ລັດຖະບານ ຈະສຳຫຼວດເສດຖະກິດທົ່ວປະເທດ ຄັ້ງທີ 3

252 07 ທ.ວ. 2018 ຂ່າວໜ້າ​ໜຶ່ງ
ລັດຖະບານ ຈະສຳຫຼວດເສດຖະກິດທົ່ວປະເທດ ຄັ້ງທີ 3

    ລັດ­ຖະ­ບານ ໄດ້​ແຕ່ງ­ຕັ້ງ​ຄະ­ນະ​ຊີ້​ນຳ​ລະ­ດັບ​ຊາດ ເພື່ອ​ຈັດ​ຕັ້ງ​ປະ­ຕິ­ບັດ​ວຽກ​ງານ​ການ​ສຳ​ຫຼວດ​ເສດ­ຖະ­ກິດ​ທົ່ວ​ປະ­ເທດ ຄັ້ງ​ທີ 3 ເຊິ່ງ​ຈະ​ເລີ່ມ​ຈັດ​ຕັ້ງ​ປະ­ຕິ­ບັດ​ນັບ​ແຕ່​ປີ 2018-2020 ເພື່ອ​ຈົດ​ນັບ ແລະ ຂຶ້ນ​ບັນ­ຊີ​ຫົວ­ໜ່ວຍ​ພື້ນ­ຖານ​ເສດ­ຖະ­ກິດ​ທີ່​ພວມ​ດຳ­ເນີນ​ທຸ­ລະ​ກິດ​ຢູ່​ລາວ ສ້າງ​ຖານ​ຂໍ້​ມູນ​ຂອງ​ບັນ­ດາ​ຫົວ­ໜ່ວຍ​ພື້ນ­ຖານ​ເສດ­ຖະ­ກິດ ເພື່ອ​ຮັບ​ໃຊ້​ແກ່​ການ​ສຳ​ຫຼວດ​ຕ່າງໆ ທີ່​ກ່ຽວ​ພັນ​ກັບ​ຫົວ­ໜ່ວຍ​ເສດ­ຖະ­ກິດ ພ້ອມ​ນັ້ນ ຍັງ​ເປັນ​ບ່ອນ​ອີງ​ແກ່​ການ​ຄາດ​ຄະ­ເນ​ລວມ​ຍອດ​ລາຍ​ຮັບ ແລະ ກຳ­ລັງ​ແຮງ​ງານ ໃນ​ແຕ່​ລະ​ຂະ­ແໜງ­ການ​ເສດ­ຖະ­ກິດ​ຕາມ​ລະ­ຫັດ​ສາ­ລະ­ບານ​ການ​ຈັດ​ແບ່ງ​ຂອງ​ສາ­ກົນ.

    ກອງ​ປະ­ຊຸມ​ຄັ້ງ​ປະ­ຖົມ​ມະ­ລຶກ ຄະ­ນະ​ຊີ້​ນຳ​ລະ­ດັບ​ຊາດ​ຂອງ​ການ​ສຳ​ຫຼວດ​ເສດ­ຖະ­ກິດ​ທົ່ວ​ປະ­ເທດ ຄັ້ງ​ທີ 3 ປີ 2018 ຈັດ​ຂຶ້ນ​ວັນ​ທີ 6 ທັນ­ວາ 2018 ທີ່​ກະ­ຊວງ​ການ​ເງິນ ໂດຍ​ເປັນ​ປະ­ທານ​ຂອງ​ທ່ານ ສົມ​ດີ ດວງ​ດີ ຮອງ​ນາ­ຍົກ­ລັດ­ຖະ­ມົນ­ຕີ ລັດ­ຖະ­ມົນ­ຕີ​ກະ­ຊວງ​ການ​ເງິນ ຫົວ­ໜ້າ​ຄະ­ນະ​ຊີ້​ນຳ​ການ​ສຳ​ຫຼວດ​ເສດ­ຖະ­ກິດ​ທົ່ວ​ປະ­ເທດ ມີ​ບັນ­ດາ​ຄະ­ນະ​ຊີ້​ນຳ​ຈາກ​ກະ­ຊວງ ແລະ ອົງ​ການ­ຈັດ­ຕັ້ງ​ທີ່​ກ່ຽວ­ຂ້ອງ​ທັງ​ສູນ​ກາງ ແລະ ທ້ອງ­ຖິ່ນ​ເຂົ້າ​ຮ່ວມ.

    ທ່ານ ສົມ​ດີ ດວງ​ດີ ກ່າວ​ວ່າ: ການ​ສຳ​ຫຼວດ​ເສດ­ຖະ­ກິດ​ທົ່ວ​ປະ­ເທດ​ມີ​ຄວາມ​ສຳ­ຄັນ ແລະ ຈຳ­ເປັນ​ທີ່​ສຸດ ໂດຍ​ການ​ສຳ​ຫຼວດ​ໄດ້​ກຳ­ນົດ​ໄວ້​ໃນ​ກົດ­ໝາຍ​ວ່າ​ດ້ວຍ​ສະ­ຖິ­ຕິ ແລະ ຍຸດ​ທະ​ສາດ​ພັດ­ທະ­ນາ​ລະ­ບົບ​ສະ­ຖິ­ຕິ​ແຫ່ງ​ຊາດ 2016-2025 ແລະ ວິ­ໄສ​ທັດ 2030 ຜົນ​ການ​ສຳ​ຫຼວດ​ຄັ້ງ​ນີ້ ຈະ​ໄດ້​ນຳ​ໃຊ້​ເພື່ອ​ຕິດ­ຕາມ​ປະ​ເມີນ​ຜົນ​ແຜນ​ພັດ­ທະ­ນາ​ເສດ­ຖະ­ກິດ-ສັງ­ຄົມ​ຂອງ​ປະ­ເທດ ແລະ ກະ­ກຽມ​ສ້າງ​ແຜນ 5 ປີ ຄັ້ງ​ທີ 9 ໂດຍ​ການ​ສຳ​ຫຼວດ​ຄັ້ງ​ທີ 3 ຖື​ເປັນ​ການ​ສຳ​ຫຼວດ​ທີ່​ໃຫຍ່ ແລະ ສຳ­ຄັນ ເຮັດ​ໃຫ້​ລັດ­ຖະ­ບານ ກໍ່​ຄື​ຄະ­ນະ​ຮັບ­ຜິດ­ຊອບ​ໄດ້​ເພີ່ມ​ທະ­ວີ​ຄວາມ​ຮັບ­ຜິດ­ຊອບ​ສູງ ເປັນ­ຕົ້ນ ການ​ຈັດ​ແບ່ງ​ໜ້າ­ທີ່​ຄວາມ​ຮັບ­ຜິດ­ຊອບ ກົນ​ໄກ ແລະ ແບບ­ແຜນ​ວິ­ທີ​ເຮັດ​ວຽກ​ການ​ສຳ​ຫຼວດ​ພາກ​ສະ­ໜາມ ລວມ​ທັງ​ການ​ຄົ້ນ­ຄວ້າ​ກ່ຽວ​ກັບ​ການ​ນຳ​ໃຊ້​ງົບ­ປະ­ມານ​ໃຫ້​ມີ​ປະ​ສິດ­ທິ​ຜົນ.

ຂ່າວທີ່ກ່ຽວຂ້ອງ