ຂ່າວຫຼ້າສຸດ

ວາງສະແດງຮູບພາບ-ວັດຖຸ ຜົນງານມູນເຊື້ອປະຕິວັດ ຄົບຮອບ 70 ປີ

534 14 ທ.ວ. 2018 ຂ່າວໜ້າ​ໜຶ່ງ
ວາງສະແດງຮູບພາບ-ວັດຖຸ ຜົນງານມູນເຊື້ອປະຕິວັດ ຄົບຮອບ 70 ປີ

    ເພື່ອ​ເປັນ​ການ​ຈົດ​ຈຳ​ລ້ຳ​ລຶກ​ຜົນ­ງານ​ມູນ­ເຊື້ອ​ອັນ​ອົງ­ອາດ​ກ້າ­ແກ່ນ ວີ­ລະ​ກຳ​ລ້ຳ​ເລີດ​ຂອງ​ກອງ­ທັບ​ປະ­ຊາ­ຊົນ​ລາວ ພາຍ​ໃຕ້​ຮົ່ມ​ທຸງ​ຂອງ​ພັກ ໄລ­ຍະ 70 ປີ­ຜ່ານ­ມາ ບັນ­ດາ​ຫຼັກ​ຖານ​ຜົນ­ງານ ມູນ­ເຊື້ອ​ປະ­ຕິ­ວັດ​ດັ່ງ­ກ່າວ​ຂອງ​ກອງ­ທັບ​ຈຳ­ນວນ​ໜຶ່ງ ຈຶ່ງ​ໄດ້​ນຳ​ມາ​ສະ­ແດງ​ເພື່ອ​ໃຫ້​ມວນ​ຊົນ​ທຸກ​ເພດ​ໄວ ທຸກ​ຊັ້ນ​ຄົນ ແຂກ​ພາຍ​ໃນ ແລະ ຕ່າງ­ປະ­ເທດ ໄດ້​ເຫັນ ໄດ້​ສຳ­ຜັດ ຮັບ​ຮູ້​ປະ­ຫວັດ­ສາດ​ຂອງ​ຊາດ ຂອງ​ພັກ ແລະ ຂອງ​ກອງ­ທັບ ທັງ​ເປັນ​ການ​ສຶກ​ສາ​ອົບ­ຮົມ​ແນວ​ຄິດ-ປູກ​ຈິດ​ສຳ­ນຶກ​ໃຫ້​ລູກ​ຫຼານ ມີ​ຄວາມ​ກະ­ຕັນ­ຍູ​ຮູ້​ບຸນ­ຄຸນ​ຕໍ່​ພັກ ຕໍ່​ກອງ­ທັບ ສືບ­ຕໍ່​ເດີນ​ຕາມ​ອຸ­ດົມ​ການ ເພື່ອ​ປົກ​ປັກ​ຮັກ­ສາ ແລະ ສ້າງ­ສາ​ພັດ­ທະ­ນາ​ປະ­ເທດ​ຊາດ ກ້າວ​ສູ່​ຈຸດ­ໝາຍ​ສັງ­ຄົມ​ນິ­ຍົມ​ຢ່າງ​ສົມ­ບູນ ໂດຍ​ງານ​ວາງ­ສະ­ແດງ​ຄັ້ງ​ນີ້ ຈະ​ດຳ­ເນີນ​ແຕ່​ວັນ 13 ທັນ­ວາ 2018-15 ກຸມ­ພາ 2019.

    ກະ­ຊວງ​ປ້ອງ​ກັນ​ປະ­ເທດ ຈັດ​ງານ​ວາງ­ສະ­ແດງ​ຮູບ​ພາບ-ວັດ­ຖຸ ຜົນ­ງານ​ມູນ­ເຊື້ອ​ປະ­ຕິ­ວັດ​ຂອງ​ກອງ­ທັບ​ປະ­ຊາ­ຊົນ ຂຶ້ນ​ວັນ​ທີ 13 ທັນ­ວາ 2018 ຢູ່​ຫໍ​ພິ​ພິ​ທະ​ພັນ​ກອງ­ທັບ ໂດຍ​ມີ​ທ່ານ ພົນ​ເອກ ຈັນ​ສະ​ໜອນ ຈັນ​ຍາ​ລາດ ລັດ­ຖະ­ມົນ­ຕີ​ກະ­ຊວງ​ປ້ອງ​ກັນ​ປະ­ເທດ ບັນ­ດາ​ການ​ນຳ​ພັກ-ລັດ ກະ­ຊວງ​ປ້ອງ​ກັນ​ປະ­ເທດ ແລະ ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

    ທ່ານ ພົນ​ຈັດ­ຕະ­ວາ ວົງ​ສອນ ອິນ​ປານ​ພິມ ຮອງ​ຫົວ­ໜ້າ​ກົມ​ໃຫຍ່​ການ­ເມືອງ​ກອງ­ທັບ ກ່າວ​ວ່າ: ຍ້ອນ​ເຫັນ​ໄດ້​ຄວາມ​ໝາຍ​ສຳ­ຄັນ ຄຸນ­ຄ່າ​ອັນ​ປະ­ເສີດ​ເລີດ​ລ້ຳ​ແຫ່ງ​ວີ­ລະ​ກຳ​ປະ­ຫວັດ­ສາດ​ຂອງ​ກອງ­ທັບ​ປະ­ຊາ­ຊົນ​ລາວ ໄລ­ຍະ 70 ປີ​ແຫ່ງ​ການ​ກຳ­ເນີດ​ເຕີບ​ໃຫຍ່​ຂະ­ຫຍາຍ­ຕົວ ແລະ ສູ້​ຮົບ​ມີ​ໄຊ ຄວາມ​ເສຍ­ສະ­ຫຼະ​ຢ່າງ​ບໍ່​ມີ​ຂອບ​ເຂດ​ຂອງ​ພະ­ນັກ­ງານ-ນັກ­ຮົບ​ທີ່​ໄດ້​ອຸ­ທິດ​ຕົນ​ເພື່ອ​ພາ­ລະ­ກິດ​ຕໍ່­ສູ້​ກູ້​ຊາດ ຍາດ​ເອົາ​ເອ­ກະ­ລາດ ອຳ­ນາດ​ອະ­ທິ­ປະ​ໄຕ ຄວາມ​ຮົ່ມ​ເຢັນ​ມາ​ໃຫ້​ປະ­ຊາ­ຊົນ​ລາວ​ບັນ­ດາ­ເຜົ່າ ແລະ ໄດ້​ເປັນ​ເຈົ້າ​ປະ­ເທດ​ຊາດ​ຢ່າງ​ແທ້​ຈິງ.

ຂ່າວທີ່ກ່ຽວຂ້ອງ