ຂ່າວຫຼ້າສຸດ

ເບິ່ງບ້ານເຂົາເອົາບົດຮຽນ 11/12/2018

434 11 ທ.ວ. 2018 ຫົວຂໍ້ຂ່າວອື່ນໆ

    ຂ່າວ​ທີ່​ໜ້າ​ສົນ­ໃຈ​ປະ­ຈຳ​ວັນ​ນີ້ ລວມ​ມີ​ຂ່າວ​ການ​ຈັບ​ກຸມ​ກຸ່ມ​ຄ້າ​ມະ­ນຸດ​ໃນ​ຝຣັ່ງ ຄະ­ດີ​ຂົ່ມ­ຂືນ​ເດັກ​ໃນ​ອິນ​ເດຍ ແລະ ມາດ​ຕະ­ການ​ຄວບ​ຄຸມ​ວັກ​ແຊງ​ໃນ ສປ ຈີນ.

    ທີ່ ປະ­ເທດ​ຝຣັ່ງ: ມີ​ຂ່າວ​ໃນ​ຕົ້ນ​ເດືອນ​ກັນ­ຍາ​ປີ​ນີ້ (ໜັງ­ສື­ພິມ The Nation) ວ່າ: ເຈົ້າ​ໜ້າ­ທີ່​ຕຳ­ຫຼວດ​ຝຣັ່ງ ໄດ້​ຈັບ​ກຸມ​ຊາຍ​ອັງ­ກິດ ອາ­ຍຸ 70 ປີ ຊື່ ໂຣ​ນານ ສະ​ກ໋ອດ (Ronald Scott) ໃນ​ຄວາມ​ຜິດ​ຄ້າ​ມະ­ນຸດ ໂຣ​ນານ ສະ​ກອດ ພ້ອມ​ດ້ວຍ​ຜູ້​ສົມ­ຮູ້​ຮ່ວມ​ຄິດ​ຊາວ​ອັງ­ກິດ​ອີກ​ສອງ​ຄົນ ໄດ້​ພະ­ຍາ­ຍາມ​ລັກ­ລອບ​ຄົນ​ຫວຽດ­ນາມ​ກວ່າ 10 ຄົນ ຈາກ​ປະ­ເທດ​ຝຣັ່ງ ເຂົ້າ​ໄປ​ປະ­ເທດ​ອັງ­ກິດ ໂດຍ​ໃຊ້​ເຮືອ­ຈັກ​ຜ່ານ​ຊ່ອງ​ແຄບ ໃນ​ຂະ­ນະ​ທີ່​ຖືກ​ຈັບ​ກຸມ​ນັ້ນ ເຮືອ­ຈັກ​ລຳ​ດັ່ງ­ກ່າວ​ໄດ້​ເດີນ­ທາງ​ຫ່າງ​ອອກ​ໄປ​ຈາກ​ຝັ່ງ ເມືອງ​ວິ​ເມ​ເຣີ (Wimereux) ທາງ​ພາກ​ເໜືອ​ຂອງ​ຝຣັ່ງ ປະ­ມານ 4-5 ກິ­ໂລ­ແມັດ ຂ່າວ​ບອກ​ວ່າ ຜົນ­ສຳ­ເລັດ​ໃນ​ການ​ຈັດ​ກຸມ​ຜູ້​ກະ­ທຳ​ຜິດ​ຄັ້ງ​ນີ້ ແມ່ນ​ຍ້ອນ​ໄດ້​ຮັບ​ການ​ຮ່ວມ​ມື​ດ້ານ​ຂ່າວ­ສານ​ຈາກ​ທາງ​ຝ່າຍ​ອັງ­ກິດ ທ້າວ ໂຣ​ນານ ສະ​ກ໋ອດ ນາຍ​ທະ­ຫານ​ເຮືອ​ບຳ­ນານ ຖືກ​ຕັດ­ສິນ​ຈຳ​ຄຸກ​ເປັນ​ເວ­ລາ 30 ເດືອນ ແລະ ຖືກ​ເກືອດ​ຫ້າມ​ເຂົ້າ​ໄປ​ດິນ­ແດນ​ຂອງ​ປະ­ເທດ​ຝຣັ່ງ ເປັນ​ເວ­ລາ 10 ປີ ສ່ວນ​ອີກ​ສອງ​ຄົນ​ທີ່​ຮ່ວມ​ມື​ກັບ ໂຣ​ນານ ສະ​ກ໊ອດ ນັ້ນ​ຖືກ​ຕັດ­ສິນ​ຈຳ​ຄຸກ 1 ແລະ 2 ປີ ຕາມ​ລຳ­ດັບ.

    ທີ່ ອິນ​ເດຍ: ໜັງ­ສື­ພິມ ເດິ​ເນ​ເຊິນ ສະ­ບັບ​ວັນ​ທີ 6 ເດືອນ​ກັນ­ຍາ​ປີ​ນີ້ ໄດ້​ສະ­ເໜີ​ຂ່າວ​ສະ​ຫຍົດ​ສະ­ຫຍອງ ກ່ຽວ​ກັບ​ເດັກ​ຍິງ​ອາ­ຍຸ 9 ປີ ທີ່​ຖືກ​ຂົ່ມ­ຂືນ​ກະ­ທຳ​ຊຳ​ເລົາ​ແລ້ວ​ຂ້າ​ຖິ້ມ ເຫດ​ຮ້າຍ​ນີ້​ເກີດ​ຂຶ້ນ​ທີ່​ເມືອງ ບາ​ຣາ​ມູ​ລາ ລັດ ກັດ​ສະ​ເມຍ ໃນ​ເຂດ​ປົກ­ຄອງ​ຂອງ​ອິນ​ເດຍ ຂ່າວ​ບອກ​ວ່າ ຜູ້​ຢູ່​ເບື້ອງ​ຫຼັງ​ເຫດ​ຮ້າຍ​ນີ້ ກໍ່​ຄື ແມ່​ນ້າ​ຂອງ​ເດັກ​ຍິງ​ຜູ້​ເຄາະ​ຮ້າຍ​ນັ້ນ​ເອງ ເພາະ​ຜູ້­ກ່ຽວ​ເກີດ​ມີ​ແນວ​ຄິດ​ອິດ­ສາ​ເດັກ​ຍິງ​ທີ່​ເປັນ​ລູກ​ນ້າ ແລະ ເມຍ​ອີກ​ຄົນ​ໜຶ່ງ​ຂອງ​ຜົວ (ແມ່​ຂອງ​ເດັກ​ຍິງ) ໃນ​ມື້​ເກີດ​ເຫດ ແມ່​ນ້າ​ຜູ້​ໃຈ​ໂຫດ​ໄດ້​ຊວນ​ເດັກ​ຍິງ​ລູກ​ນ້າ​ເຂົ້າ​ໄປ​ປ່າ ແລ້ວ​ສັ່ງ​ໃຫ້​ເດັກ​ຊາຍ​ອາ­ຍຸ 14 ປີ ທີ່​ເປັນ​ລູກ​ຂອງ​ຕົນ ແລະ ເພື່ອນ​ຊາຍ​ຂອງ​ລູກ​ອີກ 2 ຄົນ ໃຊ້​ກຳ­ລັງ​ປຸກ​ປ້າ​ຂົ່ມ­ຂືນ​ເດັກ​ຍິງ​ຢ່າງ​ໜ້າ​ອາ​ນາດ ແລະ ໃຊ້​ຂວານ​ສັບ​ກະ­ໂຫຼກ­ຫົວ​ເຫຍື່ອ​ຈົນ​ເສຍ​ຊີ­ວິດ ພໍ່​ພຽງ​ເທົ່າ​ນັ້ນ ຜູ້​ລົງ­ມື​ຂົ່ມ­ຂືນ​ຍັງ​ໄດ້​ໃຊ້​ນ້ຳ​ກົດ​ຈາກ​ໝໍ້​ໄຟ​ລົດ​ຫົດ​ຊາກ​ສົບ ເພື່ອ​ປິດ​ບັງ​ຮ່ອງ­ຮອຍ ແຕ່​ສຸດ​ທ້າຍ​ທັງ​ສີ່​ຄົນ ກໍ່​ໜີ​ບໍ່​ມົ້ມ​ກັບ​ມື​ຂອງ​ເຈົ້າ​ໜ້າ­ທີ່​ບ້ານ​ເມືອງ.

