ຂ່າວຫຼ້າສຸດ

ເລື່ອນຊັ້ນພົນເອກໃຫ້ທ່ານ ພົນໂທ ຈັນສະໝອນ ຈັນຍາລາດ

477 14 ທ.ວ. 2018 ຂ່າວໜ້າ​ໜຶ່ງ
ເລື່ອນຊັ້ນພົນເອກໃຫ້ທ່ານ ພົນໂທ ຈັນສະໝອນ ຈັນຍາລາດ

    ພິ­ທີ​ປະ­ກາດ​ເລື່ອນ​ຊັ້ນ​ນາຍ​ທະ­ຫານ​ຂັ້ນ​ສູງ ຊັ້ນ​ພົນ​ໂທ​ຂຶ້ນ​ເປັນ​ພົນ​ເອກ ຈັດ​ຂຶ້ນ​ວັນ​ທີ 13 ທັນ­ວາ 2018 ທີ່​ກະ­ຊວງ​ປ້ອງ​ກັນ​ປະ­ເທດ ໃຫ້​ກຽດ​ປະ­ດັບ​ໂດຍ​ທ່ານ ພັນ​ຄຳ ວິ­ພາ​ວັນ ຜູ້​ປະ­ຈຳ­ການ​ຄະ­ນະ​ເລ­ຂາ­ທິ­ການ​ສູນ​ກາງ​ພັກ ຮອງ​ປະ­ທານ​ປະ­ເທດ ມີ​ຄະ­ນະ​ນຳ ນາຍ ແລະ ພົນ­ທະ­ຫານ​ຂັ້ນ​ສູງ ກະ­ຊວງ​ປ້ອງ​ກັນ​ປະ­ເທດ​ເຂົ້າ​ຮ່ວມ.

    ໃນ​ພິ­ທີ​ທ່ານ ທອງ​ຈັນ ໂຂງ​ພູມ​ຄຳ ຮອງ​ຫົວ­ໜ້າ​ຄະ­ນະ​ຈັດ​ຕັ້ງ​ສູນ​ກາງ​ພັກ ໄດ້​ຂຶ້ນ​ຜ່ານ​ລັດ​ຖະ​ດຳ­ລັດ​ຂອງ​ປະ­ທານ​ປະ­ເທດ ອີງ​ຕາມ​ລັດ​ຖະ​ທຳ​ມະ­ນູນ​ແຫ່ງ ສປປ ລາວ ສະ­ບັບ​ປັບ­ປຸງ ປີ 2015 ມາດ­ຕາ 67 ຂໍ້ 6 ອີງ​ຕາມ​ກົດ­ໝາຍ​ວ່າ​ດ້ວຍ​ນາຍ​ທະ­ຫານ​ກອງ­ທັບ​ປະ­ຊາ­ຊົນ​ລາວ ແລະ ອີງ​ຕາມ​ໜັງ­ສື​ສະ­ເໝີ​ຂອງ​ນາ­ຍົກ­ລັດ­ຖະ­ມົນ­ຕີ ດັ່ງ­ນັ້ນ ປະ­ທານ​ປະ­ເທດ​ໄດ້​ອອກ​ລັດ​ຖະ​ດຳ­ລັດ ລົງ​ວັນ​ທີ 10 ທັນ­ວາ 2018 ວ່າ​ດ້ວຍ​ການ​ເລື່ອນ​ຊັ້ນ ທ່ານ ພົນ​ໂທ ຈັນ​ສະ­ໝອນ ຈັນ​ຍາ​ລາດ ລັດ­ຖະ­ມົນ­ຕີ​ກະ­ຊວງ​ປ້ອງ​ກັນ​ປະ­ເທດ ຂຶ້ນ​ເປັນ​ຊັ້ນ​ພົນ​ເອກ ຖື​ວ່າ​ເປັນ​ພົນ​ເອກ​ຜູ້​ທີ 3 ຂອງ ສປປ ລາວ ຖັດ​ຈາກ​ທ່ານ ພົນ​ເອກ ຄຳ​ໄຕ ສີ​ພັນ​ດອນ ແລະ ທ່ານ ພົນ​ເອກ ສີ​ສະ­ຫວາດ ແກ້ວ​ບຸນ​ພັນ.

    ທ່ານ ພົນ​ເອກ ຈັນ​ສະ­ໝອນ ຈັນ​ຍາ​ລາດ ເກີດ​ເມື່ອ​ວັນ​ທີ 1 ມີ­ນາ 1948 ທີ່​ແຂວງ​ຜົ້ງ​ສາ­ລີ ຊົນ­ເຜົ່າ​ກືມ​ມຸ ລະ­ດັບ​ວັດ­ທະ­ນະ­ທຳ ມ 6 ລະ­ດັບ​ວິ­ຊາ​ສະ­ເພາະ​ປະ­ລິນ­ຍາ​ໂທ​ການ­ເມືອງ-ການ​ທະ­ຫານ ລະ­ດັບ​ທິດ​ສະ​ດີ​ການ­ເມືອງ​ປະ­ລິນ­ຍາ​ໂທ ແລະ ໄດ້​ເຂົ້າ​ຮ່ວມ​ການ​ປະ­ຕິ­ວັດ​ໃນ​ວັນ​ທີ 4 ພະ­ຈິກ 1963 ແລະ ເຂົ້າ​ພັກ​ສົມ­ບູນ 20 ມີ­ນາ 1970 ປັດ­ຈຸ­ບັນ​ເປັນ​ກຳ­ມະ­ການ​ກົມ​ການ­ເມືອງ​ສູນ​ກາງ​ພັກ ແລະ ດຳ­ລົງ​ຕຳ­ແໜ່ງ​ເປັນ​ລັດ­ຖະ­ມົນ­ຕີ​ກະ­ຊວງ​ປ້ອງ​ກັນ​ປະ­ເທດ.

ຂ່າວທີ່ກ່ຽວຂ້ອງ