ຂ່າວຫຼ້າສຸດ

ເບິ່ງບ້ານເຂົາເອົາບົດຮຽນ 20/12/2018

352 20 ທ.ວ. 2018 ຫົວຂໍ້ຂ່າວອື່ນໆ

    ມື້­ນີ້​ມີ​ຂ່າວ​ກ່ຽວ​ກັບ​ບໍ­ລິ­ສັດ ສະ​ຕາ​ບັກ ມີ​ແຜນ​ຍົກ­ເລີກ​ທໍ່­ດູດ​ທີ່​ເຮັດ​ດ້ວຍ​ປຼັສ​ຕິກ ແລະ ເລື່ອງ​ທາງ​ການ ສປ ຈີນ ປະ­ຕິ­ບັດ​ວິ­ໄນ​ຕໍ່​ພະ­ນັກ­ງານ​ທີ່​ມີ​ຄວາມ​ຜິດ.

    ທີ່ ບໍ­ລິ­ສັດ​ສະ​ຕາ​ບັກ: ໃນ​ປັດ­ຈຸ­ບັນ​ສະ­ໜາມ­ຮົບ​ຕ້ານ​ຜະ­ລິດ​ຕະ​ພັນ​ຖົງ​ຢາງ ຫຼື ຖົງ​ປຼັສ​ຕິກ ນັ້ນ ພວມ​ດຳ­ເນີນ​ໄປ​ຢ່າງ​ຂຸ້ນ­ຂ້ຽວ ສະ­ຫະ­ພາບ​ເອີ​ຣົບ ບັນ­ດາ​ປະ­ເທດ​ອຸດ­ສາ­ຫະ­ກຳ​ໃຫຍ່ໆ ແລະ ປະ­ເທດ​ໂລກ​ທີ​ສາມ​ຫຼາຍ​ສິບ​ປະ­ເທດ ໄດ້​ປະ­ກາດ​ຈຳ­ກັດ ຫຼື ຍົກ­ເລີກ​ການ​ໃຊ້​ຖົງ​ຢາງ​ທີ່​ໃຊ້​ພຽງ​ເທື່ອ​ດຽວ​ແລ້ວ​ຖິ້ມ ມາ​ບັດ​ນີ້​ມີ​ຫຼາຍ​ປະ­ເທດ ແລະ ຫຼາຍ​ບໍ­ລິ­ສັດ ເຄື່ອງ​ດື່ມ​ໄດ້​ອອກ​ມາ​ປະ­ກາດ​ວ່າ ຈະ​ເຊົາ​ໃຊ້​ທໍ່­ດູດ​ທີ່​ເຮັດ​ດ້ວຍ​ປຼັສ​ຕິກ ຕົວ­ຢ່າງ: ຫວ່າງ​ບໍ່​ເຫິງ​ມາ​ນີ້ ບໍ­ລິ­ສັດ ສະ​ຕາ​ບັກ ເຈົ້າ​ພໍ່​ຈຳ­ໜ່າຍ​ເຄື່ອງ​ດື່ມ​ປະ­ເພດ​ກາ­ເຟ ລະ­ດັບ​ໂລກ​ໄດ້​ປະ­ກາດ ແຜນ​ເລີກ​ໃຊ້​ທໍ່­ດູດ​ເຄື່ອງ​ດື່ມ​ທີ່​ເຮັດ​ດ້ວຍ​ປຼັສ​ຕິກ ໃນ 28.000 ຮ້ານ​ເຄື່ອງ​ດື່ມ ພາຍ​ໃນ​ປີ 2020 ແນ­ໃສ່​ປະ­ກອບ­ສ່ວນ​ຕ້ານ​ມົນ​ລະ​ພິດ​ທີ່​ເກີດ​ຈາກ​ເສດ​ເຫຼືອ​ເຄື່ອງ​ໃຊ້​ປຼັສ​ຕິກ ການ​ປະ­ກາດ​ຂອງ Starbucks ຄັ້ງ​ນີ້ ມີ​ຂຶ້ນ​ພາຍ­ຫຼັງ​ໄດ້​ມີ​ການ​ທົດ​ລອງ​ໃຊ້​ວັດ­ຖຸ​ປ່ຽນ​ແທນ​ທໍ່­ດູດ ທີ່​ເຮັດ​ດ້ວຍ​ປຼັສ​ຕິກ ເຊິ່ງ​ດຳ­ເນີນ​ຢູ່​ປະ­ເທດ​ອັງ­ກິດ​ຕໍ່​ໄປ​ຢູ່​ຈອກ​ເຄື່ອງ​ດື່ມ​ຂອງ​ບໍ­ລິ­ສັດ​ນີ້ ຈະ​ມີ​ຝາ​ເປັນ​ປ່ອງ​ນູນ​ຂຶ້ນ ເພື່ອ​ເປັນ​ບ່ອນ​ດູດ​ຈອກ ແບບ​ນີ້​ໄດ້​ທົດ​ລອງ​ໃຊ້​ໄດ້­ຜົນ​ມາ​ແລ້ວ ສະ­ຫະ­ລັດ​ອາ​ເມ​ຣິ​ກາ ແລະ ກາ​ນາ​ດາ ເຫດ​ທີ່​ຕ້ອງ​ໄດ້​ກຳ­ຈັດ​ທໍ່­ດູດ​ກໍ່​ຍ້ອນ​ວ່າ ທໍ່­ດູດ​ນັ້ນ ເຮັດ​ດ້ວຍ​ຢາງ​ທີ່​ໝັ້ນ ແລະ ແຂງ­ແຮງ ທັງ​ມີ​ຂະ­ໜາດ​ນ້ອຍ​ຫຼາຍ ຍາກ​ທີ່​ຈະ​ແປ​ຮູບ​ເພື່ອ​ນຳ​ມາ​ໃຊ້​ຄືນ­ໃໝ່ (ຣີ​ໄຊ​ເກີນ) ເພາະ​ມັນ​ບໍ່​ພໍ­ດີ​ກັບ​ເຄື່ອງ​ຈັກ​ແປ​ຮູບ ສຳ­ລັບ​ຝາ​ທີ່​ນູນ​ຂຶ້ນ​ຢູ່​ປາກ​ຈອກ ທີ່​ຈະ​ໃຊ້​ແທນ​ທໍ່­ດູດ​ແບບ​ເກົ່າ​ນັ້ນ ຈະ​ເຮັດ​ດ້ວຍ​ວັດ­ຖຸ​ເອີ້ນ​ວ່າ ໂປ​ລີ​ໂປຼ​ປີ​ແລນ (Polypropylene) ທີ່​ມີ​ຂະ­ໜາດ​ໃຫຍ່ ພໍ­ດີ​ກັບ​ແຂ້ວ​ຈັກ​ແປ​ຮູບ ສ່ວນ​ບໍ­ລິ­ສັດ ແມນ​ໂດ​ນານ ເຈົ້າ​ພໍ່​ອາ­ຫານ​ຈານ​ດ່ວນ​ປະ­ເພດ​ແຮມ​ເບີກ​ເກີ​ນັ້ນ ກໍ່​ກຳ­ລັງ​ທົດ​ລອງ​ໃຊ້​ວັດ​ຖະ​ທີ່​ລະ­ລາຍ​ໄດ້ (Biodegradable) ເພື່ອ​ເຮັດ​ທໍ່­ດູດ​ເຄື່ອງ​ດື່ມ ຂ່າວ​ແບບ​ດຽວ​ກັນ​ນີ້ ກໍ່​ມີ​ໃນ ສ ເກົາ­ຫຼີ ຄື ຂ່າວ​ແຜນ​ຍົກ­ເລີກ​ການ​ໃຊ້​ທໍ່­ດູດ ຖ້ວຍ ຈານ ບ່ວງ ສ້ອມ ທີ່​ເຮັດ​ດ້ວຍ​ປຼັສ​ຕິກ​ທັງ​ໝົດ​ຕາມ​ຮ້ານ​ອາ­ຫານ​ຕ່າງໆ​ໃນ​ອະ­ນາ­ຄົດ.

