ຂ່າວຫຼ້າສຸດ

ສືບຕໍ່ຮ່ວມມືສ້າງຄວາມເປັນເອກະພາບ ຂອງສະມາພັນນັກຮົບເກົ່າອາຊຽນ

283 12 ທ.ວ. 2018 ຂ່າວໜ້າ​ໜຶ່ງ
ສືບຕໍ່ຮ່ວມມືສ້າງຄວາມເປັນເອກະພາບ ຂອງສະມາພັນນັກຮົບເກົ່າອາຊຽນ

    ກອງ​ປະ­ຊຸມ​ສະ​ມາ​ພັນ​ນັກ­ຮົບ​ເກົ່າ​ອາ​ຊຽນ ຄັ້ງ​ທີ 18 ຈັດ​ຂຶ້ນ​ວັນ​ທີ 11 ທັນ­ວາ 2018 ຢູ່​ໂຮງ­ແຮມ​ດອນ​ຈັນ​ພາ​ເລດ ໂດຍ​ເປັນ​ປະ­ທານ​ຂອງ​ທ່ານ ພົນ​ຈັດ­ຕະ­ວາ ສົມ​ພອນ ແກ້ວ​ມີ​ໄຊ ປະ­ທານ​ສະ­ຫະ­ພັນ​ນັກ­ຮົບ​ເກົ່າ​ແຫ່ງ​ຊາດ​ລາວ ປະ­ທານ​ສະ​ມາ​ພັນ​ນັກ­ຮົບ​ເກົ່າ​ອາ​ຊຽນ 2017-2018 ມີ​ທ່ານ ພົນ​ໂທ ຈັນ​ສະ­ໝອນ ຈັນ​ຍາ​ລາດ ລັດ­ຖະ­ມົນ­ຕີ​ກະ­ຊວງ​ປ້ອງ​ກັນ​ປະ­ເທດ ພ້ອມ​ດ້ວຍ​ສະ­ມາ­ຊິກ​ສະ​ມາ​ພັນ​ນັກ­ຮົບ​ເກົ່າ ຈາກ​ປະ­ເທດ​ສະ­ມາ­ຊິກ​ອາ​ຊຽນ​ເຂົ້າ​ຮ່ວມ.

    ທ່ານ ພົນ​ໂທ ຈັນ​ສະ­ໝອນ ຈັນ​ຍາ​ລາດ ກ່າວ​ວ່າ: ກອງ​ປະ­ຊຸມ​ຄັ້ງ​ນີ້ ແມ່ນ​ເຫດ­ການ​ປະ­ຫວັດ­ສາດ​ສຳ­ຄັນ​ຂອງ​ສະ­ຫະ­ພັນ​ນັກ​ຮົມ​ເກົ່າ​ລາວ ເຊິ່ງ​ເປັນ​ການ​ປະ­ຕິ­ບັດ​ສິດ ແລະ ພັນ­ທະ​ຂອງ ສປປ ລາວ ເວົ້າ​ສະ­ເພາະ ສະ­ຫະ­ພັນ​ນັກ­ຮົບ​ເກົ່າ​ແຫ່ງ​ຊາດ​ລາວ ລັດ­ຖະ­ບານ ກໍ່​ຄື ກະ­ຊວງ​ປ້ອງ​ກັນ​ປະ­ເທດ ຍາມ​ໃດ​ກໍ່​ຕີ​ລາ­ຄາ​ສູງ​ວຽກ​ງານ​ນັກ­ຮົບ​ເກົ່າ​ອາ​ຊຽນ ເພາະ​ວຽກ​ງານ​ດັ່ງ­ກ່າວ ໄດ້​ປະ­ກອບ­ສ່ວນ​ໃນ​ການ​ເສີມ​ສ້າງ​ຄວາມ​ສາ­ມັກ­ຄີ ຄວາມ​ໄວ້​ວາງ­ໃຈ ແລະ ຄວາມ​ເຂົ້າ­ໃຈ​ເຊິ່ງ​ກັນ ແລະ ກັນ ລະ­ຫວ່າງ​ປະ­ເທດ​ສະ­ມາ­ຊິກ​ອາ​ຊຽນ ເພື່ອ​ປົກ​ປັກ​ຮັກ­ສາ​ສັນ­ຕິ­ພາບ ສະ­ຖຽນ​ລະ​ພາບ ແລະ ຄວາມ​ໝັ້ນ­ຄົງ​ຂອງ​ພາກ​ພື້ນ ກໍ່​ຄື ໃນ​ໂລກ ສຳ­ລັບ​ການ​ປະ­ຕິ­ບັດ​ຫຼັກ­ການ 3 ເສົາ­ຄ້ຳ ແມ່ນ​ໄດ້​ຈັດ​ກອງ​ປະ­ຊຸມ​ລັດ­ຖະ­ມົນ­ຕີ​ປ້ອງ​ກັນ​ປະ­ເທດ​ອາ​ຊຽນ ແລະ ADMM ບວກ ກອງ​ປະ­ຊຸມ​ຜູ້​ບັນ­ຊາ​ການ​ທະ­ຫານ​ສູງ​ສຸດ​ຈັດ​ຂຶ້ນ​ທຸກໆ​ປີ ເພື່ອ​ພົບ​ປະ​ແລກ­ປ່ຽນ​ທັດ­ສະ­ນະ​ກ່ຽວ​ກັບ​ສິ່ງ​ທ້າ​ທາຍ​ດ້ານ​ຄວາມ​ໝັ້ນ­ຄົງ ແລະ ປຶກ­ສາ​ຫາ­ລື​ກ່ຽວ​ກັບ​ການ​ພົວ­ພັນ​ຮ່ວມ​ມື ເພື່ອ​ຮັບ​ມື​ກັບ​ສິ່ງ​ທ້າ​ທາຍ​ຕ່າງໆ​ທີ່​ອາດ​ຈະ​ເກີດ​ຂຶ້ນ.

