ຂ່າວຫຼ້າສຸດ

ຜົນດີຂອງການແລ່ນອອກກຳລັງກາຍ

490 24 ທ.ວ. 2018 ຫົວຂໍ້ຂ່າວອື່ນໆ

    ການ​ປັບ­ປຸງ​ສະ­ພາບ​ຂອງ​ທ່ານ ດ້ວຍ​ການ​ແລ່ນ​ອອກ​ກຳ​ກາຍ​ນັ້ນ ເປັນ​ວິ­ທີ​ທີ່​ດີ​ເພື່ອ​ເຮັດ​ໃຫ້​ສຸ­ຂະ­ພາບ​ແຂງ­ແຮງ ຈາກ​ການ​ວິ­ໄຈ​ພົບ​ວ່າ ການ​ແລ່ນ​ຈະ​ຊ່ວຍ​ເພີ່ມ​ລະ­ດັບ​ຂອງ​ຄໍ​ເລັດ​ເຕີ​ລອນ​ທີ່​ດີ ຊ່ວຍ​ຍົກ​ລະ­ດັບ​ການ​ເຮັດ​ວຽກ​ຂອງ​ປອດ​ໄດ້​ດີ ແລະ ຊ່ວຍ​ໃຫ້​ປອດ​ໃຊ້​ງານ​ໄດ້​ດີ​ຂຶ້ນ ພ້ອມ​ທັງ​ເພີ່ມ​ລະ­ດັບ​ພູມ​ຕ້ານ­ທານ ແລະ ຍັງ​ຫຼຸດ​ຄວາມ​ສ່ຽງ​ໃນ​ການ​ອຸດ​ຕັນ​ຂອງ​ເສັ້ນ­ເລືອດ​ໄດ້​ນຳ​ອີກ.

    ສຳ­ລັບ​ແມ່­ຍິງ ການ​ແລ່ນ​ຊ່ວຍ​ຫຼຸດ​ຄວາມ​ສ່ຽງ​ໃນ​ການ​ເປັນ​ພະ­ຍາດ​ມະ​ເຮັງ​ເຕົ້າ­ນົມ ແລະ ຍັງ​ຫຼຸດ​ຄວາມ​ສ່ຽງ​ໃນ​ການ​ເປັນ​ພະ­ຍາດ​ຫຼອດ​ເລືອດ​ສະ­ໝອງ ແພດ​ຫຼາຍ​ຄົນ​ແນະ­ນຳ​ໃຫ້​ຜູ້​ປ່ວຍ​ເປັນ​ພະ­ຍາດ​ເບົາ­ຫວານ ໄລ­ຍະ​ທຳ​ອິດ​ອອກ­ກຳ­ລັງ​ກາຍ​ດ້ວຍ​ການ​ແລ່ນ ລວມ​ທັງ​ຜູ້​ປ່ວຍ​ພະ­ຍາດ​ຄວາມ­ດັນ​ສູງ ພະ­ຍາດ​ກະ­ດູກ​ຜ່ອຍ ແລະ ຍັງ​ຊ່ວຍ​ປ້ອງ​ກັນ​ຄວາມ​ສ່ຽງ​ໃນ​ການ​ເປັນ​ພະ­ຍາດ­ຫົວ­ໃຈ​ໄດ້ ໂດຍ​ການ​ແລ່ນ​ຈະ​ຊ່ວຍ​ໃຫ້​ຫຼອດ​ເລືອດ​ແດງ​ມີ​ການ​ຫົດ​ຢືດ​ດີ​ຂຶ້ນ ເສີມ​ສ້າງ​ຄວາມ​ແຂງ­ແຮງ​ຂອງ​ຫົວ­ໃຈ ແລະ ຫຼຸດ​ໂອ­ກາດ​ທີ່​ຈະ​ມີ​ອາ­ການ​ຫົວ­ໃຈ​ວາຍ​ໄດ້​ຫຼາຍ.

    ການ​ແລ່ນ ເປັນ​ການ​ອອກ­ກຳ­ລັງ​ກາຍ​ທີ່​ຊ່ວຍ​ໃຫ້​ທ່ານ​ຫຼຸດ​ນ້ຳ­ໜັກ ຫຼື ຮັກ­ສາ​ນ້ຳ­ໜັກ​ໄວ້​ໃຫ້​ຄົງ​ທີ່ ເຊິ່ງ​ການ​ແລ່ນ​ຈະ​ຊ່ວຍ​ເຜົາ​ຜານ​ພະ­ລັງ­ງານ​ໄດ້​ຢ່າງ​ມີ​ປະ­ສິດ­ທິ­ພາບ ເປັນ​ອັນ​ດັບ​ສອງ ເມື່ອ​ທຽບ​ກັບ​ພະ­ລັງ­ງານ​ຕໍ່​ນາ­ທີ ເຊິ່ງ​ເປັນ​ຮອງ​ແຕ່​ການ​ຫຼິ້ນ​ສະ​ກີ​ເທົ່າ​ນັ້ນ.

