ມູນຄ່າການຄ້າລະຫວ່າງ ລາວ-ຣັດເຊຍ ເພີ່ມຂຶ້ນຫຼາຍກວ່າ 60%

438 14 ທ.ວ. 2018 ຂ່າວໜ້າ​ໜຶ່ງ
ມູນຄ່າການຄ້າລະຫວ່າງ ລາວ-ຣັດເຊຍ ເພີ່ມຂຶ້ນຫຼາຍກວ່າ 60%

    ທ່ານ ມີ​ຄາ​ອິນ ບາ​ຣານ​ນົບ ເອກ​ອັກ​ຄະ​ລັດ​ຖະ​ທູດ ສ ຣັດ​ເຊຍ ປະ­ຈຳ ສປປ ລາວ ຖະ­ແຫຼງ​ຂ່າວ​ວັນ​ທີ 12 ທັນ­ວາ​ນີ້ ຢູ່​ສະ­ຖານ­ທູດ​ດັ່ງ­ກ່າວ​ວ່າ: ສ ຣັດ​ເຊຍ ມີ​ຄວາມ​ເພິ່ງ​ພໍ­ໃຈ​ຕໍ່​ສາຍ​ພົວ­ພັນ​ຮ່ວມ​ມື​ມິດ­ຕະ­ພາບ​ລະ­ຫວ່າງ​ສອງ​ປະ­ເທດ ລາວ-ຣັດ​ເຊຍ ທີ່​ພວມ​ມີ​ບາດ­ກ້າວ​ຂະ­ຫຍາຍ­ຕົວ ໂດຍ​ມີ​ການ​ແລກ­ປ່ຽນ​ການ​ຢ້ຽມ­ຢາມ​ຂອງ​ການ​ນຳ​ຂັ້ນ​ສູງ​ທັງ​ສອງ​ປະ­ເທດ ຮ່ວມ​ກັນ​ປຶກ­ສາ​ຫາ­ລື​ຫຼາຍ​ບັນ­ຫາ ລະ­ຫວ່າງ​ຜູ້​ແທນ​ສອງ​ຝ່າຍ ໂດຍ​ສະ­ເພາະ ການ​ພົບ​ປະ​ປະ­ຈຳ​ປີ​ລະ­ຫວ່າງ​ທ່ານ ວາ​ຣາ​ດີ​ເມຍ ປູ​ຕິນ ປະ­ທາ­ນາ­ທິ­ບໍ­ດີ ສ ຣັດ​ເຊຍ ແລະ ທ່ານ ທອງ​ລຸນ ສີ​ສຸ​ລິດ ນາ­ຍົກ­ລັດ­ຖະ­ມົນ­ຕີ ສປປ ລາວ ໄດ້​ກາຍ­ເປັນ​ປະ­ເພ­ນີ​ອັນ​ດີ­ງາມ ລວມ​ທັງ​ກອງ​ປະ­ຊຸມ​ປົກ­ກະ­ຕິ​ຂອງ​ບັນ­ດາ​ຜູ້­ນຳ​ໃນ​ຂອບ​ອາ​ຊຽນ ໃນ​ເດືອນ​ພະ­ຈິກ ຢູ່​ປະ­ເທດ​ສິງ­ກະ­ໂປ ໃນ​ການ​ດຳ­ເນີນ​ການ​ພົບ​ປະ­ກັນ​ກ່ຽວ​ກັບ​ການ​ຂະ­ຫຍາຍ​ການ​ພົວ­ພັນ​ຮ່ວມ​ມື​ທະ­ວິ​ພາ­ຄີ.