    ທີ່ ສປ ຈີນ: ຂ່າວ​ໃຫຍ່​ໄຟ​ແຮງ​ຈາກ ສປ ຈີນ ໃນ​ເດືອນ​ກໍ­ລະ­ກົດ​ປີ​ນີ້​ນັ້ນ ກໍ່​ຄື ຂ່າວ​ຄະ­ດີ​ປອມ​ແປງ​ເອ­ກະ­ສານ​ຂໍ້​ມູນ ກ່ຽວ​ກັບ​ການ​ທົດ​ລອງ ແລະ ຜະ­ລິດ​ວັກ​ແຊງ​ປ້ອງ​ກັນ ວໍ້​ຂອງ​ບໍ­ລິ­ສັດ ຈັງ​ຈຸນ​ຈັງ​ເຊິງ (Changchun Chang Sheng) ເຖິງ​ຂັ້ນ​ມີ​ການ​ຈັບ​ກຸມ​ຫົວ­ໜ້າ​ບໍ­ລິ­ສັດ​ດັ່ງ­ກ່າວ ພ້ອມ​ກັບ​ຜູ້​ມີ​ການ​ພົວ­ພັນ​ກັບ​ຄະ­ດີ​ອີກ 14 ຄົນ ສ່ວນ​ມູນ​ຄ່າ​ປັບ​ໃໝ​ບໍ­ລິ­ສັດ ເຈົ້າ​ບັນ­ຫາ​ນີ້​ນັ້ນ ຕົກ​ເປັນ​ສູງ​ເຖິງ 1,3 ຕື້​ໂດ​ລາ​ສະ­ຫະ­ລັດ ຂ່າວ​ບອກ​ວ່າ ເຈົ້າ​ໜ້າ­ທີ່​ຫຼາຍ​ສິບ​ຄົນ ຢູ່​ບັນ­ດາ​ແຂວງ ແລະ ນະ­ຄອນ​ທີ່​ມີ​ສ່ວນ​ພົວ­ພັນ​ກັບ​ຄະ­ດີ​ນີ້ ຕ່າງ​ກໍ່​ຖືກ​ຈັບ​ກຸມ ແລະ ປົດ​ອອກ​ຈາກ​ຕຳ­ແໜ່ງ​ເປັນ​ແຖວໆ ເພື່ອ​ປ້ອງ​ກັນ​ບໍ່​ໃຫ້​ບັນ­ຫາ​ແບບ​ນີ້​ຊ້ຳ​ຮອຍ​ຕື່ມ​ໃນ​ອະ­ນາ­ຄົດ ທາງ​ການ​ຈີນ​ໄດ້​ຂຸ້ນ­ຂ້ຽວ​ຮ່າງ​ກົດ­ໝາຍ​ຄວບ​ຄຸມ​ການ​ຜະ­ລິດ​ແຈກ​ຢາຍ ແລະ ນຳ​ໃຊ້​ວັກ​ແຊງ​ທີ່​ມີ​ການ​ກຳ­ນົດ​ໂທດ​ຕໍ່​ຜູ້​ລະ­ເມີດ​ຢ່າງ​ໜັກ ແລະ ເດັດ­ຂາດ ຄື: ບໍ­ລິ­ສັດ​ທີ່​ປອມ​ແປງ​ຜົນ​ການ​ກວດ­ກາ ຫຼື ບໍ່​ຮຽກ​ຄືນ​ຜະ­ລິດ​ຕະ​ພັນ​ວັກ​ແຊງ​ທີ່​ມີ​ບັນ­ຫາ​ນັ້ນ ອາດ​ຈະ​ຖືກ​ປັບ​ໃໝ​ເປັນ​ເງິນ​ສູງ​ເຖິງ 720.000 ໂດ​ລາ​ສະ­ຫະ­ລັດ ສ່ວນ​ຜູ້​ທີ່​ພົວ­ພັນ​ກັບ​ການ​ກະ­ທຳ​ຜິດ ຫຼື ສົມ­ຮູ້​ຮ່ວມ​ຄິດ​ປິດ​ບັງ​ຜູ້​ລະ­ເມີດ ກໍ່​ຄື ກີດ­ຂວາງ​ການ​ສືບ­ສວນ-ສອບ​ສວນ​ຂອງ​ເຈົ້າ​ໜ້າ­ທີ່ ກໍ່​ຈະ​ໄດ້​ຖືກ​ຕັດ­ສິນ​ໂທດ​ຢ່າງ​ບໍ່​ໄວ້­ໜ້າ​ເຊັ່ນ​ກັນ.

ຂ່າວທີ່ກ່ຽວຂ້ອງ