ຈຳນວນ​ຄຳ​ຮ້ອງ​ຂໍ​ລີ້​ໄພ​ໃນ ສ ອາ​ເມ​ຣິ​ກາ ຖືກ​ປະຕິເສດ​ສູງ​ເປັນ​ປະຫວັດ​ການ

81 07 ທ.ວ. 2018 ຂ່າວຕ່າງປະເທດ
ຈຳນວນ​ຄຳ​ຮ້ອງ​ຂໍ​ລີ້​ໄພ​ໃນ ສ ອາ​ເມ​ຣິ​ກາ ຖືກ​ປະຕິເສດ​ສູງ​ເປັນ​ປະຫວັດ​ການ

     ບົດ​ລາຍ​ງານ​ທີ່​ຈັດ​ທຳ​ໂດຍ​ມະຫາວິທະຍາໄລ ຊີ​ຣາ​ກຸ​​ສ (Syracuse) ໃນ​ລັດ​ນີວ​ຢອກ (ສ ອາ​ເມ​ຣິ​ກາ) ຊຶ່ງ​ນຳ​ອອກ​ມາ​ເຜີຍແຜ່​ຜ່ານ​ວິທະຍຸ​ກະຈາຍສຽງ CBS ໃຫ້​ຮູ້​ວ່າ ບັນດາ​ຜູ້​ພິພາກສາ ກ່ຽວ​ກັບ​ການ​ຍ້າຍ​ທີ່ຢູ່​ອາ​ໃສ ໄດ້​ປະຕິເສດ​ຕໍ່​ຄຳ​ຮ້ອງ​ຂໍ​ລີ້​ໄພ​ເຖິງ​ກວ່າ 65% ໃນ​ປີ 2018 ນັບ​ວ່າ​ເປັນ​ຕົວ​ເລກ​ສູງ​ເປັນ​ປະຫວັດ​ການ.

    ຕົວ​ເລກ​ທີ່​ກຸ່ມ​ນັກ​ຄົ້ນຄວ້າ​ໄດ້​ມາ ຈາກ​ກະຊວງ​ຄວາມ​ໝັ້ນຄົງ​ພາຍ​ໃນ (DHS) ຂອງ ສ ອາ​ເມ​ຣິ​ກາ ໃຫ້​ຮູ້​ວ່າ ເມື່ອ​ເຍືອງ​ໃສ່​ກົດໝາຍ​ວ່າ​ດ້ວຍ​ເສລີພາບ​ດ້ານ​ຂໍ້​ມູນ​ຂ່າວສານ​ແລ້ວ ໃນ​ສົກ​ການ​ເງິນ​ທີ່​ສິ້ນ​ສຸດ​ລົງ​ໃນ​ວັນ​ທີ 30 ກັນຍາ ປີ 2018 ລວມ​ແລ້ວ​ມີ​ກວ່າ 42.000 ກໍລະນີ​ຖືກ​ປະຕິເສດ ຕໍ່​ການ​ໃຫ້​ຂໍ້​ກຳນົດ​ລີ້​ໄພ ບັນ​ວ່າ​ສູງ​ກວ່າ 89% ເມື່ອ​ທຽບໃສ່​ປີ 2016. ໄລ່​ມາ​ຮອດ​ວັນ​ທີ 30 ກັນຍາ​ທີ່​ຜ່ານ​ມາ ຍັງ​ມີ​ຄົນ​ຍ້າຍ​ບ່ອນຢູ່​ອາ​ໃສ​ຄ້າງ​ຄາ​ຢູ່​ກວ່າ 1 ລ້ານ​ກໍລະນີ ໃນ​ນັ້ນ​ມີ​ລວມ​ເຖິງ​ບັນດາ​ກໍລະນີ​ທີ່​ໄດ້​ຍື່ນ​ຄຳ​ຮ້ອງ​ຂໍ​ລີ້​ໄພ.

    ທ່ານ ອາ​ຣອນ ເຣ​ຈລິນ ນັກ​ວິເຄາະ​ນະໂຍບາຍ ຢູ່​ໃນ​ສະພາ​ເຄື່ອນ​ຍ້າຍ​ປະຊາຊົນ ຂອງ ສ ອາ​ເມ​ຣິ​ກາ ໃຫ້​ສຳພາດ​ຜ່ານ​ທາງ​ໂທລະສັບ​ກັບ CBS News ວ່າ​ປະຊາຊົນ​ທີ່​ຍ້າຍ​ບ່ອນຢູ່​ອາ​ໃສ ຖືກ​ປະຕິເສດ ບໍ່​ເປັນ​ຍ້ອນ​ວ່າ​ຄຳ​ໃຫ້ການ​ຂອງ​ພວກ​ເຂົາ ບໍ່​ມີ​ພື້ນຖານ  ຫາກ​ເປັນ​ຍ້ອນ​ວ່າ​ລັດຖະບານ ບໍ່​ມີ​ເວລາ​ເພື່ອ​ເກັບ​ກຳ​ສິ່ງ​ພິສູດ.

    ການ​ລີ້​ໄພ​ເປັນ​ຂະ​ບວນ​ການ​ຍ້າຍ​ບ່ອນຢູ່​ອາ​ໃສ ທີ່​ຈັດ​ໃຫ້​ແກ່​ພົນລະເມືອງ​ທີ່​ພວມ​ຖືກ ບັງ​ບຽດ​ຢູ່​ໃນ​ບ້ານ​ເກີດ​ເມືອງ​ນອນ ຊຶ່ງ​ຕາມ​ນັ້ນແລ້ວ ຜູ້​ລີ້​ໄພ​ຈະ​ໄດ້​ດຳລົງ​ຊີວິດ​ຢູ່​ໃນ ສ ອາ​ເມ​ຣິ​ກາ ໄປ​ຈົນ​ກວ່າ​ສານ​ຢັ້ງຢືນ​ຄວາມ​ເປັນ​ຈິງ ຈາກ​ການ​ໃຫ້ການ​ຂອງ​ເຂົາເຈົ້າ.

 

ຂ່າວທີ່ກ່ຽວຂ້ອງ