ອາເມຣິກາ ສົ່ງເສີມໂຄງການປ້ອງກັນພະຍາດໃນລາວ

162 07 ທ.ວ. 2018 ຂ່າວໜ້າ​ໜຶ່ງ
ອາເມຣິກາ ສົ່ງເສີມໂຄງການປ້ອງກັນພະຍາດໃນລາວ

    ວັນ​ທີ 6 ທັນ­ວາ 2018 ທ່ານ ໂຣ​ເບີດ ອາ​ເຣດ​ເຟວ ອຳ­ນວຍ​ການ​ສູນ​ຄວບ​ຄຸມ ແລະ ປ້ອງ​ກັນ​ພະ­ຍາດ​ຂອງ​ສະ­ຫະ­ລັດ​ອາ​ເມ​ຣິ​ກາ (CDC) ໄດ້​ເຂົ້າ​ພົບ​ປະ​ກັບ​ທ່ານ ບຸນ​ກອງ ສີ​ຫາ​ວົງ ລັດ­ຖະ­ມົນ­ຕີ​ກະ­ຊວງ​ສາ­ທາ­ລະ­ນະ​ສຸກ ແລະ ເຈົ້າ​ໜ້າ­ທີ່​ອາ­ວຸ­ໂສ​ຄົນ​ອື່ນໆ ເພື່ອ​ປຶກ­ສາ​ຫາ­ລື​ກ່ຽວ​ກັບ​ການ​ຮ່ວມ​ມຶ​ດ້ານ​ສາ­ທາ­ລະ­ນະ​ສຸກ ລະ­ຫວ່າງ​ສະ­ຫະ­ລັດ​ອາ​ເມ​ຣິ​ກາ ແລະ ລາວ ທີ່​ພວມ​ສືບ­ຕໍ່​ຂະ­ຫຍາຍ­ຕົວ.

    ສູນ CDC ສະ­ຫະ­ລັດ​ອາ​ເມ​ຣິ​ກາ ກຳ­ລັງ​ຮ່ວມ​ເຮັດ​ວຽກ​ກັບ​ບັນ­ດາ​ເຈົ້າ​ໜ້າ­ທີ່​ສາ­ທາ­ລະ­ນະ​ສຸກ​ຂອງ​ລາວ ໃນ​ບັນ­ດາ​ໂຄງ­ການ​ຮ່ວມ​ມື​ຕ້ານ ແລະ ສະ­ກັດ​ກັ້ນ​ໄພ​ຂົ່ມ­ຂູ່​ພະ­ຍາດ​ທີ່​ກຳ­ລັງ​ເກີດ​ຂຶ້ນ ແລະ ເກີດ​ຂຶ້ນ​ໃໝ່ ເຊິ່ງ​ລວມ​ທັງ​ພະ­ຍາດ​ໄຂ້​ຫວັດ​ສັດ​ປີກ ແລະ ໄຂ້­ຫວັດ­ໃຫຍ່​ສາຍ​ພັນ​ໃໝ່ ການ​ຕ້ານ​ຕໍ່​ຢາ​ຂອງ​ໄຂ້​ມາ​ເລ​ເຣຍ ໄຂ້­ເລືອດ­ອອກ ແລະ HIV/AIDS ເຊິ່ງ​ລາວ ແລະ ອາ​ເມ​ຣິ​ກາ ໄດ້​ຮ່ວມ​ມື​ກັນ​ຢ່າງ​ສະ​ໝ່ຳ​ສະ­ເໝີ ໃນ​ການ​ຈັດ­ການ​ເຝິກ­ອົບ­ຮົມ​ຕ່າງໆ​ດ້ານ​ສາ­ທາ­ລະ­ນະ​ສຸກ ແລະ ເຮັດ​ວຽກ​ດ້ານ​ການ​ປ້ອງ​ກັນ​ພະ­ຍາດ ເຝົ້າ​ລະ­ວັງ ແລະ ຕອບ​ໂຕ້​ຕໍ່​ພະ­ຍາດ​ຄວາມ​ພະ­ຍາ­ຍາມ​ຕ່າງໆ ເພື່ອ​ປົກ​ປ້ອງ​ປະ­ຊາ­ຊົນ​ລາວ ແລະ ອາ​ເມ​ຣິ​ກາ ນອກ​ນັ້ນ ອາ​ເມ​ຣິ​ກາ​ຍັງ​ຮ່ວມ​ມື​ກັບ​ລັດ­ຖະ­ບານ ແລະ ປະ­ຊາ­ຊົນ​ລາວ ໃນ​ຫຼາຍ​ໂຄງ­ການ​ດ້ານ​ສາ­ທາ­ລະ­ນະ​ສຸກ ເພື່ອ​ສົ່ງ­ເສີມ​ດ້ານ​ໂພ­ຊະ​ນາ​ການ ນ້ຳ​ສະ­ອາດ ວິດ­ຖ່າຍ ແລະ ສຸ​ຂະ​ອະ­ນາ­ໄມ ສຸ­ຂະ­ພາບ​ແມ່ ແລະ ເດັກ ສະ­ໜັບ­ສະ­ໜູນ​ຄົນ​ພິ­ການ ແລະ ໂຄງ­ການ​ອາ­ຫານ​ສຳ­ລັບ​ໂຮງ­ຮຽນ ເຊິ່ງ​ແມ່ນ​ໂຄງ­ການ​ທີ່​ນຳ​ຜົນ​ປະ­ໂຫຍດ​ມາ­ສູ່​ບັນ­ດາ​ຄອບ­ຄົວ​ທົ່ວ​ໄປ​ຢູ່​ລາວ.

