ຫຼິ້ນປີໃໝ່ສາກົນ

1.114 28 ທ.ວ. 2018 ນານາສາລະ

    ປີ​ໃໝ່​ສາ­ກົນ ກາຍ​ມາ​ເປັນ​ປະ­ເພ­ນີ​ໜຶ່ງ ເຮັດ​ໃຫ້​ຄົນ​ສ່ວນ​ໃຫຍ່​ໃນ​ບັນ­ດາ​ປະ­ເທດ​ໃນ​ທົ່ວ​ໂລກ ໄດ້​ມີ​ການ​ສະ­ເຫຼີມ­ສະ­ຫຼອງ​ທຸກ​ປີ ເນື້ອ​ແທ້​ກໍ່​ແມ່ນ​ການ​ຕໍ່​ຍອດ​ຈາກ​ບຸນ​ຄຣິດ​ສະ​ມາ​ສ​ອີບ ແຕ່​ປີ​ໃໝ່​ສາ­ກົນ​ແມ່ນ​ຖື​ເອົາ​ວັນ​ທີ 1 ມັງ­ກອນ ຂອງ​ວິ­ນາ­ທີ​ທຳ​ອິດ​ທີ່​ມີ​ການ​ປ່ຽນ­ແປງ​ຈາກ 0 ໂມງ ແຕ່​ການ​ສະ­ຫຼອງ​ຄຶກ­ຄື້ນ​ຄົງ​ແມ່ນ​ແຕ່​ວັນ​ທີ 31 ປີ​ເກົ່າ ແລະ ວັນ​ທີ 1 ປີ​ໃໝ່ ໂດຍ​ສະ­ເພາະ ຄ່ຳ​ຄືນ​ວັນ​ທີ 31 ຕໍ່​ໃສ່​ວັນ​ທີ 1 ປີ​ໃໝ່ ແມ່ນ​ການ​ສະ­ຫຼອງ​ທີ່​ເບີກ­ບານ​ມ່ວນ­ຊື່ນ​ທີ່​ສຸດ ແລະ ການ​ສະ­ຫຼອງ​ນີ້​ມີ​ທັງ​ຢູ່​ຄອບ­ຄົວ​ພີ່­ນ້ອງ ແລະ ກຸ່ມ​ໝູ່​ເພື່ອນ.

    ປະ­ເພ­ນີ​ໂດຍ​ທົ່ວ​ໄປ​ອີກ​ອັນ​ໜຶ່ງ​ກ່ອນ​ຈະ​ສີ້ນ​ສຸດ​ປີ ສຳ­ນັກ­ງານ ອົງ­ການ ບໍ­ລິ­ສັດ ຫ້າງ​ຮ້ານ​ທີ່​ປະ­ກອບ​ການ ກໍ່​ຈະ​ຈັດ​ຕັ້ງ​ໃຫ້​ມີ​ການ​ສະ­ຫຼຸບ​ປີ ສະ­ຫຼຸບ​ບັນ­ຊີ​ການ​ໃຊ້​ຈ່າຍ ການ​ປະ­ກອບ​ການ​ຄ້າ­ຂາຍ​ຫງາຍ​ມື​ຕ່າງໆ​ໄດ້​ຮັບ​ຜົນ​ໜ້ອຍ​ຫຼາຍ​ພໍ​ພຽງ​ໃດ ບາງ​ຮ້ານ ບາງ​ບໍ­ລິ­ສັດ​ຕົກ​ເດືອນ 11-12 ກໍ່​ມີ​ການ​ລົດ​ແລກ​ແຈກ​ແຖມ ຄືນ​ກຳ­ໄລ​ແກ່​ລູກ​ຄ້າ​ດ້ວຍ​ຮູບ​ການ​ຕ່າງໆ ເຮັດ​ໃຫ້​ເກີດ​ສີ­ສັນ ແລະ ກະ​ຕຸ້ນ​ຈິດ­ໃຈ​ລູກ​ຄ້າ​ໄປ​ຈັບ​ຈ່າຍ​ໃຊ້​ສອຍ​ຕື່ມ​ອີກ ບໍ­ລິ­ສັດ​ວິ​ສາ​ຫະ​ກິດ​ມັກ​ຈະ​ຈ່າຍ​ເງິນ­ເດືອນ ທີ 13 ໃຫ້​ລູກ​ຄ້າ ຫຼື ບາງ​ບ່ອນ​ກໍ່​ໄດ້​ສອງ-ສາມ​ເດືອນ​ແລ້ວ ແຕ່​ຜົນ​ລາຍ​ຮັບ​ປະ­ກອບ​ການ​ຂອງ​ປີ​ນັ້ນ.

