ຂ່າວຫຼ້າສຸດ

ເບິ່ງບ້ານເຂົາເອົາບົດຮຽນ 25/12/2018

431 25 ທ.ວ. 2018 ຫົວຂໍ້ຂ່າວອື່ນໆ

    ຄໍ​ລຳ​ປະ­ຈຳ​ວັນ​ນີ້ ຂໍ​ເລີ່ມ​ຈາກ​ຂ່າວ​ກ່ຽວ​ກັບ​ນະ­ໂຍ­ບາຍ​ຄົນ​ເຂົ້າ-ອອກ​ເມືອງ ສະ­ບັບ​ໃໝ່​ຂອງ ກູ​ບາ ການ​ຕັດ­ສິນ​ຄະ­ດີ ຂົ່ມ­ຂືນ ຢູ່ ມາ​ເລ​ເຊຍ ແລະ ມາດ​ຕະ­ການ​ກຳ­ຈັດ​ສິນ­ຄ້າ​ປອມ ກ່ອນ​ບຸນ­ປີ­ໃໝ່​ທີ່ ສປ ຈີນ.

    ທີ່ ກູ​ບາ: ໃນ​ທ້າຍ​ເດືອນ​ຕຸ­ລາ 2017 ກູ​ບາ ໄດ້​ປະ­ກາດ​ໃຊ້​ນະ­ໂຍ­ບາຍ​ຄົນ​ເຂົ້າ​ເມືອງ​ສະ­ບັບ​ໃໝ່ ແນ­ໃສ່​ເສີມ​ຂະ­ຫຍາຍ ແລະ ຮັດ​ແໜ້ນ​ການ​ພົວ­ພັນ​ກັບ​ຊາວ ກູ​ບາ ຈຳ­ນວນ 8 ແສນ​ຄົນ ທີ່​ອາ­ໄສ​ຢູ່​ຕ່າງ­ປະ­ເທດ ການ​ປະ­ກາດ​ໃຊ້​ນະ­ໂຍ­ບາຍ​ນີ້ ມີ​ຂຶ້ນ​ໃນ​ຂະ­ນະ​ທີ່ ສ ອາ​ເມ​ຣິ​ກາ ໄດ້​ຈຳ­ກັດ​ຮັດ​ແຄບ​ດ້ານ​ວີ​ຊາ ກັບ ກູ​ບາ ດ້ວຍ​ຂໍ້​ອ້າງ​ວ່າ ທາງ​ການ​ກູ​ບາ ອາດ​ຢູ່​ເບື້ອງ​ຫຼັງ​ການ​ໃຊ້​ອາ­ວຸດ​ຄື້ນ​ສຽງ​ໂຊ​ນິກ ໂຈມ​ຕີ​ທ່ານ​ທູດ​ສະ­ຫະ­ລັດ ປະ­ຈຳ​ກູ​ບາ ຈົນ​ມີ​ອາ­ການ​ບໍ່​ສະ­ບາຍ ນະ­ໂຍ­ບາຍ​ວີ​ຊາ​ໃໝ່​ຂອງ​ກູ​ບາ ທີ່​ມີ​ຜົນ​ບັງ­ຄັບ​ໃຊ້​ນັບ​ແຕ່​ວັນ​ທີ 1 ມັງ­ກອນ ປີ 2018 ເປັນ­ຕົ້ນ​ມາ ໄດ້​ອະ­ນຸ­ຍາດ​ໃຫ້​ຊາວ ກູ​ບາ ຢູ່​ຕ່າງ­ປະ­ເທດ ເດີນ­ທາງ​ເຂົ້າ-ອອກ​ປະ­ເທດ​ໄດ້​ຜ່ານ​ຈຸດ​ທ່ອງ​ທ່ຽວ 2 ແຫ່ງ ອະ­ນຸ­ຍາດ​ໃຫ້​ຊາວ ກູ​ບາ ທີ່​ອອກ​ນອກ​ປະ­ເທດ​ແບບ​ຜິດ​ກົດ­ໝາຍ ສາ­ມາດ​ກັບ​ຄືນ​ເຂົ້າ​ປະ­ເທດ​ໄດ້ ຍົກ­ເວັ້ນ​ພວກ​ທີ່​ເຂົ້າ​ໄປ​ຢູ່​ກັບ​ຖານ​ທັບ​ເຮືອ​ອາ​ເມ​ຣິ​ກາ ທີ່​ອ່າວ ກວນ​ຕາ­ນາ​ໂມ ລະ­ບຽບ​ການ​ໃໝ່​ນີ້ ຍັງ​ອະ­ນຸ­ຍາດ​ໃຫ້​ເດັກ­ນ້ອຍ​ກູ​ບາ ຢູ່​ຕ່າງ­ປະ­ເທດ ແລະ ເກີດ​ຢູ່​ຕ່າງ­ປະ­ເທດ ສາ­ມາດ​ຂໍ​ສັນ­ຊາດ​ກູ​ບາ ໂດຍ​ຈະ​ໄດ້​ຮັບ​ເອ­ກະ­ສານ​ຮັບ­ຮອງ​ຢ່າງ​ຖືກ­ຕ້ອງ ລະ­ບຽບ​ການ​ໃໝ່​ກ່ຽວ​ກັບ​ຄົນ​ເຂົ້າ​ເມືອງ​ສະ­ບັບ​ນີ້​ຢັ້ງ­ຢືນ​ວ່າ ທາງ​ການ ກູ​ບາ ຈິງ​ຈັງ​ກັບ​ນະ­ໂຍ­ບາຍ​ເປີດ​ກວ້າງ ເຖິງ​ແມ່ນ​ວ່າ​ທາງ​ການ​ສະ­ຫະ­ລັດ​ຈະ​ຮັດ​ແຄບ​ການ​ພົວ­ພັນ​ກັບ ກູ​ບາ ກໍ່​ຕາມ.

