ຮ່ວມມືພັດທະນາເຂດເສດຖະກິດສະເພາະ ບໍ່ເຕັນແດນງາມ

136 07 ທ.ວ. 2018 ຂ່າວໜ້າ​ໜຶ່ງ
ຮ່ວມມືພັດທະນາເຂດເສດຖະກິດສະເພາະ ບໍ່ເຕັນແດນງາມ

    ພິ­ທີ​ເຊັນ​ສັນ­ຍາ​ຮ່ວມ​ມື​ໃຫ້​ບໍ­ລິ­ການ​ດ້ານ​ໂທລະ​ຄົມ­ມະ­ນາ­ຄົມ ໃນ​ເຂດ​ເສດ­ຖະ­ກິດ​ສະ­ເພາະ​ບໍ່​ເຕັນ​ແດນ​ງາມ (ຄຂພສ) ແຂວງ​ຫຼວງ​ນ້ຳ​ທາ ລະ­ຫວ່າງ ບໍ­ລິ­ສັດ ລັດ​ວິ​ສາ​ຫະ​ກິດ​ລາວ​ໂທລະ​ຄົມ­ມະ­ນາ­ຄົມ (ລລທ) ແລະ ກຸ່ມ​ບໍ­ລິ­ສັດ ພັດ­ທະ­ນາ​ເຂດ​ເສດ­ຖະ­ກິດ​ສະ­ເພາະ​ບໍ່​ເຕັນ​ລາວ ຈຳ­ກັດ (ຂສບ) ຈັດ​ຂຶ້ນ​ວັນ​ທີ 6 ທັນ­ວາ 2018 ທີ່​ສຳ­ນັກ­ງານ​ໃຫຍ່ ລລທ ມີ​ທ່ານ ທອງ​ໃສ ຊານ​ໄຊ​ຍະ ຮອງ​ລັດ­ຖະ­ມົນ­ຕີ​ກະ­ຊວງ​ໄປ­ສະ­ນີ ໂທລະ​ຄົມ­ມະ­ນາ­ຄົມ ແລະ ການ​ສື່­ສານ (ປທສ) ທ່ານ ພົນ​ຕີ ກົງ​ທອງ ພົງ​ວິ­ຈິດ ຮອງ​ລັດ­ຖະ­ມົນ­ຕີ​ກະ­ຊວງ​ປ້ອງ​ກັນ​ຄວາມ​ສະ­ຫງົບ ບັນ­ດາ​ຫົວ­ໜ້າ​ກົມ ຫ້ອງ­ການ ພະ​ແນກ ປທສ ແຂວງ ພ້ອມ​ແຂກ​ຖືກ​ເຊີນ​ເຂົ້າ​ຮ່ວມ.

    ການ​ລົງ​ນາມ​ຄັ້ງ​ນີ້​ລະ­ຫວ່າງ​ທ່ານ ຈິດ​ປະ­ສົງ ໜູ​ແກ້ວ​ໄກ­ສອນ ຮອງ​ຜູ້­ອຳ­ນວຍ­ການ​ໃຫຍ່​ບໍ­ລິ­ສັດ ລລທ ແລະ ທ່ານ​ນາງ ຢາງ​ຢ້າ​ຫົງ ຮອງ​ຜູ້­ອຳ­ນວຍ­ການ ຜູ້​ປະ­ຈຳ­ການ​ກຸ່ມ​ບໍ­ລິ­ສັດ ຂສບ ເຊິ່ງ​ການ​ຮ່ວມ​ມື​ສອງ​ຝ່າຍ​ຄັ້ງ​ນີ້​ກຸ່ມ​ບໍ­ລິ­ສັດ ຂສບ ໄດ້​ຄັດ​ເລືອກ​ໃຫ້​ບໍ­ລິ­ສັດ ລລທ ເປັນ​ຜູ້​ດຳ­ເນີນ​ການ​ພັດ­ທະ­ນາ ແລະ ສະ­ໜອງ​ການ​ບໍ­ລິ­ການ​ດ້ານ​ການ​ສື່­ສານ​ໂທລະ​ຄົມ­ມະ­ນາ­ຄົມ​ແບບ​ຄົບ​ວົງ​ຈອນ ໃນ​ເຂດ​ເສດ­ຖະ­ກິດ​ສະ­ເພາະ​ບໍ່​ເຕັນ​ແດນ​ງາມ ພາຍ​ໃນ​ກຳ­ນົດ 5 ປີ ເພື່ອ​ອຳ­ນວຍ​ຄວາມ​ສະ­ດວກ​ທາງ​ດ້ານ​ພື້ນ­ຖານ​ໂຄງ​ລ່າງ​ການ​ສື່­ສານ​ໂທລະ​ຄົມ­ມະ­ນາ­ຄົມ​ທີ່​ສະ­ດວກ​ສະ­ບາຍ ທັນ​ສະ­ໄໝ ແລະ ໄດ້​ມາດ­ຕະ­ຖານ​ໃຫ້​ແກ່​ການ­ຈັດ­ຕັ້ງ​ປະ­ຕິ­ບັດ ແຜນ​ງານ​ການ​ພັດ­ທະ­ນາ​ຂອງ​ກຸ່ມ​ບໍ­ລິ­ສັດ ຂສບ ໃຫ້​ບັນ­ລຸ​ຕາມ​ຈຸດ­ປະ­ສົງ​ທີ່​ວາງ​ໄວ້ ໃນ​ການ​ຮ່ວມ​ມື​ພັດ­ທະ­ນາ ໝຶ່ງ​ແລວ​ທາງ ໝຶ່ງ​ເສດ­ຖະ­ກິດ ລະ­ຫວ່າງ​ສອງ​ພັກ-ລັດ​ລາວ ແລະ ຈີນ ໄດ້​ລົງ​ນາມ​ກັນ​ໄວ້.

ຂ່າວທີ່ກ່ຽວຂ້ອງ