ຂ່າວຫຼ້າສຸດ

ລາວ-ຈີນ ຫາລືການຈັດຕັ້ງຜັນຂະຫຍາຍ ໂຄງການຊ່ວຍເຫຼືອລ້າ

395 13 ທ.ວ. 2018 ຂ່າວໜ້າ​ໜຶ່ງ

    ທ່ານ​ນາງ ເຂັມ​ມະ­ນີ ພົນ​ເສ­ນາ ລັດ­ຖະ­ມົນ­ຕີ​ກະ­ຊວງ​ອຸດ­ສາ­ຫະ­ກຳ ແລະ ການ​ຄ້າ ປະ­ທານ​ຄະ­ນະ​ກຳ­ມະ­ການ​ຮ່ວມ​ມື​ລາວ-ຈີນ ຕ້ອນ­ຮັບ​ການ​ເຂົ້າ​ພົບ​ປະ​ຂອງ​ທ່ານ Deng Boqing ຮອງ​ຫົວ­ໜ້າ​ອົງ­ການ​ຮ່ວມ​ມື​ສາ­ກົນ​ເພື່ອ​ການ​ພັດ­ທະ­ນາ​ແຫ່ງ​ຊາດ​ຈີນ (CIDCA) ພ້ອມ​ຄະ­ນະ ວັນ​ທີ 10 ທັນ­ວາ 2018 ຢູ່​ກະ­ຊວງ​ດັ່ງ­ກ່າວ ໃນ​ໂອ­ກາດ​ມາ​ຢ້ຽມ­ຢາມ ແລະ ເຮັດ​ວຽກ​ຢູ່​ລາວ ວັນ​ທີ 9-12 ທັນ­ວາ​ນີ້.

    ການ​ພົບ​ປະ​ຄັ້ງ​ນີ້ ຄະ­ນະ​ດັ່ງ­ກ່າວ ໄດ້​ແຈ້ງ​ພາ­ລະ​ບົດ­ບາດ ໜ້າ­ທີ່​ຮັບ­ຜິດ­ຊອບ ແບບ­ແຜນ​ການ​ເຮັດ​ວຽກ​ຕໍ່​ຝ່າຍ​ລາວ ພ້ອມ​ທັງ​ໄດ້​ປຶກ­ສາ​ຫາ­ລື​ກ່ຽວ​ກັບ​ການ­ຈັດ­ຕັ້ງ​ຜັນ​ຂະ­ຫຍາຍ ໂຄງ­ການ​ຊ່ວຍ­ເຫຼືອ​ລ້າ ມູນ​ຄ່າ 4 ຕື້​ຢວນ ຫຼື ປະ­ມານ 4.975,56 ຕື້​ກີບ ທີ່​ປະ­ທານ​ປະ­ເທດ​ຈີນ ປະ­ກາດ​ໃຫ້­ການ​ຊ່ວຍ­ເຫຼືອ​ລາວ ປີ 2018-2020 ການ​ຢ້ຽມ­ຢາມ​ຂອງ​ທ່ານ Deng Boqing ຄັ້ງ​ນີ້ ຍັງ​ຈະ​ເປັນ​ການ​ປະ­ກອບ­ສ່ວນ​ຊຸກ­ຍູ້​ສາຍ​ພົວ­ພັນ ຄູ່​ຮ່ວມ​ຍຸດ​ທະ​ສາດ​ຮອບ­ດ້ານ​ບົນ​ພື້ນ­ຖານ 4 ດີ ແລະ ອື່ນໆ.

    ໂຄງ­ການ​ຊ່ວຍ­ເຫຼືອ​ລ້າ​ດັ່ງ­ກ່າວ ຈະ​ໄດ້​ປະ­ກອບ­ສ່ວນ​ໃນ​ການ​ພັດ­ທະ­ນາ​ຂອງ​ລາວ ໂດຍ​ສະ­ເພາະ ວຽກ​ງານ​ພັດ­ທະ­ນາ​ຊົນ­ນະ­ບົດ ແລະ ແກ້​ໄຂ​ຄວາມ­ທຸກ​ຍາກ ຊ່ວຍ​ໃຫ້​ລັດ­ຖະ­ບານ​ລາວ​ບັນ­ລຸ​ເປົ້າ​ໝາຍ ການ​ນຳ­ພາ​ປະ­ເທດ​ຊາດ​ຫຼຸດ​ພົ້ນ​ອອກ​ຈາກ​ສະ­ຖາ­ນະ​ພາບ​ດ້ອຍ​ພັດ­ທະ­ນາ ໃນ​ປີ 2020 ແລະ ການ​ແກ້​ໄຂ​ຄວາມ­ທຸກ​ຍາກ​ໄດ້​ໂດຍ​ພື້ນ­ຖານ ນອກ​ນີ້ ສອງ​ຝ່າຍ​ຍັງ​ໄດ້​ປຶກ­ສາ​ຫາ­ລື​ໃນ​ທິດ​ທາງ​ການ­ຈັດ­ຕັ້ງ​ປະ­ຕິ­ບັດ ໂຄງ­ການ​ຊ່ວຍ­ເຫຼືອ​ລ້າ​ຂອງ​ຈີນ​ຕໍ່​ລາວ ລວມ​ທັງ​ຮູບ​ແບບ ແລະ ວິ­ທີ​ການ ພາຍ­ຫຼັງ​ລັດ­ຖະ­ບານ​ຈີນ ໄດ້​ມີ​ການ​ສ້າງ­ຕັ້ງ​ອົງ­ການ​ຊ່ວຍ­ເຫຼືອ​ຕ່າງ­ປະ­ເທດ​ຂອງ​ຕົນ​ຂຶ້ນ​ເປັນ​ທາງ​ການ.

ຂ່າວທີ່ກ່ຽວຂ້ອງ