ຂ່າວຫຼ້າສຸດ

ເບິ່ງບ້ານເຂົາເອົາບົດຮຽນ 12/12/2018

307 12 ທ.ວ. 2018 ຫົວຂໍ້ຂ່າວອື່ນໆ

    ມື້­ນີ້ ຈະ​ພາ​ທ່ານ​ຜູ້​ອ່ານ​ໄປ​ຮູ້​ກັບ​ແຜນ​ຍົກ­ເລີກ​ໂທດ​ປະ­ຫານ​ໃນ​ມາ​ເລ​ເຊຍ ການ​ຈັບ​ກຸມ​ຄົນ​ຕ່າງ­ປະ­ເທດ​ທີ່​ເຮັດ​ຜິດ​ກົດ­ໝາຍ​ຢູ່​ໄທ ແລະ ປິດ​ທ້າຍ​ກັບ​ຂ່າວ​ນະ­ໂຍ­ບາຍ​ແກ້​ໄຂ​ບັນ­ຫາ​ຂາດ­ແຄນ​ແຮງ​ງານ​ຢູ່ ອົດ​ສະ​ຕຣາ​ລີ.

    ທີ່ ມາ​ເລ​ເຊຍ: ເດືອນ​ທັນ­ວາ​ນີ້ ທ່ານ ລິວ ວຸຍ ກົງ (Liew Vui Keong) ລັດ­ຖະ­ມົນ­ຕີ​ກະ­ຊວງ​ກົດ­ໝາຍ​ມາ​ເລ​ເຊຍ ໄດ້​ລາຍ​ງານ​ຕໍ່​ລັດ​ຖະ​ສະ­ພາ ກ່ຽວ​ກັບ​ການ​ຕົກ­ລົງ​ຂອງ​ລັດ­ຖະ­ບານ ໃນ​ການ​ຍົກ­ເລີກ​ໂທດ​ປະ­ຫານ​ຊີ­ວິດ ລວມ​ທັງ​ສຳ­ລັບ​ຄະ­ດີ​ຄາ­ຕະ­ກຳ ສຳ­ລັບ​ຄະ­ດີ​ຄາ­ຕະ­ກຳ​ນີ້ ຍັງ​ມີ​ເຫັນ​ຂັດ​ແຍ່ງ​ກັນ​ຢູ່ ເພາະ​ມີ​ກະ­ແສ​ຂ່າວ​ໜຶ່ງ​ທີ່​ເວົ້າ​ວ່າ ຍັງ​ຈະ​ມີ​ການ​ພິ­ຈາ­ລະ­ນາ​ໂທດ​ປະ­ຫານ​ສຳ­ລັບ​ຄະ­ດີ​ນີ້​ຕື່ມ ໂດຍ​ສະ­ເພາະ​ແມ່ນ​ຄະ­ດີ​ຄາ­ຕະ­ກຳ​ເດັກ ແນວ­ໃດ​ກໍ່​ດີ ທ່ານ​ລັດ­ຖະ­ມົນ­ຕີ​ກະ­ຊວງ​ກົດ­ໝາຍ ໄດ້​ຢັ້ງ­ຢືນ​ຢ່າງ​ໜັກ​ແໜ້ນ​ວ່າ ໂທດ​ປະ­ຫານ​ສຳ­ລັບ 32 ຄະ­ດີ ທີ່​ກຳ­ນົດ​ໃນ​ກົດ­ໝາຍ 8 ສະ­ບັບ​ຂອງ​ມາ​ເລ​ເຊຍ​ນັ້ນ ຈະ​ຖືກ​ຍົກ­ເລີກ​ຢ່າງ​ແນ່­ນອນ ເພາະ­ວ່າ​ລັດ­ຖະ­ບານ​ໄດ້​ມີ​ການ​ຕົກ­ລົງ​ຢ່າງ​ຄົບ​ຊຸດ ທີ່​ພົວ­ພັນ​ກັບ​ກົດ­ໝາຍ​ອາ­ຍາ ໝວດ​ທີ 302.

