ສສຊ ຮັບຮອງເອົາຮ່າງກົດໝາຍ ວ່າດ້ວຍສຳນັກງານຜູ້ຕາງໜ້າ ສປປ ລາວ ປະຈຳຢູ່ຕ່າງປະເທດ

330 12 ທ.ວ. 2018 ຂ່າວໜ້າ​ໜຶ່ງ
ສສຊ ຮັບຮອງເອົາຮ່າງກົດໝາຍ ວ່າດ້ວຍສຳນັກງານຜູ້ຕາງໜ້າ ສປປ ລາວ ປະຈຳຢູ່ຕ່າງປະເທດ

    ກອງ​ປະ­ຊຸມ​ສະ­ໄໝ​ສາ­ມັນ​ເທື່ອ​ທີ 6 ຂອງ​ສະ­ພາ​ແຫ່ງ​ຊາດ ຊຸດ​ທີ VIII ໃນ​ວັນ​ທີ 11 ທັນ­ວາ 2018 ຢູ່​ຫໍ​ປະ­ຊຸມ​ສະ­ພາ​ແຫ່ງ​ຊາດ ສະ­ມາ­ຊິກ​ສະ­ພາ​ແຫ່ງ​ຊາດ (ສສຊ) ໄດ້​ສືບ­ຕໍ່​ພິ­ຈາ­ລະ­ນາ​ຮັບ­ຮອງ​ເອົາ​ອີກ​ໜຶ່ງ​ກົດ­ໝາຍ ເຂົ້າ​ໃນ​ລັດ​ຖະ​ທຳ​ມະ­ນູນ​ຂອງ ສປປ ລາວ ຄື: ຮ່າງ​ກົດ­ໝາຍ​ວ່າ​ດ້ວຍ​ສຳ­ນັກ­ງານ​ຜູ້­ຕາງ­ໜ້າ ສປປ ລາວ ປະ­ຈຳ​ຢູ່​ຕ່າງ­ປະ­ເທດ ພາຍ​ໃຕ້​ການ​ເປັນ​ປະ­ທານ​ຂອງ​ທ່ານ ພົນ​ໂທ ແສງ​ນວນ ໄຊ​ຍະ​ລາດ ຮອງ​ປະ­ທານ​ສະ­ພາ​ແຫ່ງ​ຊາດ ມີ​ທ່ານ ສະ­ເຫຼີມ​ໄຊ ກົມ​ມະ​ສິດ ລັດ­ຖະ­ມົນ­ຕີ​ກະ­ຊວງ​ການ​ຕ່າງ­ປະ­ເທດ ພ້ອມ​ບັນ­ດາ​ຜູ້​ແທນ ສສຊ ທຸກ​ເຂດ​ເລືອກ​ຕັ້ງ​ເຂົ້າ​ຮ່ວມ.

    ຮ່າງ​ກົດ­ໝາຍ​ສະ­ບັບ​ນີ້ ກຳ­ນົດ​ຫຼັກ­ການ ລະ­ບຽບ​ການ ແລະ ມາດ​ຕະ­ການ​ກ່ຽວ​ກັບ​ການ­ຈັດ­ຕັ້ງ ການ​ຄຸ້ມ​ຄອງ ແລະ ຕິດ­ຕາມ​ກວດ­ກາ​ການ­ເຄື່ອນ­ໄຫວ​ຂອງ​ສຳ­ນັກ­ງານ​ຜູ້­ຕາງ­ໜ້າ​ແຫ່ງ ສປປ ລາວ ປະ­ຈຳ​ຢູ່​ຕ່າງ­ປະ­ເທດ ເພື່ອ​ເຮັດ​ໃຫ້­ການ​ປະ­ຕິ­ບັດ​ພາ­ລະ​ບົດ­ບາດ ສິດ ແລະ ໜ້າ­ທີ່​ຂອງ​ສຳ­ນັກ­ງານ​ຜູ້­ຕາງ­ໜ້າ​ມີ​ປະ­ສິດ­ທິ­ພາບ ແລະ ປະ​ສິດ­ທິ​ຜົນ ແນ­ໃສ່​ຮັບ­ປະ­ກັນ​ການ​ປະ­ຕິ­ບັດ​ນະ­ໂຍ­ບາຍ​ການ​ຕ່າງ­ປະ­ເທດ​ຂອງ ສປປ ລາວ ປະ­ກອບ­ສ່ວນ​ເຂົ້າ​ໃນ​ພາ­ລະ­ກິດ​ປົກ​ປັກ​ຮັກ­ສາ ແລະ ພັດ­ທະ­ນາ​ປະ­ເທດ​ຊາດ ເຊິ່ງ​ຮ່າງ​ກົດ­ໝາຍ​ສະ­ບັບ​ດັ່ງ­ກ່າວ​ນີ້ ມີ​ທັງ​ໝົດ 10 ພາກ 12 ໝວດ ແລະ 65 ມາດ­ຕາ.

