ປະທານປະເທດ ຕ້ອນຮັບການເຂົ້າຢ້ຽມຄຳນັບນາຍົກກຳປູເຈຍ

148 06 ທ.ວ. 2018 ຂ່າວໜ້າ​ໜຶ່ງ
ປະທານປະເທດ ຕ້ອນຮັບການເຂົ້າຢ້ຽມຄຳນັບນາຍົກກຳປູເຈຍ

    ວັນ​ທີ 5 ທັນ­ວາ 2018 ທີ່​ສຳ­ນັກ­ງານ​ປະ­ທານ​ປະ­ເທດ ທ່ານ ບຸນ​ຍັງ ວໍ­ລະ​ຈິດ ປະ­ທານ​ປະ­ເທດ ໄດ້​ໃຫ້​ກຽດ​ຕ້ອນ­ຮັບ​ການ​ເຂົ້າ​ຢ້ຽມ​ຄຳ­ນັບ​ຂອງ​ສົມ­ເດັດ ອັກ​ຄະ­ມະ​ຫາ ເສ­ນາ​ບໍ­ດີ ເຕ​ໂຈ ຮຸນ​ແຊນ ນາ­ຍົກ­ລັດ­ຖະ­ມົນ­ຕີ ແຫ່ງ​ຣາ​ຊະ​ອາ­ນາ­ຈັກ​ກຳ­ປູ­ເຈຍ ພ້ອມ​ດ້ວຍ​ຄະ­ນະ ໂອ­ກາດ​ເດີນ­ທາງ​ມາ​ຢ້ຽມ­ຢາມ​ລາວ​ຢ່າງ​ເປັນ​ທາງ​ການ ໃນ​ວັນ​ທີ 5-6 ທັນ­ວາ ນີ້.

    ໂອ­ກາດ​ນີ້ ທ່ານ ບຸນ​ຍັງ ວໍ­ລະ​ຈິດ ໄດ້​ສະ­ແດງ​ຄວາມ​ຍິນ​ດີ​ຕ້ອນ­ຮັບ ແລະ ຕີ​ລາ­ຄາ​ສູງ​ຕໍ່​ນາ­ຍົກ​ກຳ­ປູ­ເຈຍ ທີ່​ໄດ້​ນຳ­ພາ​ຄະ­ນະ​ເດີນ­ທາງ​ມາ​ຢ້ຽມ­ຢາມ​ລາວ​ຄັ້ງ​ນີ້ ເຊິ່ງ​ເປັນ​ການ​ປະ­ກອບ­ສ່ວນ​ອັນ​ສຳ­ຄັນ ເຂົ້າ​ໃນ​ການ​ເສີມ​ຂະ­ຫຍາຍ​ສາຍ​ພົວ­ພັນ​ມິດ­ຕະ­ພາບ ແລະ ການ​ຮ່ວມ​ມື​ໃນ​ທຸກ​ຂົງ­ເຂດ​ວຽກ​ງານ ລະ­ຫວ່າງ​ສອງ​ລັດ­ຖະ­ບານ ລາວ-ກຳ­ປູ­ເຈຍ ທີ່​ມີ​ມາ​ແຕ່​ດົນ​ນານ​ແລ້ວ​ນັ້ນ ໃຫ້​ໄດ້​ຮັບ​ການ​ພັດ­ທະ­ນາ ແລະ ສືບ­ຕໍ່​ໃຫ້­ການ​ສະ­ໜັບ­ສະ­ໜູນ​ຊ່ວຍ­ເຫຼືອ​ເຊິ່ງ​ກັນ ແລະ ກັນ ໃນ​ອະ­ນາ­ຄົດ ແລະ ຍາວ​ນານ.

    ຕອນ​ທ້າຍ ສົມ­ເດັດ ອັກ​ຄະ­ມະ​ຫາ ເສ­ນາ​ບໍ­ດີ ເຕ​ໂຈ ຮຸນ​ແຊນ ໄດ້​ສະ­ແດງ​ຄວາມ​ຂອບ­ໃຈ​ຕໍ່​ທ່ານ ບຸນ​ຍັງ ວໍ­ລະ​ຈິດ ທີ່​ໄດ້​ໃຫ້​ກຽດ​ຕ້ອນ­ຮັບ​ຢ່າງ​ອົບ​ອຸ່ນ ພ້ອມ​ທັງ​ແຈ້ງ​ຜົນ­ສຳ­ເລັດ​ຂອງ​ການ​ພົບ​ປະ​ສອງ​ຝ່າຍ​ກັບ​ທ່ານ ທອງ​ລຸນ ສີ​ສຸ​ລິດ ນາ­ຍົກ­ລັດ­ຖະ­ມົນ­ຕີ​ໃຫ້​ຮັບ​ຊາບ​ຕື່ມ​ອີກ.

ຂ່າວທີ່ກ່ຽວຂ້ອງ