ຂ່າວຫຼ້າສຸດ

ເຄື່ອງດື່ມຫຼາຍຊະນິດ ທີ່ເປັນອັນຕະລາຍຕໍ່ແມ່ຍິງຖືພາ

374 17 ທ.ວ. 2018 ຫົວຂໍ້ຂ່າວອື່ນໆ

    ແມ່­ຍິງ​ເມື່ອ​ຖື­ພາ ຈຳ­ເປັນ​ຕ້ອງ​ມີ​ການ​ຄວບ​ຄຸມ​ອາ­ຫານ ຈະ​ກິນ​ຕາມ­ໃຈ​ມັກ​ຄື​ແຕ່​ກ່ອນ​ແມ່ນ​ບໍ່​ໄດ້ ເພາະ​ອາ­ຫານ​ຫຼື​ເຄື່ອງ​ດື່ມ​ແຕ່​ລະ​ຊະ­ນິດ​ທີ່​ແມ່­ຍິງ​ຖື­ພາ​ກິນ​ເຂົ້າ​ໄປ​ໃນ​ຮ່າງ­ກາຍ​ນັ້ນ ຈະ​ຖືກ​ສົ່ງ​ໄປ​ຍັງ​ລູກ­ນ້ອຍ​ຢູ່​ໃນ​ທ້ອງ​ທັນ­ທີ ດັ່ງ­ນັ້ນ ແມ່­ຍິງ​ທີ່​ກຳ­ລັງ​ຖື­ພາ​ຄວນ​ເລືອກ​ກິນ​ອາ­ຫານ​ທີ່​ມີ​ຄຸນ​ປະ­ໂຫຍດ​ຕໍ່​ຮ່າງ­ກາຍ ແລະ ເສີມ​ສ້າງ​ພັດ­ທະ­ນາ​ການ​ຈະ­ເລີນ​ເຕີບ​ໃຫຍ່​ຂອງ​ລູກ​ໃນ​ທ້ອງ ສະ­ນັ້ນ ແມ່­ຍິງ​ຖື­ພາ​ຄວນ​ຫຼີກ­ເວັ້ນ​ການ​ດື່ມ​ເຄື່ອງ​ດື່ມ​ທີ່​ເປັນ​ອັນ­ຕະ­ລາຍ ເຊັ່ນ: (1) ເຄື່ອງ​ດື່ມ​ທີ່​ມີ​ທາດ​ເຫຼົ້າ ແມ່­ຍິງ​ຖື­ພາ​ຈະ​ໄດ້​ຮັບ​ຄຳ­ເຕືອນ ບໍ່​ໃຫ້​ດື່ມ​ເຄື່ອງ​ດື່ມ​ທີ່​ມີ​ທາດ​ເຫຼົ້າ ເນື່ອງ​ຈາ​ກວ່າ​ທາດ​ເຫຼົ້າ​ທີ່​ດື່ມ​ເຂົ້າ​ໄປ​ນັ້ນ ຈະ​ສົ່ງ​ຜົນ​ເສຍ​ໄປ​ຫາ​ເດັກ​ໃນ​ທ້ອງ ໂດຍ​ຈະ​ທຳ​ລາຍ­ການ​ພັດ­ທະ­ນາ​ສະ­ໝອງ ແລະ ຮ່າງ­ກາຍ​ນຳ​ອີກ ເຄື່ອງ​ດື່ມ​ທີ່​ມີ​ທາດ​ເຫຼົ້າ​ທຸກ​ຊະ­ນິດ​ລ້ວນ​ແຕ່​ສາ­ມາດ​ສ້າງ​ຄວາມ​ສ່ຽງ​ໃຫ້​ແມ່­ຍິງ​ທີ່​ມັກ​ດື່ມ​ເຄື່ອງ​ດື່ມ​ທີ່​ມີ​ທາດ​ເຫຼົ້າ ໂດຍ​ສະ­ເພາະ​ແມ່ນ​ສົ່ງ​ຜົນ​ກະ­ທົບ​ຕໍ່​ການ​ພັດ­ທະ­ນາ​ເດັກ​ໃນ​ທ້ອງ​ໄດ້ ເປັນ­ຕົ້ນ​ແມ່ນ​ເຄື່ອງ​ດື່ມ​ປະ­ເພດ​ເບຍ ເຫຼົ້າ​ວາຍ ຫຼື​ເຄື່ອງ​ດື່ມ​ທີ່​ມີ​ທາດ​ແອນ​ກໍ​ຮໍ ແນວ­ໃດ​ກໍ່​ຕາມ ຜູ້​ຊ່ຽວ­ຊານ​ດ້ານ​ການ​ແພດ​ໃຫ້​ທັດ­ສະ­ນະ​ວ່າ ການ​ດື່ມ​ເຄື່ອງ​ດື່ມ​ທີ່​ມີ​ທາດ​ເຫຼົ້າ​ໃນ​ປະ­ລິ­ມານ​ເລັກ​ໜ້ອຍ​ໃນ​ບາງ​ໂອ­ກາດ ແມ່ນ​ບໍ່​ມີ​ຄວາມ​ສ່ຽງ​ອັນ­ຕະ­ລາຍ​ຕໍ່​ລູກ​ໃນ​ທ້ອງ (2) ການ​ດື່ມ­ນ້ຳ​ຊາ ແລະ ກາ­ເຟ ສຳ­ລັບ​ການ​ດື່ມ​ກາ­ເຟ​ໃນ​ປະ­ລິ­ມານ​ທີ່​ສູງ​ເກີນ​ໄປ ສາ­ມາດ​ເຮັດ​ໃຫ້​ເກີດ​ຄວາມ​ສ່ຽງ​ຕໍ່​ລູກ​ໃນ​ທ້ອງ ເຊັ່ນ: ການ​ແທ້ງ​ລູກ​ໄດ້​ງ່າຍ ແຕ່​ການ​ດື່ມ​ກາ­ເຟ​ພຽງ​ເລັກ​ໜ້ອຍ​ແມ່ນ​ບໍ່​ມີ​ຄວາມ​ສ່ຽງ ເຊິ່ງ​ແພດ​ແນະ­ນຳ​ວ່າ ການ​ດື່ມ​ກາ­ເຟ​ບໍ່​ເກີນ 200 ມີ​ລີ​ກຼາມ ຫຼື ກາ­ເຟ​ສຳ­ເລັດ​ຮູບ 1 ຈອກ​ຕໍ່​ມື້ ຖື​ວ່າ​ບໍ່​ມີ​ຜົນ​ກະ­ທົບ​ຕໍ່​ລູກ​ໃນ​ທ້ອງ ສ່ວນ​ການ​ດື່ມ­ນ້ຳ​ຊາ ມີ​ແມ່­ຍິງ​ຫຼາຍ​ຄົນ​ຫັນ​ໄປ​ດື່ມ​ຊາ​ຂຽວ​ແທນ ແຕ່​ແນວ­ໃດ​ກໍ່​ຕາມ ທາງ​ທີ່​ດີ​ຄວນ​ຈະ​ດື່ມ​ໃຫ້​ໜ້ອຍ​ລົງ ຫຼື ເຊົາ​ດື່ມ​ເລີຍ​ໃນ​ໄລ­ຍະ​ຖື­ພາ (3) ດື່ມ­ນ້ຳ​ອັດ​ລົມ ການ​ດື່ມ­ນ້ຳ​ອັດ​ລົມ ມີ​ຜົນ​ເສຍ​ຕໍ່​ສຸ­ຂະ­ພາບ​ແຂ້ວ​ຂອງ​ເຮົາ ແລະ ແຂ້ວ​ຈະ​ມີ​ໂອ­ກາດ​ຜຸ​ໄດ້​ຫຼາຍ​ກວ່າ ໂດຍ​ສະ­ເພາະ ໃນ​ໄລ­ຍະ​ຖື­ພາ ແຂ້ວ​ຂອງ​ເຮົາ​ຈະ​ມີ​ໂອ­ກາດ​ຜຸ​ໄດ້​ຫຼາຍ​ກວ່າ​ປົກ­ກະ­ຕິ ເນື່ອງ​ຈາ​ກວ່າ​ຮ່າງ­ກາຍ​ມີ​ການ​ປ່ຽນ­ແປງ​ຂອງ​ຮໍ​ໂມນ ແລະ ຄວາມ​ເປັນ​ກົດ​ໃນ​ຊ່ອງ​ປາກ​ທີ່​ເພີ່ມ​ສູງ​ຂຶ້ນ​ລະ­ຫວ່າງ​ການ​ຖື­ພາ ໂດຍ​ສະ­ເພາະ​ຢ່າງ​ຍິ່ງ ຖ້າ​ຫາກ​ເຮົາ​ປວດ­ຮາກ ແລະ ມີ​ອາ­ການ​ຮ້ອນ​ໃນ​ບໍ­ລິ­ເວນ​ໜ້າ​ເອິກ ຄວນ​ໄປ​ພົບ​ແພດ ເພື່ອ​ກວດ​ສຸ­ຂະ­ພາບ​ແຂ້ວ ເນື່ອງ​ຈາ​ກວ່າ ແມ່­ຍິງ​ຫຼາຍ​ຄົນ​ມີ​ຄວາມ​ສ່ຽງ​ທີ່​ຈະ​ເກີດ​ເປັນ​ພະ­ຍາດ​ເບົາ­ຫວານ​ໃນ​ຂະ­ນະ​ຖື­ພາ ນອກ​ນັ້ນ ການ​ດື່ມ­ນ້ຳ​ອັດ​ລົມ ທີ່​ມີ​ສານ​ໃຫ້​ຄວາມ​ຫວານ​ແທນ​ນ້ຳ­ຕານ ອາດ​ເຮັດ​ໃຫ້­ການ​ເກີດ​ລູກ​ກ່ອນ​ກຳ­ນົດ​ຫຼາຍ​ຂຶ້ນ (4) ການ​ດື່ມ­ນ້ຳ​ໝາກ​ໄມ້​ທີ່​ບໍ່​ໄດ້​ຜ່ານ​ການ​ຂ້າ​ເຊື້ອ ເມື່ອ​ເຮົາ​ຊື້​ເຄື່ອງ​ດື່ມ​ນົມ​ສົດ ຫຼື ໝາກ​ໄມ້ ຄວນ​ໃຫ້​ແນ່​ໃຈ​ວ່າ ເຄື່ອງ​ດື່ມ​ນັ້ນ​ໄດ້​ຮັບ​ການ​ຂ້າ​ເຊື້ອ​ມາ​ແລ້ວ​ຫຼື​ບໍ່ ເພື່ອ​ປ້ອງ​ກັນ​ເຊື້ອ​ແບັກ​ທີ​ເຣຍ​ທີ່​ຈະ​ມາ​ກັບ​ອາ­ຫານ ເຊັ່ນ: ອີ​ໂຄ​ໄລ ຊາ​ໂມ​ແນ​ລ່າ ແລະ ລິດ​ສະ​ເຕີ​ເຣຍ ການ​ຖື­ພາ​ເຮັດ​ໃຫ້​ພູມ​ຕ້ານ­ທານ​ໃນ​ຮ່າງ­ກາຍ​ຂອງ​ແມ່­ຍິງ​ຕ່ຳ​ລົງ ແລະ ມີ​ຄວາມ​ສ່ຽງ​ຕໍ່​ການ​ຕິດ­ເຊື້ອ​ໄດ້​ງ່າຍ ສ່ວນ​ນົມ​ທີ່​ຂາຍ​ຢູ່​ຕາມ​ຮ້ານ​ສັບ­ພະ​ສິນ­ຄ້າ ສ່ວນ​ຫຼາຍ​ແມ່ນ​ໄດ້​ຮັບ​ການ​ຂ້າ​ເຊື້ອ​ມາ​ແລ້ວ ຈຶ່ງ​ບໍ່​ມີ​ຄວາມ​ສ່ຽງ​ຕໍ່​ແມ່­ຍິງ​ພາ​ປານ­ໃດ.

ຂ່າວທີ່ກ່ຽວຂ້ອງ