ຣາ​ເດ​ໂຣ ແລະ ບັນ­ດາ​ເມືອງ​ໃນ​ເຂດ​ເທ­ສະ​ບານ​ໃຈ­ກາງ​ນະ­ຄອນ­ຫຼວງ ລາ​ຮາ​ວານ ເຊິ່ງ​ເອີ້ນ​ກັນ​ວ່າ: ເຂດ​ເກົ່າ​ແກ່ ໃນ​ປັດ­ຈຸ­ບັນ ເຂດ​ໃຈ­ກາງ​ດັ່ງ­ກ່າວ ໄດ້​ກາຍ­ເປັນ​ສູນ​ກາງ​ການ­ທ່ອງ­ທ່ຽວ ນອກ­ຈາກ​ນັ້ນ ຂໍ້​ກຳ­ນົດ​ໃໝ່​ດັ່ງ­ກ່າວ​ນີ້ ຍັງ​ມີ​ເປົ້າ​ໝາຍ​ຮັກ­ສາ​ຄວາມ​ສົມ​ດູນ​ດ້ານ​ຈຳ­ນວນ​ຂອງ​ປະ­ຊາ­ກອນ ບໍ່​ໃຫ້​ເພີ່ມ​ຂຶ້ນ​ກາຍ​ຄວາມ​ຈຳ­ເປັນ​ໃນ​ເຂດ​ດັ່ງ­ກ່າວ ໃນ​ເດືອນ​ພະ­ຈິກ ປີ 2011 ລັດ­ຖະ­ບານ​ກູ​ບາ ໄດ້​ເລີ່ມ​ອະ­ນຸ­ຍາດ​ໃຫ້​ເອ­ກະ​ຊົນ​ສາ­ມາດ ຊື້-ຂາຍ ເຮືອນ​ຢູ່​ໄດ້ ໃນ​ປັດ­ຈຸ­ບັນ  ຫຼາຍ​ຕົວ​ເມືອງ​ໃຫຍ່​ໃນ​ທົ່ວ​ໂລກ ໄດ້​ອອກ​ຂໍ້​ກຳ­ນົດ​ຈຳ­ກັດ​ຈຳ­ນວນ​ປະ­ຊາ­ກອນ​ໃຫ້​ສົມ­ສ່ວນ​ກັນ ຄວາມ​ສາ­ມາດ​ໃນ​ການ​ບໍ­ລິ­ການ​ດ້ານ​ສາ­ທາ­ລະ­ນະ​ສຸກ​ທີ່​ພັກ​ພາ​ອາ­ໄສ ລະ­ບົບ​ການ​ຂົນ­ສົ່ງ ການ​ເພີ່ມ​ຂຶ້ນ​ຂອງ​ປະ­ຊາ­ກອນ​ເປັນ​ຈຳ­ນວນ​ຫຼວງ­ຫຼາຍ​ໂດຍ​ໄວ​ໃນ​ຕົວ​ເມືອງ​ໃຫຍ່​ນັ້ນ ຍັງ​ກໍ່­ໃຫ້­ເກີດ​ບັນ­ຫາ​ມົນ​ລະ​ພິດ ແລະ ບັນ­ຫາ​ຫຍໍ້­ທໍ້​ຫຼາຍ​ຢ່າງ​ໃນ​ສັງ­ຄົມ​ອີກ​ດ້ວຍ.

