ຕຳຫຼວດ 4 ປະເທດ​ໃນ​ເອີ​ຣົບ​ສົມທົບ​ກັນ​ຈັບ​ກຸມ​ມາ​ເຟຍ ໄດ້ 90 ຄົນ

84 07 ທ.ວ. 2018 ຂ່າວຕ່າງປະເທດ
ຕຳຫຼວດ 4 ປະເທດ​ໃນ​ເອີ​ຣົບ​ສົມທົບ​ກັນ​ຈັບ​ກຸມ​ມາ​ເຟຍ ໄດ້ 90 ຄົນ

     ໃນ​ລະຫວ່າງ​ການ​ປະສານ​ງານ​ບຸກ​ໂຈມ​ຕີ ຢູ່​ໃນ 4 ປະເທດ​ໃນ​ເອີ​ຣົບ ໄດ້ແກ່ ເຢຍ​ລະ​ມັນ ໂຮນ​ລັງ ອີ​ຕາ​ລີ ແລະ ແບນ​ຊິກ ນັ້ນ ຕຳຫຼວດ​ໄດ້​ຈັບ​ກຸມ​ເປົ້າ​ໝາຍ 90 ຄົນ ທີ່​ຖືກ​ຖື​ວ່າ​ເປັນ​ມາ​ເຟຍ ອີ​ຕາ​ລີ.

    Eurojust  ຊຶ່ງ​ເປັນ​ອົງການ​ຕ້ານ​ອາ​ຊະ​ຍາກ​ຂ້າມ​ຊາຍ​ແດນ​ຢ່າງ​ມີ​ການຈັດຕັ້ງ ຢູ່​ໃນ​ເອີ​ຣົບ ໃຫ້​ຮູ້​ວ່າ ໄດ້​ມີ​ການ​ປະສານ​ສົມທົບ ລະຫວ່າງ​ກອງ​ກຳລັງ​ຮັກສາ​ຄວາມ​ສະຫງົບ​ຢູ່​ໃນ 4 ປະເທດ​ດັ່ງກ່າວ ເພື່ອ​ດຳເນີນ​ການ​ປິດ​ລ້ອມ ແລະ​ຈັບ​ກຸມ​ເປົ້າ​ໝາຍ​ເຫຼົ່ານັ້ນ ໃນ​ຕອນ​ເຊົ້າ​ມືດ​ຂອງ​ວັນ​ທີ 5 ທັນວາ​ນີ້.

    ການ​ໂຈມ​ຕີ​ທີ່​ເກີດ​ຂຶ້ນ​ນັ້ນ ເປັນ​ສ່ວນ​ໜຶ່ງ​ຂອງ​ການ​ສືບສວນ​ສອບ​ສວນ ທີ່​ມີ​ລະຫັດ​ລັບ​ວ່າ Pollino ຊຶ່ງ​ໄດ້​ເລີ່ມ​ມາ​ແຕ່​ປີ 2006 ເພື່ອ​ຕ້ານ​ກັບ​ອົງການ​ອາ​ຊະ​ຍາ​ກຳ  Ndrangheta (ຊຶ່ງ​ຕົ້ນຕໍ​ແມ່ນ​ເຄື່ອນ​ໄຫວ​ຢູ່​ໃນ​ເຂດ​ພາກ​ໃຕ້​ອີ​ຕາ​ລີ) ໂດຍ​ຖືກ​ກ່າວ​ຫາ​ວ່າ​ຄ້າຂາຍ​ຢາ​ເສບ​ຕິດ ຟອກ​ເງິນ ໃຫ້​ສິນ​ບົນ ແລະ ກະທຳ​ຮຸນ​ແຮງ.

    ການ​ຈັບ​ກຸມ​ດັ່ງກ່າວ ໄດ້​ດຳເນີນ​ໄປ​ໃນ​ເວລາ​ພຽງ​ໜຶ່ງ​ວັນ ຫຼັງ​ຈາກ​ທີ່​ຕຳຫຼວດ​ອີ​ຕາ​ລີ ຈັບ​ກຸມ ເຊັດ​ຕີ​ມີ​ໂນ ມີ​ເນ​ໂອ (Settimino Mineo) ເຈົ້າ​ພໍ່​ມາ​ເຟຍ​ໃໝ່ ລວມ​ເຖິງ​ຜູ້​ຕ້ອງ​ສົງ​ໃສ​ອີກ​ຢ່າງ​ໜ້ອຍ 45 ຄົນ ໃນ​ລະຫວ່າງ​ການ​ກວາດ​ລ້າງ​ຂະໜາດ​ໃຫຍ່ ຢູ່​ໃນ​ເມືອງ ຊີ​ຊີ​ລີ.

 

ຂ່າວທີ່ກ່ຽວຂ້ອງ