ສາລະວັນ ຈະໃຫ້ຢາວັກແຊັງແມ່-ເດັກ ໃຫ້ໄດ້ຫຼາຍກວ່າ 90%

215 13 ທ.ວ. 2018 ຂ່າວໜ້າ​ໜຶ່ງ
ສາລະວັນ ຈະໃຫ້ຢາວັກແຊັງແມ່-ເດັກ ໃຫ້ໄດ້ຫຼາຍກວ່າ 90%

    ທ່ານ ກອນ​ສະ­ໜຸກ ສິງ​ພວງ​ເພັດ ຮອງ​ໜ່ວຍ​ງານ​ປຸກ­ລະ­ດົມ ສູນ​ສຸ­ຂະ­ພາບ​ແມ່ ແລະ ເດັກ ກົມ​ອະ­ນາ­ໄມ ແລະ ສົ່ງ­ເສີມ​ສຸ­ຂະ­ພາບ ກະ­ຊວງ​ສາ­ທາ­ລະ­ນະ​ສຸກ ສືບ­ຕໍ່​ເຄື່ອນ​ໄຫວ​ຕິດ­ຕາມ​ຂະ​ບວນ​ການ​ໃຫ້​ວັກ​ແຊັງ​ກັນ​ພະ­ຍາດ​ແມ່ ແລະ ເດັກ ຮອບ​ຕະ­ລຸມ­ບອນ ຢູ່​ບ້ານ​ນາ​ກອກ ເມືອງ​ຄົງ​ເຊ​ໂດນ ແຂວງ​ສາ­ລະ​ວັນ ວັນ​ທີ 11 ທັນ­ວາ 2018 ໂດຍ​ມີ​ທ່ານ ບຸນ​ກອງ ໄຊ​ສົມ­ບັດ ຫົວ­ໜ້າ​ຂະ­ແໜງ​ອະ­ນາ­ໄມ ແລະ ສົ່ງ­ເສີມ​ສຸ­ຂະ­ພາບ ພະ​ແນກ​ສາ­ທາ­ລະ­ນະ​ສຸກ ແຂວງ​ເຊ​ກອງ ພ້ອມ​ດ້ວຍ​ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

    ທ່ານ ບຸນ​ກອງ ໄຊ​ສົມ­ບັດ ກ່າວ​ວ່າ: ປີ 2018 ແຂວງ​ສາ­ລະ​ວັນ ໄດ້​ຊີ້​ນຳ​ວຽກ​ງານ​ສັກ​ຢາ​ເປັນ​ປົກ­ກະ­ຕິ​ໂດຍ​ແບ່ງ​ເປັນ​ການ​ບໍ­ລິ­ການ​ຢູ່​ຈຸດ​ຄົງ​ທີ່ ແລະ ບໍ­ລິ­ການ​ເຄື່ອນ​ທີ່ ປັດ­ຈຸ­ບັນ​ອັດ­ຕາ​ການ​ສັກ​ຢາ​ຍັງ​ບໍ່​ທັນ​ສູງ​ເທົ່າ​ທີ່​ຄວນ ຈຶ່ງ​ໄດ້​ຈັດ​ຮອບ​ຕະ­ລຸມ­ບອນ​ຂຶ້ນ ເຊິ່ງ​ຄັ້ງ​ນີ້​ເປັນ​ຄັ້ງ​ທີ​ສອງ ເພື່ອ​ຍົກ​ອັດ­ຕາ​ເພີ່ມ​ຄຸ້ມ​ກັນ​ການ​ສັກ​ຢາ​ໃຫ້​ເປົ້າ​ໝາຍ​ເດັກ​ລຸ່ມ 1 ປີ ໃຫ້​ມີ​ສຸ­ຂະ­ພາບ​ແຂງ­ແຮງ ເຮັດ​ໃຫ້​ບັນ­ລຸ​ເປົ້າ​ໝາຍ​ທີ່​ຄາດ​ໄວ້​ສູງ​ກວ່າ 90% ສຳ­ລັບ​ການ​ປະ­ຕິ­ບັດ 10 ຍຸດ​ທະ​ສາດ​ຂອງ​ກະ­ຊວງ​ສາ­ທາ­ລະ­ນະ​ສຸກ ໃນ​ນີ້ ມີ 5 ຍຸດ​ທະ​ສາດ​ວຽກ​ງານ​ແມ່ ແລະ ເດັກ ປັດ­ຈຸ­ບັນ​ປະ­ຕິ­ບັດ​ໄດ້​ຄື: ອັດ­ຕາ​ການ​ຕາຍ​ຂອງ​ເດັກ​ລຸ່ມ 1 ປີ ມີ 20/1.000 ຄົນ ເດັກ​ລຸ່ມ 5 ປີ 22/1.000 ຄົນ ອັດ­ຕາ​ການ​ຕາຍ​ຂອງ​ແມ່​ຫຼຸດ​ລົງ​ຈາກ​ປີ­ຜ່ານ­ມາ ທຽບ­ໃສ່​ອັດ­ຕາ​ການ​ຕາຍ ມີ 45/100.000 ຄົນ ການ​ເກີດ​ລູກ​ທີ່​ມີ​ແພດ​ຊ່ວຍ​ເກີດ​ປັດ­ຈຸ­ບັນ​ບໍ­ລິ­ການ​ໄດ້ 45% (ຫຼຸດ​ຄາດ­ໝາຍ) ການ​ສັກ​ຢາ​ກັນ​ພະ­ຍາດ​ທົ່ວ​ແຂວງ 10 ເດືອນ​ຜ່ານ​ມາ​ບັນ­ລຸ 75% 2 ເດືອນ​ທີ່​ຍັງ​ເຫຼືອ​ຈະ​ສູ້​ຊົນ​ໃຫ້​ໄດ້​ຫຼາຍ​ກວ່າ 90% ໂດຍ​ອີງ­ໃສ່​ການ​ປຸກ­ລະ­ດົມ​ຂັ້ນ​ເມືອງ ແລະ ຂັ້ນ​ສຸກ­ສາ­ລາ​ທີ່​ລົງ​ເຄື່ອນ​ໄຫວ ສ່ວນ​ສາ­ເຫດ​ທີ່​ປະ­ຕິ­ບັດ​ບໍ່​ໄດ້​ຕາມ​ເປົ້າ​ໝາຍ ຍ້ອນ​ປະ­ຊາ­ກອນ​ມີ​ການ​ເຄື່ອນ​ຍ້າຍ​ໄປ​ເຮັດ​ວຽກ​ຢູ່​ປະ­ເທດ​ເພື່ອນ​ບ້ານ ໄປ​ປະ­ຈຳ​ຢູ່​ໄຮ່ ນາ ສວນ.