    ທ່ານ ພົນ​ຈັດ­ຕະ­ວາ ສົມ​ພອນ ແກ້ວ​ມີ​ໄຊ ໄດ້​ສະ­ແດງ​ຄວາມ​ຍິນ​ດີ​ຕ້ອນ­ຮັບ​ປະ­ທານ​ໃໝ່ ຈາກ​ປະ­ເທດ​ກຳ­ປູ­ເຈຍ ມາ​ເລ​ເຊຍ ຟີ​ລິ​ປິນ ແລະ ປະ­ເທດ​ໄທ ເຂົ້າ​ສູ່​ສະ​ມາ​ພັນ​ນັກ­ຮົບ​ເກົ່າ​ອາ​ຊຽນ ພ້ອມ​ນີ້ ກອງ​ປະ­ຊຸມ​ຍັງ​ໄດ້​ພ້ອມ​ກັນ​ສືບ­ຕໍ່​ປຶກ­ສາ​ຫາ­ລື ແລະ ທົບ​ທວນ­ຄືນ​ກ່ຽວ​ກັບ​ບັນ­ຫາ​ສຳ­ຄັນ ທີ່​ໄດ້​ຕົກ­ລົງ​ກັນ​ໃນ​ຄັ້ງ​ຜ່ານ​ມາ ແລະ ບັນ­ຫາ​ອື່ນໆ ເພື່ອ​ຕົກ­ລົງ​ກັນ​ເປັນ​ເອ­ກະ​ພາບ​ຄັ້ງ​ສຸດ​ທ້າຍ ແລະ ຮັບ­ຮອງ​ໃນ​ກອງ​ປະ­ຊຸມ​ຄັ້ງ​ນີ້ ເພື່ອ​ນຳ­ໄປ​ສູ່​ພາກ​ປະ­ຕິ­ບັດ​ຕົວ​ຈິງ​ໃນ​ອະ­ນາ­ຄົດ ສ່ວນ​ກອງ​ປະ­ຊຸມ​ຄັ້ງ​ຕໍ່​ໄປ​ຈະ​ຈັດ​ຂຶ້ນ​ຢູ່​ປະ­ເທດ​ກຳ­ປູ­ເຈຍ.

ຂ່າວທີ່ກ່ຽວຂ້ອງ