ຂ່າວຫຼ້າສຸດ

ປະຊາຊົນ 150.000 ຄົນ ໄດ້ຮັບຜົນປະໂຫຍດຈາກແຜນງານລາວ/030

290 13 ທ.ວ. 2018 ຂ່າວໜ້າ​ໜຶ່ງ
ປະຊາຊົນ 150.000 ຄົນ ໄດ້ຮັບຜົນປະໂຫຍດຈາກແຜນງານລາວ/030

    ກອງ​ປະ­ຊຸມ​ຄະ­ນະ​ຊີ້​ນຳ​ລະ­ດັບ​ຊາດ ຄັ້ງ​ທີ II ເພື່ອ​ຈັດ​ຕັ້ງ​ປະ­ຕິ­ບັດ​ແຜນ​ງານ​ພັດ­ທະ­ນາ​ທ້ອງ­ຖິ່ນ (ແຜນ​ງານ​ລາວ/030) ສຳ­ລັບ​ແຂວງ​ບໍ່​ແກ້ວ ວຽງ​ຈັນ ບໍ​ລິ​ຄຳ​ໄຊ ແລະ ແຂວງ​ຄຳ​ມ່ວນ ຈັດ​ຂຶ້ນ​ວັນ​ທີ 12 ທັນ­ວາ 2018 ຢູ່​ໂຮງ­ແຮມ​ລາວ​ພຣາ​ຊາ ໂດຍ​ເປັນ​ປະ­ທານ​ຂອງ​ທ່ານ ກິ​ແກ້ວ ຈັນ­ທະ​ບູ​ຣີ ຮອງ​ລັດ­ຖະ­ມົນ­ຕີ ກະ­ຊວງ​ແຜນ­ການ ແລະ ການ​ລົງ­ທຶນ (ຜທ) ແລະ ທ່ານ ແຊມ ໄຊ​ເນີ ອຸ­ປະ​ທູດ​ຣາ​ຊະ​ອາ​ນະ​ຈັກ​ລຸກ​ຊຳ​ບວກ ມີ​ບັນ­ດາ​ຮອງ​ເຈົ້າ­ແຂວງ ແລະ ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

    ທ່ານ​ນາງ ພອນ​ວັນ ອຸ​ທະ​ວົງ ຫົວ­ໜ້າ​ກົມ​ແຜນ­ການ ກະ­ຊວງ ຜທ ໄດ້​ລາຍ​ງານ​ຕໍ່​ກອງ​ປະ­ຊຸມ​ວ່າ: ປີ 2018 ວຽກ​ງານ​ຈຸດ​ສຸມ​ໃນ​ບ້ານ​ເປົ້າ​ໝາຍ ທີ່​ໄດ້​ສຳ­ເລັດ​ການ​ສ້າງ​ແຜນ​ພັດ­ທະ­ນາ​ບ້ານ ເຊິ່ງ​ມີ​ມູນ​ຄ່າ​ກອງ​ທຶນ​ພັດ­ທະ­ນາ​ຕໍ່​ບ້ານ 20.000 ເອີ​ໂຣ ຫຼື ປະ­ມານ 194 ລ້ານ​ກີບ ເພື່ອ​ຈັດ​ຕັ້ງ​ປະ­ຕິ­ບັດ 1.400 ກິດ­ຈະ­ກຳ ແລະ ເລີ່ມ​ກໍ່­ສ້າງ​ໂຄງ­ການ​ພັດ­ທະ­ນາ​ພື້ນ­ຖານ​ໂຄງ​ລ່າງ​ທີ່​ຈຳ­ເປັນ​ຂະ­ໜາດ​ນ້ອຍ 58 ໂຄງ­ການ ໃນ​ນີ້ ມີ​ໂຄງ­ການ​ສຶກ​ສາ 38 ໂຄງ­ການ ລະ­ບົບ​ສະ­ໜອງ​ນ້ຳ 17 ໂຄງ­ການ ໂຄງ­ການ​ປັບ­ປຸງ​ເສັ້ນ­ທາງ 3 ເສັ້ນ ຜ່ານ​ການ­ຈັດ­ຕັ້ງ​ປະ­ຕິ­ບັດ​ໂຄງ­ການ​ແຜນ​ງານ​ລາວ/030 ມູນ​ຄ່າ 23 ລ້ານ​ເອີ​ໂຣ ຫຼື ປະ­ມານ 223.910 ຕື້​ກີບ ທີ່​ໄດ້​ຮັບ​ການ​ສະ­ໜັບ­ສະ­ໜູນ​ຈາກ​ລັດ­ຖະ­ບານ​ລຸກ​ຊຳ​ບວກ ເພື່ອ​ພັດ­ທະ­ນາ​ຊົນ­ນະ­ບົດ ດ້ວຍ​ການ​ສ້າງ​ຄວາມ​ເຂັ້ມ­ແຂງ​ດ້ານ​ວຽກ​ງານ​ບໍ­ລິ­ຫານ​ລັດ ທີ່​ຕິດ​ພັນ​ກັບ​ການ​ຫຼຸດ­ຜ່ອນ​ຄວາມ­ທຸກ​ຍາກ​ໃນ 229 ບ້ານ ໃນ 14 ເມືອງ​ຂອງ 4 ແຂວງ​ເປົ້າ​ໝາຍ ມີ​ປະ­ຊາ­ຊົນ​ໄດ້​ຮັບ​ປະ­ໂຫຍດ​ປະ­ມານ 150.000 ຄົນ ເຊິ່ງ​ໄດ້​ປະ­ກອບ­ສ່ວນ​ເຮັດ​ໃຫ້​ຊີ­ວິດ​ການ​ເປັນ​ຢູ່​ຂອງ​ເຂົາ­ເຈົ້າ​ນັບ​ມື້​ດີ​ຂຶ້ນ ແລະ ຫຼຸດ​ພົ້ນ​ອອກ​ຈາກ​ຄວາມ­ທຸກ​ຍາກ​ເທື່ອ​ລະ​ກ້າວ.

