ກີລາ ມ ອາຊຽນ ໄຂຂຶ້ນເປັນທາງການ ລາວໄດ້ 2 ຫຼຽນຄຳ 4 ຫຼຽນເງິນ

369 14 ທ.ວ. 2018 ວົງຈອນກີລາ
ກີລາ ມ ອາຊຽນ ໄຂຂຶ້ນເປັນທາງການ ລາວໄດ້ 2 ຫຼຽນຄຳ 4 ຫຼຽນເງິນ

    ງານ​ແຂ່ງ­ຂັນ​ກີ­ລາ​ມະ­ຫາ­ວິ­ທະ­ຍາ­ໄລ​ອາ​ຊຽນ (ມ ອາ​ຊຽນ) ຄັ້ງ​ທີ 19 ໄຂ​ຂຶ້ນ​ເປັນ​ທາງ​ການ​ວັນ​ທີ 10 ທັນ­ວາ 2018 ຢູ່​ເນ​ປີ​ດໍ ສສ ມຽນ​ມາ ໂດຍ​ມີ​ນັກ­ກີ­ລາ​ເກືອບ 1.500 ຄົນ ຈາກ​ມະ­ຫາ­ວິ­ທະ­ຍາ­ໄລ 10 ປະ­ເທດ​ອາ​ຊຽນ ແລະ ຕີ​ມໍ​ເລັສ​ເຕ ເຂົ້າ​ຮ່ວມ ມີ​ການ​ຊີງ​ໄຊ 201 ຫຼຽນ​ຄຳ ໃນ 17 ປະ­ເພດ​ກີ­ລາ ຄື: ບານ­ເຕະ​ຊາຍ ຍິງ​ທະ­ນູ ແລ່ນ-ລານ ດອກ​ປີກ​ໄກ່ ບານ­ບ້ວງ ໝາກ­ເສິກ ກັອຟ ຄາ​ຣາ​ເຕ​ໂດ ເປ​ຕັງ ເຮືອ­ພາຍ ກະ­ຕໍ້ ກະ­ຕໍ້​ຊິນ​ລອນ ລອຍ­ນ້ຳ ປິ່ງ​ປ່ອງ ເທັນ​ນິ​ສ ບານ­ສົ່ງ ໂວ​ວີ​ນາມ ແລະ ວູ​ຊູ.

    ສຳ­ລັບ ສປປ ລາວ ໄດ້​ສົ່ງ​ຄະ­ນະ​ນຳ ຄູ​ເຝິກ ກຳ­ມະ­ການ ແລະ ນັກ­ກີ­ລາ​ເຂົ້າ​ຮ່ວມ 150 ຄົນ ຮ່ວມ​ແຂ່ງ­ຂັນ 9 ປະ­ເພດ​ເຊັ່ນ: ບານ­ເຕະ​ຊາຍ ແລ່ນ-ລານ ເປ​ຕັງ ວູ​ຊູ ຍິງ​ທະ­ນູ ໂວ​ວີ​ນາມ ດອກ​ປີກ​ໄກ່ ກະ­ຕໍ້ ແລະ ກັອຟ ໂດຍ​ວາງ​ເປົ້າ​ໝາຍ​ຢ່າງ​ໜ້ອຍ 5 ຫຼຽນ​ຄຳ.

    ວັນ​ທີ 11 ທັນ­ວາ 2018 ນັກ­ກີ­ລາ​ລາວ ຍາດ​ໄດ້​ເພີ່ມ​ອີກ 1 ຫຼຽນ​ຄຳ 3 ຫຼຽນ​ເງິນ ໂດຍ 1 ຫຼຽນ​ຄຳ 2 ຫຼຽນ​ເງິນ ຈາກ​ກີ­ລາ​ວູ​ຊູ ປະ­ເພດ​ຕໍ່­ສູ້ ຮຸ່ນ 60 ກິ​ໂລ ທ້າວ ໜູ​ຄິດ ລາດ​ຊະ​ເພົາ ຮອບ​ຊີງ ຊະ­ນະ​ນັກ­ກີ­ລາ​ໄທ​ອີກ 2 ຫຼຽນ​ເງິນ ໄດ້​ຈາກ​ກີ­ລາ​ວູ​ຊູ ປະ­ເພດ​ຕໍ່­ສູ້​ຈາກ​ທ້າວ ລາ­ຕີ ອິນ​ທະ​ວົງ ຮຸ່ນ 65 ກິ​ໂລ ແລະ ທ້າວ ກາ­ລັນ ອິນ​ທະ​ວົງ ຮຸ່ນ 70 ກິ​ໂລ ສ່ວນ​ອີກ 1 ຫຼຽນ​ເງິນ​ໄດ້​ຈາກ​ກີ­ລາ​ກະ­ຕໍ້​ຊິນ​ລອນ ລາຍ­ການ Event 4 ຫຼຽນ​ຄຳ​ເປັນ​ຂອງ​ເຈົ້າ­ພາບ ຫຼຽນ​ທອງ​ເປັນ​ຂອງ​ໄທ.

    ມາ​ຮອດ​ວັນ​ທີ 12 ທັນ­ວາ ນັກ­ກີ­ລາ​ລາວ ສາ­ມາດ​ຍາດ​ມາ​ໄດ້ 2 ຫຼຽນ​ຄຳ 4 ຫຼຽນ​ເງິນ ຢູ່​ອັນ​ດັບ​ທີ 5 ຂອງ​ຕາ­ຕະ­ລາງ​ແຂ່ງ­ຂັນ ແລະ ຍັງ​ມີ​ຄວາມ​ຫວັງ​ອີກ​ຫຼາຍ​ປະ­ເພດ​ກີ­ລາ​ໃນ​ການ​ແຂ່ງ­ຂັນ​ທີ່​ເຫຼືອ.

ຂ່າວທີ່ກ່ຽວຂ້ອງ