    ສຳ­ນັກ­ງານ​ຜູ້­ຕາງ­ໜ້າ ແມ່ນ​ອົງ​ການ­ຈັດ­ຕັ້ງ​ລັດ​ປະ­ຈຳ​ຢູ່​ຕ່າງ­ປະ­ເທດ ເຊິ່ງ​ຢູ່​ພາຍ​ໃຕ້​ການ​ຄຸ້ມ​ຄອງ​ຂອງ​ກະ­ຊວງ​ການ​ຕ່າງ­ປະ­ເທດ ມີ​ພາ­ລະ​ບົດ­ບາດ​ຕາງ­ໜ້າ​ໃຫ້​ແກ່ ສປປ ລາວ ໃນ​ການ​ພົວ­ພັນ​ກັບ​ປະ­ເທດ​ທີ່​ຮັບ ແລະ ຫຼື ອົງ​ການ­ຈັດ­ຕັ້ງ​ສາ­ກົນ ແລະ ຄຸ້ມ​ຄອງ​ການ­ເຄື່ອນ­ໄຫວ​ວຽກ​ງານ​ການ​ຕ່າງ­ປະ­ເທດ ລວມ​ທັງ​ຄຸ້ມ​ຄອງ​ບຸກ­ຄົນ ນິ­ຕິ­ບຸກ­ຄົນ ແລະ ການ­ຈັດ­ຕັ້ງ​ຢ່າງ​ລວມ​ສູນ ແລະ ເປັນ​ເອ­ກະ​ພາບ​ຢູ່​ປະ­ເທດ​ທີ່​ຮັບ ແລະ ຫຼື​ອົງ​ການ­ຈັດ­ຕັ້ງ​ສາ­ກົນ.

    ທ່ານ ສະ­ເຫຼີມ​ໄຊ ກົມ​ມະ​ສິດ ກ່າວ​ວ່າ: ເນື່ອງ​ຈາກ​ຜ່ານ​ມາ​ຍັງ​ບໍ່​ທັນ​ມີ​ກົດ­ໝາຍ ຫຼື ລະ­ບຽບ​ການ​ພາຍ​ໃນ​ໃດ​ທີ່​ກຳ­ນົດ​ກ່ຽວ​ກັບ​ການ­ຈັດ­ຕັ້ງ ແລະ ການ­ເຄື່ອນ­ໄຫວ​ຂອງ​ສຳ­ນັກ­ງານ​ຜູ້­ຕາງ­ໜ້າ​ແຫ່ງ ສປປ ລາວ ປະ­ຈຳ​ຢູ່​ຕ່າງ­ປະ­ເທດ ໃນ​ຕົວ​ຈິງ​ແລ້ວ ທຸກ​ອົງ​ການ­ຈັດ­ຕັ້ງ​ຕ້ອງ​ມີ​ນິ­ຕິ​ກຳ​ຂອງ​ຕົນ ເພື່ອ​ເປັນ​ບ່ອນ​ອີງ​ທາງ​ດ້ານ​ກົດ­ໝາຍ ເພື່ອ​ຈັດ​ຕັ້ງ ແລະ ເຄື່ອນ​ໄຫວ​ໃຫ້​ສອດ­ຄ່ອງ ແລະ ເປັນ​ລະ­ບົບ ສະ­ນັ້ນ ການ​ສ້າງ​ກົດ­ໝາຍ​ສະ­ບັບ​ນີ້ ແມ່ນ​ເພື່ອ​ກຳ­ນົດ​ຢ່າງ​ຈະ­ແຈ້ງ ຮັດ­ກຸມ ແລະ ຄົບ​ຖ້ວນ​ກ່ຽວ​ກັບ​ຈັດ​ຕັ້ງ​ການ​ຄຸ້ມ​ຄອງ ແລະ ຕິດ­ຕາມ​ກວດ­ກາ​ການ­ເຄື່ອນ­ໄຫວ​ຂອງ​ສຳ­ນັກ­ງານ​ຜູ້­ຕາງ­ໜ້າ​ແຫ່ງ ສປປ ລາວ ປະ­ຈຳ​ຢູ່​ຕ່າງ­ປະ­ເທດ ແນ­ໃສ່​ແກ້​ໄຂ​ຂໍ້​ຫຍຸ້ງ­ຍາກ​ຕ່າງໆ ລວມ​ທັງ​ຮັບ­ປະ­ກັນ​ໃຫ້​ໂຄງ​ປະ­ກອບ​ການ­ຈັດ­ຕັ້ງ​ຂອງ​ສຳ­ນັກ­ງານ​ດັ່ງ­ກ່າວ​ໃຫ້​ກະ­ທັດ​ຮັດ ເຂັ້ມ­ແຂງ ແລະ ໜັກ​ແໜ້ນ ສາ­ມາດ​ປະ­ຕິ­ບັດ​ພາ­ລະ​ບົດ­ບາດ ສິດ ແລະ ໜ້າ­ທີ່​ການ​ທູດ​ຂອງ​ຕົນ ຕາມ​ແນວ­ທາງ​ນະ­ໂຍ­ບາຍ​ການ​ຕ່າງ­ປະ­ເທດ​ຂອງ​ລາວ ໃນ​ໄລ­ຍະ​ໃໝ່​ໃຫ້​ມີ​ປະ­ສິດ­ທິ­ພາບ ແລະ ປະ​ສິດ­ທິ​ຜົນ​ສູງ​ກວ່າ​ເກົ່າ.