    ທີ່ ສປ ຈີນ: ຂ່າວ​ຕ່າງ­ປະ­ເທດ​ໃນ​ຕົ້ນ​ເດືອນ​ສິງ­ຫາ​ປີ​ນີ້​ໃຫ້​ຮູ້​ວ່າ: ໃນ 6 ເດືອນ​ຕົ້ນ​ປີ 2018 ນີ້ ເຈົ້າ​ໜ້າ­ທີ່​ລັດ​ຈຳ­ນວນ 36.618 ຄົນ ໃນ​ທົ່ວ​ປະ­ເທດ​ຈີນ ໄດ້​ຖືກ​ປະ­ຕິ­ບັດ​ວິ­ໄນ​ຍ້ອນ​ໄດ້​ລະ­ເມີດ​ຂໍ້​ກຳ­ນົດ ແລະ ກົດ​ລະ­ບຽບ​ຂອງ​ພັກ ໃນ​ນັ້ນ ມີ​ເຈົ້າ​ໜ້າ­ທີ່​ລະ­ດັບ​ກະ­ຊວງ 1 ຄົນ ທາງ​ຄະ­ນະ​ກຳ­ມະ­ການ​ກວດ­ກາ​ວິ­ໄນ​ຂອງ​ສູນ​ກາງ​ພັກ​ຄອມ​ມູ​ນິດ​ຈີນ ໄດ້​ໃຫ້​ລາຍ​ລະ­ອຽດ​ຕື່ມ​ວ່າ ໃນ​ພະ­ນັກ­ງານ​ລັດ​ທີ່​ຖືກ​ປະ­ຕິ­ບັດ​ວິ­ໄນ​ທັງ​ໝົດ​ນັ້ນ ຕິດ​ພັນ​ກັບ​ຄວາມ​ຜິດ 25.677 ກໍ­ລະ­ນີ​ຫຼາຍ​ກວ່າ​ໝູ່ ແມ່ນ​ຄະ­ດີ​ການ​ໃຫ້​ເງິນ​ລາ­ງວັນ ແລະ ເງິນ​ອຸດ​ໜູນ​ທີ່​ບໍ່​ຖືກ­ຕ້ອງ​ກັບ​ຂໍ້​ກຳ­ນົດ​ກົດ​ລະ­ບຽບ​ຄວາມ​ຜິດ​ຫຼາຍ​ເປັນ​ອັນ​ດັບ​ທີ​ສອງ ແມ່ນ​ການ​ໃຫ້ ຫຼື ຮັບ​ຂອງ­ຂວັນ​ທີ່​ມີ​ມູນ​ຄ່າ​ເກີນ​ຫຼັກ­ການ ອັນ​ດັບ​ທີ​ສາມ​ແມ່ນ​ການ​ໃຊ້​ຍານ­ພາ­ຫະ­ນະ​ຂອງ​ລັດ​ແບບ​ຜິດ​ເປົ້າ​ໝາຍ ເພື່ອ​ຜົນ​ປະ­ໂຫຍດ​ຂອງ​ສ່ວນ​ບຸກ­ຄົນ.

ຂ່າວທີ່ກ່ຽວຂ້ອງ