ສົ່ງເສີມໂຄງການປຸງແຕ່ງຜະລິດຕະພັນເຂົ້າເປັນສິນຄ້າ

292 18 ທ.ວ. 2018 ຂ່າວໜ້າ​ໜຶ່ງ
ສົ່ງເສີມໂຄງການປຸງແຕ່ງຜະລິດຕະພັນເຂົ້າເປັນສິນຄ້າ

    ວັນ​ທີ 14 ທັນ­ວາ 2018 ພະ​ແນກ​ອຸດ­ສາ­ຫະ­ກຳ ແລະ ການ​ຄ້າ ນະ­ຄອນ­ຫຼວງ​ວຽງ​ຈັນ (ນວ) ໄດ້​ຈັດ​ສຳ​ມະ​ນາ​ຫົວ­ຂໍ້​ໂຄງ­ການ​ປຸງ​ແຕ່ງ​ຜະ­ລິດ​ຕະ​ພັນ​ເຂົ້າ​ເປັນ​ສິນ­ຄ້າ​ຂຶ້ນ ທີ່​ພະ​ແນກ​ແຜນ­ການ ແລະ ການ​ລົງ­ທຶນ ນວ ເປັນ​ປະ­ທານ​ຂອງ​ທ່ານ ເບີ​ລິນ ເພັດ​ຈັນ­ທະ​ລາດ ຫົວ­ໜ້າ​ພະ​ແນກ​ອຸດ­ສາ­ຫະ­ກຳ ແລະ ການ​ຄ້າ ນວ ໃຫ້​ກຽດ​ເຂົ້າ​ຮ່ວມ​ຂອງ​ທ່ານ ສິນ​ລະ​ວົງ ຄຸດ​ໄພ­ທູນ ເຈົ້າ​ຄອງ ນວ ທ່ານ​ຮອງ​ຫົວ­ໜ້າ​ກົມ​ການ​ຄ້າ ບັນ­ດາ​ຫົວ­ໜ້າ ຮອງ​ຫົວ­ໜ້າ​ພະ​ແນກ ເຈົ້າ­ເມືອງ ຮອງ​ເຈົ້າ­ເມືອງ ຂະ­ແໜງ­ການ​ກ່ຽວ­ຂ້ອງ ຜູ້​ປະ­ກອບ​ການ​ທຸ­ລະ​ກິດ​ໂຮງ­ງານ​ເບຍ ໂຮງ­ສີ​ເຂົ້າ ໂຮງ­ງານ​ໝີ່ ໂຮງ­ງານ​ເສັ້ນ​ເຝີ ແລະ ຮ້ານ​ອາ­ຫານ.

