ຂ່າວຫຼ້າສຸດ

ສສຊ ຮັບຮອງເອົາຮ່າງກົດໝາຍ ວ່າດ້ວຍລາຍເຊັນເອເລັກໂຕຣນິກ

243 13 ທ.ວ. 2018 ຂ່າວໜ້າ​ໜຶ່ງ

    ກອງ​ປະ­ຊຸມ​ສະ­ໄໝ​ສາ­ມັນ​ເທື່ອ​ທີ 6 ຂອງ​ສະ­ພາ​ແຫ່ງ​ຊາດ ຊຸດ​ທີ VIII ວັນ​ທີ 12 ທັນ­ວາ 2018 ຢູ່​ສະ­ພາ​ແຫ່ງ​ຊາດ ໂດຍ​ເປັນ​ປະ­ທານ​ຂອງ​ທ່ານ ບຸນ​ປອນ ບຸດ​ຕະ​ນະ​ວົງ ຮອງ​ປະ­ທານ​ສະ­ພາ​ແຫ່ງ​ຊາດ ມີ​ສະ­ມາ­ຊິກ​ສະ­ພາ​ແຫ່ງ​ຊາດ (ສສຊ) ປະ­ຈຳ​ເຂດ​ເລືອກ​ຕັ້ງ​ຕ່າງໆ​ເຂົ້າ​ຮ່ວມ ເຊິ່ງ​ໄດ້​ຮັບ​ຟັງ​ການ​ສະ­ເໜີ​ຮ່າງ​ກົດ­ໝາຍ ວ່າ​ດ້ວຍ​ລາຍ​ເຊັນ​ເອ​ເລັກ​ໂຕຣ​ນິກ.

    ທ່ານ ທັນ​ສະ­ໄໝ ກົມ​ມະ​ສິດ ລັດ­ຖະ­ມົນ­ຕີ​ກະ­ຊວງ​ໄປ­ສະ­ນີ ໂທລະ​ຄົມ­ມະ­ນາ­ຄົມ ແລະ ການ​ສື່­ສານ (ປທສ) ກ່າວ​ວ່າ: ການ​ສ້າງ​ກົດ­ໝາຍ​ສະ­ບັບ​ນີ້ ມີ​ຄວາມ​ຈຳ­ເປັນ​ເພື່ອ​ຄຸ້ມ​ຄອງ ເກັບ​ກຳ ແລະ ສົ່ງ­ເສີມ​ການ​ນຳ​ໃຊ້​ລາຍ​ເຊັນ​ເອ​ເລັກ​ໂຕຣ​ນິກ ເຮັດ​ໃຫ້­ການ​ນຳ​ໃຊ້ ແລະ ການ​ບໍ­ລິ­ການ​ມີ​ຄວາມ​ຖືກ­ຕ້ອງ ໄດ້​ມາດ­ຕະ­ຖານ ແນ­ໃສ່​ສ້າງ​ຄວາມ​ສະ­ດວກ ວ່ອງ­ໄວ ທັນ​ສະ­ໄໝ ໂປ່ງ​ໃສ ປອດ​ໄພ ແລະ ຍຸ­ຕິ​ທຳ​ຕໍ່​ຜູ້​ບໍ­ລິ­ການ ຜູ້​ໃຊ້​ບໍ­ລິ­ການ​ໃນ​ຂົງ­ເຂດ​ການ​ຄ້າ ການ​ເງິນ ແລະ ບໍ­ລິ­ການ​ທາງ​ອິນ​ເຕີ​ເນັດ​ອື່ນໆ ເປັນ​ການ​ຜັນ​ຂະ­ຫຍາຍ ແລະ ຮອງ​ຮັບ​ກົດ­ໝາຍ​ເຕັກ​ໂນ​ໂລ​ຊີ​ການ​ສື່­ສານ​ຂໍ້​ມູນ​ຂ່າວ­ສານ ກົດ­ໝາຍ​ປົກ​ປ້ອງ​ຂໍ້​ມູນ​ຂ່າວ­ສານ​ຜ່ານ​ອິນ​ເຕີ​ເນັດ ແລະ ດຳ­ລັດ​ວ່າ​ດ້ວຍ​ສູນ​ຂໍ້​ມູນ​ຂ່າວ­ສານ​ຜ່ານ​ອິນ​ເຕີ​ເນັດ ໃຫ້​ສາ­ມາດ​ປະ­ຕິ­ບັດ​ຢ່າງ​ສະ­ດວກ ແລະ ຮັບ­ປະ­ກັນ​ຄວາມ​ປອດ​ໄພ ເປັນ​ການ​ຊຸກ­ຍູ້​ການ​ຄ້າ​ເອ​ເລັກ​ໂຕຣ​ນິກ​ໃຫ້​ຂະ­ຫຍາຍ­ຕົວ ແລະ ເຊື່ອມ​ໂຍງ​ກັບ​ສາ­ກົນ​ໄດ້ ເພື່ອ​ສົ່ງ­ເສີມ​ການ​ຫັນ​ການ​ບໍ­ລິ­ຫານ ບໍ­ລິ­ການ​ຂອງ​ລັດ ໄປ​ສູ່​ລະ­ບົບ​ເອ​ເລັກ​ໂຕຣ​ນິກ​ໄດ້​ຢ່າງ​ມີ​ປະ​ສິດ­ທິ​ຜົນ ໂດຍ​ຮັບ­ປະ­ກັນ​ຄວາມ​ປອດ​ໄພ​ຂອງ​ຂໍ້​ມູນ​ຂ່າວ­ສານ​ພາກ​ລັດ ສ້າງ​ເງື່ອນ­ໄຂ​ໃຫ້​ພາກ​ທຸ­ລະ​ກິດ​ດຳ­ເນີນ​ທຸ­ລະ​ກິດ​ຢ່າງ​ສະ­ດວກ ປະ­ຢັດ ແລະ ປອດ​ໄພ ກົດ­ໝາຍ​ດັ່ງ­ກ່າວ​ປະ­ກອບ​ມີ 13 ພາກ 82 ມາດ­ຕາ.

ຂ່າວທີ່ກ່ຽວຂ້ອງ