    ທີ່ ມາ​ເລ​ເຊຍ: ຂ່າວ​ຕ່າງ­ປະ­ເທດ​ໃນ​ທ້າຍ​ເດືອນ​ມີ­ນາ ປີ 2018 ໄດ້​ເວົ້າ​ກ່ຽວ​ກັບ​ການ​ຕັດ­ສິນ​ລົງ­ໂທດ​ຈຳ​ຄຸກ​ພໍ່​ນ້າ​ໃຈ ໂຫດ ເປັນ​ເວ­ລາ 20 ປີ ຖານ​ໄດ້​ຂົ່ມ­ຂືນ​ເດັກ​ຍິງ​ທີ່​ເປັນ​ລູກ​ນ້າ​ຂອງ​ຕົນ ໃນ​ເດືອນ​ທັນ­ວາ ປີ 2015 ໃນ​ເວ­ລາ​ນັ້ນ ເດັກ​ຍິງ ທີ່​ຕົກ​ເປັນ​ເຫຍື່ອ​ມີ​ອາ­ຍຸ​ພຽງ 12 ປີ ພໍ່​ນ້າ​ບ້າ​ຕັນ­ຫາ (ບໍ່​ບອກ​ຊື່) ຄົນ​ນີ້ ມີ​ອາ­ຍຸ 45 ປີ ໄດ້​ສາ­ລະ­ພາບ​ຜິດ​ຕາມ​ກົດ­ໝາຍ ອາ­ຍາ ໝວດ 376 (3) ໂດຍ​ໄດ້​ຮັບ​ໂທດ​ຈຳ​ຄຸກ 20 ປີ ແລະ ຖືກ​ຂ້ຽນ​ດ້ວຍ​ແສ້​ຫວາຍ 10 ບາດ.