    ກອງ​ປະ­ຊຸມ​ໄດ້​ນຳ​ສະ­ເໜີ​ຫຼາຍ​ຫົວ­ຂໍ້​ທີ່​ຕິດ​ພັນ ເປັນ­ຕົ້ນ ການ​ສົ່ງ­ເສີມ​ການ​ຜະ­ລິດ​ເປັນ​ສິນ­ຄ້າ ການ​ປັບ­ປຸງ ແລະ ຍົກ​ລະ­ດັບ​ສະ­ມັດ­ຖະ­ພາບ​ໂຮງ­ສີ​ເຂົ້າ ໃນ​ການ​ຜະ­ລິດ​ເປັນ​ສິນ­ຄ້າ ສະ­ພາບ​ລວມ​ຂອງ​ອຸດ­ສາ­ຫະ­ກຳ​ປຸງ​ແຕ່ງ​ໃນ​ປັດ­ຈຸ­ບັນ ບົດ­ຮຽນ ການ​ນຳ​ໃຊ້​ເຕັກ​ໂນ​ໂລ​ຊີ​ໃນ​ການ​ປຸງ​ແຕ່ງ​ຜະ­ລິດ​ຕະ​ພັນ​ເຂົ້າ ການ​ກະ­ກຽມ​ເພື່ອ​ປັບ­ປຸງ​ຍົກ​ລະ­ດັບ​ໂຮງ­ສີ​ເຂົ້າ​ໃຫ້​ໄດ້​ຮັບ​ການ​ຢັ້ງ­ຢືນ ການ​ປະ­ຕິ­ບັດ​ການ​ຜະ­ລິດ​ທີ່​ດີ GMP ການ​ກະ­ກຽມ ແລະ ຂັ້ນ​ຕອນ​ການ​ສ້າງ​ຍີ່­ຫໍ້​ການ​ຄ້າ​ຂອງ​ຜະ­ລິດ​ຕະ​ພັນ ແລະ ເງື່ອນ­ໄຂ​ການ​ສົ່ງ​ເຂົ້າ​ໄປ ສປ ຈີນ ໂດຍ​ລວມ​ແລ້ວ ມາ​ຮອດ​ວັນ​ທີ 30 ພະ­ຈິກ 2018 ທົ່ວ ນວ ມີ​ຈຳ­ນວນ​ໂຮງ­ງານ​ທັງ​ໝົດ 3.028 ແຫ່ງ ໃນ​ນີ້​ເປັນ​ໂຮງ­ງານ​ຂະ­ໜາດ​ໃຫຍ່ 164 ແຫ່ງ ຂະ­ໜາດ​ກາງ 218 ແຫ່ງ ຂະ­ໜາດ​ນ້ອຍ 370 ແຫ່ງ ແລະ ເສດ­ຖະ­ກິດ​ຄອບ­ຄົວ 2.276 ແຫ່ງ ປີ 2018 ມີ​ໂຮງ­ງານ​ອຸດ­ສາ­ຫະ­ກຳ​ປຸງ​ແຕ່ງ​ເຂົ້າ​ທັງ​ໝົດ 639 ແຫ່ງ ໃນ​ນັ້ນ ຂະ­ໜາດ​ໃຫຍ່ 1 ແຫ່ງ ຂະ­ໜາດ​ກາງ 4 ແຫ່ງ ຂະ­ໜາດ​ນ້ອຍ 8 ແຫ່ງ ແລະ ເສດ­ຖະ­ກິດ​ຄອບ­ຄົວ 626 ແຫ່ງ ຍອດ​ມູນ​ຄ່າ​ຜະ­ລິດ​ຕະ​ພັນ 87.270 ຕື້​ກີບ.