    ທີ່ ປະ­ເທດ​ໄທ: ຫວ່າງ​ບໍ່​ດົນ​ມາ​ນີ້ ສື່​ສັງ­ຄົມ​ຂອງ​ໄທ​ຈຳ­ນວນ​ໜຶ່ງ ໄດ້​ສະ­ແດງ​ຄວາມ​ບໍ່​ພໍ­ໃຈ​ທີ່​ນັກ​ອອກ​ແບບ​ເກີບ​ຝຣັ່ງ ທີ່​ນະ­ຄອນ­ຫຼວງ​ປາ​ຣີ ໄດ້​ໃສ່​ສີ​ເກີບ​ເປັນ​ສີ​ດຽວ​ກັບ​ສີ​ທຸງ­ຊາດ​ໄທ (ໜັງ­ສື­ພິມ ເດິ​ເນ​ເຊິນ 17/10/2018) ເຖິງ​ຂັ້ນ​ທ່ານ​ນາ­ຍົກ ປຣະ​ຢຸດ ຈັນ​ໂອ­ຊາ ໄດ້​ມີ​ຄຳ​ສັ່ງ​ໃຫ້​ກະ­ຊວງ​ການ​ຕ່າງ­ປະ­ເທດ​ໄທ ຕິດ­ຕາມ​ເບິ່ງ​ບັນ­ຫາ​ດັ່ງ­ກ່າວ ແຕ່​ທ່ານ​ກໍ່​ບອກ​ວ່າ ບໍ່​ຮູ້​ຈະ​ເຮັດ​ຢ່າງ­ໃດ ເຖິງ​ວ່າ​ໄທ​ມີ​ກົດ­ໝາຍ​ກ່ຽວ​ກັບ​ທຸງ­ຊາດ ແຕ່​ສີ (ແດງ ຂາວ ແລະ ສີ­ຟ້າ) ນັ້ນ ພັດ​ເປັນ​ສີ​ລວມ​ຂອງ​ປະ­ຊາ​ຄົມ​ໂລກ ທ່ານ​ນາ­ຍົກ​ບອກ​ຕື່ມ​ວ່າ ຢູ່​ຫຼາຍ​ປະ­ເທດ​ໃນ​ໂລກ ຄົນ​ສາ­ມາດ​ໃຊ້​ທຸງ­ຊາດ​ຕາມ­ໃຈ​ມັກ ບໍ່​ຖື​ເປັນ​ບັນ­ຫາ ແຕ່​ສຳ­ລັບ​ຢູ່​ປະ­ເທດ​ໄທ​ແລ້ວ ທຸງ­ຊາດ​ແມ່ນ​ເຄື່ອງ­ໝາຍ​ຕົວ​ແທນ​ຊາດ ສາ­ສະ­ໜາ ແລະ ພະ​ມະ­ຫາ​ກະ­ສັດ ຊາວ​ສື່​ສັງ­ຄົມ​ໄທ​ຈຳ­ນວນ​ໜຶ່ງ ໄດ້​ຮຽກ­ຮ້ອງ​ໃຫ້​ພວກ​ອອກ​ແບບ​ເກີບ​ທີ່​ມີ​ສີ​ທຸງ­ຊາດ​ໄທ​ຂໍ​ໂທດ ແລະ ມີ​ບົດ​ລົງ­ໂທດ​ຈຳ​ຄຸກ​ພວກ​ເຂົາ­ເຈົ້າ ແຕ່​ບັນ­ຫາ​ມີ​ຢູ່​ວ່າ ເກີບ​ເຈົ້າ​ບັນ­ຫາ​ນັ້ນ​ຜະ­ລິດ​ຢູ່​ນອກ​ປະ­ເທດ​ໄທ ຈຶ່ງ​ບໍ່​ສາ­ມາດ​ຕັດ­ສິນ​ໂທດ​ພວກ​ອອກ​ແບບ​ໄດ້ ຖ້າ​ເກີບ​ດັ່ງ­ກ່າວ​ຜະ­ລິດ ແລະ ນຳ​ໃຊ້​ຢູ່​ພາຍ​ໃນ​ປະ­ເທດ​ໄທ ຜູ້​ຜະ­ລິດ ແລະ ຜູ້​ໃຊ້ ຈະ​ຕ້ອງ​ຖືກ​ປັບ​ໃໝ​ເປັນ​ເງິນ 2.000 ບາດ ຫຼື ຮັບ​ໂທດ​ຈຳ​ຄຸກ​ເປັນ​ເວ­ລາ 1 ປີ.

    ທີ່ ອິນ​ເດຍ: ກ່ອນ​ໜ້າ​ນີ້​ສອງ​ປີ (ໜັງ­ສື­ພິມ​ວຽງ​ຈັນ​ທາມ 10/11/2016) ໄດ້​ສະ­ເໜີ​ຂ່າວ​ກ່ຽວ​ກັບ​ຄຳ​ຮຽກ­ຮ້ອງ​ຂອງ​ທ່ານ ນາ​ເຣັນ​ດຣາ​ໂມ​ດີ ນາ­ຍົກ­ລັດ­ຖະ­ມົນ­ຕີ​ອິນ​ເດຍ ໃຫ້​ປະ­ຊາ­ຊົນ​ອິນ​ເດຍ​ຮ່ວມ​ກັນ​ຕໍ່­ສູ້ ເພື່ອ​ເຮັດ​ໃຫ້​ເປັນ​ປະ­ເທດ​ຂາວ​ສະ­ອາດ ປາ­ສະ­ຈາກ​ໄພ​ສໍ້​ລາດ​ບັງ​ຫຼວງ ແລະ ເງິນ​ມືດ ທ່ານ​ນາ­ຍົກ​ໄດ້​ກ່າວ​ຂອບ­ໃຈ ບັນ­ດາ ດາ​ຣາ ນັກ­ສະ­ແດງ­ຮູບ­ເງົາ ໂບນ​ລີ​ວູດ ເຊັ່ນ: ຣາ​ຈີ​ນິ​ກັນ ອາ​ມີ​ຕາບ ບາກ​ຈານ ຣີ​ຊິ​ກາ​ປໍ ແລະ ອາ​ນຸດ​ສະ­ກາ ຊາກ​ມາ ທີ່​ໄດ້​ຮ່ວມ​ໃນ​ຂະ​ບວນ​ຕ້ານ​ການ​ສໍ້​ລາດ​ບັງ​ຫຼວງ ແລະ ເວົ້າ​ວ່າ: ພວກ​ເຮົາ​ທຸກ​ຄົນ​ຕ້ອງ​ເຮັດ​ວຽກ​ຄຽງ​ບ່າ​ຄຽງ​ໄຫຼ່ ເພື່ອ​ເຮັດ​ໃຫ້​ອິນ​ເດຍ​ກາຍ­ເປັນ​ປະ­ເທດ​ທີ່​ສົມ­ບູນ​ພູນ​ສຸກ ມີ​ສ່ວນ​ຮ່ວມ​ຂອງ​ທຸກໆ​ຄົນ ແລະ ປອດ​ຈາກ​ພະ­ຍາດ ສໍ້​ລາດ​ບັງ​ຫຼວງ.

ຂ່າວທີ່ກ່ຽວຂ້ອງ