    ພາຍ­ຫຼັງ​ທີ່​ໄດ້​ຮັບ​ຟັງ​ການ​ສະ­ເໜີ​ຮ່າງ​ກົດ­ໝາຍ ແລະ ການ​ໃຫ້​ຄວາມ​ກະ­ຈ່າງ​ແຈ້ງ​ຈາກ​ທ່ານ​ລັດ­ຖະ­ມົນ­ຕີ​ກະ­ຊວງ​ການ​ຕ່າງ­ປະ­ເທດ ບັນ­ດາ ສສຊ ກໍ່​ໄດ້​ຜັດ­ປ່ຽນ​ກັນ​ຂຶ້ນ​ປະ­ກອບ​ຄຳ​ຄິດ​ເຫັນ​ໃສ່​ຮ່າງ​ກົດ­ໝາຍ​ດັ່ງ­ກ່າວ​ຢ່າງ​ກົງ​ໄປ​ກົງ​ມາ ເປັນ­ຕົ້ນ ການ​ປັບ­ປຸງ​ຄຳ​ສັບ​ຄືນ­ໃໝ່​ຢູ່​ບາງ​ມາດ­ຕາ ການ​ປັບ​ປ່ຽນ​ຊື່​ກົດ­ໝາຍ​ໃຫ້​ສອດ­ຄ່ອງ ແລະ ແທດ­ເໝາະ​ກັບ​ຮ່າງ​ກົດ­ໝາຍ​ການ​ປະ­ຕິ­ບັດ​ນະ­ໂຍ­ບາຍ​ລັດ ຕໍ່​ຜູ້­ຕາງ­ໜ້າ​ປະ­ຈຳ​ຢູ່​ຕ່າງ­ປະ­ເທດ​ກຳ­ນົດ​ຕ້ອງ​ໃຫ້​ຊັດ​ເຈນ ການ​ຄຸ້ມ​ຄອງ​ກວດ­ກາ​ນັກ​ສຶກ​ສາ​ຢູ່​ຕ່າງ­ປະ­ເທດ ນັກ​ການ​ທູດ ຫຼື ພະ­ນັກ­ງານ​ທີ່​ປະ­ຈຳ​ຢູ່​ຕ່າງ­ປະ­ເທດ ຕ້ອງ​ມີ​ຄວາມ​ຮູ້​ຄວາມ​ສາ­ມາດ ສະ­ເໜີ​ບາງ​ຂໍ້​ຫ້າມ​ເຂົ້າ​ຕື່ມ ແລະ ອື່ນໆ ເຊິ່ງ​ສຽງ​ສ່ວນ​ຫຼາຍ​ແມ່ນ​ເຫັນ​ດີ​ສະ­ໜັບ­ສະ­ໜູນ ແລະ ເປັນ​ເອ­ກະ​ພາບ​ກັນ​ຕໍ່​ບົດ​ສະ­ເໜີ ທ່ານ​ລັດ­ຖະ­ມົນ­ຕີ​ກະ­ຊວງ​ການ​ຕ່າງ­ປະ­ເທດ ທີ່​ຈະ​ຮັບ­ຮອງ​ເອົາ​ຮ່າງ​ກົດ­ໝາຍ​ວ່າ​ດ້ວຍ​ສຳ­ນັກ­ງານ​ຜູ້­ຕາງ­ໜ້າ ສປປ ລາວ ປະ­ຈຳ​ຢູ່​ຕ່າງ­ປະ­ເທດ ດ້ວຍ​ຄະ­ແນນ​ສຽງ​ສ່ວນ​ຫຼາຍ.

ຂ່າວທີ່ກ່ຽວຂ້ອງ