ຈັດກິດຈະກຳສະຫຼອງວັນສ້າງຕັ້ງ ຄອລ ຄົບຮອບ 40 ປີ

407 26 ທ.ວ. 2018 ວົງຈອນກີລາ
ຈັດກິດຈະກຳສະຫຼອງວັນສ້າງຕັ້ງ ຄອລ ຄົບຮອບ 40 ປີ

    ກິດ­ຈະ­ກຳ​ສະ­ເຫຼີມ­ສະ­ຫຼອງ​ວັນ​ສ້າງ­ຕັ້ງ ຄະ­ນະ​ກຳ­ມະ­ການ​ໂອ​ແລມ​ປິກ​ລາວ (ຄອລ) ໄດ້​ມີ​ຂຶ້ນ​ວັນ​ທີ 22 ທັນ­ວາ 2018 ຜ່ານ​ມາ ທີ່​ສະ­ໜາມ​ກີ­ລາ​ເຈົ້າ​ອາ​ນຸ​ວົງ ເມືອງ​ຈັນ­ທະ​ບູ​ລີ ນະ­ຄອນ­ຫຼວງ​ວຽງ​ຈັນ ໂດຍ​ມີ​ທ່ານ​ນາງ ແສງ​ເດືອນ ຫຼ້າ​ຈັນ­ທະ​ບູນ ລັດ­ຖະ­ມົນ­ຕີ​ກະ­ຊວງ​ສຶກ​ສາ​ທິ​ການ ແລະ ກີ­ລາ ປະ­ທານ ຄອລ ພ້ອມ​ດ້ວຍ​ບັນ­ດາ​ຮອງ​ລັດ­ຖະ­ມົນ­ຕີ ຜູ້­ຕາງ­ໜ້າ​ຄະ­ນະ​ກຳ­ມະ­ການ​ໂອ​ແລມ​ປິກ​ແຫ່ງ​ຊາດ​ຈາກ ສສ ຫວຽດ­ນາມ ກຳ­ປູ­ເຈຍ ແລະ ໄທ ພະ­ນັກ­ງານ ຄູ-ອາ­ຈານ ຕະ­ຫຼອດ​ນ້ອງ​ນັກ­ຮຽນ​ທົ່ວ​ນະ­ຄອນ­ຫຼວງ​ວຽງ​ຈັນ​ເຂົ້າ​ຮ່ວມ.

    ໂອ­ກາດ​ນີ້ ທ່ານ ສົມ​ພູ ພົງ­ສາ ຮອງ​ປະ­ທານ ແລະ ເລ­ຂາ­ທິ­ການ ຄອລ ກ່າວ​ວ່າ: ຄອລ ໄດ້​ສ້າງ­ຕັ້ງ​ຂຶ້ນ ແລະ ລົງ​ລາຍ​ເຊັນ​ໂດຍ​ປະ­ທານ​ສະ­ພາ​ລັດ­ຖະ­ມົນ­ຕີ ແລະ ຖືກ​ຮັບ­ຮອງ​ເປັນ​ສະ­ມາ­ຊິກ ຄອສ ໃນ​ປີ 1978 ແລະ ສະ­ມາ­ຊິກ​ສົມ­ບູນ​ໃນ​ປີ 1979 ມາ​ເຖິງ​ປັດ­ຈຸ­ບັນ ຄອລ ເປັນ​ສະ­ມາ­ຊິກ​ໂອ​ແລມ​ປິກ​ສາ­ກົນ ເຊິ່ງ​ມີ 206 ປະ­ເທດ​ສະ­ມາ­ຊິກ ຫຼັງ​ຈາກ​ສ້າງ­ຕັ້ງ ຄອລ ແຕ່​ປີ 1979 ເຖິງ 2018 ປີ​ນີ້ ພໍ­ດີ​ຄົບ­ຮອບ 40 ປີ ເຊິ່ງ​ພວກ​ເຮົາ​ໄດ້​ມາ​ເຕົ້າ­ໂຮມ​ກິດ­ຈະ­ກຳ​ກິ­ລາ​ມື້­ນີ້​ແມ່ນ ເພື່ອ​ພ້ອມ​ກັນ​ເຄື່ອນ​ໄຫວ​ຢ່າງ​ຕໍ່​ເນື່ອງ​ມາ​ຕາມ​ສິດ​ຂອບ​ເຂດ ແລະ ພາ­ລະ​ບົດ­ບາດ​ຂອງ​ຕົນ.

