ອານຸສອນ ຍາດໄດ້ຫຼຽນຄຳ ໃນ ມ ອາຊຽນ

336 17 ທ.ວ. 2018 ວົງຈອນກີລາ
ອານຸສອນ ຍາດໄດ້ຫຼຽນຄຳ ໃນ ມ ອາຊຽນ

    ທ້າວ ອາ​ນຸ​ສອນ ໄຊ​ສາ ນັກ​ແລ່ນ​ທີມ​ຊາດ​ລາວ ໄວ 24 ປີ ສາ­ມາດ​ຊິງ​ຫຼຽນ​ຄຳ​ທີ 2 ໃຫ້​ທັບ​ນັກ​ສຶກ​ສາ​ມະ­ຫາ­ວິ­ທະ­ຍາ­ໄລ​ລາວ ໃນ​ງານ​ກີ­ລາ​ມະ­ຫາ­ວິ­ທະ­ຍາ­ໄລ​ອາ​ຊຽນ ຄັ້ງ​ທີ 19 ທີ່​ນະ­ຄອນ­ຫຼວງ​ເນ​ປີ​ດໍ ປະ­ເທດ​ມຽນ​ມາ ໃນ​ວັນ​ທີ 13 ທັນ­ວາ 218 ໂດຍ​ອາ​ນຸ​ສອນ ລົງ​ແຂ່ງ​ລາຍ­ການ​ແລ່ນ​ຂ້າມ​ຮົ້ວ 110 ແມັດ​ຊາຍ ເຂົ້າ​ເສັ້ນ​ໄຊ​ເປັນ​ຄົນ​ທຳ​ອິດ ດ້ວຍ​ເວ­ລາ 14,30 ວິ­ນາ­ທີ ເອົາ​ຊະ­ນະ​ນັກ​ແລ່ນ​ຈາກ​ສິງ­ກະ­ໂປ 16 ລິບ­ດາ ມາ​ເລ​ເຊຍ 21 ລິບ­ດາ ແລະ ອິນ​ໂດ​ເນ​ເຊຍ 48 ລິບ­ດາ.

    ອາ​ນຸ​ສອນ ໄຊ​ສາ ໄດ້​ຫຼຽນ​ຄຳ ແລ່ນ​ຂ້າມ​ຮົ້ວ 110 ແມັດ​ຊາຍ ເປັນ​ຄັ້ງ​ທີ 3 ຕິດ­ຕໍ່​ກັນ ຕໍ່​ຈາກ​ຄັ້ງ​ທີ 17 ປີ 2014 ທີ່​ອິນ​ໂດ​ເນ​ເຊຍ ຄັ້ງ​ທີ 18 ປີ 2016 ທີ່​ສິງ­ກະ­ໂປ ອາ​ນຸ​ສອນ ໄຊ​ສາ ຮ່ວມ​ແຂ່ງ­ຂັນ​ງານ​ກີ­ລາ​ມະ­ຫາ­ວິ­ທະ­ຍາ­ໄລ​ອາ​ຊຽນ ຄັ້ງ​ນີ້ ເປັນ​ຄັ້ງ​ທີ 4 ໂດຍ​ຄັ້ງ​ນີ້ ຮ່ວມ​ຊີງ 2 ລາຍ­ການ ອີກ​ໜຶ່ງ​ລາຍ­ການ​ເປັນ​ການ​ແລ່ນ 4×100 ແມັດ​ຊາຍ ສ່ວນ​ນາງ ມັດ ຖິ່ນ​ມະ​ນາວ ໄດ້​ຫຼຽນ​ທອງ ຈາກ​ລາຍ­ການ​ຊຸກ​ນ້ຳ­ໜັກ ຫຼຽນ​ຄຳ​ເປັນ​ຂອງ​ໄທ ຫຼຽນ​ເງິນ​ມາ​ເລ​ເຊຍ ປັດ­ຈຸ­ບັນ​ນີ້ ທັບ​ນັກ­ກີ­ລາ​ນັກ​ສຶກ​ສາ​ລາວ ໄດ້​ມາ​ແລ້ວ 2 ຫຼຽນ​ຄຳ 4 ຫຼຽນ​ເງິນ 1 ຫຼຽນ​ທອງ

    ສຳ­ລັບ​ງານ​ກີ­ລາ​ມະ­ຫາ­ວິ­ທະ­ຍາ­ໄລ​ອາ​ຊຽນ 2018 ຄັ້ງ​ນີ້ ສະ­ຫະ­ພັນ​ກີ­ລາ​ມະ­ຫາ­ວິ­ທະ­ຍາ­ໄລ​ລາວ ສົ່ງ​ຄະ­ນະ​ນຳ ຄູ​ເຝິກ ກຳ­ມະ­ການ​ຕັດ­ສິນ ແລະ ນັກ­ກີ­ລາ​ເຂົ້າ​ຮ່ວມ 150 ຄົນ ໃນ 9 ປະ­ເພດ​ກີ­ລາ ຄື: ບານ­ເຕະ​ຊາຍ ແລ່ນ-ລານ ເປ​ຕັງ ວູ​ຊູ ຍິງ​ທະ­ນູ ໂວ​ວີ​ນາມ ດອກ​ປີກ​ໄກ່ ກະ­ຕໍ້ ແລະ ກ໊ອຟ ສະ­ເພາະ​ກີ­ລາ​ແລ່ນ-ລານ ສົ່ງ​ຄະ­ນະ​ນັກ­ກີ­ລາ​ຮ່ວມ 16 ຄົນ ໃນ​ນີ້ ເປັນ​ນັກ­ກີ­ລາ 12 ຄົນ ຄູ​ເຝິກ 3 ທ່ານ ຜູ້​ຈັດ­ການ​ທີມ 1 ທ່ານ.

ຂ່າວທີ່ກ່ຽວຂ້ອງ