ຂ່າວຫຼ້າສຸດ

ຍິ່ງແກ້ຍິ່ງໄດ້

1.224 03 ມ.ກ. 2019 ນານາສາລະ

    ຍິ່ງ​ແກ້​ໄຂ ຍິ່ງ​ເກີດ​ລາຍ​ໄດ້ ກໍ່​ຄື ການ​ແກ້​ໄຂ​ບັນ­ຫາ​ເງິນ​ຮົ່ວ​ໄຫຼ ເຊິ່ງ​ບໍ່​ສາ­ມາດ​ເກັບ​ລາຍ​ຮັບ​ເທົ່າ​ທີ່​ຄວນ ໃນ​ວາ­ລະ​ການ​ດຳ­ເນີນ​ກອງ​ປະ­ຊຸມ ສະ­ໄໝ​ສາ­ມັນ​ເທື່ອ​ທີ 6 ຂອງ​ສະ­ພາ​ແຫ່ງ​ຊາດ​ຊຸດ​ທີ VIII ທ່ານ ທອງ​ລຸນ ສີ​ສຸ​ລິດ ນາ­ຍົກ­ລັດ­ຖະ­ມົນ­ຕີ ໄດ້​ຊີ້​ແຈງ​ຕໍ່​ສະ­ມາ­ຊິກ​ສະ­ພາ​ແຫ່ງ​ຊາດ ກ່ຽວ​ກັບ​ມາດ​ຕະ­ການ​ເກັບ​ລາຍ​ຮັບ ແລະ ການ​ຄຸ້ມ​ຄອງ​ລາຍ​ຈ່າຍ ເຊິ່ງ​ລັດ­ຖະ­ບານ​ຕັດ­ສິນ​ໃຈ​ຫັນ​ໄປ​ສູ່​ຄວາມ​ໂປ່ງ​ໃສ ລະ­ບຽບ​ກົດ­ໝາຍ​ບໍ່​ໃຫ້​ຍົກ­ເວັ້ນ​ສິນ­ຄ້າ​ທີ່​ບໍ່​ເປັນ​ລະ­ບົບ​ລະ­ບຽບ​ອື່ນໆ.

    ການ​ເກັບ​ລາຍ​ຮັບ​ຕ້ອງ​ຫັນ​ໄປ​ສູ່​ທັນ​ສະ­ໄໝ ທຸກ​ພາກ­ສ່ວນ​ຕ້ອງ​ເອົາ­ໃຈ­ໃສ່​ຊ່ວຍ​ກັນ​ສ້າງ​ໃຫ້​ເປັນ​ລະ­ບຽບ​ກົດ­ໝາຍ ເພາະ​ຖ້າ​ບໍ່​ຫັນ​ໄປ​ສູ່​ທັນ​ສະ­ໄໝ​ກໍ່​ຈະ​ຮົ່ວ​ໄຫຼ​ຄື­ເກົ່າ ພ້ອມ​ນີ້ ກໍ່​ຈະ​ເຂັ້ມ​ງວດ​ຜູ້​ໃດ​ຜິດ​ຈະ​ຕ້ອງ​ລົງ­ໂທດ ຫຼື ຜູ້​ໃດ​ຖືກ­ຕ້ອງ​ໄດ້​ຮັບ​ການ​ຍ້ອງ­ຍໍ ທ່ານ​ນາ­ຍົກ​ຍັງ​ໄດ້​ຢ້ຳ​ຕື່ມ​ວ່າ: ພະ­ນັກ­ງານ​ໃນ​ຂະ­ແໜງ​ພາ­ສີ-ອາ­ກອນ​ຕ້ອງ​ໄດ້​ປະ­ຕິ​ຮູບ​ຄືນ­ໃໝ່ ເພາະ​ປັດ­ຈຸ­ບັນ​ໃຊ້​ຄົນ​ຫຼາຍ​ເກີນ​ໄປ ແລະ ຂາດ​ຈັນ​ຍາ​ບັນ ຕ້ອງ​ເອົາ​ຄົນ​ດີ​ມາ​ເຮັດ ດັ່ງ­ນັ້ນ ຂໍ​ໃຫ້​ສະ­ມາ­ຊິກ​ສະ­ພາ​ແຫ່ງ​ຊາດ​ຊ່ວຍ​ກັນ​ສະ­ໜັບ­ສະ­ໜູນ ແລະ ປະ­ຊາ­ຊົນ​ເປັນ​ຫູ​ເປັນ­ຕາ.