    ເວົ້າ​ສະ­ເພາະ​ປະ­ເທດ​ເຮົາ ການ​ຫຼີ້ນ​ປີ​ໃໝ່​ສາ­ກົນ​ມັກ​ມີ​ແຕ່​ຢູ່​ໃນ​ຕົວ​ເມືອງ​ໃຫຍ່​ຂອງ​ແຂວງ ເທ­ສະ​ບານ ສ່ວນ​ຊົນ­ນະ­ບົດ​ແທ້ ກໍ່​ຍັງ​ບໍ່​ທັນ​ຍິນ​ດີ​ຍິນ​ຮ້າຍ​ນຳ​ແຕ່​ຢ່າງ­ໃດ ຄື​ເຮັດ​ກະ​ໄດ້ ບໍ່​ເຮັດ​ກະ­ດີ ສະ­ເພາະ​ໃນ​ນະ­ຄອນ­ຫຼວງ ຊຶ່ງ​ເປັນ​ສູນ​ການ­ເມືອງ ການ​ປົກ­ຄອງ ເສດ­ຖະ­ກິດ ວັດ­ທະ­ນະ­ທຳ​ຂອງ​ປະ­ເທດ ແລະ ມີ​ສຳ­ນັກ­ງານ​ຜູ້­ຕາງ­ໜ້າ​ອົງ­ການ​ສາ­ກົນ ສະ­ຖານ­ທູດ ນັກ​ລົງ­ທຶນ​ຕ່າງ­ປະ­ເທດ​ຫຼາຍ ບາງ​ຄົນ​ກໍ່​ກັບ​ເມືອ​ສະ­ຫຼອງ​ຢູ່​ປະ­ເທດ​ຕົນ ການ­ຈັດ­ຕັ້ງ​ສົມ­ທົບ​ກັບ​ອົງ​ການ­ຈັດ­ຕັ້ງ​ທາງ​ສັງ­ຄົມ​ໃດ​ໜຶ່ງ ຈັດ​ຈຸດ​ພົບ​ປະ​ສັງ​ສັນ​ກັນ​ຂຶ້ນ​ໃນ​ຮູບ​ແບບ​ລາ­ຕີ​ສະ­ໂມ­ສອນ ໃສ່​ໜຶ່ງ​ຫາ​ຫຼາຍ​ຈຸດ​ທີ່​ເຫັນ​ວ່າ​ເໝາະ​ສົມ ເພື່ອ​ເຮັດ​ໃຫ້​ແຂກ​ຄົນ​ມີ​ບ່ອນ​ຫຼີ້ນ​ມ່ວນ­ຊື່ນ ໂດຍ​ສະ­ເພາະ ຊາວ​ນະ­ຄອນ­ຫຼວງ.

    ງານ​ນີ້​ມີ​ການ​ປະ­ດັບ​ປະ­ດາ​ສະ­ຖານ­ທີ່​ໃຫ້​ສວຍ​ງາມ ເປັນ​ທີ່​ດຶງ​ດູດ​ໃຈ​ໃຫ້​ເຂົ້າ​ກັບ​ບັນ­ຍາ­ກາດ​ປີ​ໃໝ່​ສາ­ກົນ ມີ​ຕົ້ນ​ແປກ​ເອ້​ຢ້ອງ​ດ້ວຍ​ແສງ​ໄຟ​ລະ​ຍິບ​ລະ​ຍັບ ສິ່ງ​ທີ່​ຂາດ​ບໍ່​ໄດ້ ກໍ່​ຄື ຄຳ​ວ່າ “HAPPY NEW YEAR” ປົກ­ກະ­ຕິ​ເພິ່ນ​ເລິ່ມ​ເປີດ​ງານ​ແຕ່ 10 ໂມງ ຫຼື 22 ໂມງ ຜູ້​ເຂົ້າ​ຮ່ວມ​ຈະ​ນຸ່ງ​ຖື​ອອກ​ໄປ​ໃນ​ແນວ​ສາ­ກົນ ຫຼື ໃສ່­ເຄື່ອງ​ກັນ​ໜາວ​ເພາະ​ແມ່ນ​ຍາມ­ໜາວ​ມາ​ຮອດ​ແລ້ວ ງານ​ເລິ່ມ​ຈາກ​ການ​ພົບ​ປະ​ສັງ​ສັນ​ກິນ​ດື່ມ ຟ້ອນ ແລະ ສະ­ຫຼັບ​ດ້ວຍ​ລາຍ­ການ​ທີ່​ໜ້າ​ສົນ­ໃຈ​ຕ່າງໆ​ທີ່​ຜູ້​ຈັດ​ນຳ​ມາ​ສະ­ເໜີ ພໍ​ເຖິງ​ໃກ້​ຈະ​ຮອດ 0 ໂມງ ການ­ຈັດ­ຕັ້ງ​ກໍ່​ມອດ​ໄຟ​ນັບ​ຖອຍ­ຫຼັງ “ເຄົ້າ​ດາວ” ເມື່ອ​ຮອດ​ວິ­ນາ­ທີ​ທຳ​ອິດ​ຂອງ​ປີ​ໃໝ່​ເພິ່ນ​ກໍ່​ໄຕ້­ໄຟ​ຂຶ້ນ ຈາກ​ນັ້ນ ບັ້ງ­ໄຟ­ດອກ​ກໍ່​ຖືກ​ຍິງ​ຂຶ້ນ​ຟ້າ​ເພື່ອ​ຕ້ອນ­ຮັບ ແລະ ສະ­ຫຼອງ​ປີ​ໃໝ່ ຕິດ­ຕາມ​ດ້ວຍ​ສຽງ​ຮ້ອງ “ແຮບ​ປີ ນິວ​ເຢຍ” ຖືກ​ຮ້ອງ​ຊ້ອນໆ​ດັງ​ແຮງ​ຂຶ້ນ​ດັ່ງ​ເປັນ​ຄຳ​ຂວັນ ແລະ ຜູ້​ຄົນ​ຕ່າງ​ກໍ່​ຕຳ​ຈອກ ແລະ ຕ່າງ​ອວຍ­ພອນ​ເຊິ່ງ​ກັນ ແລະ ກັນ ແລະ ທັງ​ຊັກ​ຊວນ​ກັນ​ໄປ​ຟ້ອນ ເຕັ້ນ​ຢ່າງ​ມ່ວນ­ຊື່ນ​ຈົນ​ເຖິງ​ເວ­ລາ​ອັນ​ຄວນ.

ໂດຍ: ດອກ​ຊ້ອນ ດອນ​ໂຂງ

ຂ່າວທີ່ກ່ຽວຂ້ອງ