    ທີ່ ປະ­ເທດ​ໄທ: ໃນ​ອາ­ທິດ​ທີ 1 ພະ­ຈິກ​ຜ່ານ​ມາ ມີ​ຂ່າວ​ຈາກ​ປະ­ເທດ​ໄທ​ວ່າ ເຈົ້າ​ໜ້າ­ທີ່​ໄທ​ໄດ້​ກວດ​ຄົ້ນ​ສະ­ຖານ­ທີ່​ຕ່າງໆ 262 ແຫ່ງ ໃນ​ທົ່ວ​ປະ­ເທດ ແລະ ສາ­ມາດ​ຈັບ​ກຸມ​ຄົນ​ຕ່າງ­ປະ­ເທດ​ໄດ້ 542 ຄົນ ທີ່​ພັກ​ອາ­ໄສ​ຢູ່​ພາຍ​ໃນ​ປະ­ເທດ​ຢ່າງ​ຜິດ​ກົດ­ໝາຍ  ຫຼື ມີ​ຄະ­ດີ​ອາ​ຊະ​ຍາ​ກຳ​ຕ່າງໆ ນີ້​ຄື​ຜົນ­ງານ​ການ​ກວດ​ຄົ້ນ ຄັ້ງ​ທີ  25 ເພື່ອ​ແກ້​ໄຂ​ບັນ­ຫາ​ຄົນ​ຕ່າງ­ປະ­ເທດ ທີ່​ເຄື່ອນ​ໄຫວ​ຜິດ​ກົດ­ໝາຍ​ຢູ່​ໃນ​ໄທ ໃນ​ຈຳ­ນວນ​ຊາວ​ຕ່າງ­ປະ­ເທດ​ທີ່​ຖືກ​ຈັບ​ກຸມ​ນັ້ນ 48 ຄົນ ມີ​ຄວາມ​ຜິດ​ຖານ​ຢູ່​ກາຍ​ເວ­ລາ ທີ່​ກຳ­ນົດ​ໄວ້​ໃນ​ວີ​ຊາ 262 ຄົນ ລັກ­ລອບ​ເຂົ້າ​ໄທ​ໂດຍ​ບໍ່​ມີ​ວີ​ຊາ ສ່ວນ​ອີກ 232 ຄົນ​ນັ້ນ ມີ​ຄວາມ​ຜິດ​ໃນ​ຄະ­ດີ​ອື່ນໆ ຮູ້​ແນວ​ນີ້​ແລ້ວ ຄົນ​ລາວ​ພວກ​ເຮົາ​ຕ້ອງ​ມີ​ສະ­ຕິ ຢ່າ​ລະ­ເມີດ​ກົດ­ໝາຍ​ບ້ານ​ເມືອງ​ຂອງ​ປະ­ເທດ​ອື່ນ.