    ເວົ້າ​ເລື່ອງ​ຄົນ​ກັບ​ເງິນ​ນີ້ ຜູ້​ຂຽນ​ຄິດ​ຂຶ້ນ​ໄດ້​ບົດ­ຮຽນ​ໃນ​ອະ­ດີດ ມີ​ຄັ້ງ​ໜຶ່ງ​ເຈົ້າ​ຊີ­ວິດ​ເບີກ​ຈ່າຍ​ເງິນ​ໃຫ້​ແກ່​ຄົນ​ຮັກ­ສາ​ສວນ­ສັດ ເຊິ່ງ​ມື້­ໜຶ່ງ​ຈະ​ຕ້ອງ​ເບີກ​ຈ່າຍ​ໃຫ້​ໄປ​ຊື້​ອາ­ຫານ​ມາ​ໃຫ້​ສັດ 7 ເຟື້ອງ ອະ­ດີດ​ໃຊ້​ເງິນ​ເຟື້ອງ ສ່ວນ​ຜູ້​ເປັນ​ຫົວ­ໜ້າ​ສວນ­ສັດ​ກໍ່​ຮັບ​ເອົາ​ເງິນ 7 ເຟື້ອງ​ນັ້ນ​ມອບ​ໃຫ້​ລູກ​ນ້ອງ 6 ເຟື້ອງ ເພື່ອ​ໄປ​ຊື້​ຊີ້ນ​ມາ​ໃຫ້​ເສືອ ແລະ ສິງ​ກິນ ແຕ່​ລູກ​ນ້ອງ​ຄົນ​ນັ້ນ​ໄດ້​ໃຊ້​ເງິນ​ມາ​ໃຫ້​ເສືອ ແລະ ສິງ​ກິນ​ມື້​ລະ 4 ເຟື້ອງ ຢູ່​ຕໍ່​ມາ​ເດືອນ​ໜຶ່ງ​ເສືອ​ກັບ​ສິງ​ກິນ​ອາ­ຫານ​ບໍ່​ພຽງ­ພໍ​ມັນ​ຈຶ່ງ​ຕາຍ ເຈົ້າ​ຊີ­ວິດ​ຈຶ່ງ​ເອີ້ນ​ມາ​ກວດ​ສອບ​ຫາ​ຄວາມ​ຈິງ ຈຶ່ງ​ພົບ​ວ່າ​ພວກ​ຮັກ­ສາ​ສວນ­ສັດ ທັງ​ຫົວ­ໜ້າ ແລະ ລູກ​ນ້ອງ​ຕ່າງ​ກໍ່​ຫັກ​ກິນ​ເງິນ​ຂອງ​ສັດ.

    ການ​ກວດ­ກາ ຫຼື ກວດ​ສອບ ແລະ ໃຊ້​ມາດ​ຕະ­ການ​ຫັນ​ໄປ​ສູ່​ຄວາມ​ໂປ່ງ​ໃສ ມີ​ລະ­ບຽບ​ກົດ­ໝາຍ​ເປັນ​ມາດ­ຕະ­ຖານ ຜູ້​ຜິດ​ຕ້ອງ​ຮັບ​ໂທດ ຖື​ເປັນ​ມາດ​ຕະ­ການ​ທີ່​ສຽບ​ຂາດ​ທີ່​ສັງ­ຄົມ​ລາວ​ຕ່າງ ກໍ່​ຊື່ນ​ຊົມ​ກັບ​ແນວ­ທາງ​ຂອງ​ລັດ­ຖະ­ບານ ເພາະ​ມີ​ແຕ່​ການ​ກວດ­ກາ​ແກ້​ໄຂ​ເປັນ​ປະ­ຈຳ​ເທົ່າ​ນັ້ນ ຈຶ່ງ​ຄ້ຳ­ປະ­ກັນ​ບໍ່​ໃຫ້​ລາຍ​ຮັບ​ຮົ່ວ.     

ດັ້ນ​ກີບ​ເມກ

ຂ່າວທີ່ກ່ຽວຂ້ອງ