    ໂອ­ກາດ​ນີ້ ທ່ານ​ເຈົ້າ​ຄອງ ນວ ໄດ້​ມີ​ຄຳ​ເຫັນ​ຊີ້​ນຳ​ວ່າ: ເຖິງ​ເວ­ລາ​ແລ້ວ​ທີ່ ນວ ຕ້ອງ​ໄດ້​ຍົກ​ລະ­ດັບ​ການ​ຜະ­ລິດ​ເຂົ້າ​ໃຫ້​ເປັນ​ສິນ­ຄ້າ ເພື່ອ​ກ້າວ​ໄປ​ສູ່​ການ​ມີ​ລາຍ​ຮັບ ແລະ ມີ​ຄວາມ​ຮັ່ງ­ມີ ແຕ່​ຢາກ​ຜະ­ລິດ​ເຂົ້າ​ເປັນ​ສິນ­ຄ້າ ສຳ­ຄັນ​ຕ້ອງ​ມີ​ຕະ­ຫຼາດ​ຮອງ​ຮັບ​ຜະ­ລິດ​ຕະ​ພັນ ເບື້ອງ​ຕົ້ນ​ກໍ່​ແມ່ນ​ໃຫ້​ມີ​ຕະ­ຫຼາດ​ພາຍ​ໃນ​ທີ່​ສະ­ໜອງ ໃຫ້​ບັນ­ດາ​ໂຮງ­ງານ​ປຸງ​ແຕ່ງ​ພຽງ­ພໍ ຈາກ​ນັ້ນ ກໍ່​ກ້າວ​ໄປ​ເຖິງ​ການ​ສົ່ງ​ອອກ​ໄປ​ຕະ­ຫຼາດ​ຕ່າງ­ປະ­ເທດ ທີ່​ເປັນ​ຜະ­ລິດ​ຕະ​ພັນ​ສຳ­ເລັດ​ຮູບ ແລະ ຜະ­ລິດ​ຕະ​ພັນ​ຜ່ານ​ການ​ປຸງ​ແຕ່ງ​ທີ່​ໄດ້​ມາດ­ຕະ­ຖານ ແຕ່​ບັນ­ຫາ​ດັ່ງ­ກ່າວ ຈະ​ປະ­ສົບ​ຜົນ­ສຳ­ເລັດ​ໄດ້​ນັ້ນ ຜູ້​ປະ­ກອບ​ການ​ຕ້ອງ​ລວມ​ຕົວ​ເຂົ້າ­ກັນ​ສ້າງ​ເປັນ​ສະ­ມາ­ຄົມ​ທີ່​ເຂັ້ມ­ແຂງ ເພື່ອ​ແຂ່ງ­ຂັນ​ກັບ​ສາ­ກົນ ການ​ຜະ­ລິດ​ຕ້ອງ​ຖືກ​ຕາມ​ເຕັກ­ນິກ​ເພື່ອ​ໃຫ້​ໄດ້​ວັດ­ຖຸ​ດິບ ເປັນ​ເຂົ້າ 2 ປະ­ເພດ ຄື: ຜະ­ລິດ​ເຂົ້າ​ໃຫ້​ໂຮງ­ງານ ແລະ ຜະ­ລິດ​ໃຫ້​ອຸດ­ສາ­ຫະ­ກຳ (ເຂົ້າ​ເມັດ​ຫັກ) ອັນ​ສຳ­ຄັນ​ໜຶ່ງ​ອີກ​ຕ້ອງ​ສົ່ງ­ເສີມ​ໃຫ້​ຊາວ­ນາ ຜະ­ລິດ​ເຂົ້າ​ປອດ​ສານ­ພິດ ໂດຍ​ລວມ​ແລ້ວ ທຸກ​ພາກ­ສ່ວນ ທັງ​ພາກ​ລັດ ແລະ ພາກ​ທຸ­ລະ​ກິດ ຕະ­ຫຼອດ​ຮອດ​ຊາວ­ນາ​ຜະ­ລິດ​ເຂົ້າ​ຕ້ອງ​ເປັນ​ອັນ​ໜຶ່ງ​ອັນ​ດຽວ​ກັນ ໃນ​ການ­ຈັດ­ຕັ້ງ​ປະ­ຕິ­ບັດ​ວຽກ​ງານ​ສົ່ງ­ເສີມ​ການ​ຜະ­ລິດ​ເຂົ້າ​ໃຫ້​ກາຍ­ເປັນ​ສິນ­ຄ້າ ນັບ​ມື້​ນັບ​ຫຼາຍ​ຂຶ້ນ​ໃນ​ອະ­ນາ­ຄົດ ໂດຍ​ການ​ນຳ​ໃຊ້​ທ່າ­ແຮງ​ທີ່​ມີ​ປັດ­ຈຸ­ບັນ ເປັນ­ຕົ້ນ ພື້ນ​ທີ່​ດິນ​ກະ­ສິ­ກຳ​ທີ່​ກວ້າງ­ຂວາງ ແລະ ຍັງ​ເປັນ​ແບບ​ທຳ​ມະ​ຊາດ ບໍ່​ມີ​ສານ​ເຄ​ມີ​ຕົກ​ຄ້າງ ທີ່​ຈະ​ເຮັດ​ໃຫ້​ຜົນ​ຜະ­ລິດ​ອອກ​ມາ​ໄດ້​ມາດ­ຕະ­ຖານ ເປັນ​ທີ່​ຕ້ອງ­ການ​ຂອງ​ຕະ­ຫຼາດ​ຕ່າງ­ປະ­ເທດ.

ຂ່າວທີ່ກ່ຽວຂ້ອງ