    ທີ່ ອົດ​ສະ​ຕຣາ​ລີ: ໃນ​ປັດ­ຈຸ­ບັນ ອົດ​ສະ​ຕຣາ​ລີ ພວມ​ປະ​ເຊີນ​ກັບ​ບັນ­ຫາ​ຂາດ­ແຄນ​ແຮງ​ງານ​ໃນ​ລະ­ດັບ “ຫິວ​ໂຫຍ” ດັ່ງ­ນັ້ນ ທາງ​ການ​ຂອງ​ປະ­ເທດ​ນີ້ ຈຶ່ງ​ຊອກ​ວິ­ທີ​ແກ້​ໄຂ​ດ້ວຍ​ການ​ຕໍ່​ກຳ­ນົດ​ເວ­ລາ​ການ​ພັກ​ອາ­ໄສ ສຳ­ລັບ​ວີ​ຊາ​ທ່ອງ​ທ່ຽວ ແລະ ພັກ­ຜ່ອນ​ສົມ­ທົບ​ກັບ​ການ​ອອກ­ແຮງ​ງານ ນະ­ໂຍ­ບາຍ​ແກ້​ໄຂ​ບັນ­ຫາ​ຂາດ­ແຄນ​ແຮງ​ງານ​ໃນ​ນິ­ຄົມ (ຟາມ) ຕ່າງໆ​ນັ້ນ ຈະ​ມີ​ຜົນ​ສັກ­ສິດ ນັບ​ແຕ່​ເດືອນ​ກໍ­ລະ­ກົດ​ປີ 2019 ເປັນ­ຕົ້ນ​ໄປ ເຊິ່ງ​ຈະ​ອະ­ນຸ­ຍາດ​ໃຫ້​ຊາວ​ຕ່າງ­ປະ­ເທດ​ທີ່​ເຂົ້າ​ໄປ ອົດ​ສະ​ຕຣາ​ລີ ໃນ​ຖາ­ນະ​ນັກ​ທ່ອງ​ທ່ຽວ ເພື່ອ​ອອກ­ແຮງ​ງານ ສາ­ມາດ​ຢູ່​ເຄືອນ​ໄຫວ​ພາຍ ໃນ​ປະ­ເທດ​ໄດ້​ສູງ​ສຸດ 3 ປີ ພາຍ​ໃຕ້​ເງື່ອນ­ໄຂ​ທີ່​ວ່າ ນັກ​ທ່ອງ​ທ່ຽວ​ທີ່​ກ່ຽວ­ຂ້ອງ​ໄດ້​ໃຊ້​ເວ­ລາ​ຢ່າງ​ໜ້ອຍ 6 ເດືອນ ໃນ​ການ​ອອກ­ແຮງ​ງານ​ຢູ່​ນິ­ຄົມ​ກະ­ສິ­ກຳ ອີງ​ຕາມ​ນະ­ໂຍ­ບາຍ​ເກົ່າ ວີ​ຊາ​ພັກ­ຜ່ອນ-ທ່ອງ​ທ່ຽວ ສົມ­ທົບ​ການ​ອອກ­ແຮງ​ງານ​ນັ້ນ ອະ­ນຸ­ຍາດ​ໃຫ້​ຄົນ​ຕ່າງ­ປະ­ເທດ​ຢູ່​ໃນ​ອົດ​ສະ​ຕຣາ​ລີ ໄດ້​ພຽງ 1 ປີ ແລະ ສາ­ມາດ​ຕໍ່​ໄດ້​ຕື່ມ​ອີກ​ເປັນ​ປີ​ທີ 2 ຖ້າ​ຜູ້­ກ່ຽວ​ຍອມ​ອອກ­ແຮງ​ງານ​ຢູ່​ໃນ​ເຂດ​ຫ່າງ​ໄກ​ສອກ­ຫຼີກ ທາງ​ພາກ​ເໜືອ​ຂອງ​ປະ­ເທດ ຕາມ​ສະ­ຖິ­ຕິ​ປີ 2017-2018 ມີ​ນັກ​ທ່ອງ​ທ່ຽວ​ຕ່າງ­ປະ­ເທດ ຫຼາຍ​ກວ່າ 2 ແສນ​ຄົນ ໄດ້​ຮັບ​ວີ​ຊາ​ທ່ອງ​ທ່ຽວ​ສົມ­ທົບ​ການ​ອອກ­ແຮງ​ງານ​ຢູ່ ອົດ​ສະ​ຕຣາ​ລີ ບັນ­ດາ​ນັກ​ທ່ອງ​ທ່ຽວ​ທີ່​ໄດ້​ຮັບ​ວີ​ຊາ​ປະ­ເພດ​ນີ້ ສ່ວນ​ຫຼາຍ​ໄປ​ຈາກ​ປະ­ເທດ​ອັງ­ກິດ ຝຣັ່ງ ແລະ ເຢຍ​ລະ​ມັນ.

ຂ່າວທີ່ກ່ຽວຂ້ອງ