    ທີ່ ສປ ຈີນ: ໜັງ­ສື­ພິມ​ວຽງ​ຈັນ​ທາມ ສະ­ບັບ​ວັນ​ທີ 18 ເດືອນ​ທັນ­ວາ​ນີ້ ໄດ້​ໃຫ້​ຮູ້​ວ່າ: ທາງ​ການ​ຈີນ ໄດ້​ເປີດ​ບັ້ນ​ກວາດ​ລ້າງ​ສິນ­ຄ້າ​ປອມ ແລະ ສິນ­ຄ້າ​ບໍ່​ໄດ້​ມາດ­ຕະ­ຖານ ໃນ​ທົ່ວ​ເຂດ​ຊົນ­ນະ­ບົດ ພາຍ​ໃຕ້​ການ​ຊີ້​ນຳ​ຂອງ​ກະ­ຊວງ ກະ­ສິ­ກຳ ແລະ ກິດ­ຈະ­ການ​ຊົນ­ນະ­ບົດ ໂດຍ​ເລັ່ງ​ໃສ່​ແກ້​ໄຂ 6 ປະ­ເພດ ອາ​ຊະ​ຍາ​ກຳ ທີ່​ພົວ­ພັນ​ກັບ​ສິນ­ຄ້າ ເຊັ່ນ: ອາ­ຫານ ເຫຼົ້າ ຜະ­ລິດ​ຕະ​ພັນ​ເຄື່ອງ­ປຸງ​ລົດ​ຊາດ​ອາ­ຫານ ທີ່​ຜະ­ລິດ​ຈາກ​ນົມ ແລະ ຜະ­ລິດ​ຕະ​ພັນ​ຊີ້ນ 6 ປະ­ເພດ​ອາ­ຫານ​ນີ້ ມີ​ການ​ຊື້-ຂາຍ​ກັນ​ໃນ​ປະ­ລິ­ມານ​ຫຼາຍ​ທີ່​ສຸດ​ຢູ່​ເຂດ​ຊົນ­ນະ­ບົດ ໃນ​ໂອ­ກາດ​ບຸນ­ປີ­ໃໝ່​ຈີນ ຈາກ​ຄວາມ​ຕ້ອງ­ການ​ອັນ​ມະ­ຫາ­ສານ​ນີ້ ຈຶ່ງ​ສ່ຽງ​ເກີດ​ມີ​ສິນ­ຄ້າ​ປອມ ສິນ­ຄ້າ​ບໍ່​ໄດ້​ມາດ­ຕະ­ຖານ​ເປັນ​ເງົາ​ຕາມ​ຕົວ​ມາ ທ່ານ ຮານ ຈັງ​ຟູ ລັດ­ຖະ­ມົນ­ຕີ​ກະ­ຊວງ​ກະ­ສິ­ກຳ ແລະ ກິດ­ຈະ­ການ​ຊົນ­ນະ­ບົດ ໄດ້​ກ່າວ​ກ່ຽວ​ກັບ​ບັ້ນ​ກວາດ​ລ້າງ​ນີ້​ວ່າ: “ພວກ​ເຮົາ​ມີ​ຂໍ້​ມູນ​ທີ່​ເປັນ​ປະ­ໂຫຍດ​ສຳ­ລັບ​ຈັດ­ການ​ກັບ​ບັນ­ດາ​ໂຮງ­ງານ ແລະ ຫ້າງ​ຮ້ານ​ທີ່​ເຮັດ​ຜິດ​ກົດ­ໝາຍ ຜູ້​ທີ່​ພົບ​ວ່າ​ມີ​ຄວາມ​ຜິດ​ຈະ​ຖືກ​ຕັດ​ສິດ​ດຳ­ເນີນ​ທຸ­ລະ​ກິດ ແລະ ຈະ​ຖືກ​ສົ່ງ​ຕົວ ໃຫ້​ເຈົ້າ​ໜ້າ­ທີ່​ຕຳ­ຫຼວດ”.

ຂ່າວທີ່ກ່ຽວຂ້ອງ