    ການ​ປຶກ­ສາ​ຫາ­ລື​ຂັ້ນ​ຜູ້​ຊ່ຽວ­ຊານ​ກະ­ຊວງ​ການ​ຕ່າງ­ປະ­ເທດ​ຂອງ​ສອງ​ຊາດ ມີ​ຈຳ­ນວນ​ເພີ່ມ​ຂຶ້ນ ເດືອນ​ກໍ­ລະ­ກົດ 2017 ຢູ່​ນະ­ຄອນ­ຫຼວງ​ວຽງ​ຈັນ ໄດ້​ມີ​ກອງ​ປະ­ຊຸມ​ປຶກ­ສາ​ຫາ­ລື​ຂັ້ນ​ຄະ­ນະ​ກົມ ກະ­ຊວງ​ການ​ຕ່າງ­ປະ­ເທດ ຣັດ​ເຊຍ ແລະ ລາວ ກ່ຽວ​ກັບ​ບັນ­ຫາ​ການ​ພົວ­ພັນ​ລະ­ຫວ່າງ​ຣັດ​ເຊຍ ແລະ ອາ​ຊຽນ ສະ­ເພາະ​ການ​ຄ້າ ແລະ ການ​ຮ່ວມ​ມື​ດ້ານ​ເສດ­ຖະ­ກິດ ເປັນ​ວຽກ​ບຸ­ລິ­ມະ­ສິດ​ໃນ​ວາ­ລະ​ກອງ​ປະ­ຊຸມ​ສອງ​ຝ່າຍ ເຊິ່ງ​ມູນ​ຄ່າ​ຊື້-ຂາຍ­ຂອງ​ສອງ​ຝ່າຍ​ຍັງ​ຢູ່​ລະ­ດັບ​ຕ່ຳ ເຖິງ​ແມ່ນ​ຝ່າຍ​ລາວ​ຈະ​ໄດ້​ຮັບ​ນະ­ໂຍ­ບາຍ​ເອື້ອ​ອຳ­ນວຍ ແຕ່​ຍັງ​ມີ​ຂອບ​ຈຳ­ກັດ​ໃນ​ຫຼາຍ​ດ້ານ ສ່ວນ​ໃຫຍ່​ຍ້ອນ​ການ​ເພີ່ມ​ຂຶ້ນ​ຂອງ​ການ​ສົ່ງ​ອອກ​ຜະ­ລິດ​ຕະ​ພັນ​ຂອງ​ລາວ ໃນ​ທ້າຍ​ປີ 2018 ມູນ​ຄ່າ​ການ​ຄ້າ​ລະ­ຫວ່າງ​ສອງ​ປະ­ເທດ​ເພີ່ມ​ຂຶ້ນ​ຫຼາຍ​ກວ່າ 60% ຂະ­ແໜງ­ການ​ທີ່​ສຳ­ຄັນ​ທີ່​ສຸດ​ແມ່ນ​ພະ­ລັງ­ງານ​ໄຟ­ຟ້າ ເຊິ່ງ​ຣັດ​ເຊຍ​ໄດ້​ດຳ­ເນີນ​ການ​ສຳ​ຫຼວດ ທາງ​ທໍ­ລະ­ນີ­ວິ­ທະ­ຍາ​ຢູ່​ສະ­ຖານ­ທີ່​ກໍ່­ສ້າງ​ເຂື່ອນ​ໄຟ­ຟ້າ​ນ້ຳ­ຕົກ ແລະ ການ​ຮ່ວມ​ມື​ວຽກ​ງານ​ຫຼາຍ​ຂະ­ແໜງ­ການ​ພວມ​ສືບ­ຕໍ່​ໄປ​ໃນ​ທາງ​ທີ່​ດີ ພິ­ເສດ​ການ​ຮ່ວມ​ມື​ພັດ­ທະ­ນາ​ສາຍ​ພົວ­ພັນ​ດ້ານ​ການ​ສຶກ​ສາ ໃນ​ປີ​ນີ້​ໄດ້​ສົ່ງ​ນັກ​ສຶກ​ສາ​ລາວ 91 ຄົນ ໄປ​ສຶກ​ສາ​ຢູ່​ມະ­ຫາ­ວິ­ທະ­ຍາ­ໄລ​ແຫ່ງ​ຕ່າງໆ​ໃນ​ຣັດ​ເຊຍ.

    ທ່ານ ມີ​ຄາ​ອິນ ບາ​ຣານ​ນົບ ຍັງ​ໄດ້​ຢືນ­ຢັນ​ເຖິງ​ເຈ­ຕະ­ນາ​ຂອງ​ລັດ­ຖະ­ບານ​ຣັດ​ເຊຍ ທີ່​ມີ​ຕໍ່​ອາ​ຊຽນ ແລະ ສາ­ກົນ ໃນ​ການ​ຮ່ວມ​ມື​ສົ່ງ­ເສີມ​ເສດ­ຖະ­ກິດ​ການ​ຄ້າ ແລະ ສັງ­ຄົມ ໂດຍ​ສະ­ເພາະ ສປປ ລາວ ຍັງ​ຈະ​ສືບ­ຕໍ່​ສາຍ​ພົວ­ພັນ​ຮ່ວມ​ມື​ມິດ­ຕະ­ພາບ​ທີ່​ມີ​ມູນ­ເຊື້ອ​ມາ​ແຕ່​ດົນ​ນານ ໃຫ້​ນັບ​ມື້​ແຕກ​ດອກ​ອອກ​ຜົນ ນອກ​ນີ້​ຍັງ​ໄດ້​ຍົກ​ໃຫ້​ເຫັນ​ບາງ​ທັດ­ສະ­ນະ​ຂອງ​ຣັດ​ເຊຍ​ຕໍ່​ອາ​ຊຽນ ແລະ ສາ­ກົນ ບາງ​ບັນ­ຫາ​ທີ່​ພົ້ນ​ເດັ່ນ​ໃນ​ຂົງ­ເຂດ​ພາກ​ພື້ນ ແລະ ສາ­ກົນ ນຳ​ອີກ.

ຂ່າວທີ່ກ່ຽວຂ້ອງ