    ສຳ­ລັບ​ສົກ​ປີ 2019-2020 ແຜນ​ງານ​ລາວ/030 ຈະ​ສືບ­ຕໍ່​ຈັດ​ຕັ້ງ​ປະ­ຕິ­ບັດ​ອີກ 92 ໂຄງ­ການ ແລະ ເອົາ­ໃຈ­ໃສ່​ສົ່ງ­ເສີມ​ວຽກ​ງານ​ບໍ­ລິ­ຫານ​ຄຸ້ມ​ຄອງ​ພາກ​ລັດ​ໃນ​ຫຼາຍ​ຂົງ­ເຂດ​ຍ່ອຍ ເປັນ­ຕົ້ນ ວຽກ​ງານ​ສະ­ຖິ­ຕິ ການ​ວາງ​ແຜນ​ລະ­ບົບ​ຂໍ້​ມູນ​ຂ່າວ­ສານ​ດ້ານ​ພູມ​ສາດ ແລະ ວຽກ​ງານ​ທີ່​ຕິດ​ພັນ​ກັບ​ການ​ພັດ­ທະ­ນາ​ອື່ນໆ ເພື່ອ​ສະ­ໜັບ­ສະ­ໜູນ​ການ­ຈັດ­ຕັ້ງ​ປະ­ຕິ­ບັດ​ຍຸດ​ທະ​ສາດ​ຫຼຸດ­ຜ່ອນ​ຄວາມ­ທຸກ​ຍາກ ເຊິ່ງ​ເປັນ​ບຸ­ລິ­ມະ­ສິດ​ຂອງ​ແຜນ​ພັດ­ທະ­ນາ​ເສດ­ຖະ­ກິດ-ສັງ­ຄົມ 5 ປີ ຄັ້ງ​ທີ VIII (2016-2020) ກໍ່​ຄື ແຜນ​ພັດ­ທະ­ນາ​ທ້ອງ­ຖິ່ນ​ໃຫ້​ມີ​ຜົນ­ສຳ­ເລັດ​ຕາມ​ເປົ້າ​ໝາຍ​ທີ່​ວາງ​ໄວ້.

ຂ່າວທີ່ກ່ຽວຂ້ອງ