    ການ​ແລ່ນ​ບໍ່​ມີ​ພຽງ​ແຕ່​ປະ­ໂຫຍດ​ຕໍ່​ຮ່າງ­ກາຍ​ເທົ່າ​ນັ້ນ ແຕ່​ຍັງ​ຊ່ວຍ​ກະ​ຕຸ້ນ​ຄວາມ​ໝັ້ນ​ໃຈ ແລະ ຄວາມ​ນັບ­ຖື​ຕົວ​ຂຶ້ນ​ຕື່ມ​ອີກ ການ​ຕັ້ງ​ເປົ້າ​ໝາຍ​ຢ່າງ​ມີ​ວິ­ໄນ ແລະ ມຸ່ງ​ໝັ້ນ​ໃນ​ການ​ແລ່ນ ຈະ​ຊ່ວຍ​ໃຫ້​ທ່ານ​ຮູ້­ສຶກ​ມີ​ຄວາມ​ໝັ້ນ​ໃຈ​ໃນ​ຕົວ​ເອງ​ຫຼາຍ​ຂຶ້ນ ແລະ ຍັງ​ເຮັດ​ໃຫ້​ທ່ານ​ຮູ້­ສຶກ​ມີ​ຄວາມ­ສຸກ​ຫຼາຍ​ຂຶ້ນ.

    ຄວາມ​ກັງ­ວົນ​ໃຈ​ເປັນ​ສາ­ເຫດ​ໜຶ່ງ​ຂອງ​ບັນ­ຫາ​ສຸ­ຂະ­ພາບ ແລະ ບັນ­ຫາ​ທາງ​ດ້ານ​ອາ­ລົມ ນອກ​ນີ້ ຍັງ​ຫຼຸດ​ອາ­ຫານ ແລະ ຄຸ­ນະ­ພາບ​ຂອງ​ການ​ນອນ​ຫຼັບ​ກໍ່​ຫຼຸດ​ລົງ​ໄປ​ນຳ ເມື່ອ​ທ່ານ​ແລ່ນ​ຈະ​ມີ​ການ​ບັງ­ຄັບ​ໃຫ້​ຮ່າງ­ກາຍ​ໃຊ້​ພະ­ລັງ­ງານ ແລະ ຮໍ​ໂມນ​ສ່ວນ​ເກີນ ຈຶ່ງ​ຊ່ວຍ​ຫຼຸດ​ອາ­ການ​ເຈັບ​ຫົວ​ຈາກ​ຄວາມ​ກັງ­ວົນ​ໃຈ​ໄດ້.

    ການ​ແລ່ນ ຍັງ​ຊ່ວຍ​ກຳ­ຈັດ​ພາ­ວະ​ຊຶມ​ເສົ້າ ເມື່ອ​ທ່ານ​ຮູ້­ສຶກ​ໂສກ­ເສົ້າ ສິ່ງ​ສຸດ​ທ້າຍ​ທີ່​ທ່ານ​ຕ້ອງ​ເຮັດ​ກໍ່​ຄື​ລຸກ­ຂຶ້ນ​ມາ ແລ້ວ​ອອກ​ໄປ​ແລ່ນ​ຜ່ອນ­ຄາຍ ເຊິ່ງ​ທ່ານ​ຈະ​ພົບ​ວ່າ​ຫຼັງ​ຈາກ​ໃຊ້​ເວ­ລາ​ແລ່ນ​ພຽງ​ບໍ່​ເທົ່າ­ໃດ​ນາ­ທີ ສະ­ໝອງ​ກໍ່​ຈະ​ປົດ​ປ່ອຍ​ຮໍ​ໂມນ ເຊິ່ງ​ຊ່ວຍ​ຍົກ​ລະ­ດັບ​ອາ­ລົມ​ຂອງ​ທ່ານ​ດີ​ຂຶ້ນ ແຕ່​ຢ່າງ­ໃດ​ກໍ່​ຕາມ ຍັງ​ມີ​ວິ­ທີ​ອື່ນໆ​ທີ່​ຊ່ວຍ​ຮັກ­ສາ​ອາ­ການ​ຊຶມ​ເສົ້າ​ໄດ້​ດີ ແລະ ໄວ​ກວ່າ​ການ​ອອກ­ກຳ­ລັງ​ກາຍ​ອີກ​ດ້ວຍ.

ຂ່າວທີ່ກ່ຽວຂ້ອງ