    ທ່ານ ແສງ​ອາ​ລຸນ ໂຄດ​ສຸ­ວັນ ຫົວ­ໜ້າ​ສຸກ­ສາ­ລາ​ນາ​ໂນງ ກ່າວ​ວ່າ: ສຸກ­ສາ­ລາ​ນາ​ໂນງ ໄດ້​ລົງ​ໃຫ້​ວັກ​ແຊັງ​ກັນ​ພະ­ຍາດ​ແມ່ ແລະ ເດັກ ແມ່ນ​ໄດ້​ຮັບ​ການ​ຕອບ​ຮັບ​ຈາກ​ອຳ­ນາດ​ການ​ປົກ­ຄອງ ແລະ ປະ­ຊາ­ຊົນ​ພາຍ​ໃນ​ບ້ານ​ນາ​ກອກ​ເປັນ​ຢ່າງ​ດີ ເມື່ອ​ກ່ອນ​ປະ­ຊາ­ຊົນ​ມີ​ການ​ຫຼົບ​ຫຼີກ ແຕ່​ປັດ­ຈຸ­ບັນ​ແມ່ນ​ໄດ້​ໃຫ້​ຄວາມ​ຮ່ວມ​ມື ສະ­ແດງ​ອອກ ການ​ສັກ​ແຕ່​ລະ​ຄັ້ງ ປະ­ຊາ­ຊົນ​ໄດ້​ມີ​ຄວາມ​ເຂົ້າ­ໃຈ ແລະ ຕື່ນ​ຕົວ​ເຂົ້າ​ຮ່ວມ ເຮັດ​ໃຫ້​ປັດ­ຈຸ­ບັນ​ການ​ສັກ​ຢາ​ຢູ່​ບ້ານ​ນາ​ກອກ ປະ­ຕິ­ບັດ​ໄດ້ 95%.

    ການ​ລົງ​ເຄື່ອນ​ໄຫວ​ຄັ້ງ​ນີ້ ມີ 5 ໜ້າ​ວຽກ​ສຳ­ຄັນ​ຄື: ວຽກ​ສຸ​ຂະ​ສຶກ​ສາ ສັກ​ຢາ​ກັນ​ພະ­ຍາດ ປະ​ເມີນ​ໂພ­ຊະ​ນາ​ການ ກວດ​ທ້ອງ​ແມ່​ມານ-ຫຼັງ​ເກີດ ແລະ ວາງ​ແຜນ​ຄອບ­ຄົວ ເຊິ່ງ​ມີ​ຜູ້​ເຂົ້າ​ຮ່ວມ 138 ຄົນ ຍິງ 86 ຄົນ ໃນ​ນີ້ ມີ​ກຸ່ມ​ເປົ້າ​ໝາຍ​ມາ​ຮັບ​ວັກ​ແຊັງ​ກັນ​ພະ­ຍາດ​ເພີ່ມ 10 ຄົນ ເດັກ­ນ້ອຍ​ສັກ​ຢາ 4 ຄົນ ຕິດ­ຕາມ​ໂພ­ຊະ​ນາ​ການ 6 ຄົນ ໃນ​ນີ້​ສີ­ເຫຼືອງ (ເຕືອນ​ໃກ້​ຈະ​ຂາດ​ອາ­ຫານ) 2 ຄົນ ກວດ​ທ້ອງ 11 ຄົນ ກວດ​ທ້ອງ​ຫຼັງ​ເກີດ 1 ຄົນ.

ຂ່າວທີ່ກ່ຽວຂ້ອງ