    ທ່ານ​ນາງ ແສງ​ເດືອນ ຫຼ້າ​ຈັນ­ທະ​ບູນ ກ່າວ​ວ່າ: ຕະ­ຫຼອດ​ໄລ­ຍະ​ການ​ສ້າງ­ຕັ້ງ ຄອລ ເຫັນ​ໄດ້​ວ່າ​ມີ​ພາ­ລະ​ບົດ­ບາດ ແລະ ຜົນ­ງານ​ທີ່​ພົ້ນ​ເດັ່ນ​ຫຼາຍ​ດ້ານ​ເຕີບ​ໃຫຍ່​ຂະ­ຫຍາຍ­ຕົວ​ຢ່າງ​ກວ້າງ­ຂວາງ ພິ­ເສດ​ແມ່ນ​ປີ 2009 ທີ່ ສປປ ລາວ ຮັບ​ກຽດ​ເປັນ​ເຈົ້າ­ພາບ​ງານ​ກີ­ລາ​ຊີ­ເກມ ຄັ້ງ​ທີ 25 ອັນ​ໄດ້​ຍົກ​ບົດ­ບາດ​ຂອງ​ລາວ​ເຮົາ ຂຶ້ນ​ໃນ​ເວ­ທີ​ສາ­ກົນ​ທັງ​ດ້ານ​ສັງ­ຄົມ ແລະ ວັດ­ທະ­ນະ­ທຳ ການ​ຮ່ວມ​ມື ແລະ ເສດ­ຖະ­ກິດ​ຂອງ​ຊາດ ນັບ​ມາ​ຮອດ​ປັດ­ຈຸ­ບັນ ຄອລ ໄດ້​ນຳ​ພາ­ເຂົ້າ​ຮ່ວມ​ແຂ່ງ­ຂັນ​ກີ­ລາ​ຮ່ວມ​ກັບ​ສະ­ຫະ­ພັນ​ກີ­ລາ​ແຫ່ງ​ຊາດ​ລາວ ໃນ​ງານ​ກີ­ລາ​ຊີ­ເກມ ເຖິງ 15 ຄັ້ງ ເອ​ຊຽນ​ເກມ 10 ຄັ້ງ ແລະ ໂອ​ແລມ​ປິກ 9 ຄັ້ງ ການ­ເຄື່ອນ­ໄຫວ​ແຕ່​ລະ​ຄັ້ງ ສ້າງ​ໄດ້​ໃນ​ການ​ຮ່ວມ​ມື​ພັດ­ທະ­ນາ​ວົງ​ການ​ກີ­ລາ​ລາວ ຢ່າງ​ເຕີບ​ໃຫຍ່​ຂະ­ຫຍາຍ​ຂຶ້ນ​ຢ່າງ​ຕໍ່​ເນື່ອງ.

    ສຳ­ລັບ​ກິດ­ຈະ­ກຳ​ຄັ້ງ​ນີ້ ປະ­ກອບ​ມີ ຍ່າງ​ອອກ­ກຳ­ລັງ​ເພື່ອ​ສຸ­ຂະ­ພາບ ອ້ອມ​ສະ­ໜາມ​ກີ­ລາ​ເຈົ້າ​ອະ­ນຸ­ວົງ 3 ຮອບ ທັງ​ໝົດ 1.200 ແມັດ ຫຼັງ​ຈາກ​ນັ້ນ ກໍ່​ໄດ້​ຊົມ​ການ­ສະ­ແດງ​ຟ້ອນ​ສິ­ລະ​ປະ​ຈາກ​ວິ­ທະ­ຍາ­ໄລ​ສິ­ລະ​ປະ​ສຶກ​ສາ ການ­ສະ­ແດງ​ເຕັ້ນ​ເຊຍ ການ­ສະ­ແດງ​ກີ­ລາ​ມວຍ 4 ປະ­ເພດ ຄື: ປັນ​ຈັກ​ສີ​ລັດ ວູ​ຊູ ເທ​ຄວັນ​ໂດ ແລະ ມວຍ​ລາວ ປະ­ກອບ​ອຸ­ປະ­ກອນ ແລະ ສຽງ​ເພງ ແລະ ການ​ແຂ່ງ­ຂັນ​ກີ­ລາ​ດຶງ­ເຊືອກ​ຄຽງ​ຄູ່​ກັນ​ນັ້ນ ຕະ­ຫຼອດ​ໄລ­ຍະ​ການ​ສະ­ຫຼອງ ຄອລ ຍັງ​ໄດ້​ຈັດ​ແຂ່ງ­ຂັນ​ກີ­ລາ 4 ປະ­ເພດ ປະ­ກອບ​ມີ ບານ­ເຕະ ກະ­ຕໍ້ ບານ­ສົ່ງ ແລະ ລອຍ­ນ້ຳ​ອີກ​ດ້ວຍ.

ຂ່າວທີ່ກ່ຽວຂ້ອງ