    ທັງ​ສອງ​ຝ່າຍ​ສົນ­ທະ­ນາ​ກ່ຽວ​ກັບ​ກອງ​ປະ­ຊຸມ​ລະ­ດັບ​ລັດ­ຖະ­ມົນ­ຕີ ຂອງ​ວຽກ​ງານ​ຄວາມ​ໝັ້ນ­ຄົງ​ດ້ານ​ສຸ­ຂະ­ພາບ​ໂລກ ຄັ້ງ​ທີ 5 ເຊິ່ງ​ແມ່ນ​ໂຄງ­ການ​ລິ​ເລີ່ມ ໂດຍ​ທ່ານ ອີ​ຣິກ ຮາ​ແກນ ຮອງ​ລັດ­ຖະ­ມົນ­ຕີ​ກະ­ຊວງ​ສາ­ທາ­ລະ­ນະ​ສຸກ​ອາ​ເມ​ຣິ​ກາ ທີ່​ມາ​ຢ້ຽມ­ຢາມ​ລາວ ໃນ​ວັນ​ທີ 9 ພະ­ຈິກ 2018 GHSA ແມ່ນ​ຄວາມ​ພະ­ຍາ­ຍາມ​ລະ­ດັບ​ສາ­ກົນ ໃນ​ການ​ສ້າງ​ຄວາມ​ອາດ​ສາ­ມາດ​ໃຫ້​ບັນ­ດາ​ປະ­ເທດ ເພື່ອ​ຊ່ວຍ​ໃຫ້​ໂລກ​ມີ​ຄວາມ​ປອດ​ໄພ ແລະ ປາ­ສະ­ຈາກ​ໄພ​ຂົ່ມ­ຂູ່​ຈາກ​ພະ­ຍາດ​ຊຶມ​ເຊື້ອ ແລະ ຍົກ​ລະ­ດັບ​ຄວາມ​ໝັ້ນ­ຄົງ​ດ້ານ​ສຸ­ຂະ­ພາບ​ໂລກ ໃຫ້​ກາຍ­ເປັນ​ບຸ­ລິ­ມະ­ສິດ​ແຫ່ງ​ຊາດ ແລະ ສາ­ກົນ ຜ່ານ​ມາ​ມໍ່ໆ​ນີ້ ອາ​ເມ​ຣິ​ກາ​ຕົກ­ລົງ​ໃຫ້­ການ​ສະ­ໜັບ­ສະ­ໜູນ 150 ລ້ານ​ໂດ​ລາ​ສະ­ຫະ­ລັດ​ແກ່ GHSA.

    ໃນ​ການ​ຢ້ຽມ­ຢາມ​ລະ­ດັບ​ສູງ​ຄັ້ງ​ນີ້ ແລະ ການ​ສະ­ໜັບ­ສະ­ໜູນ​ຂອງ​ອາ​ເມ​ຣິ​ກາ ຕໍ່​ກັບ​ຂະ­ແໜງ​ສາ­ທາ­ລະ­ນະ​ສຸກ​ຂອງ​ລາວ ແມ່ນ​ດ້ານ​ສຳ­ຄັນ​ຂອງ​ຍຸດ​ທະ​ສາດ​ອິນ​ໂດ-ປາ​ຊິ​ຟິກ​ຂອງ​ອາ​ເມ​ຣິ​ກາ ໄດ້​ປະ­ກອບ­ສ່ວນ​ດ້ານ​ຄວາມ​ຊຳ­ນິ​ຊຳ­ນານ ແລະ ການ​ຊ່ວຍ­ເຫຼືອ ເພື່ອ​ສ້າງ​ຄວາມ​ເຂັ້ມ­ແຂງ​ໃຫ້​ຂະ­ແໜງ​ສາ­ທາ­ລະ­ນະ​ສຸກ ຂອງ​ບັນ­ດາ​ຄູ່​ຮ່ວມ​ງານ​ໃນ​ທົ່ວ​ພາກ​ພື້ນ.

ຂ່າວທີ່ກ່ຽວຂ້ອງ